འཛམ་གླིང་སྟེང་ཆེས་རིང་བའི་བོད་ཀྱི་གཙག་དྲུབ།

       ཉེ་སྔོན། མང་རྫོང་བོད་ཀྱི་གཙག་དྲུབ་སྤུས་རྟགས་སྒྲོག་སྤེལ་དང“འཛམ་གླིང་སྟེང་ཆེས་རིང་བའི་བོད་ཀྱི་གཙག་དྲུབ”ཅེས་པའི་འཛམ་གླིང་ཟིན་ཐོའི་དཔང་བདེན་ར་སྤྲོད་མཛད་སྒོ་མཚོ་སྔོན་ཞིང་ཆེན་ཟི་ལིང་གྲོང་ཁྱེར་དུ་འཚོགས། དཔང་བདེན་ར་སྤྲོད་མཛད་སྒོའི་སྟེང་། འཛམ་གླིང་ཟིན་ཐོའི་དཔང་བདེན་མཁན་མ་ཁེ་ཡིས་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་མང་རྫོང་གིས་སྒྲིག་འཛུགས་བྱས་ཏེ་བཞེངས་སྐྲུན་གནང་བའི«གེ་སར་གཙག་ཐང་རི་མོ»ལ། འཛམ་གླིང་ཟིན་ཐོ་དཔང་བདེན་ལས་ཁུངས་ཀྱིས་ཞིབ་བཤེར་བྱས་པ་བརྒྱུད། “འཛམ་གླིང་སྟེང་ཆེས་རིང་བའི་བོད་ཀྱི་གཙག་དྲུབ”ཏུ་བདམས་ཐོན་བྱུང་བ་ཁྱབ་བསྒྲགས་བྱས།

       «གེ་སར་གཙག་ཐང་རི་མོ»ཡི་སྤྱིའི་རིང་ཚད་ལ་སྨི270དང་མཐོ་ཚད་ལ་སྨི2.6ཡོད་ཅིང་། དེ་ནི་འཛམ་གླིང་སྟེང་མཉམ་འབྲེལ་རྒྱལ་ཚོགས་སློབ་གསོ་ཚན་རིག་རིག་གནས་རྩ་འཛུགས་ཀྱི་མིའི་རིགས་ཀྱི་མངོན་མིན་རིག་གནས་ཤུལ་བཞག་གི་མཚོན་བྱེད་རྣམ་གྲངས་མིང་ཐོར་བཀོད་པའི«གེ་སར་རྒྱལ་པོའི་སྒྲུང»དང་མང་རྫོང་བོད་ཀྱི་གཙག་དྲུབ་གཉིས་མཉམ་འདྲེས་གཏིང་ཟབ་བྱས་པའི་གཙག་དྲུབ་རི་མོ་ཐོག་མ་ཡིན། 2017ལོར་བཞེངས་སྐྲུན་བྱེད་མགོ་ཚུགས་པ་ནས་བཟུང་མང་རྫོང་གིས་རྐང་འཛིན་འཚེམ་མཁན་སྒྲིག་འཛུགས་བྱས་ནས། ལོ་ངོ9ཡི་རིང་ནན་ཏན་གྱིས་འཚེམ་དྲུབ་ཞིབ་མོའི་སྦྱོར་བ་ལེགས་པར་བསྟར་བའི་མཐུ་ལས་སྨིན་ཏེ2026ལོའི་ཟླ9པར་ལེགས་འགྲུབ་བྱུང་། གཙག་ཐང་དེར་ཐོག་མའི་གཙག་དྲུབ་རྣམ་པ200ལྷག་ཚུད་ཡོད་ཅིང་། སྲོལ་རྒྱུན་གྱི་བཟོ་རྩལ་སྣ་ཚོགས་ཕྱོགས་བསྡུས་བེད་སྤྱོད་བྱས་པ་དང་། རྒྱ་དང་བོད། ཧོར། སོག་པོ། ཟ་ལར་སོགས་མི་རིགས་མང་བོའི་གཙག་དྲུབ་ལག་རྩལ་གྱི་སྙིང་བོ་གཅིག་ཏུ་བསྡུས་ནས། མི་རིགས་ཁག་ཕན་ཚུན་འགྲོ་འོང་དང་སྤེལ་རེས། མཉམ་འདྲེས་ཀྱི་ལོ་རྒྱུས་རྣམ་པ་གསོན་ཉམས་དོད་པོས་མཚོན་ཡོད།