ངོས་དང་པོ > ཆེད་དོན། > གངས་ལྗོངས་ཀུན་གླེང་། > བོད་ཀྱི་སྙན་ངག་པའི་སྙན་དེབ་དབྱི་འགྱུར་མ་ཞིག་རྒྱལ་སྤྱིར་བཀྲམ་འདུག

བོད་ཀྱི་སྙན་ངག་པའི་སྙན་དེབ་དབྱི་འགྱུར་མ་ཞིག་རྒྱལ་སྤྱིར་བཀྲམ་འདུག

རྩོམ་པ་པོ།： ཡོང་ཁུངས།：མཚོ་སྔོན་ཞིང་ཆེན་སྲིད་གཞུང་དྲ་བ། དུས་ཚོད།：2026-10-03 12:06:30 ཀློག་གྲངས།：

ཉེ་ལམ། བོད་ཀྱི་རྩོམ་པ་པོ་ས་དམར་གྲགས་པའི་སྙན་དེབ་དབྱི་འགྱུར་མ«འཁོར་བའི་མིང»ཞེས་པ་རྒྱལ་སྤྱིའི་སྟེང་དངོས་སུ་འགྲེམ་སྤེལ་བྱས།

སྙན་དེབ་ཀྱི་རྒྱབ་ཤོག

2024ལོར་ས་དམར་གྲགས་པའི་རྒྱ་ཡིག་སྙན་དེབ《活在家里的名字》ཞེས་པ་ལུའུ་ཞིན་རྩོམ་རིག་སློབ་གླིང་གི“གཞི་རྐང་སྐྱེད་སྲིང་ལས་གཞིའི”(培根工程)དཔེ་ཚོགས་སུ་བདམས་ཤིང་། 2025ལོའི་ཟླ་དང་པོར་ཨན་ཧུའེ་རིག་རྩལ་དཔེ་སྐྲུན་ཁང་གིས་པར་དུ་བསྐྲུན། སྙན་དེབ་འདི་དབྱི་ཐ་ལའི་ནས་དཔར་པའི་ས་དམར་གྲགས་པའི་སྙན་དེབ་གཉིས་པ་དེ་རེད་འདུག

2026 ལོའི་ཟླ9པའི་ཚེས24ཉིན། བོད་ཀྱི་སྙན་ངག་པ་ས་དམར་གྲགས་པའི་སྙན་དེབ«འཁོར་བའི་མིང»(བོད་འགྱུར་གཞན་དུ་དེབ་འདིའི་མིང་ལ«རང་ཁྱིམ་གསལ་བྱེད་ཀྱི་མིང་ཐོ»ཞེས་བསྒྱུར་ཡོད།)ཞེས་པའི་དབྱི་ཐ་ལའི་སྐད་ཀྱི་འགྱུར་མ་དབྱི་ཐ་ལིའི་ཧྥ་ཏཱ་ཞི་ཡཱ(Fiori d’Asia Editrice)པར་སྐྲུན་ཁང་ནས་དངོས་སུ་པར་སྐྲུན་གནང་སྟེ་རྒྱལ་སྤྱིའི་སྟེང་འགྲེམ་སྤེལ་བྱས་ཤིང་། འགྱུར་དེབ་འདི་དབྱི་ཐ་ལིའི་རྩོམ་པ་པོ་དང་རྒྱའི་རིག་པ་བ། སྙན་ངག་པ་ཧྥེ་ཝོ་ལཱི་ཕེ་ཁུ(FioriPicco)ལྕམ་མོ་ལགས་ཀྱིས་བསྒྱུར་ཅིང་ཞུས་ལ། ཁོང་གིས་ཁ་གསལ་ཞིང་ངག་བདེ་བའི་སྒོ་ནས་མ་ཡིག་གི་ཉམས་དང་རྟོགས་པ་ཉེ་བར་བསྟན།

འགྱུར་དེབ་ཀྱི་རྒྱབ་ཤོག་རི་མོ་ནི་དབྱི་ཐ་ལིའི་གཞོན་སྐྱེས་སྒྱུ་རྩལ་པ་ཕེ་ཁུ་ཀྲོ་ཨ་ཞེ་ཡཱ(Asia Picco Zhao)ལགས་ཀྱིས་གསར་རྩོམ་གནང་བའི་ལག་བྲིས་རི་མོ་དངོས་ཡིན་ཞིང་། དེ་ནི་སྙན་དེབ་གྱི་ནང་དོན་དང་ཀྲུང་གོའི་བོད་ལྗོངས་ཀྱི་ཁོར་ཡུག་ཉམས་དགའ་བ་ལ་གཞིར་བྱས་ཏེ་གསར་རྩོམ་གནང་ཞིང་ཐུན་མིན་གྱི་ཁྱད་ཆོས་དོད་པོ་ལྡན། གཞན་དེབ་འདིའི་མཛེས་སྤྲས་ཇུས་འགོད་ནི་དབྱི་ཐ་ལིའི་ཇུས་འགོད་པ་མཱ་ནོ་ཨེ་ལཱ་མེ་རེ་ཧུ་ཐེ(Manuela Mereghetti)ལགས་ཀྱིས་ལེགས་པར་གྲུབ་ཅིང་། གཙང་ལ་མཛེས་ཉམས་ལྡན། མིག་སྔར། འགྱུར་དེབ་འདི་པར་སྐྲུན་ཁང་གིས་རྒྱལ་སྤྱིའི་འབྲེལ་ལམ་བརྒྱུད་ནས་རྒྱལ་ཁབ་ཀུན་ལ་ཁ་གཏད་དེ་འགྲེམ་འཚོང་བྱེད་བཞིན་འདུག

དེ་སྔོན«འཁོར་བའི་མིང»ཞེས་པའི་སྙན་དེབ་འདིར་རྒྱལ་སྤྱིའི་རྩོམ་རིག་ཚོགས་པས་གདེང་འཇོག་ཚད་མཐོན་པོ་གནང་ཞིང་། 2025ལོའི་ཟླ11པར། འགྱུར་དེབ་ཉིད་དབྱི་ཐ་ལིའི་རྩོམ་རིག་གྲོང་ཁྱེར་ལི་ཡཱ་སི་ཐུའི“མདུན་ལྗོངས་ཚོད་ལྟ་ཁང”(Premio Laboratorio Della Visione)གི་རྒྱལ་སྤྱིའི་སྙན་ངག་ལོ་ཙཱའི་བྱ་དགའ་ཨང་དང་པོ་ཐོབ་ལ། སྐབས་དེའི་འགྲན་ཞུགས་རྟིང་རྩོད་ཁྲོད་རྒྱལ་ཕྱིའི་སྙན་ངག་གི་རྒྱལ་ཁ་ཐོབ་མཁན་གཅིག་པུ་ཡིན།

དེ་ཡང་རྒྱལ་སྤྱིའི་དཔྱད་ཞིབ་ཚོགས་པའི་ཚོགས་གཙོ་སྟེ་ཉིའུ་ཅིན་སློབ་ཆེན་གྱི་དགེ་རྒན་ཆེན་མོ་ཨེ་མཱ་ནོ་ཨེ་ལཱ་ཐན་ཏི་ལའོ(Emmanuela Tandello)ལགས་ཀྱིས་གསུངས་རྒྱུར། ས་དམར་གྲགས་པའི་སྙན་ངག་ནི་ཐེངས་འདིའི་འགྲན་ཞུགས་ཁྲོད་ཆེས་ཡིད་སེམས་སྤྲོ་བསྐྱེད་ཀྱི་བརྩམས་ཆོས་ཤིག་ཏུ་མཐོང་ཞེས་གདེང་འཇོག་གནང་ཞིང་། གཞན་ཚོགས་ཞུགས་སྐུ་མགྲོན་དང་རྩོམ་རིག་རྟེན་མཛོད་ཁང་གི་ལས་སྣེ་བ་བཅས་ཀྱིས་ཚད་མཐོའི་གདེང་འཇོག་མང་དུ་གནང་།

ཐེངས་འདིར་དབྱི་ཐ་ལིའི་སྐད་ལམ་ནས་པར་སྐྲུན་ལེགས་འགྲུབ་བྱུང་བ་འདི། བོད་ཀྱི་འཚོ་བའི་བརྗོད་བྱས་བལྟམས་པའི་དེང་རབས་སྙན་ངག་མེས་རྒྱལ་གྱི་པང་ཁུག་ལས་བརྒལ་ཏེ། ཀྲུང་ཕྱིའི་སྙན་ངག་འབྲེལ་འདྲིས་ཀྱི་ལམ་ཁ་སྔར་བས་ཡངས་པོར་འགྱུར་བའི་རྟེན་འབྲེལ་ལོ། །

སྒྱུར་མཁན།

རྒྱ་ཡིག་གི་མིང་ལ་ཞོལ་ལེན་ཟེར་ཞིང་། དབྱི་ཐ་ལིའི་མིང་དུ་གྲགས་པའི་རྒྱ་རིག་པ་མཁས་ཅན། རྒྱལ་སྤྱིའི་རྩོམ་པ་པོ། ཡིག་རིགས་སྣ་མང་གི་ལོ་ཙཱ་བ། དབྱི་ཐ་ལིའི་ཧྭ་ཏ་ཞི་ཡ་དཔེ་སྐྲུན་ཁང་གི་གཙོ་འཛིན། ཝེ་ཉི་སིའི་ཤར་ཕྱོགས་སློབ་གྲྭ་ཆེན་མོར་རྒྱ་ཡིག་དང་ཀྲུང་གོའི་རྩོམ་རིག་ཆེད་ལས་སྦྱངས་ཏེ་སློབ་ཐོན་བྱུང་། བརྩམས་ཆོས་ལ་སྒྲུང་ཐུང«ང་རང་ཁྱེད་ལ་དགའ། མཚམས་སྤྲིན་གྱི་ལྷོ་མཐའ»དང་། སྒྲུང་རིང«ལས་ཀྱི་གསེར་ཟམ་བརྒལ་བ» «འདས་སོང་ལ་སྤྲིངས་པ» «གཡང་ཊི་དམར་པོ» «མཐོང་ལམ་ཡག་མོ» «སྣང་བའི་ཕྱེ་ལེབ»སོགས་ཡོད། དབྱི་ཐ་ལིའི་ཡཱ་ཁེ་ཕུའུ་ལེ་ཝེར་རྒྱལ་སྤྱིའི་རྩོམ་རིག་བྱ་དགའ་དང་། དབྱི་ཐ་ལིའི་ལོན་པཱ་ས་ཁུལ་སྲིད་གཞུང་གི་རྒྱལ་སྤྱིའི་བུད་མེད་ཕུལ་བྱུང་གི་བྱ་དགའ། དབྱི་ཐ་ལིའི་ལཱ་ཏིས་ན་གྲོང་ཁྱེར་གྱི་རྒྱལ་སྤྱིའི་རྩོམ་རིག་བྱ་དགའ། དབྱི་ཐ་ལིའི་ཨ་ཀྲིན་ཐ་ལི་ཨོ་རྩོམ་རིག་བྱ་དགའ་སོགས་ཐོབ། 2021ལོར་སྒྲུང་རིང«མཐོང་ལམ་ཡག་མོ»རྒྱ་ཡིག་མ་དཔར་དུ་བསྐྲུན་པར་ཀྲུང་གོའི་རྩོམ་པ་པོ་ལན་ཞིན་གྱིས་རྩོམ་སྒྲིག་པའི་འགན་ཁུར་ཐོག་མགོ་བརྗོད་བྲིས་པ་དང་། པཱ་པོ་ལོ་ཉེ་ལུའུ་ཏེ(Pablo Ne-ruda)རྒྱལ་ཕྱིའི་རྩོམ་རིག་བྱ་དགའ་ཨང་དང་པོ་ཐོབ། སྒྲུང་ཐུང«སྣང་བའི་ཕྱེ་ལེབ»ལ་མི་ཁེ་ལང་ཆི་ལོ་པོ་ནཱ་ལོ་ཏི་རྒྱལ་སྤྱིའི་རྩོམ་རིག་བྱ་དགའ་ཐོབ། ལོ་ཙཱའི་བརྩམས་ཆོས་ལ་ཐའེ་ཉིན་གྱི«ཆར་གྱིས་མ་གོས་པའི་གྲོང་ཁྱེར»དང་། ཨ་ལེ་ཡི«སྤྲིན་རུམ་གྱི་ཡི་གེ»སོགས་ཡོད། 2018ལོར་ཀྲུང་གོའི་རྩོམ་པ་པོ་མཐུན་ཚོགས་ཀྱི་ལུའུ་ཞུན་རྩོམ་རིག་སློབ་གླིང་གི་རྒྱལ་སྤྱིའི་རྩོམ་འབྲི་འཆར་གཞིར་ཞུགས་པ་མ་ཟད“ཀྲུང་གོའི་རྩོམ་རིག་གི་ཤག་པོ”ཞེས་པའི་དཔང་ཡིག་ཐོབ། བློ་ཡི་འཇུག་པ་མིའི་རིགས་ཀྱི་དྲན་པའི་ཤུལ་བཞག་ནཱ་ཞི་སྟོན་པའི་དཔེ་རྙིང་ལ་ཆེ་བས། ཀྲུང་གོའི་གྲངས་ཉུང་མི་རིགས་ཀྱི་རིག་གནས་ལ་བྱས་པ་ཆེར་བཞག་ཡོད།

རྩོམ་མཁན།

ས་དམར་གྲགས་པའམ་གྲགས་པ་རྒྱ་མཚོ། མིང་གཞན་གཡག་རྭ། ལོ་རབས་བརྒྱད་ཅུ་པའི་ནང་ཅོ་ནེ་ས་དམར་དུ་སྐྱེས། རྩོམ་རིག་གི་བྱས་འབྲས་སུ་བོད་རྒྱ་ཡིག་རིགས་གཉིས་ཀྱི་དུས་དེབ་དང་ཚགས་ཤོག་སྟེང་སྙན་ངག་གཙོས་བརྩམས་ཆོས་བརྒྱ་ཕྲག་འགའ་བཀོད། སྔ་རྗེས་སུ2009ལོར་སྐབས་གསུམ་པའི་ཟླ་ཟེར་རྩོམ་རིག་བྱ་དགའ་དང་། 2017ལོར་རྒྱལ་ཡོངས་སྐབས་དང་པོའི«ཐུ་བྷོད་སྙན་ངག་མཁན་པོའི»མཚན་སྙན་བྱ་དགའ་དང་། 2020ལོར2020ལོའི་དབྱི་ཐ་ལིའི“རྒྱལ་སྤྱིའི་གསེར་སྨྱུག་བྱ་དགའ”དང་། 2021ལོར་སྐབས་དགུ་པའི་བོད་ཀྱི་དུས་རབས་གསར་པའི་རྩོམ་རིག་བྱ་དགའ་དང་། 2023ལོར་སྐབས་བཅུ་པའི་དབྱི་ཐ་ལིའི་རྒྱལ་སྤྱིའི་ཨ་པོ་ལའོ•ཏིའོ་ཉོ་སོས་སྙན་ངག་བྱ་དགའ་སོགས་ཐོབ། ལྷུག་རྩོམ་སྙན་ངག་དེབ«སེམས་ཚེགས»དང་། སྙན་ངག་དེབ«གཡོས་ཁང་གི་མདོ»དང་། རྒྱ་ཡིག་གི་སྙན་ངག་དེབ«རང་ཁྱིམ་གསལ་བྱེད་ཀྱི་མིང་ཐོ»དང་། དབྱི་ཐ་ལིའི་སྐད་ཀྱི་སྙན་ངག་དེབ«སྐྱེ་བ་བོད»སོགས་དེབ་དགུ་པར་དུ་བསྐྲུན། བརྩམས་ཆོས་རེ་འགའ་ཨིན་སྐད་དང་། དབྱི་ཐ་ལིའི་སྐད། སི་ཕེན་གྱི་སྐད་སོགས་ཡིག་རིགས་བདུན་ལ་བསྒྱུར་ཡོད་དོ། །

འབྲེལ་ཡོད་འོས་སྦྱོར།

暂无相关信息roking

འབྲེལ་གཏུག་ཁ་པར།：0974-8512858

འཕྲིན་སྐུར་ཡིག་ཟམ།：amdotibet@163.com