ཀན་སུའུ་ཞིང་ཆེན་ཐང་ག་སྒྱུ་རྩལ་མཐུན་ཚོགས་གསར་ཚུགས་དང་སྐབས་དང་པོའི་ཚོགས་མིའི་ཚོགས་འདུ་ལན་ཇུ་ནས་འཚོགས།

       ཀྲུང་ཧྭ་མི་རིགས་ཀྱི་ཕུལ་དུ་བྱུང་བའི་སྲོལ་རྒྱུན་རིག་གནས་སྔར་ལས་ལྷག་པའི་སྒོ་ནས་སྔོག་འདོན་སྲུང་སྐྱོབ་དང་། ཐང་ག་ཞེས་པའི་དངོས་མིན་ཤུལ་བཞག་རིག་གནས་འདི་ཉིད་རྒྱུན་འཛིན་དར་སྤེལ། ཀན་སུའུ་་ཞིང་ཆེན་གྱི་མི་རིགས་རིག་གནས་ལས་དོན་ཡར་རྒྱས་གོང་འཕེལ་དུ་གཏོང་ཆེད། ཟླ1པོའི་ཚེས24ཉིན། ཀན་སུའུ་ཞིང་ཆེན་ཐང་ག་སྒྱུ་རྩལ་མཐུན་ཚོགས་གྲོང་ཁྱེར་ལན་ཇུ་ནས་དངོས་སུ་བཙུགས་ཤིང་སྐབས་དང་པོའི་ཚོགས་མིའི་ཚོགས་འདུ་བསྡུས།

       ཀན་སུའུ་ཞིང་ཆེན་རིག་གནས་དང་ཡུལ་སྐོར་ཐིང་གི་རིམ་པ་དང་པོའི་རྟོག་ཞིབ་པ་ལིའུ་ཞིན་ལེ། ཞིང་ཆེན་མི་རིགས་ལས་དོན་ཨུ་ཡོན་ལྷན་ཁང་གི་ཏང་ཙུའུ་ཁོངས་མིའམ་ཀྲུའུ་རེན་གཞོན་པ་ཝེ་ཞུའུ་ཝེན། ཞིང་ཆེན་དང་ཁུལ་གྱི་འབྲེལ་ཡོད་ལས་ཁུངས་ཀྱི་མགོ་ཁྲིད་ལས་བྱེད་དང་། ཞིང་ཆེན་ཕྱི་ནང་གི་ཆེད་མཁས་པ་དང་རིག་གཞུང་ཞིབ་འཇུག་པ། ཐང་གའི་ལས་རིགས་དོན་དུ་གཉེར་བའི་སྒྱུ་རྩལ་པ་དང་ཚོགས་མི་ཡོངས་བཅས་མི130ལྷག་ཚོགས་འདུར་ཞུགས།

       ཚོགས་ཐོག་ཏུ་ཚོགས་པའི་སྟ་གོན་ལས་རིམ་གྱི་སྙན་ཞུ་སྒྲོག་འདོན་བྱས་ཤིང་། «ཀན་སུའུ་ཞིང་ཆེན་ཐང་ག་སྒྱུ་རྩལ་མཐུན་ཚོགས་སྐབས་དང་པོའི་ཚོགས་མིའི་འདེམས་བསྐོ་བྱེད་ཐབས་ཀྱི་འཆར་ཟིན»དང་ཀན་སུའུ་ཞིང་ཆེན་ཐང་ག་སྒྱུ་རྩལ་མཐུན་ཚོགས་སྐབས་དང་པོའི་ཚོགས་མིའི་ཚོགས་འདུའི་འདེམས་ཤོག་ལྟ་ཞིབ་པ་དང་འདེམས་ཤོག་སྡོམ་རྩིས་པའི་གྲོས་བཏོན་མིང་ཐོ་ལ་བརྡས་ཐག་བཅད། «ཀན་སུའུ་ཞིང་ཆེན་ཐང་ག་སྒྱུ་རྩལ་མཐུན་ཚོགས་ཀྱི་སྒྲིག་ཡིག་གི་འཆར་ཟིན»དང«ཀན་སུའུ་ཞིང་ཆེན་ཐང་ག་སྒྱུ་རྩལ་མཐུན་ཚོགས་ཀྱི་ཚོགས་རིན་དོ་དམ་བྱེད་ཐབས་ཀྱི་འཆར་ཟིན» «ཀན་སུའུ་ཞིང་ཆེན་ཐང་ག་སྒྱུ་རྩལ་མཐུན་ཚོགས་ཀྱི་དངུལ་དོན་དོ་དམ་ལམ་ལུགས་ཀྱི་འཆར་ཟིན» ཀན་སུའུ་ཞིང་ཆེན་ཐང་ག་སྒྱུ་རྩལ་མཐུན་ཚོགས་ཀྱི་ལས་འཛིན་ཚོགས་པ་སྐབས་དང་པོའི་ལས་འཛིན་བཅས་འདེམས་ཤོག་འཕངས་ནས་ཐག་བཅད། ཚོགས་གཙོ་དང་། ཚོགས་གཙོ་གཞོན་པ། ལྟ་ཞིབ་པ། དྲུང་ཡིག་ཆེན་མོ། དྲུང་ཡིག་ཆེན་མོ་གཞོན་པ་བཅས་འདེམས་བསྐོ་བྱས་མཐར། འདེམས་བསྐོའི་འབྲས་བུ་དང་ཀན་སུའུ་ཞིང་ཆེན་ཐང་ག་སྒྱུ་རྩལ་མཐུན་ཚོགས་འཛུགས་པའི་རེ་ཞུའི་བཀའ་ལན་སྒྲོག་འདོན་བྱས། གསར་དུ་བདམས་ཐོན་བྱུང་བའི་ཀན་སུའུ་ཞིང་ཆེན་ཐང་ག་སྒྱུ་རྩལ་མཐུན་ཚོགས་ཀྱི་ཚོགས་གཙོ་ཚེ་རིང་དོན་གྲུབ་ཀྱིས་རྣམ་འགྱུར་སྟོན་པའི་གཏམ་བཤད་པ་དང་། ཞིང་ཆེན་མི་རིགས་ལས་དོན་ཨུ་ཡོན་ལྷན་ཁང་གི་ཏང་ཙུའུ་ཁོངས་མིའམ་ཀྲུའུ་རེན་གཞོན་པ་ཝེ་ཞུའུ་ཝེན་གྱིས་གཏམ་བཤད།

       ཐང་ག་ནི་བོད་ཀྱི་བཟོ་རིག་སྒྱུ་རྩལ་གྱི་ཡན་ལག་ཐུན་མོང་མ་ཡིན་པ་ཞིག་ཡིན་ལ། ཀྲུང་ཧྭ་མི་རིགས་ཀྱི་རིན་ཐང་བྲལ་བའི་དངོས་མིན་རིག་གནས་ཤུལ་བཞག་ཅིག་ཀྱང་ཡིན། ཐང་ག་སྒྱུ་རྩལ་གྱིས་མཐོ་དབུས་མཐོ་སྒང་གི་མཚར་སྡུག་ཕུན་སུམ་ཚོགས་པའི་ཕྱི་སྣོད་ཀྱི་དགེ་མཚན་དང་བོད་མའི་མཛེས་དཔྱོད་དང་རིན་ཐང་ལྟ་བ། བསམ་པའི་འཁྱེར་སོ་སོགས་མངོན་པར་མཚོན་ཏེ་རིག་གནས་ཀུན་འདུས་ཀྱི་མེ་ལོང་ལྟ་བུ་ཞིག་ཏུ་ཆགས་ཡོད་པར་མ་ཟད། ལོ་རྒྱུས་ཀྱི་ཆུ་རྒྱུན་རིང་མོའི་ཁྲོད། མི་རིགས་གཞན་པའི་སྒྱུ་རྩལ་གྱི་ཉིང་བཅུད་གང་མང་བསྡུ་ལེན་བྱས་ཏེ། མི་རིགས་སོ་སོའི་རིག་གནས་འགྲོ་འོང་བརྗེ་རེས་དང་བརྩེ་བ་གཅིག་འདྲེས་ཀྱི་བསྐྱེད་འབྲས་ཤིག་ཀྱང་ཡིན། ཀན་སུའུ་ཞིང་ཆེན་ཐང་ག་སྒྱུ་རྩལ་ཚོགས་པ་བཙུགས་པའི་དམིགས་ཡུལ་ནི། ཐང་ག་སྒྱུ་རྩལ་ལ་འབྲེལ་འདྲིས་ཀྱི་གར་སྟེགས་བསྐྲུན་ཞིང་། ལས་རིགས་ཀྱི་ཐོན་ཁུངས་ཕྱོགས་བསྡུས་དང་སྲུང་སྐྱོབ་རྒྱུན་འཛིན་ལ་ཤུགས་སྣོན། ཐང་ག་སྒྱུ་རྩལ་དང་དེང་རབས་སྤྱི་ཚོགས། རིག་གནས་ཡུལ་སྐོར་ཐོན་ལས་བཅས་མཉམ་འདྲེས་གཏིང་ཟབ་བྱས་ཏེ། ལོ་ངོ་སྟོང་ཕྲག་ལ་བརྒྱུད་པའི་རིག་གནས་ཀྱི་གཅེས་ནོར་འདི་ཉིད་དུས་རབས་གསར་པར་གསོན་ཤུགས་གསར་པ་རྒྱས་སུ་བཅུག་སྟེ། ཀྲུང་ཧྭ་མི་རིགས་ཐུན་མོང་གཞི་གཅིག་གི་འདུ་ཤེས་བརྟན་པོར་བཙུགས་ནས། རིག་གནས་ཀྱི་སྟོབས་དང་ལྡན་པའི་ཀན་སུའུ་གསར་པ་འཛུགས་པར་སྟོབས་ཤུགས་དབུལ་བའི་ཆེད་ཡིན།

       དུས་ཡུན་རིང་པོའི་ཁྲོད། ཀན་ལྷོ་ཁུལ་གྱིས་སྲོལ་རྒྱུན་གྱི་ཐོན་ལས་འདི་ཉིད་ལ་མཐོང་ཆེན་ཚད་མཐོན་པོ་བྱས་ཏེ། ཐང་གའི་བརྩམས་ཆོས་ཀྱི་གསར་རྩོམ་དང་། མི་སྣ་འཇོན་ཐང་ཅན་གསོ་སྐྱོང་། ཐང་ག་རིག་གནས་འཛུགས་སྐྲུན་སོགས་ཀྱི་ཐད་དུ་གྲུབ་འབྲས་གཡུར་དུ་ཟ་བ་བླངས་ཤིང་། ཐང་གའི་ཐོན་ལས་བརྒྱུད་དེ་དཔལ་འབྱོར་གྱི་ཡོང་འབབ་དང་ལས་ཞུགས་འཕར་སྣོན། རིག་གནས་ཡུལ་སྐོར་ལས་རིགས་སྐུལ་འདེད་སོགས་ཀྱི་ཕྱོགས་ལ་ཐུན་མོང་མ་ཡིན་པའི་ནུས་ཤུགས་བཏོན། བླ་བྲང་ཐང་གས་ཚབ་མཚོན་བྱས་པའི་ཀན་ལྷོའི་བོད་ཀྱི་ཐང་ག2008ལོར་རྒྱལ་ཁབ་རིམ་པའི་དངོས་མིན་རིག་གནས་ཤུལ་བཞག་གི་གྲས་སུ་ཚུད།