ཆབ་འགག་རྡོ་རྗེ་ཚེ་རིང་གི་གླུ་ཚིག་བཞི་བཅུ་པ།

    9.ཨ་མ་དྲན་པ།

                                                                     ཡར་བལྟས་ཨ་སྔོན་དགུང་གི །
                                                                     ལྷ་བྱ་ཁྲུང་ཁྲུང་དཀར་མོ །
                                                                     ད་ནངས་གང་ནས་འཕུར་ཡོང་ །
                                                                     ཕ་ཡུལ་ཕྱོགས་ནས་ཡོང་ན །
                                                                     བདག་གི་དྲིན་ཆེན་ཨ་མའི །
                                                                     སྐྱིད་སྡུག་ལས་ཀྱི་གནས་ཚུལ །
                                                                     མ་གསང་བདག་ལ་གསུངས་རོགས །
                                                                     བདག་གིས་ས་མཐའ་འདི་ནས །
                                                                     དྲིན་ཆེན་ཨ་མ་དྲན་ནས །
                                                                     མིག་ཆུའི་ཕྲེང་ཐག་ཆད་སོང་ །
                                                                     ཨོ །  ཨ་མ་དྲན་པ་ལ །
                                                                     ཨོ །   ཡིད་སེམས་སྐྱོ་བ་ལ །

                                                                     
                                                                     ཡར་བལྟས་ཨ་སྔོན་དགུང་གི །
                                                                     ལྷ་བྱ་ཁྲུང་ཁྲུང་དཀར་མོ །
                                                                     དོ་ནུབ་གང་ལ་འཕུར་འགྲོ །
                                                                     ཕ་ཡུལ་ཕྱོགས་ལ་འགྲོ་ན །
                                                                     ཕྱོགས་མེད་རྒྱལ་ཁམས་འགྲིམ་པའི །
                                                                     ན་ཆུང་བུ་མོའི་སེམས་གཏམ །
                                                                     མ་གསང་ཨ་མར་གསུངས་རོགས །
                                                                     བདག་གིས་ས་མཐའ་འདི་ནས །
                                                                     དྲིན་ཆེན་ཨ་མ་དྲན་ནས །
                                                                     མིག་ཆུའི་ཕྲེང་རྡོག་ཐོར་སོང་ །
                                                                     ཨོ །   ཨ་མ་དྲན་པ་ལ །
                                                                     ཨོ །   ཡིད་སེམས་སྐྱོ་བ་ལ །

    10.ལྷ་རྒྱལ་ལོ །

                                                                     རྒྱུད་གཅིག་རྒྱུད་གཉིས་རྒྱུད་གསུམ །
                                                                     གཞུ་གཅིག་གཞུ་གཉིས་གཞུ་གསུམ །
                                                                     ལག་ལ་བཟུང་བའི་ལྷ་གཞུ །
                                                                     ཡར་མཆོག་སྲ་མོ་ཕ་ཡིན །
                                                                     མར་མཆོག་སྙི་མོ་མ་ཡིན །
                                                                     སྲ་སྙི་འཛོམས་པའི་གཞུ་མོ །
                                                                     རྭ་རྒོད་བཀྲ་ཤིས་འཁྱིལ་བ །
                                                                     ལྷ་གཞུ་ལོ་ཡ་ལྷ་རྒྱལ་ལོ །

                                                                     
                                                                     མཐེབ་གཅིག་མཐེབ་གཉིས་མཐེབ་གསུམ །
                                                                     མདའ་གཅིག་མདའ་གཉིས་མདའ་གསུམ །
                                                                     ལག་ལ་བཟུང་བའི་ལྷ་མདའ །
                                                                      མདའ་མགོ་ལྗིད་མོ་རྣོ་ཡིན །
                                                                     མདའ་རྟིང་ཡང་མོ་སྒྲོ་ཡིན །
                                                                     ཡང་ལྗིད་འཛོམས་པའི་མདའ་མོ །
                                                                     སྐྱེན་པོ་གནམ་ལྕགས་ཐོག་ཡིན །
                                                                     ལྷ་མདའ་ལོ་ཡ་ལྷ་རྒྱལ་ལོ །

    11.རྨི་ལམ །

                                                                     མཚན་མོའི་རྨི་ལམ་ནང་དུ །
                                                                     ཆུང་འདྲིས་རྩེད་རོགས་ངེད་གཉིས །
                                                                     སྤང་དཀར་མེ་ཏོག་ཐང་ནས །
                                                                     གཡང་དཀར་ལུག་གི་རྗེས་ནས །
                                                                     ཕྱིང་དཀར་ཚར་ཞྭའི་འོག་ནས །
                                                                     གསང་བས་འོ་ཞིག་བྱས་པ །
                                                                     མིག་གིས་ལྟ་ཕྱོགས་མིན་ན །
                                                                     གཡང་མོ་ལུག་གི་ཁྱུ་ཚོགས །
                                                                     ངེད་གཉིས་མཐའ་ལ་བསྐོར་ཡོད །
                                                                     བུ་མོ་ཡིད་སེམས་མ་བདེ །
                                                                     མགོ་བོ་སྒུར་ནས་བྲོས་སོང་ །

                                                                     
                                                                     བུ་མོ་སྐལ་བཟང་མེ་ཏོག
                                                                     སྐྱིད་པོ་གཉིད་ལས་སད་དེ །
                                                                     ཞོགས་པའི་མཚམས་སྤྲིན་འོག་ནས །
                                                                     གསོམ་དཀར་འོ་ཟེའུ་བཟུང་ནས །
                                                                     ཐུལ་དཀར་འབྲི་མོ་བཞོ་དུས །
                                                                     གཡང་དཀར་ལུག་ཁྱུ་རིག་ནས །
                                                                     རྨི་ལམ་སེམས་ལ་འཁོར་བྱུང་ །
                                                                     འོ་ཟེའུ་ལག་ནས་ཤོར་སོང་ །
                                                                     འོ་མ་ས་ལ་བཞུར་སོང་ །
                                                                     ན་ཆུང་བུ་མོའི་ཞལ་རས །
                                                                     ངོ་ཚས་དམར་པོར་གྱུར་སོང་ །

    12.དམ་བཅའ །

                                                                     བུ་ཆུང་འཁོར་ལོ་རྩིབས་བརྒྱད །
                                                                     བུ་མོ་པད་མ་འདབ་བརྒྱད །
                                                                     གནམ་ས་གཉིས་ཀྱི་བར་ལ །
                                                                     རང་བྱུང་རྟེན་འབྲེལ་ཆ་འགྲིག
                                                                     སྦྲང་མའི་ཆར་བ་བབས་ནས །
                                                                     པད་མ་མེ་ཏོག་བཀད་སོང་ །
                                                                     སྦྲང་ཆར་མེ་ཏོག་གཉི་གས །
                                                                     གཅིག་སེམས་གཅིག་གིས་ཤེས་ཡོད །
                                                                     མི་འབྲལ་དམ་བཅའ་བཞག་ཡོད །