༢༠༢༡ལོའི་དཔྱིད་ཀའི་སློབ་དུས་ཀྱི་ཀྲུང་དབྱང་ཏང་གི་སློབ་གྲྭའི(རྒྱལ་ཁབ་སྲིད་འཛིན་སློབ་གླིང)དར་གཞོན་ལས་བྱེད་པ་གསོ་སྦྱོང་འཛིན་གྲྭ་སློབ་མགོ་ཚུགས་པའི་མཛད་སྒོའི་ཐོག་གནང་བའི་གསུང་བཤད།

       རིགས་པའི་གཞུང་ལུགས་དང་དོན་དངོས་ཟུང་འབྲེལ་བྱེད་པའི་སྔོན་འགྲོའི་ཆ་རྐྱེན་ནི་རིགས་པའི་གཞུང་ལུགས་སློབ་སྦྱོང་ཡག་པོ་བྱེད་ཅིང་གོ་བ་ཟབ་མོ་ལོན་པ་དང་། བསམ་བློའི་བདེན་པ་ཁོང་དུ་ཆུད་པར་བྱ་རྒྱུ་དེ་ཡིན། ན་གཞོན་ལས་བྱེད་པས་མར་ཁེ་སིའི་རིང་ལུགས་ཀྱི་གཞི་རྩའི་རིགས་པ་དང་ལྷག་པར་དུ་དུས་རབས་གསར་པར་ཏང་གི་གསར་གཏོད་རིགས་པའི་གཞུང་ལུགས་ཀྱི་གྲུབ་འབྲས་སྡུག་རུས་ཆེན་པོས་སློབ་དགོས་པ་དང་། དེའི་ནང་འདུས་པའི་ལངས་ཕྱོགས་ལྟ་བ་ཐབས་ཤེས་གསུམ་དང་། གནས་ལུགས་དང་། རིག་གཞུང་། བདེན་ལུགས་བཅས་ཁོང་དུ་ཆུད་གང་ཐུབ་བྱས་ཏེ། སྐད་ཆ་འདི་ཤེས་ཤིང་འདིའི་དོན་ཡང་རྟོགས་པ་དང་། དེ་འདྲ་ཡིན་པ་ཤེས་ལ་དེ་འདྲ་ཡིན་ལུགས་དེ་བས་ཀྱང་ཤེས་དགོས། ཏང་གི་རིགས་པའི་གཞུང་ལུགས་གསར་གཏོད་ཀྱི་གྲུབ་འབྲས་ལ་སློབ་སྦྱོང་གཏིང་ཟབ་བྱས་ཏེ། སྔ་ཕྱིའི་འབྲེལ་མཐུད་ཀྱིས་སློབ་སྦྱོང་དང་། དུས་ཐོག་རྗེས་སྙེག་གིས་སློབ་སྦྱོང་བྱེད་པ་དང་། ཏང་གི་ཚན་རིག་དང་མཐུན་པའི་རིགས་པའི་གཞུང་ལུགས་སྤྱད་དེ་བསམ་བློ་གཏོང་སྟངས་ལེགས་འགྱུར་བྱས་ནས། བསམ་བློའི་དཀའ་ངལ་སེལ་བ་དང་རང་ངོས་ཀྱི་བསམ་བློའི་སྤྱོད་ཚུལ་དང་བསམ་པའི་འཁྱེར་ཕྱོགས་ལ་ཞིབ་ལྟ་བྱེད་པ། ཡང་དག་པའི་འཇིག་རྟེན་གྱི་ལྟ་བ་དང་། མི་ཚེའི་ལྟ་བ། རིན་ཐང་གི་ལྟ་བ། དབང་ཆའི་ལྟ་བ། སྲིད་སྐྱོང་བྱས་རྗེས་ཀྱི་ལྟ་བ། བྱ་གཞག་གི་ལྟ་བ་བཅས་བརྟན་པོར་བཙུགས་ཏེ། རང་ཉིད་ཀྱི་བསམ་གཞིགས་བྱེད་སྟངས་དང་སེམས་ཁམས་འཇིག་རྟེན་དེ་ལས་དོན་འཕེལ་རྒྱས་ཀྱི་དགོས་མཁོ་དང་སྔར་ལས་མཐུན་པར་བྱེད་དགོས།