ཀྲུང་དབྱང་གི་ཕྱོགས་ཡོངས་ནས་ཁྲིམས་བཞིན་རྒྱལ་ཁབ་བཅོས་སྐྱོང་གི་ལས་དོན་ཚོགས་འདུའི་ཐོག་གནང་བའི་གསུང་བཤད།

       ལོ་རྒྱུས་ནི་བསླབ་གཞི་ཡག་ཤོས་ཤིག་ཡིན་ལ། བསམ་པའི་རྒྱགས་ཕྱེ་ཡག་ཤོས་ཀྱང་ཡིན། རང་རེའི་ཏང་གིས་སྣེ་ཁྲིད་དེ་སྤྱི་ཚོགས་རིང་ལུགས་ཀྱི་ཁྲིམས་སྐྱོང་འཛུགས་སྐྱོང་བྱས་པར་གྲུབ་འབྲས་ལྡན་པའི་ཉམས་མྱོང་ཐོབ་ཡོད་ལ། ནོར་འཁྲུལ་གྱི་བསླབ་བྱའང་ཐོབ་མྱོང་ཡོད། ལྷག་པར་དུ་ལོ་བཅུའི་ནང་འཁྲུག་རིང་། ཁྲིམས་ལུགས་ལ་གཏོར་སྐྱོན་ཚབས་ཆེན་ཕོག་པས་ཏང་དང་མི་དམངས་ཀྱིས་བློས་གཏོང་མང་པོ་བྱེད་དགོས་བྱུང་ཡོད། “རིག་གནས་གསར་བརྗེ་ཆེན་པོ”མཇུག་འགྲིལ་རྗེས། བློ་མཐུན་ཏེང་ཞའོ་ཕིང་གིས་གནད་དོན་དེ་ཏང་དང་རྒྱལ་ཁབ་ཀྱི་མདུན་ལམ་དང་ལས་དབང་དང་འབྲེལ་བ་ཡོད་པའི་མཐོ་ཚད་དུ་བཞག་གནང་ནས“ངེས་པར་དུ་ཁྲིམས་ལུགས་ལ་ཤུགས་སྣོན་རྒྱག་དགོས་ལ། ངེས་པར་དུ་དམངས་གཙོ་ལམ་ལུགས་ཅན་དང་བཅའ་ཁྲིམས་ཅན་ལ་འགྱུར་བ་བྱེད་དགོས་པའི”ནན་བཤད་གནང་ཡོད། དྲང་ཕྱོགས་དང་ལྡོག་ཕྱོགས་ཀྱི་ཉམས་མྱོང་ལས་རྒྱལ་སྤྱི་རྒྱལ་ནང་གི་ཁོར་ཡུག་ཇི་ཙམ་རྙོག་འཛིང་ཆེ་ན། སྒྱུར་བཅོས་སྒོ་དབྱེ་དང་སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་བྱེད་པའི་ལས་འགན་དེ་ཙམ་གྱིས་ལྕི་བ་ཡོད་པ་དང་། ཁྲིམས་སྐྱོང་གི་བསམ་གཞིག་དང་ཁྲིམས་སྐྱོང་གི་བྱེད་ཐབས་སྤྱད་དེ་སྲིད་སྐྱོང་གི་གནས་བབ་སྲ་བརྟན་དང་། སྲིད་སྐྱོང་གི་བྱེད་སྟངས་ལེགས་གཏོང་། སྲིད་སྐྱོང་གི་འཇོན་ཐང་ཆེར་གཏོང་བཅས་བྱས་ཏེ་ཏང་དང་རྒྱལ་ཁབ་ཡུན་རིང་བདེ་འཁོད་ཡོང་བའི་འགན་ལེན་དེ་བས་བྱེད་དགོས་པ་ང་ཚོར་ར་སྤྲོད་བྱས་ཡོད།