ཆབ་འགག་རྡོ་རྗེ་ཚེ་རིང་གི་གླུ་ཚིག་བཞི་བཅུ་པ།

1.ཕ་མའི་འཚོ་བ།

                                                                     ཞོགས་པའི་མཚམས་སྤྲིན་འོག་ནས །
                                                                     ཨ་མས་མ་ཎི་འདོན་ཞོར །
                                                                     ལྷ་ཤིང་མེ་ཁ་གསོ་སྐབས །
                                                                     སེམས་ལ་དྲོད་ཀྱིས་ཁེངས་ཡོད །
                                                                     འཇམ་པོ་སྦྲང་དཀར་རྩམ་པ །
                                                                     སྣུམ་པོ་འབྲི་མར་སེར་པོ །
                                                                     ཞིམ་པོ་འོ་ཇ་དཀར་པོ །
                                                                     སྦྲ་ཁྱིམ་གྲུ་བཞིའི་ནང་ནས །
                                                                     གཅིག་ལུས་གཅིག་ལ་འཐིམ་སོང་ །

                                                                     
                                                                     རྩྭ་མགོའི་ཟིལ་བའི་ཁྲོད་ནས །
                                                                     ཨ་ཕས་ཕྲེང་བ་འདྲེན་ཞོར །
                                                                     ལྷ་བསང་སྔོན་མོ་གཏོང་སྐབས །
                                                                     སེམས་ལ་དད་པས་ཁེངས་ཡོད །
                                                                     གཡང་དཀར་ལུག་གི་འབའ་སྒྲ །
                                                                     ཐུལ་དཀར་འབྲི་མོའི་ངུར་སྒྲ །
                                                                     རྐྱང་དཀར་རྒོད་མའི་འཚེར་སྒྲ །
                                                                     ལྷས་ར་གོར་མོའི་ནང་ནས །
                                                                     གཅིག་སྐད་གཅིག་ལ་འདྲེས་སོང་ །

    2.སྙིང་གི་མཛའ་མོ །

                                                                     སྙིང་གི་ཆུང་འདྲིས་མཛའ་མོ །
                                                                     བུ་མོ་ཚེ་རིང་ལྷ་མོ །
                                                                     ཁྱོད་ཀྱི་མཛེས་སྡུག་ཞལ་རས །
                                                                     བཅོ་ལྔའི་ཟླ་ལས་མཛེས་སོང་ །
                                                                     ཁྲ་ཆེན་མིག་གི་ལང་ཚོ །
                                                                     དབྱངས་ཅན་ལྷ་ལས་སྒེག་སོང་ །
                                                                     ཁྱོད་ལ་འགྱུར་བ་མེད་ན །
                                                                     ངའི་སེམས་ཁྱོད་ལ་འཁོར་ཡོད །
                                                                     ཨེ་བདེན་མི་བདེན་འདོད་ན །
                                                                     ཡ་ཆུང་ཁོག་ཁ་ཕྱེ་ནས །
                                                                     སེམས་པ་ཁྱོད་ལ་བསྟན་ཆོག

                                                                     
                                                                     སྙིང་གི་ཆུང་འདྲིས་མཛའ་མོ །
                                                                     བུ་མོ་ཚེ་རིང་ལྷ་མོ །
                                                                     མཛའ་མོ་ཁྱོད་ཀྱི་ཚིག་སྒོ །
                                                                     རྗེ་བཙུན་མགུར་ལས་སྙན་སོང་ །
                                                                     བུ་མོ་ཁྱོད་ཀྱི་ངང་རྒྱུད །
                                                                     གཡང་དཀར་བལ་ལས་འཇམ་སོང་ །
                                                                     ཁྱོད་ལ་འགྱུར་བ་མེད་ན །
                                                                     ངའི་སེམས་ཁྱོད་ལ་འཁོར་ཡོད །
                                                                     ཨེ་བདེན་མི་བདེན་འདོད་ན །
                                                                     ཡ་ཆུང་ཁོག་ཁ་ཕྱེ་ནས །
                                                                     སེམས་པ་ཁྱོད་ལ་བསྟན་ཆོག

    3. ཨ་མདོ་ན་ཆུང་བུ་མོ །

                                                                     ཨ་མྱེས་རྨ་ཆེན་གངས་རི་དཀར་པོའི་ཕང་བ་ན།
                                                                     མཛེས་སྡུག་ལྡན་པའི་ཨ་མདོ་ན་ཆུང་བུ་མོ་ལགས། 
                                                                     ཉི་ཟླ་སྐར་གསུམ་བུ་མོ་ཁྱོད་ཀྱི་རྒྱན་ཆ་ཡིན།
                                                                     རྨ་འབྲི་རྫ་གསུམ་བུ་མོ་ཁྱོད་ཀྱི་ལང་ཚོ་ཡིན།
                                                                     ལོ་ཡ་རེ་ལོ། 
                                                                     ཡིད་དུ་འོངས་པའི་ཨ་མདོ་ན་ཆུང་བུ་མོ་ལགས། 
                                                                     བུ་མོ་ཁྱོད་ཀྱི་སེམས་རྒྱ་ནམ་མཁའི་མཁའ་ལས་ཡངས། 
                                                                     བུ་མོ་ཁྱོད་ཀྱི་ཁོག་རྒྱ་རྒྱ་མཚོའི་གཏིང་ལས་ཟབ། 
                                                                     ལོ་ཡ་རེ་ལོ། 
                                                                     རྨི་ལམ་གྱི་ཨ་མདོ་ཡ་ན་ཆུང་གི་བུ་མོ་ལགས། 
                                                                     བུ་མོ་ཁྱོད་ལ་བརྩེ་ཞིང་བུ་མོ་ཁྱོད་ལ་དུངས།

                                                                     
                                                                     ལྷ་མཚོ་སྔོན་མོ་ཁྲི་ཤོར་རྒྱལ་མོའི་ཕང་བ་ན། 
                                                                     མཛེས་སྡུག་ལྡན་པའི་ཨ་མདོ་ན་ཆུང་བུ་མོ་ལགས། 
                                                                     རྟ་ནོར་ལུག་གསུམ་བུ་མོ་ཁྱོད་ཀྱི་རྒྱན་ཆ་ཡིན། 
                                                                     གྲོ་ནས་སྲན་གསུམ་བུ་མོ་ཁྱོད་ཀྱི་ལང་ཚོ་ཡིན། 
                                                                     ལོ་ཡ་རེ་ལོ། 
                                                                     སྙིང་དུ་སྡུག་པའི་ཨ་མདོ་ན་ཆུང་བུ་མོ་ལགས། 
                                                                     བུ་མོ་ཁྱོད་ཀྱི་ངང་རྒྱུད་གཡང་དཀར་བལ་ལས་འཇམ། 
                                                                     བུ་མོ་ཁྱོད་ཀྱི་གཞུང་རྒྱུད་གསོམ་དཀར་མདའ་ལས་དྲང་། 
                                                                     ལོ་ཡ་རེ་ལོ། 
                                                                     རྨི་ལམ་གྱི་ཨ་མདོ་ཡ་ན་ཆུང་གི་བུ་མོ་ལགས། 
                                                                     བུ་མོ་ཁྱོད་ལ་བརྩེ་ཞིང་ཁྱོད་ལ་དུངས།

    4.རྒྱ་ཚ་ཞལ་དཀར །

                                                                     གནམ་ལ་གཟའ་སྐར་འཕྲོད་སོང་ །
                                                                     བཀྲ་ཤིས་འཇའ་ཚོན་མཛེས་སོང་ །
                                                                     ཐོ་རངས་སྐར་ཆེན་ཤར་སོང་ །
                                                                     ཉི་ཟླ་གཉི་ག་དགའ་སོང་ །
                                                                     ཕ་རུས་ཁྲི་གདུགས་ཉི་མ །
                                                                     མ་རྒྱུད་དཀར་གསལ་ཟླ་བ །
                                                                     ཉི་ཟླ་ཕ་མའི་རྒྱན་དུ །
                                                                     ཤར་བའི་ཐོ་རངས་སྐར་ཆེན །
                                                                     སྐར་ཆེན་ཚེ་རིང་ལོ་བརྒྱ །