གསེར་གྱི་རྣ་ལོང་ཡ་གཅིག གཡུ་སྒྲོན་འཚོ།

       ད་ལྟ་ཡང་མཐར་ཕྱིན་གྱི་དུས་ཚིགས་ཤིག་རེད།
       མཐོ་སྒང་གི་ཟླ་དྲུག་པའི་རླུང་བུ་སློབ་ཆེན་དུ་ལྡང་དུས། སྨིན་ཐག་མ་ཆོད་པའི་མེ་ཏོག་གི་འདབ་མ་འགའ་ཡང་ཅིས་ཀྱང་ཕྱི་ལ་བྱེར་དགོས། འདི་ནི་སྦྱང་བརྩོན་གྱི་མེ་ཏོག་ལ་ཤེས་ཡོན་གྱི་འབྲས་བུ་སྨིན་སོང་བ་མིན་ཡང་། དུས་ཚིགས་འདིས་རང་ཉིད་ཀྱི་ལས་འགན་དུས་ལྟར་བསྒྲུབ་ཏུ་བཅུག་པ་ཡིན་ངེས།
       ཉིན་འདི་འགར། ང་སེམས་ནད་གང་ཞིག་གིས་མནར་གྱིན་ཡོད་པ་འདྲ། ཉིན་མོར་ཟས་མི་འདོད་ལ་མཚན་མོར་གཉིད་ཀྱང་མི་བདེ། ཕྱི་ཡི་དྲོད་མི་ཚོར་ལ་ནང་གི་ཁམས་ཀྱང་མི་དྭངས། སྐབས་ལ་ལར་ཡ་ཁོག་སྟོང་ལྷང་ལྷང་དང་། མཚམས་ལན་རེར་སེམས་པ་ལྗིད་ཏིག་ཏིག འདི་ནི་རང་ཉིད་སློབ་མཐར་ཕྱིན་རྒྱུ་དང་། དེའི་རྗེས་ཀྱི་ཅི་ཞིག་ལ་སེམས་ཚེགས་སྐྱེས་པ་ཙམ་ལས་འགོངས་ཡོད་པ་འདྲ། དོན་དམ་དུ་ང་ལ་ཅི་ཞིག་བྱུང་སོང་ངམ། ངས་སེམས་དོན་ཅི་ཞིག་འགྲུབ་མེད་པར་ཡ་ཁོག་ཏུ་ལུས་ཡོད་དམ།
       ཡ་མཚན། ད་ནངས་ཞོགས་པར། ང་སློབ་གྲོགས་ཚོ་དང་མཉམ་དུ་མཐར་ཕྱིན་མཉམ་པར་བསྐྱོན་དུ་འགྲོ་དུས། རྒྱུན་ལྡན་ལྟར་སློབ་གྲོགས་ཚོ་དང་མཉམ་དུ་འཛིན་གཙོས་བཤད་པའི་ལམ་ཐིག་དེད་དེ། ས་ཚིགས་རེ་རེར་དུས་བགོས་ལྟར་འགྲོ་རྒྱུའི་སེམས་ཁམས་ཁྱོན་ནས་མི་འདུག འདི་ནི་འཛིན་གྲྭ་ལ་མདངས་རྩིས་ཤིན་ཏུ་ཆེ་བའི་ངའི་གཤིས་སྤྱོད་དང་འགལ་བ་ལྟག་སྤྲོད་དུ་གྱུར་པ་ཤ་སྟག་རེད། ངས་མཐའ་མཇུག་གི་དུས་ཚོད་ཐུང་ངུ་འདི་གཅེས་འཛིན་སྒོས་སློབ་གྲོགས་ཚོ་དང་མཉམ་དུ་དྲན་རྟེན་མཉམ་པར་ཞིག་ཅི་ལ་མི་བསྐྱོན། ཡིན་ནའང་། སེམས་འདུན་ལྐོག་ཏུ་གྱུར་པ་ཞིག་གིས་ང་ལ་ཁ་ལོ་སྒྱུར་གྱིན་མཆིས། ང་ཁོ་ཚོ་དང་ཁ་བྲལ་ཏེ་དཔེ་མཛོད་ཁང་གི་ལྟག་རྒྱབ་བརྒྱུད་ནས། མེ་ཏོག་ར་བའི་མཐའ་བསྐོར་ཏེ་ཅི་ཞིག་འཚོལ་དུ་ཕྱིན།
       གསེར་གྱི་རྣ་ལོང་ཡ་གཅིག་སྟེ། མཐའ་མཇུག་འདིར། ངས་ཅིས་ཀྱང་ཁྱོད་བཙལ་ནས་རྙེད་དགོས།
       རེད་ཡ། བཤད་ན་གཏམ་རྒྱུད་རིང་བ་འདྲ། གཏམ་རྒྱུད་ཡོད་ཚད་ཀྱང་ངས་དཔེ་མཛོད་ཁང་དུ་གསེར་གྱི་རྣ་ལོང་ཡ་གཅིག་རྙེད་པ་དང་འབྲེལ་བ་ཡོད་པ་འདྲ།
       ཉིན་དེར་ཡང་། ང་རྒྱུན་ལྡན་གྱི་ལོབས་ཕྱོགས་ལྟར། རི་བོའི་གཏོས་དང་མཉམ་པའི་དཔེ་དེབ་སྣ་མང་གིས་རང་ལུས་བརྒྱན་པའི་དཔེ་སྒྲོམ་ནར་མོ་དག་གི་གྲལ་བར་བརྒྱུད་ཞོར། རང་གི་འདུག་གནས་གཟས་ཏེ་སོང་། རྡོག་སྣེ་གཏོད་ཡུལ་གྱི་ས་ངོས་དེ་རུ་རང་མདོག་གསལ་བའི་དངོས་གཟུགས་ཆུང་ངུ་ཞིག་ངའི་མཐོང་སྣེར་ཐོགས་ཤིང་། དེ་ནི་ཏག་ཏག་གསེར་གྱི་རྣ་ལོང་ཡ་གཅིག་རེད། གསེར་གྱི་རྣ་ལོང་ཡ་གཅིག་དེ་ནི། དེ་ལྟར་གསེར་མདོག་ཀྲིག་གེར་ངའི་མིག་ལམ་དུ་མངོན་ཡོང་དུས། ངས་ཐེ་ཚོམ་ཅི་ཡང་མེད་པར་དེ་ཉིད་པང་གཅལ་སྟེང་ནས་ཡར་བསྒྲུགས་པ་ཡིན། དེ་མ་ཐག ངའི་མིག་ལམ་དུ་མི་ཞིག་གི་གཟུགས་བརྙན་འཁོར་ཡོང་ཞིང་། དེའང་ཏག་ཏག་ཁོའི་གཟུགས་བརྙན་ཡིན་པར་འདུག གློ་བུར་ང་ལ་གསེར་གྱི་རྣ་ལོང་ཡ་གཅིག་པོ་དེ་ཧ་ཅང་སྙིང་དུ་སྡུག་པ་དང་། ཤིན་ཏུ་རྒྱུས་མངའ་ཡོད་པ་ལྟ་བུའི་ཉམས་སྣང་ཞིག་ཤར།
       ཉིན་འགའི་སྔོན་གྱི་ཕྱི་དྲོ་ཞིག་ལ། ངས་གནས་འདི་སྟེ། དཔེ་དེབ་སྣ་ཚོགས་གྲལ་འགྲིག་མོའི་ངང་རིམ་པ་དང་རིམ་པ། ཐེམ་པ་དང་ཐེམ་པ་བྱས་ནས་བསྒྲིགས་ཡོད་པའི་དཔེ་སྒྲོམ་དག་གི་བར་གསེང་དུ། གསེར་གྱི་རྣ་ལོང་ཡ་འདི་ཁོའི་གཡོན་ཕྱོགས་ཀྱི་ཟ་འགྲམ་དེ་ནས་ཐོག་དང་པོར་མཐོང་བ་ཡིན།
       དེའི་དུས། ཁོ་དཔེ་སྒྲོམ་མཐོན་པོ་དེ་དག་གི་བར་དུ་ལངས་ཏེ། དཔེ་དེབ་སྤུས་ལེགས་མཐུག་པོ་ཞིག་གི་ཁ་ཕྱེ་ནས་ལྟ་བཞིན་འདུག ཁོའི་མགོ་བོ་ཅུང་ཙམ་དུད་པས་གདོང་གི་མིག་ཤེལ་མར་ཅུང་ཟད་ལྷུང་བ་དང་། སྐྲ་ལོ་ནག་པོས་དཔྲལ་བའི་ཕྱེད་ཙམ་ཁེབས་ལ། ངོ་གདོང་ཧྲིལ་བོར་གཟབ་ནན་གྱི་ཉམས་སྣང་ཁྱད་པར་བ་ཞིག་མངོན་ཞིང་། མིག་གི་རྒྱལ་མོས་ཀྱང་ནན་ཏན་སྒོས་དཔེ་དེབ་ལས་ཅི་ཞིག་འཚོལ་བར་བྲེལ་བཞིན་མཆིས། དེ་དག་ལས་ཀྱང་མངོན་པར་གསལ་བ་ཞིག་ནི། ཁོའི་རྣ་བ་གཡོན་པར་བཏགས་པའི་གསེར་གྱི་རྣ་ལོང་ཆུང་ངུ་དེ་ཡིན་ལ། དེས་གསེར་འོད་ལམ་ལམ་གྱིས་མི་དེ་ལ་མཛེས་ཉམས་ཁྱད་པར་བ་ཞིག་བསྣན་འདུག་པའི་ཚོར་བ་བྱུང་། སྣང་བརྙན་དེ་ནི་དེ་འདྲའི་གསལ་ལྷང་ངེ་བ་ཞིག་དང་རྙིང་རྒྱུ་མེད་པ་ཞིག་སྟེ། བདག་གི་དྲན་པའི་ཡོལ་ངོས་སུ་ཡང་ཡང་འཆར་ཞིང་། ཧ་ཅང་མཛེས་པའི་སྒྱུ་རྩལ་གྱི་བརྐོས་རིས་ཤིག་དང་ཡང་འདྲ།
       ངས་གསེར་གྱི་རྣ་ལོང་དེ་ཡར་བླངས་ནས་ལག་མཐིལ་ལ་བཞག་སྟེ། དེ་ལྟར་ཐོག་མའི་བག་ཆགས་ཁྲོད་ཀྱི་ཁོ་ཡང་བསྐྱར་ཡིད་ངོར་ཐེངས་གཅིག་ཤར།
       “ཨ་རོག གཟའ་ཕོག་བྱུང་ངམ།” གྲོགས་མོས་སྐད་སྒྲ་དམའ་མོས་ངའི་རྣ་རྩར་དེ་སྐད་བཤད་པས། ང་ཧད་སེར་བཏང་བྱུང་།
       “གསེར་གྱི་རྣ་ལོང་ཡ་གཅིག”ངའི་ངག་ལས་དེ་ལྟར་ཤོར། དེ་ནི་ངས་ཁོའི་མིང་ནས་ཐེངས་གཅིག་བོས་པ་དང་འདྲ།
       “རྣ་ལོང་ཨེ། རྣ་འཛེར་ཟེར་ན་འགྲིག་གི་རེད། ད་དུང་གསེར་གྱི་རྣ་ལོང་ཨེ། སེར་པོ་ཐམས་ཅད་གསེར་ཡིན་དགོས་པས་ཁྱབ་པ་ཡོད་དམ། ཧ་ཧ།” གྲོགས་མོས་ནམ་རྒྱུན་ཁྱབ་མ་ཁྱབ་སོགས་ཀྱི་བརྡ་ཆད་སྤྱད་ནས་མོའི་རིག་སྟོབས་ངོམ་པར་བྱེད་མོད། སྐབས་འདིའི་ངའི་ཚོར་རྟོག་གི་རྒྱུ་བ་མཚར་བོ་ནི། མོའི་རྣོ་དབལ་འབར་བའི་རིག་ཤེས་ཀྱིས་ཀྱང་ཟིན་གྱིན་མེད་ཚོད་རེད།
       སྐབས་དེར། ང་ལ་མཚོན་ན་རྣ་ལོང་དེའི་རྒྱུ་ཆ་གསེར་ཡིན་མིན་ལ་བསམ་བློ་འཁོར་དགོས་དོན་མེད་ཅིང་། རྣ་ལོང་དེའི་མིང་ལ་ཅི་བཏགས་ན་འོས་མིན་ལའང་དྲན་པ་གཡར་དགོས་དོན་མེད། གང་ལྟར་རྣ་ལོང་དེས་དེ་ལྟར་གསེར་འོད་ཀྲིག་ཀྲིག་ངང་ངའི་དྲན་པ་ལ་ཅི་ཞིག་འཕྱོར་སྤྲོས་བྱེད་བཞིན་མཆིས་ལ། ངའི་ནང་སེམས་ལའང་དྲོད་ཁོལ་ཞིག་སྩོལ་བཞིན་མཆིས།
       ངའི་གྲོགས་མོས་བཤད་པ་ནང་བཞིན། སྤྱིར་གཞོགས་གཉིས་སུ་དེབ་ཀྱི་འཁྲུགས་ཆ་དོད་པོར་བརྩིགས་པའི་དཔེ་སྒྲོམ་དག་གི་བར་གསེང་དུ། དམིགས་པ་རྩེ་གཅིག་ལ་གཏད་ནས་དེབ་ཅིག་འཚོལ་བའི་མིག་མདངས་ཤིག་དང་། དམིགས་འབེན་གཅིག་པའི་མིག་མདངས་གཞན་ཞིག་ལ་གདོང་ཐུག་རྒྱག་སྲིད་པ་ནི་རྒྱུན་ལྡན་ཞིག་རེད། ཡིན་ནའང་། ངའི་མིག་གི་རྒྱལ་མོའི་ལས་ཀ་ལ་གེགས་བྱེད་མཁན་ནི་གསེར་གྱི་རྣ་ལོང་ཡ་འདི་ཡིན། དེའང་གསལ་བོར་བཤད་ན། གསེར་གྱི་རྣ་ལོང་ཅན་གྱི་སྐྱེས་པ་དེ་རེད།
       དེ་ནས་བཟུང་། ངའི་འཆར་སྒོ་ནི་འཚོ་བའི་སྒྱུ་འཕྲུལ་གྱི་ལྟད་མོ་སྣ་ཚོགས་མངོན་སའི་ཡོལ་རས་ཤིག་ཡིན་པའི་དབང་དུ་བཏང་ན། གསེར་གྱི་རྣ་ལོང་ཅན་གྱི་སྐྱེས་པ་དེའི་སྣང་བརྙན་ནི། ཡུལ་དུས་ངེས་མེད་ཀྱིས་ཡོལ་རས་ངོས་སུ་རང་ཤུགས་སྒོས་འཕོས་ཡོང་གིན་འདུག་ལ། དེར་ཤེས་བཞིན་གྱི་རྩོལ་བའང་ཅི་ཡང་གདོན་མི་དགོས།
       “རྣ་ལོང་འདི་ཁོའི་ཡིན་སྲིད་དམ།” ངའི་མིག་ཟུང་ཁོའི་འདུག་གནས་ཀྱི་ཕྱོགས་སུ་ཅེར།
       “སུ་ཞིག” གྲོགས་མོས་མཚར་ཉམས་བསྟན་སོང་།
       སྟེས་དབང་གི་ལམ་ཕྲད་ཐེངས་དེ་ནས་བཟུང་། ངས་གསེར་གྱི་རྣ་ལོང་ཅན་གྱི་སྐྱེས་པ་དེ་ཡང་ཡང་མཐོང་། དེ་ལྟར་ཡང་ཡང་མཐོང་བ་ནས་བཟུང་། ང་ཁོ་ལ“ལོབས”པར་གྱུར་སོང་། ང་དེ་ལྟར་ཁོ་ལ“ལོབས”པར་གྱུར་པ་ནས་བཟུང་། ངས་ཁོའི་མིང་ལ་ཐད་ཀར“གསེར་གྱི་རྣ་ལོང་ཡ་གཅིག”ཅེས་བཏགས། མིང་དེ་དེ་ལྟར་བཏགས་པ་ནས་བཟུང་དེ་ནི་སྙིང་དུ་སྡུག་པ་ཞིག་ཡིན་པའི་ཚོར་སྣང་བྱུང་། ཚོར་སྣང་དེའི་རིགས་བྱུང་བ་ནས་བཟུང་། ངས་དངོས་གནས་ཁོའི་མིང་ལ་ཅི་ཟེར་བར་ཁ་ཡ་བྱས་མ་མྱོང་། ཁོ་སུ་ཡིན་པའང་གསལ་ཁ་འབྱེད་མྱོང་མེད། གནས་ཚུལ་ནི་དེ་ལྟ་བུ་ཞིག་ཡིན་པས། ངས་གསེར་གྱི་རྣ་ལོང་། འདི་སུ་ཞིག་གི་ཡིན་པ་དེ། གྲོགས་མོར་ཇི་ལྟར་བཤད་དགོས་པའང་མ་ཤེས། དྲང་མོར་བཤད་ན། ཁོ་སུ་ཡིན་པ་དང་མིང་ལ་ཅི་ཟེར་བ་དེ་ང་ལ་འབྲེལ་བ་ཅི་ཡོད། དཔེ་མཛོད་ཁང་གི་གྲུ་ཟུར་དེ་རུ། ཁོ་སྔར་གནས་སུ་ལྷོད་ཀྱིས་སྡོད་ཅིང་། དཔེ་དེབ་གང་ཞིག་ནན་ཏན་གྱིས་ཀློག་པའི་རྣམ་པ་མིག་ལམ་དུ་མངོན་ཐུབ་པ་ཡིན་ན། ང་ལ་དེ་ལས་ལྷག་པའི་སེམས་ཀྱི་ལོངས་སྤྱོད་ཅིག་མེད། མཚམས་རེར་དེ་ལས་ལྡོག་པར་གྱུར་ཚེ། ང་ལ་གར་ཡོང་མི་ཤེས་པའི་བྲེལ་རྟབ་ཅིག་གམ། བློ་ཁ་མི་བདེ་བའི་འཚུབ་ཆ་ཞིག་སྐྱེ་བར་བྱེད་པ་དང་། རང་གི་འདུག་གནས་སུ་ཏབ་ཅིག་ལའང་སྡོད་མི་ཚུགས་པ་ལྟ་བུ་ཞིག་ཡོང་གིན་པ་བདེན་དུ་ཆུགས་ཀྱང་། དེ་དག་ནི་ཁོ་སུ་ཡིན་དང་མིང་ལ་ཅི་ཟེར་བར་འབྲེལ་བ་ཅི་ཡང་མེད། ཡང་གཅིག་བཤད་ན། ངས་ཁོ་ངོ་ཤེས་ཀྱིན་ཡོད་དེ། ཁོ་ནི“གསེར་གྱི་རྣ་ལོང་ཡ་གཅིག”མིན་ནམ། 
       ངའི་མིག་གིས་མུ་མཐུད་དུ་འཛུར་བ་མེད་པར་གྲུ་ཟུར་གྱི་ཁོའི་འདུག་གནས་ལ་ཅེར་ནས་བསྡད་ཡོད།
       ལམ་ཕྲད་དེ་དང་དེའི་རྗེས་ནས། ངས་བསམ་བཞིན་ནམ་བསམ་བཞིན་མ་ཡིན་པ་རང་གིས་ཀྱང་ཐག་མི་ཆོད་པའི་སེམས་འདུན་ཞིག་གིས་ཀུན་ནས་བསླངས་ཏེ། ཁོ་དང་ཐག་མི་རིང་བའི་ཁ་གཏད་ཀྱི་འདུག་གནས་དེར་འདུག་རྐྱང་བྱས་པ་ཡིན། དེ་ནས་བཟུང་། གྲུ་ཟུར་གྱི་ཁོའི་འདུག་གནས་ཕྱོགས་སུ་བལྟ་རྒྱུའང་རྒྱུན་གོམས་ལྟ་བུ་ཞིག་ཏུ་གྱུར་ཡོད།
       རྣ་ལོང་འདི་ཁོའི་ཡིན་པ་འདྲ།” ངས་ཆིག་ལབ་ལྟ་བུ་ཞིག་བྱས།
       “ཁྱོད་ལ་དངོས་གནས་གཟའ་ཕོག་འདུག ཁོ་ཨེ། སྐྱེས་པ་གསེར་གྱི་རྣ་ལོང་འདོགས་མཁན་ཞིག་གང་ན་ཡོད། ཡོད་པའི་དབང་དུ་བཏང་ནའང་། འདི་ནི་སློབ་གྲྭའི་དཔེ་མཛོད་ཁང་ཡིན་པ་ལས་འབྲོག་པའི་རྩྭ་ཐང་མ་རེད། ཧ་ཧ།” གྲོགས་མོ་སྔར་ལྟར་གད་མོ་དགོད་ཀྱིན་འདུག སྐད་མགོ་དམའ་མོས་གད་མོ་བསླུག་བསླུག་དགོད་ཀྱིན་འདུག
       “་་་་་་་་་་་”
       ངས་མུ་མཐུད་དུ་ཁོའི་ཕྱོགས་སུ་ཞིབ་ཏུ་ལྟ་བཞིན་ཡོད།
       ཁོ་སྔར་ལྟར་འདུག་གནས་དེ་གར་བསྡད་དེ། མིག་ཟུང་གིས་དེབ་ངོས་ཀྱི་ཡིག་འབྲུ་དག་རེ་རེ་བཞིན་གཡོན་སྣེ་ནས་གཡས་སྣེ་རུ་འདེད་ཀྱིན་མཆིས། ལག་གཡས་ཀྱིས་ལོབས་ཕྱོགས་ལྟར་ཅུང་ཟད་འཇིལ་ལིར་འཁྱིལ་བའི་སྐྲ་ལོ་དེ་ལྟག་པར་ཤད་ཙམ་དང་། མཐའ་སྒྲོམ་ནག་པོ་ཅན་གྱི་མིག་ཤེལ་དེ་ཡར་འདེད་ཙམ་བྱེད། བལྟས་ཚོད་ལ་ཡོད་ཚད་སྔར་ལྟར་རྒྱུན་ལྡན་བག་ལྷོད་ཅིག་ཏུ་འདུག ཡིན་ནའང་། ཞིབ་མོར་བལྟས་ཚེ་གསེར་འོད་ལམ་ལམ་འཕྲོ་བའི་གསེར་གྱི་རྣ་ལོང་ཆུང་ངུ་དེ། གསེར་འོད་ཀྲིག་ཀྲིག་ངང་ཁོའི་ཟ་འགྲམ་གྱི་ཁ་མལ་ན་མི་འདུག
       “རྣ་ལོང་འདི་དངོས་གནས་ཁོའི་རེད” ངས་ཁ་ཚོན་ཆོད་པའི་སྒོ་ནས་དེ་སྐད་བཤད།
       “ཡ་མཚན། ངས་རྐུབ་སྟེགས་སྟེང་སྡོད་པའི། བུ་མོ་རེ་རེའི་རྣ་བར་ཞིབ་ལྟ་བྱས་མོད། རྣ་འཛེར་འདིའི་ཡ་དེ་བཏགས་པའི་བུ་མོ་ཞིག་མཐོང་མ་སོང་། ཡང་ན་མོ་དཔེ་མཛོད་ཁང་གཞན་ཞིག་ལ་བུད་སོང་ངམ།” གྲོགས་མོས་དེ་ལྟར་ཟེར་བཞིན་དཔེ་མཛོད་ཁང་ལ་སྐོར་ལྟ་ཞིག་བྱས་རྗེས་ཕྱིར་ངའི་གམ་དུ་སླེབས།
       “འདི་ལ་ཆ་ཡ་ཞིག་ཡོད་པ་མ་རེད། གསེར་གྱི་རྣ་ལོང་ཡ་གཅིག འདི་ལ་ཆ་ཡ་ཞིག་ཡོད་ན་ངས་བྱ་ཆོག………”ངས་ཡུན་རིང་སེམས་ལ་ཉར་བའི་སྐད་ཆ་ཞིག་དེ་ལྟར་ཕྱི་རུ་ཐལ་སོང་བ་འདྲ། ངས་བསྟན་དོན་ཤུགས་སུ་བསྐུངས་པའི་སྐད་ཆ་མགུ་གང་བ་ཞིག་བཤད་སོང་བ་དང་འདྲ་བས། ངའི་སེམས་པ་བདེ་ལྷང་ངེ་བ་ཞིག་ཏུ་གྱུར།
       “དངོས་གནས་གཟའ་བཤད་བྱེད་ཀྱིན་འདུག.....”གྲོགས་མོ་བུད་སོང་།
       ཉིན་དེར། ངེད་གཉིས་དེ་ལྟར“ཕྲད”ཅིང་དེ་ལྟར“འདྲེས”སོང་།
       གཅིག་བྱས་ན། མི་རྣམས་རྒྱུན་ལྡན་གྱི་ལམ་ཕྲད་ཅིག་ནས་སྟེས་དབང་གི་ལས་འཕྲོ་ཞིག་ཏུ་གྱུར་ནའང་ཅིས་མི་ཆོག མ་མཐའ་ཡང་ངས་ནི་སྟེས་དབང་ལྟ་བུའི་ལམ་ཕྲད་དེ་གསང་བ་ལྟ་བུའི་ལས་འཕྲོ་ཞིག་ཏུ་བརྩིས་ཡོད་ཀྱང་སྲིད། གང་ལྟར། དེ་རིང་གསེར་གྱི་རྣ་ལོང་ཡ་གཅིག་དེ་འདི་ལྟར་ངའི་མདུན་དུ་ལྷུང་ཡོང་བ་འདིས་ཀྱང་མང་བོ་ཞིག་འགྲེལ་བརྗོད་བྱེད་ཀྱིན་མི་འདུག་གམ། ཁྲིགས་ཁྲིགས་མེད་ན། འདི་ནི་ལས་ཀྱི་བཀོད་སྒྲིག་ཅིག་ཡིན་ཡང་སྲིད། ངའི་ནང་སེམས་ལ་སྨྲ་མི་ཤེས་པའི་ཚོར་བ་ཞིག་གིས་ཡོངས་སུ་བརྟས་པར་གྱུར་སོང་།
       གྲོང་ཁྱེར་འདིར་ཟླ་དྲུག་པར་ཚ་གདུག་ཧ་ཅང་ཆེ་སྟེ། ངས་སློབ་གྲོགས་ཚོ་དང་མཉམ་དུ་མཐར་ཕྱིན་མཉམ་པར་བསྐྱོན་ཆེད་དམ། དེ་ལས་ལྷག་པའི་དམིགས་འདུན་ལྐོག་གྱུར་པ་ཞིག་གི་ཆེད། ཞོགས་དུས་ཀྱི་ཆུ་ཚོད་གཉིས་ལྷག་སྤྱད་ནས་བྱུགས་པའི་སྐག་ཚོས་ཀྱང་རྔུལ་ཆུས་བརྫིས་འདུག སླར་མཐིལ་དུ་སེམས་ཆུང་ངང་ཉར་བའི་གསེར་གྱི་རྣ་ལོང་ཡ་གཅིག་དེའང་རྔུལ་ཆུས་བརླན་འདུག ཚ་བ་འདིས་དངོས་གནས་ངའི་ཕྱི་ནང་གསང་གསུམ་ལ་ཚ་སྲེག་གི་མདུང་སྣེས་ཡང་ཡང་བསྣུན་ཡོང་། འདི་ནི་དབྱར་ཟླ་དྲུག་པས་རང་གི་ལས་འགན་ལག་བསྟར་བྱེད་པར་དུས་ཚོད་མང་བོ་ལྷག་མི་འདུག་ཅེས་པ་དང་ཡང་འདྲ་བས། ང་ལ་སྡོད་མི་ཚུགས་པའི་བྲེལ་རྟབ་བམ་འཚུབ་ཆ་ཡང་ཡང་སྐྱེས་བྱུང་།
       ང་སྐྱོར་ཀློག་ཐང་ཆེན་བརྒལ་ནས་རིག་ཞིབ་ཐོག་ཁང་གི་ཉེ་སར་བསྐྱོད་པ་དང་། དེ་ནས་ཡང་བསྐྱུར་མེ་ལོང་རྫིང་ཆུང་བསྐོར་ནས་དཔེ་མཛེད་ཁང་གི་ཕྱོགས་སུ་སོང་། དེ་རུ་སློབ་ཐོན་སློབ་མའི་ལྭ་བ་ནག་པོ་གོན་པའི་མི་རེ་རེ་བཞིན་མིག་བཤེར་བྱེད་པའི་ཚེ། ངའི་སྣང་བ་ཞིག་ལ། ང་ནི་རང་ཉིད་ལ་མི་དབང་བར་དུམ་ཆ་གཉིས་སུ་ཕྱེ་ནས་འགྲོ་བཞིན་པ་དང་འདྲ། ཆ་གཅིག་གིས་མིག་འདྲིས་སུ་སོང་བའི་ངོ་གདོང་དེ། འཕྲལ་མ་ཉིད་དུ་མཐོང་ལམ་དུ་མངོན་རྒྱུ་བྱུང་ན་དགའ་བ་ལ་ཨང་བསམས་ཏེ་མཆོང་རྒྱུག་བྱེད་ཅིང་མཆིས། ཆ་གཅིག་གིས་གནས་འདི་རུའམ་ཀན་དུ་ད་ལྟའམ་འཕྲལ་དུ་ཁོ་ལ་འཕྲད་མི་ཡོང་ངམ། དངོས་གནས་འཕྲད་པར་གྱུར་ཚེ་ཅི་བྱ་སྙམ་ནས་གང་ཞིག་ལ་འབྲོ་སྙིང་དང་གང་ཞིག་ལ་གབ་འདོད་སྐྱེས། དོན་དངོས་ཀྱི་ང་ནི་གང་ཡིན་ནམ།
       ཚོད་དཔག་བྱས་ན། ཁོས་དཔེ་མཛོད་ཁང་གི་སྒོ་མདུན་དུ་དྲན་རྟེན་གྱི་འདྲ་པར་ཞིག་ཅིས་ཀྱང་བསྐྱོན་ངེས་ཡིན། དེ་ལ་དོགས་པ་ཟ་མི་དགོས། རྒྱུ་མཚན་ནི་ཁོའང་ང་ནང་བཞིན་དཔེ་མཛོད་ཁང་ལ་མདངས་རྩིས་ཤིན་ཏུ་ཆེ་ངེས། ངེད་གཉིས་དཔེ་མཛོད་ཁང་ལ་དགའ་བའི་རྒྱུ་མཚན་ཡང་འདྲ་མིན་མི་ཤེས་ལ། འདྲ་མིན་དེ་ཚོད་དཔག་བྱ་དཀའ་བའི་ལྐོག་གྱུར་ཞིག་ཡིན་ཡང་སྲིད། གང་ལྟར་ཁོ་དཔེ་མཛོད་ཁང་ལ་མདངས་རྩིས་ཆེ་བ་དེ། ངས་གདེང་ཚོད་ཆེན་པོས་ཁ་ཚོན་གཅོད་ཐུབ། དེ་བས་ངས་སྒོ་ཁ་འདི་རུ་ཁོ་ལ་བསྒུག་བསྡད་ན་འགྲིག་སྙམ།
       སློབ་ཆེན་དུ་འབྱོར་བ་ནས། ངས་ཉི་མ་རེ་རེའི་སློབ་ཁྲིད་ཀྱི་དུས་ཚོད་ཕུད། དུས་ཚོད་མང་ཤོས་དཔེ་མཛོད་ཁང་དུ་བསྐྱལ་བ་ཡིན། དེ་ནི་ང་དཔེ་ཀློག་ལ་ཤིན་ཏུ་དགའ་བས་ཡིན་ཞེས་བཤད་མི་སྤོབས་ནའང་། ཉིན་དེར། གསེར་གྱི་རྣ་ལོང་ཡ་གཅིག་དང་སྟེས་དབང་གིས“ཕྲད”སའང་བྲག་རི་ལྟར་བརྩིགས་པའི་དཔེ་སྒྲོམ་དག་གི་བར་དེ་ཡིན། དུས་དེ་ནས་བཟུང་། གསེར་གྱི་རྣ་ལོང་ཡ་གཅིག་དང་ཅུང་རྒྱང་ཐག་རིང་བའི་ཁ་གཏད་ཀྱི་འདུག་གནས་དེར་བསྡད་དེ། དཔེ་ཀློག་བྱེད་ཁུལ་ངང་མི་དྲན་དགུ་དྲན་བྱེད་སའང་དཔེ་མཛོད་ཁང་གི་གྲུ་ཟུར་དེ་ཡིན་པ་བསྙོན་དུ་མེད། དེ་བས་དཔེ་མཛོད་ཁང་ནི་ངའི་ནང་སེམས་ལྷོད་ལ་དབབ་སའི་གནས་དེ་ཡིན་ལ། ཡང་ནང་སེམས་བག་ལྷོད་ངང་སྡོད་ཐབས་ཡེ་ནས་མེད་པའི་གནས་དེའང་ཡིན་ངེས། མདོར་ན་ང་ལ་མཆོན་ན། དཔེ་མཛོད་ཁང་ནི་དཔེ་ཀློག་ཡིན་མིན་གྱི་དུས་ཚོད་ཅི་རིགས་བསྟིམས་སའི་རྨི་ལམ་གྱི་ཞིང་ཁམས་ཆུང་ཆུང་ཞིག་ཡིན་ཆོག་པས། ནམ་ཡང་བརྗེད་ཐབས་མེད་པའི་ཡིད་འོང་གི་གནས་མལ་དྲོན་མོ་དེའང་ཅི་ལ་མིན། ངས་ཁ་པར་བླངས་ནས་སྒོ་བྱང་སྟེང་གི་ཡིག་འབྲུ་ཆེན་པོ་དེ་གསུམ་པར་དུ་བསྐྱོན་པ་ཡིན།
       “ཅི་ཞིག་འཚོལ་གྱིན་ཡོད།” ངས་རྒྱབ་ཁུག་གི་ཕྱི་རིམ་ནང་རིམ་གྱི་ཁུག་མ་ཆུང་ངུ་དག་གཅིག་རེ་གཅིག་རེ་བྱས་ནས་སློག་གིན་པ་མཐོང་ཐེངས་རེར། གྲོགས་མོས་ང་ལ་དེ་ལྟར་འདྲི་སྲིད།
       “གསེར་གྱི་རྣ་ལོང་ཡ་གཅིག་དེ།”
       “གསེར་གྱི་རྣ་ལོང་ཡ་གཅིག་དེ་ད་དུང་བདག་པོར་མ་སྤྲད་དམ།”
       “་་་་་་་་ ”
       དུས་དེ་ནས་བཟུང་། ངས་གསེར་གྱི་རྣ་ལོང་ཡ་གཅིག་དེ་དཔེ་དེབ་དང་མཉམ་དུ་རྒྱབ་ཁུག་ཏུ་བཅུག་ནས། དཔེ་མཛོད་ཁང་དུ་སོང་བ་ཡིན། ང་ཁོའི་འདུག་གནས་དང་བར་ཐག་ཅུང་རིང་བའི་ཁ་གཏད་དེར་སྡོད་ཐེངས་རེར། བདེ་ལྡན་ཞིང་ཁམས་ཤིག་ཏུ་སླེབས་པ་ལྟར་སེམས་པ་སྐྱིད་པར་འགྱུར་བ་དང་། སུ་ཞིག་གི་པང་ཁུག་ཏུ་འབྱོར་བ་ལྟར་ཡིད་སེམས་ཀྱང་དྲོ་བར་བྱེད། ཡིན་ནའང་། གསེར་གྱི་རྣ་ལོང་ཡ་གཅིག་དེ་ངའི་ལག་ཏུ་སོན་པ་ནས་བཟུང་། ངས་སྔར་ལྟར་སེམས་པ་ལྷོད་ལ་ཕབ་སྟེ། འདུག་གནས་དེར་ཅི་མི་སྙམ་པའི་ངང་། ཁོ་ལ་ལྐོག་ལྟ་བྱེད་བཞིན་སྡོད་ཐབས་ཡེ་ནས་མེད་པ་ཞིག་ཏུ་གྱུར།
       གསེར་གྱི་རྣ་ལོང་ཡ་གཅིག་འདི་ངས་ཅིས་ཀྱང་བདག་པོར་སྤྲད་དགོས། ཁོས་གསེར་གྱི་རྣ་ལོང་ཡ་གཅིག་འདི་མ་བཏགས་ན། ངའི་སེམས་ནང་གི་མིང་དོན་མཚུངས་པའི“གསེར་གྱི་རྣ་ལོང་ཡ་གཅིག”ཡིན་པར་ཡང་སྒྲུབ་བྱེད་ཅིའང་མི་འདུག་པའི་ཚོར་བ་སྟེར།
       ཁོ་ཙོག་ནས་སྡོད་དུས་གམ་ལ་བཅར་ནས་སྟེར་རམ། མིན། ཁོས་དཔེ་ཀློག་བྱེད་སྐབས་ཧ་ཅང་གཟབ་ནན་ཞིག་རེད། སྐབས་རེར་དཔེ་དེབ་ལ་ཅེར་ནས་མགོ་བོ་ལྡེམ་ལྡེམ་ངང་ཅི་ཞིག་ཧ་གོ་བཞིན་ཡོད་པ་དང་འདྲ། དེའི་དུས་ཁོ་ལ་བར་ཆད་བྱ་མི་རུང་། ཁོའི་ནང་སེམས་ཀྱི་སྐྱིད་སྣང་དཀྲོགས་སོང་ན་ཅི་བྱ། སྐབས་རེར། ཁོས་ལག་ཡས་ཀྱི་གྲུ་མོ་ཅོག་ངོས་ལ་བཙུགས་ཤིང་མགོ་བོ་གསེག་ཙམ་གྱིས་ལག་མགོར་ཁེན་ནས་ངལ་གསོ་བར་བྱེད། སྐབས་དེར་གོ་སྐབས་བཙལ་ནས་སྟེར་རམ། དེ་ཡང་མི་རུང་། དེའི་དུས་ཁོས་དཔྲལ་བར་གཉེར་མདུད་ཅིག་ཀྱང་བསྡུས་འདུག་པས། ཅི་ཞིག་ལ་བསམ་བློ་གཏོང་བཞིན་ཡོད་ཀྱང་སྲིད། དེ་དུས་བར་ཆད་གཏོང་ག་ལ་རུང་། ཁོའི་བསམ་གཞིག་གི་རིགས་ལམ་གཅོལ་སོང་ན་ཅི་བྱ། ཡང་སྐབས་རེར། ཁོ་ངའི་གཡས་འགྲམ་ནས་ཆུ་ཁོལ་ལེན་དུའམ་ཆབ་གསང་ལ་འགྲོ་ངེས་པས། དེའི་དུས་མྱུར་མོར་ཡར་ལངས་ནས་སྟེར་དགོས་སམ། ཁོ་སྐྲག་འགྲོའམ། ཁོས་གསེར་གྱི་རྣ་ལོང་ཡ་གཅིག་འདི་ངོས་ལེན་བྱ་སྲིད་དམ། ངས་ནི་ཅི་ཞིག་བཤད་ན་འོས་སམ་ཞེས་ང་ནི་ཅི་བྱ་གཏོལ་མེད་ངང་ལུས་པར་གྱུར།
       གློ་བུར་དཔེ་མཛོད་ཁང་ནང་འུར་ཆིལ་ལེར་གྱུར་སོང་། མི་ཚང་མས་ཚིག་འབྲུ་མི་གསལ་བའི་ངང་གང་ཞིག་གླེང་བཞིན་མཆིས། དེ་ལྟ་བུའི་ཤབ་ཤུབ་ཀྱི་སྒྲ་མང་བོ་ཕྱོགས་གཅིག་ཏུ་འདུས་ན་འུར་སྒྲ་ཆེན་པོ་ཞིག་ཏུ་གྱུར་འགྲོ། ངས་མཐོང་སྣེ་དེད་ནས་ཁོ་ཚོའི་ཕྱོགས་སུ་བལྟས་པ་ན། ཁོ་ནི་མི་ཚོགས་ཀྱི་དཀྱིལ་དུ་རྒྱལ་པོ་ལྟ་བུའི་བཟོ་ལྟའི་ཚུལ་གྱིས་འགྲེང་སྡོད་ཅིང་། དཔེ་ཀློག་པ་ཐམས་ཅད་ནི་བློན་འཁོར་ཡིན་པ་ལྟར་ཁོ་བསྐོར་ནས་འདུག
       “སུས་ངའི་གསེར་གྱི་རྣ་ལོང་ཡ་གཅིག་རྙེད་ན། དེ་ལ་རྒྱལ་པོ་ངས་བྱ་དགའ་ཆེན་པོ་སྟེར་རྒྱུ་ཡིན།”
       “རྒྱལ་པོ་ལགས། བྱ་དགའ་ཅི་གནང་རྒྱུ།”
       “སྐྱེས་པ་ཞིག་གིས་ངའི་གསེར་གྱི་རྣ་ལོང་ཡ་གཅིག་དེ་རྙེད་ན་ངས་རྒྱལ་སྲིད་ཀྱི་ཕྱེད་ཀ་སྟེར་རྒྱུ་ཡིན། གལ་ཏེ་སྐྱེས་མ་ཞིག་གིས་ངའི་གསེར་གྱི་རྣ་ལོང་ཡ་གཅིག་དེ་རྙེད་ན་བཙུན་མོར་མངའ་གསོལ་རྒྱུ་ཡིན།”
       དེར་འདུས་ཀྱི་ཚང་མས“རྒྱལ་པོའི་བཀའ་ལ། ཡར་བསློག་མེད། རྒྱལ་པོ་ཁྲི་ལོར་ཤོག”ཅེས་འུར་བརྒྱབ་སོང་།
       ང་ལའང་དགའ་སྤྲོ་ཚད་མེད་སྐྱེས་ནས་རང་ཉིད་ཀྱི་ལག་པ་ཡར་འགྱོག་རྩིས་བྱས་པ་ན། ངའི་ལག་པ་ནི་ཁྲོ་ལྕགས་ཀྱི་ཀ་བ་ཞིག་ལྟར་ཤིན་ཏུ་ལྕི་བས་ཡར་འདེགས་ཐབས་མ་བྱུང་ལ། ཡང་རུལ་ཟགས་སུ་གྱུར་པའི་ཤིང་སྡོང་རྒས་འཁོགས་ཤིག་ལྟར་འགུལ་བར་ཡང་བྱ་མི་ཐུབ། གནད་འགག་གི་སྐབས་དེར་ངས་ཚོར་བ་ཡོངས་སུ་ཉམས་པའི་རང་ཉིད་ཀྱི་ལག་པར་སྡང་སེམས་དང་སེམས་ཁུར་མཉམ་དུ་སྐྱེས། དེ་ནས་སེམས་ཤུགས་དང་ལུས་སྟོབས་ཡོད་ཚད་རང་གི་ནད་པར་གྱུར་པའི་ལག་པའི་སྟེང་བསྡུས་ཏེ། ཤུགས་ཀྱིས་ཡར་བཀྱགས་པ་ན། ཡོད་ཚད་དཀར་གསལ་ལེར་གྱུར་སོང་།
       ཁོས་སྔར་མལ་དེ་རུ་དཔེ་ཀློག་བྱེད་བཞིན་མཆིས་ལ། ཁོའི་ཉེ་འཁོར་གྱི་མི་རྣམས་ཀྱིས་ཀྱང་ཁོ་དང་མཚུངས་པར་དཔེ་ཀློག་བྱེད་བཞིན་མཆིས། ང་གཉིད་ལས་སད་དུས། ངའི་ལག་པ་ནི་སྦྲིད་ནས་འགུལ་དཀའ་བ་ཞིག་ཏུ་གྱུར་ཡོད་ཅིང་། མཐའ་སྐོར་གྱི་ཡོད་ཚད་ལའང་གྲག་འགུལ་དང་འགྱུར་བ་ཅི་ཡང་མི་འདུག་པས། ངས་ད་གཟོད་ང་རྨི་ལམ་གྱི་ཞིང་ཁམས་ཤིག་ཏུ་ཕྱིན་པ་ཚོར།
       ངའི་ངོ་གདོང་ཧྲིལ་བོ་ཚ་བེར་བེར་ཞིག་ཏུ་གྱུར་འདུག
       དེ་ལྟར། ངས་གསེར་གྱི་རྣ་ལོང་ཡ་གཅིག་བདག་པོར་སྤྲོད་མ་ཐུབ་པར་ཡུན་རིང་ཕྱིན། ངས་རང་སེམས་ལྷོད་ལ་ཕབ་ནས་དཔེ་ཀློག་བྱ་མ་ཐུབ་པར་ཡུན་རིང་འགོར། ཐ་ན་མགོ་བོ་ཅོག་ངོས་སུ་བཞག་ནས་གཉིད་ཐུན་སྐྱིད་པོ་ཞིག་ལའང་རོལ་མ་ཐུབ་པར་ཡུན་རིང་ཕྱིན་སོང་།
       རིམ་བཞིན་གསེར་གྱི་རྣ་ལོང་ཡ་དེའང་ངའི་ཆ་ཤས་ལྟ་བུ་ཞིག་ཏུ་གྱུར་སོང་། གང་ལྟར། ངས་གསེར་གྱི་རྣ་ཁོང་ཡ་དེ་རང་གི་ལག་ཏུ་ཉར་ན། ང་དང་ཁོའི་བར་ལ་འབྲེལ་བ་ངེས་ཅན་ཞིག་ལྡན་པའི་སྣང་བ་སྟེར། སྐབས་རེར་ཁོས་འདུག་གནས་སུ་མགོ་བོ་དགྱེ་ནས་ཕར་ལྟ་ཚུར་ལྟ་རེ་བྱེད་དུས། ངས་མྱུར་སྟབས་ཀྱིས་རང་གི་མགོ་བོ་སྨད་ཅི་ཐུབ་སྒོས་ནན་ཏན་ངང་དཔེ་ཀློག་བྱེད་བཞིན་པའི་ཚུལ་སྟོན་དགོས་བྱུང་། ཁོས་མགོ་བོ་སྨད་ཅིང་ཡང་བསྐྱར་དཔེ་དེབ་ལ་ཅེར་ནས་སྡོད་དུས། ངས་སེམས་པ་བདེ་ལ་འབབ་ཐུབ་ཙམ་བྱེད་མོད། གོ་སྐབས་ཤིག་ཤོར་སོང་བ་ལྟ་བུའི་འགྱོད་སྣང་ཞིག་ཀྱང་སྐྱེས་ཡོང་།
       མཚམས་རེར། ཁོས་མགོ་བོ་དགྱེ་ནས་ཚུར་ཕྱོགས་སུ་ལྟ་ཙམ་དང་འཛུམ་ཆུང་རེ་མངོན་ཙམ་བྱས་པ་ཡིན་ན། ང་ལ་ཤ་གསེང་ནས་ཁོང་འདར་ལྟ་བུ་རེ་རྒྱག་ཅིང་། ཅི་ཡིན་འདི་ཡིན་མེད་པར་ཤིན་ཏུ་དོགས་མི་བདེ་བ་ཞིག་ཏུ་འགྱུར་ལ། ངོ་གདོང་ཡང་ཚ་ལམ་ལམ་བྱེད་བཞིན་ཡོད། ཚོར་བ་དེ་ནི་གཏིང་རིམ་ཞིག་ནས་རྦ་རླབས་འཕྱུར་བ་ནང་བཞིན་སྙིང་ཆུང་ཡང་ལྷོག་ལྷོག་ལྡིང་བར་བྱེད་ལ། ཡང་གང་ཞིག་ནས་ལྷོད་ཀྱིས་ལྡང་འོང་བའི་རླུང་བུ་བསིལ་མོ་ཞིག་ལྟར། ལུས་སེམས་གཉིས་ཀར་བདེ་བ་ཞིག་ཀྱང་སྦྱིན་པར་བྱེད།
       ཕྱིས་སུ། ང་ནི་ཚོར་བ་དེ་འདྲར་དགའ་ཞིང་དེ་ལྟར་ལོབས་པར་གྱུར་པས། གསེར་གྱི་རྣ་ལོང་ཡ་གཅིག་དེ་བདག་པོར་སྤྲོད་མ་འདོད་པར་བདག་གིར་བཟུང་བ་ཡིན།
       “ཅི་ཞིག་འཚོལ་གྱིན་ཡོད།”ངས་རྒྱབ་ཁུག་གི་ཕྱི་རིམ་ནང་རིམ་གྱི་ཁུག་མ་ཆུང་ངུ་དག་སློག་བཞིན་ཡོད་པ་མཐོང་བས། གྲོགས་མོས་ཡང་བསྐྱར་ང་ལ་དེ་ལྟར་དྲིས་སོང་།
       “གསེར་གྱི་རྣ་ལོང་ཡ་གཅིག་དེ།”
       “གསེར་གྱི་རྣ་ལོང་ཡ་གཅིག་དེ་ད་དུང་བདག་པོར་མ་སྤྲད་དམ། རྙེད་དངོས་ཀྱི་བདག་པོ་ངོ་མ་ངོས་ཟིན་ཡང་། དེ་ཕྱིར་བདག་པོར་མ་སྤྲད་ན་དེ་ལ་རྐུས་ཟེར་བ་རེད།”གྲོགས་མོས་ང་ལ་དེ་ལྟར་བཤད་བྱུང་།
       “གསེར་གྱི་རྣ་ལོང་ཡ་གཅིག་དེ་ངའི་ཡིན།” གསེར་གྱི་རྣ་ལོང་ཡ་གཅིག་དེའི་བདག་པོ་ངོ་མ་ང་ཡིན་ནམ། ང་ཡིན་ན་ཅི་མ་རུང་།
       དེ་རིང་། ང་ལ་སྔ་ན་མེད་པའི་སྤོབས་པ་ཆེན་པོ་ཞིག་རྒྱས་སོང་། ང་ཅིས་ཀྱང་གསེར་གྱི་རྣ་ལོང་ཡ་གཅིག་དེའི་བདག་པོ་དངོས་སུ་ངོ་ཐུག་དགོས། གསེར་གྱི་རྣ་ལུང་ཡ་ཅིག་དེ་སྤྱིར་བདག་པོར་སྤྲོད་དགོས། རེད་ལགས། དྲན་ཚུལ་འདིར་གནད་དོན་ཅི་ཡང་མི་འདུག གསེར་གྱི་རྣ་ལོང་ཡ་གཅིག་དེ་ངའི་ལག་ན་གཅིག་དང་སེམས་ན་གཅིག་ཡོད། ལག་ནང་གི་དེ་དང་སེམས་ནང་གི་དེ་གཉིས་ངོ་བོ་ངོ་འཕྲོད་དུ་འཇུག་རྒྱུ་ནི་ངའི་དུས་ཡུན་རིང་བོའི་ཕུགས་འདུན་ཉག་གཅིག་ཡིན། དེ་ལྟར་བྱུང་ན་གསེར་གྱི་རྣ་ལོང་ཡ་གཅིག་དེ་བདག་པོར་འཕྲོད་སོང་བ་རེད། ང་ནི་གསེར་གྱི་རྣ་ལོང་ཡ་གཅིག་གི་བདག་པོར་གྱུར་སོང་བ་རེད། འགྲིག་འདུག ངས་ཁོའི་མིང་ལ་ཐད་ཀར་གསེར་གྱི་རྣ་ལོང་ཡ་གཅིག་ཏུ་བཏགས་པའང་དོན་ལ་གནས་སོང་བ་རེད། ང་གསེར་གྱི་རྣ་ལོང་ཡ་གཅིག་གི་བདག་པོ་ངོ་མར་འགྱུར་བའི་རེ་འདུན་ཡང་དོན་ཐོག་ཏུ་སྨིན་སོང་བ་རེད། ང་ཡི་གསེར་གྱི་རྣ་ལོང་། གསེར་གྱི་རྣ་ལོང་ཡ་གཅིག
       རེད། ཁོ་རེད། ཏག་ཏག་ཁོ་རེད། ཁོ་དཔེ་མཛོད་ཁང་གི་སྒོ་མདུན་ནས་ངའི་ཕྱོགས་སུ་སླེབས་བྱུང་། ངའི་ལུས་པོ་འདར་བྱུང་། སྙིང་ཆུང་ལྡིང་བྱུང་། རྔུལ་ཆུ་ཕྲུམ་ཕྲུམ་བཞུར་བྱུང་། ད་ནི་འབྲོ་བར་རྩོམ་མམ་ཨུ་ཚུགས་ཀྱིས་སྡོད་ཨང……