ངོས་དང་པོ > རྩོམ་རིག > དེང་རབས་བརྩམས་ཆོས། > ཆབ་འགག་རྡོ་རྗེ་ཚེ་རིང་གི་གླུ་ཚིག་བཞི་བཅུ་པ།

ཆབ་འགག་རྡོ་རྗེ་ཚེ་རིང་གི་གླུ་ཚིག་བཞི་བཅུ་པ།

རྩོམ་པ་པོ།：ཆབ་འགག་རྡོ་རྗེ་ཚེ་རིང་། ཡོང་ཁུངས།：མཚོ་སྤོན་པོ་དྲ་བ། དུས་ཚོད།：2011-07-25 09:43:00 ཀློག་གྲངས།：

                                                                     ས་ལ་རྟེན་འབྲེལ་འགྲིག་སོང་ །
                                                                     མེ་ཏོག་ཆར་བ་བབས་སོང་ །
                                                                     རྒྱ་ཚ་ཞལ་དཀར་འཁྲུངས་སོང་ །
                                                                     རྒྱ་བོད་གཉི་ག་དགའ་སོང་ །
                                                                     ཕ་རུས་གངས་ཅན་བོད་པ །
                                                                     མ་རྒྱུད་རྒྱ་བཟའ་ལྷ་མོ །
                                                                     རྒྱ་བོད་ཕ་མའི་རྒྱན་དུ །
                                                                     འཁྲུངས་པའི་རྒྱ་ཚ་ཞལ་དཀར །
                                                                     རྒྱ་ཚ་ཚེ་རིང་ལོ་བརྒྱ །

5.སེམས་ལ་སེར་ག་ཤོར་སོང་ །

                                                                     མཐོན་པོ་ཨ་སྔོན་ནམ་མཁའི །
                                                                     སྐར་མའི་དགུ་ཚིགས་ཁྲ་མོ །
                                                                     དམའ་མོ་ས་ལ་ལྷུང་འདྲའི །
                                                                     རྨ་ཆུ་དལ་བ་རིང་མོ །
                                                                     རི་ལུང་བརྒྱུད་ནས་བཞུར་དུས །
                                                                     སེམས་ལ་ཅི་ཞིག་དྲན་བྱུང་ །

                                                                     ཆ་མེད་རྒྱལ་ཁམས་འགྲིམ་པའི །
                                                                     གྲོགས་མེད་ན་ཆུང་བུ་མོས །
                                                                     སྐྱིད་མེད་ས་མཐའ་འདི་ནས །
                                                                     ཉིན་མཚན་ཐུན་དྲུག་མེད་པར །
                                                                     ཆུང་འདྲིས་རྩེད་རོགས་དྲན་ནས །
                                                                     སེམས་ལ་སེར་ག་ཤོར་སོང་ །

6.རྨི་ལམ་ནང་དུ་མཇལ་ཆོག

                                                                     སྟོན་གསུམ་སྟོན་འགོ་ཚུགས་ནས །
                                                                     བད་དཀར་ས་ལ་ལྷུང་སོང་ །
                                                                     ཁུ་བྱུག་སེམས་པ་སྐྱོ་བཞིན །
                                                                     མི་འཕུར་རང་དབང་མེད་སོང་ །
                                                                     ཁུ་བྱུག་སེམས་པ་མ་སྐྱོ །
                                                                     མི་རྟག་སྒྱུ་མའི་འགྱུར་ལྡོག
                                                                     དུས་ཀྱི་ཆོས་ཉིད་ཡིན་རུང་ །
                                                                     གཅིག་སེམས་གཅིག་ལ་མཐུན་ན །
                                                                     རྨི་ལམ་ནང་དུ་མཇལ་ཆོག

                                                                     སྟོན་གསུམ་སྟོན་མཇུག་ཚར་ནས །
                                                                     མེ་ཏོག་འདབ་མ་ལྷུང་སོང་ །
                                                                     གཡུ་སྦྲང་སེམས་པ་སྐྱོ་བཞིན །
                                                                     མི་འཕུར་རང་དབང་མེད་སོང་ །
                                                                     གཡུ་སྦྲང་སེམས་པ་མ་སྐྱོ །
                                                                     མི་རྟག་སྒྱུ་མའི་འགྱུར་ལྡོག
                                                                     ལས་ཀྱིས་བསྐོས་ཐང་ཡིན་རུང་ །
                                                                     གཅིག་སེམས་གཅིག་ལ་འདྲིས་ན །
                                                                     རྨི་ལམ་ནང་དུ་མཇལ་ཆོག

7.འབྲུག་ཆུང་སྔོན་མོ །

                                                                     དགུང་སྔོན་ཕོ་བྲང་ནང་དུ །
                                                                     འཇའ་ཚོན་ཁྲི་ལ་བཞུགས་པའི །
                                                                     གཡུ་ཡི་འབྲུག་ཆུང་སྔོན་མོས །
                                                                     དཀར་དམར་སྤྲིན་གྱི་བར་ནས །
                                                                     ཁྱུག་འགྲོས་གར་ལ་རོལ་བཞིན །
                                                                     སྙན་འཇེབས་སྒྲ་དང་འགྲོགས་ནས །
                                                                     མེ་ཏོག་ཆར་བ་ཕབ་སོང་ །
                                                                     དགུང་སྔོན་བཀྲ་ཤིས་བདེ་ལེགས །
                                                                     གཡུ་འབྲུག་ཚེ་རིང་ལོ་བརྒྱ །

                                                                     ས་གཞིའི་ཕོ་བྲང་ནང་དུ །
                                                                     པད་མའི་ཁྲི་ལ་བཞུགས་པའི །
                                                                     མཛེས་སྡུག་རྨ་བྱ་སྔོན་མོས །
                                                                     སྒྲོ་མདོངས་དཀྱིལ་འཁོར་འོག་ནས །
                                                                     དགའ་སྐྱིད་གར་ལ་རོལ་བཞིན །
                                                                     མཛའ་བའི་འཛུམ་དང་འགྲོགས་ནས །
                                                                     བརྩེ་དུང་ཆང་གིས་བཟི་སོང་ །
                                                                     ས་གཞི་བཀྲ་ཤིས་བདེ་ལེགས །
                                                                     རྨ་བྱ་ཚེ་རིང་ལོ་བརྒྱ །

8.གཡུ་སྦྲང་།

                                                                     མཛེས་སྡུག་སྤང་ལྗོངས་ཐང་གི
                                                                     མེ་ཏོག་གསེར་ཆེན་མགོ་ལ །
                                                                     གཡུ་ཡི་སྦྲང་ཆུང་བབས་ཡོད །
                                                                     དབྱར་གསུམ་ཚ་གདུག་ཆེ་བས །
                                                                     མེ་ཏོག་མ་སྐམ་བར་དུ །
                                                                     གཡུ་སྦྲང་གཞན་ལ་མི་འཕུར །

                                                                     བཅུ་དྲུག་ལང་ཚོ་སྨིན་པའི །
                                                                     ཞང་བཟང་ཚ་མོའི་སེམས་པ །
                                                                     ཕ་བཟང་བུ་ལ་འཁོར་ཡོད །
                                                                     མི་ཡུལ་བཤད་དྲུག་རྒོད་པས །
                                                                     བརྩེ་དུང་མ་འགྱུར་བར་དུ །
                                                                     བུ་མོ་གཞན་དང་མི་འགྲོགས །