ཀ་རྩོམ་བྱིས་པའི་འོ་ཆུ།

ཀ་ཁའི་བྲོ་བ་ཀ་ར་ལས་ཀྱང་ཞིམ།།
ཁ་ཁོག་མེད་པར་ཞིམ་པའི་ཚེ་རིལ་འདྲ།།
ག་ལེར་ཇི་ལྟར་འཐུང་ན་དེ་ལྟར་ཞིམ།།
ང་ཡི་གཅེས་ཕྲུག་མི་འཐུང་མི་ཟེར་རོགས།།

ཅ་དག་སློབ་ཁང་བྱིས་པའི་བློ་དང་འཚམ།།
ཆ་རྐྱེན་གང་ལེགས་བྱིས་པའི་ཡུལ་ལ་མཛའ།།
ཇ་ཐུན་རེ་ཡི་ཟས་སྤྱོད་ཁྲིགས་སེ་ཡིན།།
ཉ་ཉོག་མ་བཤད་རང་གི་ཁྱིམ་ལྟར་སོང་།།

ཏ་ལེན་ཐེད་པའི་རྟ་ཞོན་ཡིན་ཡང་ཆོག།
ཐ་དད་རིགས་རུས་མི་འབྱེད་གྲལ་རིམ་མེད།།
ད་ལྟ་ལོ་རིམ་གཅིག་དང་སློབ་སྟེགས་གཅིག།
ན་གེ་ནོག་གེ་མ་བཤད་གོ་སྐབས་ཟུངས།།

པ་སངས་ལྟར་དཀར་ལྷག་བསམ་དཀར་པོ་ཅན།།
ཕ་མས་ཡོད་ཚད་བཅོལ་སའི་དགེ་རྒན་ལགས།།
བ་སོ་ལྟར་དཀར་ཁ་སེམས་སྤྱོད་པ་དཀར།།
མ་ལོའི་ཚབ་ཏུ་བཟུང་ནས་མདུན་ལ་སོང་།།

ཙ་གེ་ཙིག་གེ་ཟེར་བཞིན་ཀུ་ཡངས་ངང་།།
ཚ་ཚ་འུར་འུར་གླིང་དུ་འཁྲིད་པ་མང་།།
ཛ་ཏི་རླུང་ལ་ཕན་བཞིན་རྒན་གྱི་གསུང་།།
ཝ་ལེར་སེམས་ལ་འཛིན་བཞིན་སློབ་སྦྱོང་བྱོས།།

ཞ་བོ་ཞ་ར་མིན་པའི་ལུས་བཟང་ལ།།
ཟ་མ་གང་འཚམ་སྦྱིན་པའི་ལས་ཅན་ཁྱོད།།
འ་ཅག་སྐད་ཡིག་གཙོ་བའི་སློབ་གྲྭ་འདིར།།
ཡ་ཆུང་གངས་དཀར་སེམས་ནས་དགའ་ན་འགྲིག།

ར་སྐོར་གཅིག་ལ་འཛོམས་པའི་སློབ་གྲོགས་ཚོ།།
ལ་ལུང་གང་ནས་ཡོང་བ་མི་གཙོ་ལ།།
ཤ་སྟག་མཁས་པའི་རིགས་འཕྲུལ་ལྡེ་མིག་དེ།།
ས་ལ་བཞག་པ་ལྟ་བུར་སུ་ལ་དབང་།།

ཧ་ཧ་ཨེ་བདེན་རང་གིས་བསམ་བློ་ཐོངས།།
ཨ་ཕ་ཨ་མས་ཡུལ་དུ་བསྒུག་ནས་འདུག།