ཁྱུག་དབྱིངས་སོགས་ཀྱི་བྱེད་ནུས་གླེང་བ།

       ཁྱུག་དབྱིངས་ནི་རྒྱ་སྐད་ཀྱི(抖音)ཞེས་པ་ཡིན་ལ། འདིར་བོད་སྐད་ལ་འབྲི་སྟངས་མི་འདྲ་བ་ཁ་ཤས་འདུག དཔེར་ན། བོད་རང་སྐྱོང་ལྗོངས་བོད་ཡིག་ཐ་སྙད་བཀས་བཅད་ཨུ་ཡོན་ལྷན་ཁང་གིས“ཁྱུག་དབྱིངས”ཞེས་བཀས་བཅད་ཡོད་ལ། མཚོ་སྔོན་ཞིང་ཆེན་བོད་ཀྱི་བརྡ་ཆད་ཚད་ལྡན་ཞུས་བཤེར་གཏན་འབེབས་ཨུ་ཡོན་ལྷན་ཁང་གིས(༢༠༢༣-༡༡-༢༤)སྤྱི་བསྒྲགས་གནང་བའི་ཡིག་ཆ་ནང་དུ“འཁྱུག་དབྱིངས།”ཞེས་གཏན་འབེབས་གནང་འདུག རྒྱལ་ཡོངས་བོད་ཡིག་སྨྱན་སྦྱོར་མཐུན་སྦྱོར་ཚོགས་འདུ་སྐབས་བཅུ་དགུ་བའི་སྟེང་ཞུས་བཤེར་གཏན་འབེབས་བྱས་པའི་བརྡ་ཆད་སྤྱི་བསྒྲགས་ནང་དུ“འཁྱུག་དབྱིངས”ཞེས་གཏན་འབེབས་བྱས་འདུག འདི་དག་གཞུང་གི་ལས་ཁུངས་ཁག་གིས་གཏན་འབེབས་བྱས་པ་ཡིན་མོད་གཅིག་གྱུར་གྱི་རྣམ་པ་བྱུང་མི་འདུག གཞན་ཡང་ཁམས་པའི་བརྙན་འཕྲིན་ཁང་གི་སྤྱི་སྟེགས་སོགས་སུ་འདར་དབྱངས་ཞེས་བཀོལ་སྤྱོད་གནང་འདུག་ལ། བོད་མི་མང་པོ་ཞིག་ཀྱང་འདར་དབྱིངས་ཞེས་སྨྲ་བར་གོམས་འདུག དེ་བས་གུས་པས་ཡང་སྙིང་གང་ཞིག་བྲིས་ན་ཏག་ཏག་འགྲིག་མིན་ཧ་མི་གོ་བས། འདིར་བོད་ལྗོངས་བོད་ཡིག་ཐ་སྙད་བཀས་བཅད་ཨུ་ཡོན་ལྷན་ཁང་གི་གཏན་འབེབས་ལྟར་བྲིས་ཡོད། ཡིན་ནའང་དེ་ལ་དམིགས་བསལ་གྱི་རྒྱུ་མཚན་ཞུ་རྒྱུ་མེད། ཁྱུག་དབྱིངས་ནི་བོད་ཁུལ་ལ་བེད་སྤྱོད་པའི་མཉེན་ཆས་དག་ལས་སྐད་གྲགས་ཆེ་ཤོས་དང་ཤུགས་རྐྱེན་ཆེ་ཤོས་དེ་ཡིན་པ་འདྲ། དེ་བས་གུས་པས་མཉེན་ཆས་འདི་མཚན་གཞིར་བཟུང་ནས་གླེང་དགོས་བསམ་བྱུང་། མཉེན་ཆས་འདི་ནི་ནན་ཁེ་སློབ་ཆེན་ནས་མཐར་ཕྱིན་པའི་ཀྲང་དབྱི་མིང(张一鸣)ལགས་ཀྱིས་གསར་དུ་བཏོད་ཅིང་། ༢༠༡༦ལོར་དངོས་སུ་ཁྲོམ་རར་འགྲིམ་སྤེལ་བྱས་པ་ཞིག་རེད། ཉེ་ཆར་ཁྱབ་བསྒྲགས་བྱས་པའི་གསར་འགྱུར་ལྟར་ན། ཀྲང་དབྱི་མིང་ནི་ཀྲུང་གོའི་ཕྱུག་བདག་ཨང་དང་པོར་གྱུར་ཡོད་ཅེས་བཀོད་འདུག བོད་ཁུལ་ལ་མཚོན་ན་ཁྱུག་དབྱངས་ཀྱི་ཤུགས་རྐྱེན་ནི་ཧ་ཅང་ཆེ་ལ། ཕལ་ཆེར་བོད་མི་མི་རེའི་ལག་ཏུ་ཁྱུག་དབྱངས་རེ་ཡོད་ལ། མི་རྣམས་ཀྱི་འདུ་འཛོམས་དང་ཁ་བརྡའི་གསེང་དུ་ཁྱུག་དབྱངས་ནང་གི་དྲ་གྲགས་དང་དེ་དག་གི་སྐོར་གླེང་བྱ་གཙོ་བོར་གྱུར་འདུག་ལ། ཐ་ན་དྲ་གྲགས་དག་གི་ལུས་ངག་གི་བྱ་སྤྱོད་རེ་རེ་ཡར་གྱི་དགོན་སྡེ་ནས་མར་གྱི་གྲོང་སྡེའི་བར་དུ་ཁྱབ་བཞིན་འདུག དེ་བས་ང་ཚོས་མཉེན་ཆས་འདི་དག་གི་བྱེད་ནུས་ལ་བསམ་གཞིག་མ་བཏང་རང་བཏང་ཆགས་ཡོད། དེ་ལྟར་སྔོན་འགྲོའི་གཏམ་གླེང་མཇུག་གྲུབ་ནས་གཤམ་དུ་མཉེན་ཆས་འདིའི་བྱེད་ནུས་སྐོར་ནས་གླེང་བར་བྱའོ། །
དང་པོ། དགེ་མཚན་ནམ་མཐུན་ཕྱོགས་ཀྱི་བྱེད་ནུས།
       གཅིག ཆ་འཕྲིན་སྣ་མང་མཁོ་འདོན་བྱེད་པ།
       དུས་རབས་གསར་པའི་སྐྱ་རེངས་ཀྱི་དུང་བརྡ་བཏང་ཞིང་ཚན་རྩལ་གྱི་ཉི་གཞོན་ཤར་རི་ནས་འཕགས་པ་དང་མཉམ་དུ་འཛམ་གླིང་ཤར་ནུབ་ཀྱི་བར་ཐག་བསྟུངས་ཏེ་གླིང་ཕྲན་དང་གླིང་ཕྲན་བར། རྒྱལ་ཁབ་དང་རྒྱལ་ཁབ་བར། མི་རིགས་དང་མི་རིགས་བར་ལ་ཕན་ཚུན་འགྲོ་འོང་དང་རྒྱུས་ལོན་བྱེད་པར་སྔར་མེད་ཀྱི་སྟབས་བདེ་བསྐྲུན་ཡོད། དེ་བས་ཀྱང་གློག་བརྙན་དང་ཁ་པར་སོགས་ཀྱིས་སྔར་ལས་ལྷག་པའི་སྒོ་ནས་ལྟད་མོ་གསར་པ་དང་ཤེས་བྱ་གསར་པ། ཆ་འཕྲིན་གསར་པ་སོགས་ཡུལ་གྲུ་ཁག་ཏུ་ཁྱེར་ཡོད། བོད་ཁུལ་ལ་མཚོན་ན་ཆ་འཕྲིན་སྣ་གཅིག་ལས་སྣ་མང་གི་རང་བཞིན་དུ་འཕོ་འགྱུར་སོང་བར་ཁྱུག་དབྱིངས་ཀྱིས་ནུས་པ་གལ་ཆེན་ཐོན་ཡོད། ཁྱུག་དབྱིངས་ཀྱིས་འཛམ་གླིང་ཤར་ནུབ་རྒྱལ་ཁབ་ཁག་གི་གནས་ཚུལ་དང་མི་རིགས་མི་འདྲ་བའི་ཡུལ་སྲོལ་གོམས་གཤིས། ས་ཆུ་རི་ལུང་ནགས་ཚལ་སོགས་རང་བྱུང་གི་བཀོད་པ་ངོ་མཚར་བ། སྲོག་ཆགས་སྣ་ཚོགས་ཀྱི་ལྟད་མོ་ཁྱད་མཚར་བ། ཁ་ཟས་དང་རྒྱན་གོས་རིག་གནས། ཆབ་སྲིད་དང་དམག་དོན། ཚན་རྩལ། ཚོང་ལས། སྤྱི་ཚོགས་གནས་བབ་དང་འཚོ་བའི་གནས་སྟངས་སོགས་རྒྱ་ཆེ་ལ་རྣམ་གྲངས་མང་བའི་ཆ་འཕྲིན་འབོར་ཆེན་ཞིག་བོད་ཁུལ་ལ་ཁྱེར་ཡོད། འདིས་ལོ་ངོ་བརྒྱ་སྟོང་ཁ་ཤས་ལ་ཆ་འཕྲིན་དང་རིག་གནས་སྣ་གཅིག་གི་ནང་དུ་འཚོ་སྡོད་བྱས་པའི་བོད་མི་རྣམས་ལ་ལྟད་མོ་གསར་པ་དང་། ཤེས་བྱ་གསར་པ། གོ་བ་གསར་པ། གནོན་ཤུགས་གསར་པ། སྒུལ་ཤུགས་གསར་པ། གོ་རྟོགས་གསར་པ། དོགས་འདྲི་གསར་པ་སོགས་སྤྲད་ཡོད། འདི་ནི་དགའ་འོས་པའི་དོན་ཞིག་ཡིན་པར་འདོད་དེ། ཆ་འཕྲིན་སྣ་མང་གིས་ད་གཟོད་ང་ཚོས་གནད་དོན་ཞིག་ལ་ཕྱོགས་ཡོངས་ནས་བསམ་གཞིག་བྱེད་པའི་ཆ་རྐྱེན་བསྐྲུན་པ་ཡིན་ལ། ཆ་འཕྲིན་སྣ་གཅིག་གི་རྒྱ་ལས་གྲོལ་ནས་ང་ཚོ་རང་རང་གིས་གནད་དོན་ཁག་ལ་དཔྱད་པ་གཏོང་བའི་ཤེས་རབ་དང་སྤོབས་པ་སྐྱེ་བ་ཡིན། བསམ་གཞིག་དང་དཔྱད་པ་དེ་དག་གིས་འུ་ཅག་གི་དོན་དངོས་ཀྱི་གནས་ཚུལ་ཧ་གོ་བ་དང་འཇིག་རྟེན་ཁམས་ཀྱི་གནས་ལུགས་མང་པོ་ཞིག་ཤེས་ཐུབ་པ་ཡིན་ནོ། །
       གཉིས། ཚོང་ལས་ལ་སྟབས་བདེ་དང་གོ་སྐབས་བསྐྲུན་པ།
       ཚང་མས་ཤེས་གསལ་ལྟར་མཉེན་ཆས་འདི་དག་གི་བྱེད་ནུས་གཙོ་བོ་ནི་མི་སྒེར་སོ་སོས་སྟབས་བདེའི་སྒོ་ནས་སྒོར་མོ་བཙལ་ཆོག་པ་དང་ཚོང་ལས་གཉེར་ཆོག་པ་དེ་རེད། དེར་བརྟེན་ཚོང་རྒྱག་བསམ་མཁན་དང་ཚོང་པ་དག་གིས་མཉེན་ཆས་འདི་དག་བཀོལ་སྤྱོད་བྱེད་ནས་རང་གི་ཚོང་རྫས་ཁྱབ་བསྒྲགས་དང་། ཚོང་ཁང་ངོ་སྤྲོད། འཛད་སྤྱོད་པ་རྣམས་ལ་སྟབས་བདེ་བསྐྲུན་རྒྱུ་ནི་གལ་ཆེན་པོ་ཆགས་ཡོད། དེ་བས་ཚོང་པ་དག་གིས་ངེས་པར་དུ་དྲ་ལམ་བཀོལ་སྤྱོད་ཐད་ལ་ཤུགས་རྒྱག་རྒྱུ་དང་ནུས་ཤུགས་འདོན་རྒྱུ། མཉེན་ཆས་འདི་དག་བེད་སྤྱོད་ཡང་དག་གཏོང་རྒྱུ་གལ་ཆེན་པོ་ཆགས་ཡོད་པ་བཤད་མི་དགོས། དེང་གི་ཆར་མི་མང་པོ་ཞིག་གིས་མཉེན་ཆས་འདི་དག་བཀོལ་ནས་རང་གི་ཡོན་འབབ་གསོག་བཞིན་ཡོད་པ་ནི་གནས་ཚུལ་ཡག་པོ་ཞིག་རེད་ལ། དུས་རབས་དང་འཚམ་ཞིང་དུས་བབ་དང་བསྟུན་པའི་ཚོང་ལས་གཉེར་བ། གོ་སྐབས་དམ་འཛིན་ཤེས་པ་བྱེད་རྒྱུ་སོགས་ནི་དུས་རབས་འདིའི་མི་ཡིས་ངེས་དགོས་པའི་འཚོ་ཐབས་གལ་ཆེན་ཞིག་ཡིན་པ་འདྲ། དེ་བས་མཉེན་ཆས་འདི་དག་གིས་དཔལ་འབྱོར་མཁོ་སྒྲུབ་ཐད་ནས་བྱེད་ནུས་དམིགས་བསལ་འཐོན་བཞིན་ཡོད་པ་ནི་དོན་དངོས་ཡིན། ཞོར་དུ་ཞུ་འདོད་པ་ཞིག་ནི་ངས་བསམ་ན་ཚོང་ལས་ཀྱི་རྩ་དོན་ནམ་གཞི་འཛིན་ས་ནི་རྒྱུ་སྤུས་ཀྱི་ཁག་ཐེག་དང་ཁ་དན་ཚིག་གནས། ཞབས་ཞུའི་རྣམ་འགྱུར་སོགས་གལ་ཆེན་པོ་ཆགས་ཡོད་སྙམ། དེ་དག་གིས་ད་གཟོད་ཚོང་ལས་སྔར་ལས་ཇེ་རྒྱས་དང་རྒྱུན་སྐྱོང་ཐུབ་པར་ཕན་ཐོགས་ཡོང་གི་ཡོད། དེ་མིན་གཡོ་སྒྱུ་ཁྲམ་གསུམ་གྱིས་གནས་སྐབས་ཁེ་ཕན་ཐོབ་སྲིད་མོད། མཐའ་མཇུག་གི་རྒྱལ་ཁ་ལོན་པ་མ་ཡིན་ནོ། །
       གསུམ། ཤེས་བྱ་སྣ་མང་གསོག་འཇོག་ཐུབ་པ།
       ཁྱུག་དབྱིངས་སོགས་བཀོལ་སྤྱོད་ཡག་པོ་ཐུབ་ན་དངོས་གནས་སྣ་མང་ཤེས་བྱ་ལ་མཁས་པའི་དགེ་རྒན་ཞིག་འགྲམ་དུ་ཡོད་པ་དང་འདྲ། ང་ཚོས་རང་གི་འཚོ་བའི་ཁྲོད་དུ་འཕྲད་པའི་གནད་དོན་མང་པོ་ཞིག་གི་ཐག་གཅོད་བྱེད་སྟངས་མཉེན་ཆས་འདི་དག་ནང་ནས་བཙལ་ན་རྙེད་ཐུབ་ལ། དེ་བཞིན་རྒྱུན་ཤེས་སྣ་ཚོགས། ཐ་ན་ཁ་ལག་བཟོ་སྟངས་ཡན་ཆད་བསླབ་ཆོག་པ་རེད། གཞན་ཡང་བདེ་ཐང་རྒྱུན་ཤེས་དང་འབྲེལ་བའི་གཏམ་བཤད་ལ་ཉན་ཆོག་པ། ཁྲིམས་ལུགས་ཀྱི་ཤེས་བྱ་སྣ་ཚོགས་ལ་རྒྱུས་ལོན་ཐུབ་པ། སྔོ་ཚལ་འདེབས་འཛུགས་དང་ཁང་ཁྱིམ་ཕྱི་ནང་གི་དངོས་རྫས་ཞིག་གསོ་བྱེད་ཐབས་སོགས་མདོར་ན་ཤེས་བྱ་འཐོར་བུ་མང་པོ་ཞིག་ཧ་ཅང་སྟབས་བདེའི་སྒོ་ནས་བསླབ་ཆོག་པ་རེད། དེ་བས་མཉེན་ཆས་འདི་དག་ཚུལ་བཞིན་བཀོལ་སྤྱོད་གནང་རྒྱུ་དང་། བེད་སྤྱོད་ལེགས་པོ་གཏོང་རྒྱུ་གལ་ཆེན་པོ་ཡིན། ཡང་ཕྱོགས་གཞན་ཞིག་ནས་བསམ་བློ་བཏང་ན། མཉེན་ཆས་འདི་དག་ཏུ་ཤེས་བྱ་འདྲ་མིན་སྣ་ཚོགས་ཤིག་མཆིས་ནའང་། དེ་དག་ལ་ཉེན་ཁ་དང་ཞོར་སྐྱོན་སྣ་ཚོགས་མི་མངོན་པའི་ཚུལ་དུ་སྦས་ཡོད་སྲིད་པས། དེ་དག་ལ་སྙིགས་འདོར་བཅུད་ལེན་གྱི་སྒོ་ནས་འཇུག་དགོས་པ་དང་། སྨན་རྫས་བཀོལ་སྤྱོད་སོགས་ཤེས་བྱ་མང་པོ་ཞིག་དྲ་ལམ་གྱི་མན་ངག་ཁོ་ནར་ཡིད་ཆེས་པ་མ་ཡིན་པར་ཚད་ལྡན་གྱི་སྨན་པ་སོགས་ལ་བཀའ་འདྲི་ཞུ་དགོས་པ་ནི་གནད་ཀྱི་དམ་པར་གྱུར་ཡོད། སྤྱིར་ནའང་དྲ་ལམ་གྱི་ཤེས་བྱ་དེ་དག་རང་གི་དཔྱད་གཞི་ཙམ་དུ་ངོས་འཛིན་བྱ་རྒྱུ་ནི་གལ་ཆེན་པོ་ཡིན་སྙམ་མོ། །
       བཞི། རང་གི་བརྩམས་ཆོས་གཞན་ལ་མཉམ་སྤྱོད་ཐུབ་པ།
       མཉེན་ཆས་སྣ་ཚོགས་དར་ཁྱབ་བྱུང་བ་དེས་འཛམ་གླིང་གི་གྲུ་ཟུར་རེ་རེ་ན་གནས་པའི་ཕུགས་བསམ་དང་དགའ་ཕྱོགས་ལྡན་པའི་མི་སྣ་མང་པོ་ཞིག་ལ་སྟབས་བདེ་བསྐྲུན་ཡོད། ཕུགས་བསམ་དང་དགའ་ཕྱོགས་འཚོལ་སྙེག་བྱེད་པའི་བརྒྱུད་རིམ་ནི་མཛེས་སྡུག་ལྡན་ལ་དཀའ་ཚེགས་ཀྱི་རང་བཞིན་ཅན་ཞིག་རེད། དེ་ཡང་གཙོ་བོ་གཅིག་ནི་རང་རང་གི་བརྩམས་ཆོས་གཞན་ལ་མཉམ་སྤྱོད་དགོས་དུས་དཀའ་ཁག་སྣ་ཚོགས་འཕྲད་ཀི་ཡོད། སྔོན་མ་ཡིན་ན་ཚགས་པར་དང་དུས་དེབ། རླུང་འཕྲིན་དང་བརྙན་འཕྲིན། རྒྱང་སྒྲོག་སོགས་བརྒྱུད་ནས་མཉམ་སྤྱོད་བྱེད་དགོས་ལ། སྨྱན་སྦྱོར་ཚན་པ་སྣ་ཚོགས་ཀྱི་ལམ་ཁ་བརྒྱུད་དེ་ད་གཟོད་རང་གི་བརྩམས་ཆོས་དེ་ཉིད་མི་རྣམས་ཀྱི་མིག་མདུན་དུ་གཤམ་སྟོན་ཐུབ་པ་ཡིན། དེ་ཡང་ལས་སླ་པོ་མིན་པར་རྒྱུ་འབྱོར་དང་དཀའ་ཚེགས་གཉིས་ཀར་བསྟེན་དགོས་པ་ལོས་ཡིན། དེའི་བརྒྱུད་རིམ་ནི་མནར་གཅོད་དང་དཀའ་ཁག་གི་གོ་རིམ་ཞིག་ཡིན། ད་ལྟ་ཡིན་ན་ཤེས་བྱའི་རྣམ་གྲངས་གང་ཞིག་གཉེར་མཁན་ཡིན་ནའང་། རང་རང་གི་བརྩམས་ཆོས་མཉེན་ཆས་སྣ་ཚོགས་བརྒྱུད་དེ་ཧ་ཅང་སྟབས་བདེའི་སྒོ་ནས་མི་གཞན་ལ་མཉམ་སྤྱོད་ཐུབ་ལ། དེའི་ཕན་ནུས་ཀྱིས་རང་གི་བརྩམས་ཆོས་ལ་དགའ་བའི་ཞེན་མི་མང་པོ་ཞིག་རྙེད་ཐུབ་པ། དེ་དག་གི་ནུས་ཤུགས་ཀྱིས་རང་ཉིད་ཀྱི་འཚོ་བ་ཇེ་ལེགས་དང་དཔལ་འབྱོར་མང་པོ་སྒྲུབ་བཞིན་ཡོད་པ་ནི་མངོན་གསལ་དོད་པོར་གྱུར་ཡོད། དེ་བས་སྒྱུ་རྩལ་ལས་རིགས་གཉེར་མཁན་དག་ལ་མཚོན་ན་མཉེན་ཆས་འདི་དག་གི་ཕན་ནུས་ནི་ཧ་ཅང་ཆེ་བ་ཡིན་ནོ། །
       ལྔ། འཇིག་རྟེན་གྱི་ལྟད་མོ་དང་སྤྲོ་གར་ལ་རོལ་ཆོག་པ།
       མི་ཕལ་པ་མང་པོ་ཞིག་ལ་མཚོན་ན་མཉེན་ཆས་འདི་དག་ནི་འཚོ་བའི་བར་གསེང་ནས་ལྟད་མོ་བལྟ་ས་དང་སྤྲོ་གར་ལ་རོལ་ས་ཞིག་ཡིན། དེར་བརྟེན་ཆོབ་ཚ་ལ་དགོད་བྲོ་བའི་བརྙན་ཐུང་དག་ནི་ཁོ་ཅག་དགའ་ཤོས་ཀྱི་ལྟད་མོར་གྱུར་ཡོད། ལྟད་མོ་དེ་དག་གི་གསེང་ནས་འཚོ་བའི་ཁྲོད་ཀྱི་ངལ་དུབ་དང་སེམས་ངལ་མང་པོ་ཞིག་སེལ་ཐུབ་པ་ལོས་ཡིན་སྙམ། གཞན་ཡང་མཉེན་ཆས་འདི་དག་ལས་ཡུལ་ཁམས་མི་འདྲ་བའི་རི་ཆུ་ལུང་གསུམ་གྱི་ཆགས་ཚུལ་དང་། འཛུགས་སྐྲུན་རྣམ་པ། གླུ་གར་རོལ་མོ། ཁ་ཟས་གཡོ་སྦྱོར། རྒྱན་གོས་བྱད་གཟུགས། འཚོ་བ་རོལ་སྟངས་སོགས་ལ་མྱོང་རོལ་ཆོག་པ་རེད། འདི་དག་ལས་ངོ་མཚར་ལྡན་ལ་ཡིད་སྨོན་འཆོར་བའི་ཡུལ་ཁམས་དང་འཚོ་བ་རོལ་སྟངས་མཐོང་ཐུབ་ལ། ཁོར་ཡུག་གི་བཀོད་པ་དང་ཐོན་ཁུངས་མི་ལེགས་ཤིང་སྐྱོ་ལ་སྡུག་པའི་འཚོ་བ་རོལ་སྟངས་དག་ཀྱང་མཐོང་ཐུབ་པ་ཡིན། དེ་དག་ལས་ང་ཚོས་ཕྱོགས་དང་ཟུར་མང་པོ་ནས་འཇིག་རྟེན་ཁམས་ངོས་ཟིན་པ་དང་མཉམ་དུ་རང་གི་ཕ་ས་ཕ་ཡུལ་དང་རི་ཆུ་ལུང་གསུམ་ལ་དགའ་གུས་སྐྱེ་སྲིད་པ་མ་ཚད། འཚོ་བའི་གནས་སྟངས་དང་སྤྱི་ཚོགས་སྣང་ཚུལ་མང་པོ་ཞིག་ཚུལ་བཞིན་རྒྱུས་ལོན་ཐུབ་པ་ལོས་ཡིན། དེ་བས་མཉེན་ཆས་འདི་དག་གིས་འུ་ཅག་ལ་འཇིག་རྟེན་ཁམས་ཀྱི་ལྟད་མོ་འདྲ་མིན་གཤམ་སྟོན་བྱས་ཡོད་ལ། སེམས་ཁམས་ལྷོད་གཡེང་གཏོང་ས་དང་ངལ་གསོའི་སྤྲོ་གར་སྣ་ཚོགས་མཁོ་འདོན་བྱས་ཡོད་དོ། །  
གཉིས་པ། མི་མཐུན་ཕྱོགས་ཀྱི་བྱེད་ནུས་དང་ཤུགས་རྐྱེན།
       གཅིག མི་ཚེའི་རིན་ཐང་ལྟ་ཚུལ་དང་ཁ་ཕྱོགས་འབོར་བ།
       སྤྱིར་མཉེན་ཆས་འདི་དག་རང་ངོས་ནས་ཡག་སྡུག་དང་བཟང་ངན་སོགས་གླེང་རྒྱུ་དཀའ་ནའང་། བེད་སྤྱོད་ཚུལ་བཞིན་གཏོང་ཤེས་མིན་ཐད་ནས་ཞོར་སྐྱོན་མང་པོ་ཞིག་འབྱུང་བཞིན་ཡོད་པ་རེད། དེར་བརྟེན་གཤམ་དུ་མཉེན་ཆས་འདི་དག་གི་ཞོར་སྐྱོན་གླེང་བར་བྱ། གོང་གི་ཚན་པ་དང་པོར་གླེང་བ་ལྟར། མཉེན་ཆས་འདི་དག་གིས་འུ་ཅག་ལ་ཆ་འཕྲིན་སྣ་མང་མཁོ་འདོན་བྱས་ཡོད་མོད། དེ་དག་ལ་ང་ཚོས་སྙིགས་དོར་བཅུད་ལེན་ཚུལ་བཞིན་མ་ཐུབ་པའམ། དེ་དག་གི་རྗེས་སུ་འབྲངས་རྐྱང་བྱས་ན། དེས་ལྡོག་ཕྱོགས་ནས་ང་ཚོ་མི་སྒེར་གྱི་རིན་ཐང་ལྟ་ཚུལ་དང་མི་ཚེའི་ཁ་ཕྱོགས་སོགས་ལ་ཤུགས་རྐྱེན་ངན་པ་འཇོག་པ་ཡིན་ལ། ཆ་འཕྲིན་དེ་དག་གི་ཀློང་དུ་དུས་འདས་ཏེ་བསྡད་ན། ང་ཚོ་མི་སྒེར་གྱི་ཁ་ཕྱོགས་བོར་ཏེ་ལུག་ཁྱུ་སྨུག་ཁྲོད་དུ་འགྲིམ་པ་ནང་བཞིན་ཆགས་ནས། རང་གི་འགན་འཁྲི་དང་བྱ་གཞག ཕུགས་འདུན་དང་དམིགས་ཡུལ་སོགས་བརླག་པའི་ཉེན་ཁ་ཆེན་པོ་ཡོད། གཞན་ཡང་མཉེན་ཆས་འདི་དག་ནང་དུ་བསམ་གཞིན་དང་བསམ་བཞིན་མ་ཡིན་པས་བཟོས་པའི་ཆ་འཕྲིན་རྫུན་མ་དང་གཡོ་སྒྱུའི་སྐད་ཆ། བསླུ་བྲིད་ཀྱི་ཐབས་ལམ་སྣ་ཚོགས་མཆིས་པས་དེ་དག་ལ་དཔྱོད་ཤེས་ཀྱི་སྒོ་ནས་འཇུག་པ་དང་། རང་གི་ཁ་ཕྱོགས་དང་འགན་འཁྲི་བྱ་གཞག་སོགས་མི་འབོར་རྒྱུ་ནི་ཧ་ཅང་གལ་ཆེན་ཆགས་ཡོད་པ་བཤད་མི་དགོས་པ་ཡིན་ནོ། །
       གཉིས། ཡ་རབས་བཟང་སྤྱོད་ལ་ཆག་ཀྲུམ་བཟོ་བ།
       དེ་ཡང་མཉེན་ཆས་འདི་དག་དར་ཁྱབ་སོང་བ་དང་བསྟུན་མི་རིགས་སོ་སོ་དང་ཡུལ་ཁམས་སོ་སོའི་བར་ཐག་བསྟུངས་ཏེ་ཕན་ཚུན་གྱི་གོམས་སྲོལ་དང་ལམ་ལུགས་མང་པོ་ཞིག་རྒྱུས་ལོན་ཐུབ་པ་ཡིན། དེས་ཕྱོགས་གཅིག་ནས་མཐོང་རྒྱ་བསྐྱེད་ནའང་ཕྱོགས་གཞན་ནས་གཞན་གྱི་གོམས་གཤིས་ངན་པ་དང་། ལུགས་སྲོལ་མི་ལེགས་པ་མང་པོ་ཞིག་ཁྱེར་ཡོང་སྲིད་ལ། དེས་རང་མི་རིགས་ཀྱི་སྔར་ནས་བརྒྱུད་པའི་རིན་ཐང་ལྟ་ཚུལ་དང་གོམས་སྲོལ་མང་པོ་ཞིག་ལ་དོགས་འདྲི་དང་འགྲན་སློང་བྱེད་པ་ཡིན། ཐ་ན་རང་གི་གོམས་སྲོལ་བཟང་པོ་འགའ་ཞིག་ཆ་འཕྲིན་སྣ་མང་དང་རིག་གནས་འདྲ་མིན་གྱི་འགལ་འདུའི་ཁྲོད་ནས་མེད་རླག་འགྲོ་བཞིན་ཡོད། སྔར་གྱི་གོམས་སྲོལ་དག་ལ་སྙིགས་དོར་བཅུད་ལེན་དགོས་པ་བདེན་དུ་ཆུགས་ཀྱང་། ལུགས་མཐུན་དང་མི་རིགས་རང་གི་ཐུན་མིན་ཡ་རབས་བཟང་སྤྱོད་མང་པོ་འགྱུར་ལྡོག་དང་མེད་རླག་འགྲོ་བཞིན་པ་ནི་སྐྱོ་འོས་པའི་གནས་སུ་འཁུམས། དཔེར་ན། ཆོས་ལུགས་དད་མོས། རྒན་བཀུར་གཞོན་གཅེས། ངོ་ཚ་ཁྲེལ་ཡོད། དྲང་བདེན་ལུགས་མཐུན། ཁ་བཤད་དོན་གནས། གཙང་བཙོག་འཛེམ་ང་སོགས་ལྟ་བུ་རེད། ལྷག་ཏུ་འཁྲབ་སྟོན་ཡིན་ནམ་དངོས་གནས་གང་ཡིན་མི་ཤེས་མོད། ཚ་དྲག་ལ་འཁྲུག་ཆ་དོད་པ། ངུ་མ་དགོད་ཀྱི་ཐད་གཏོང་གི་རྩོད་པའི་རྒྱལ་ཕབ་ཁྲོད་དུ་རྫུན་ལབ་པ། མནའ་སྐྱེལ་བ། སྨྲེ་ངག་འདོན་པ། ངོ་ཚ་མེད་ལ་ཐལ་དྲག་པའི་བྱ་སྤྱོད་སྤེལ་བ་སོགས་ཀྱིས་མི་མང་པོ་ཞིག་དང་ལྷག་ཏུ་ནར་མ་སོན་པའི་གཞོན་ནུ་དག་ལ་ཤན་ངན་པ་ཐེབས་བཞིན་ཡོད་པ་རེད། ལྷག་ཏུ་དེང་ཆར་མི་ཁ་ཤས་ཀྱིས་རང་ལ་དོ་ཁུར་བྱེད་མཁན་མང་དུ་ཡོང་ཆེད་བླ་མ་དང་མཁས་པ་སོགས་མི་ཆེན་ཀུན་ལ་ཡ་ང་བག་ཚ་གང་ཡང་མེད་པར་དམའ་འབེབས་བྱེད་པ་སོགས་ནི་ཧ་ཅང་འཇིགས་ཡེར་བའི་གནས་སུ་མཆིས། འདི་དག་ལ་ང་ཚོས་དོ་སྣང་དགོས་པ་ལས་འདི་དག་གི་ཤུགས་རྐྱེན་དང་ནུས་ཤུགས་ནི་ཧང་སངས་དགོས་པ་ཡིན་ནོ། །
       གསུམ། དུས་ཚོད་བརླག་ཅིང་བདེ་ཐང་ལ་གནོད་པ།
       ང་ཚོས་རང་ཉིད་ལ་རྒྱུས་ཡོད་པ་ལྟར་མཉེན་ཆས་འདི་དག་གིས་རང་གི་རྩ་ཆེའི་དུས་ཚོད་འཕྲོག་པ་དང་། བདེ་ཐང་ལ་གནོད་པ་བཟོ་བཞིན་ཡོད་པ་ནི་མངོན་གསལ་དོད་པོ་ཡིན། ང་ཚོས་བྱིས་དུས་དང་འདས་པའི་དུས་སྐབས་ལ་ཕྱིར་དྲན་བྱེད་དུས་སྐབས་དེར་ད་ལྟ་ནང་བཞིན་སྟབས་བདེའི་འཕྲུལ་ཆས་སྣ་ཚོགས་མེད་མའང་། ནང་མི་ལྷན་འཛོམས་སྐབས་དང་ནངས་དགོང་སོགས་དུས་ཚིགས་རྣམས་སུ་ནང་མི་ཕན་ཚུན་བར་རྫོགས་མེད་ཀྱི་ཁ་བརྡ་ཡོད་ཅིང་། དུས་ཚོད་ཀྱང་འདང་ངེས་ཡོད་པའི་སྣང་བ་ཞིག་སྟེར་བར་བྱེད། དེང་གི་ཆར་ང་ཚོར་དམིགས་བསལ་ལས་ཀ་མང་དྲག་པ་མིན་ནའང་ནང་མི་མཉམ་འཛོམས་དང་གྲོགས་པོ་འདུ་འཛོམས་སོགས་མདོར་ན་མི་དང་མིའི་བར་གྱི་ཁ་བརྡ་ཇེ་ཉུང་སོང་བ་དང་དུས་ཚོད་ཀྱང་གར་སོང་འདིར་སོང་མེད་པ་ཡོང་གི་ཡོད། ལྷག་ཏུ་སློབ་གཉེར་བ་དང་བྱ་གཞག་ལ་འཇུག་མཁན་སོགས་ཀྱི་དུས་ཚོད་མང་པོ་ཞིག་ཁྱུག་དབྱིངས་སོགས་ལ་གཡེང་ནས་རྫོགས་བཞིན་ཡོད། འདིས་འུ་ཅག་གི་ལས་ཆོད་དང་སློབ་སྦྱོང་གི་གྲུབ་འབྲས་ལ་བར་ཆད་བསམ་ཡུལ་ལས་འདས་པ་བཟོ་བཞིན་ཡོད་པ་རེད། གཉིས་ནས་མཉེན་ཆས་འདི་དག་ལ་མཚམས་ཚོད་མེད་པར་གཡེང་ན་འུ་ཅག་གི་སེམས་ཀྱི་བདེ་ཐང་དང་དྲན་འཛིན་ནུས་པ། མིག་དབང་གི་བདེ་ཐང་སོགས་ལ་གནོད་པ་ཚབ་ཆེན་བཟོ་བཞིན་ཡོད། གསུམ་ནས་གནམ་གྱི་བག་ལེབ་ལྷུང་བ་ལྟ་བུའི་གཏམ་རྒྱུད་སྨྲ་མཁས་པའི་ཚོང་པ་དག་དང་། བྱང་སེམས་མངོན་དུ་རྫུས་པའི་ཟློས་གར་གྱི་བསླུ་བྲིད་མཁན་པོ་རྣམ་པའི་གཡོ་ཐབས་འོག་ཏུ། ཡང་ན་རང་གི་དང་རྟེན(偶像)རྣམ་པའི་རྒྱལ་ཕམ་གྱི་ཡོ་ལང་ཁྲོད་ནས་རང་གིས་དཀའ་བས་བསགས་པའི་དངུལ་དམར་དག་རྩིག་གསེང་དུ་ཆུ་བླུག་པ་ལྟར་འཛད་བཞིན་ཡོད་པ་རེད། དེ་བས་ཚད་དང་རན་ཞིང་དང་འོས་འཚམ་སྒོ་ནས་མཉེན་ཆས་འདི་དག་བཀོལ་སྤྱོད་བྱེད་པ་ནི་གནད་ཀྱི་དམ་པ་ཡིན་ལ། ཇི་ལྟར་བྱས་ན་ད་གཟོད་བཟང་ཕྱོགས་ནས་ནུས་ཤུགས་འབྱིན་ཐུབ་མིན་ཐད་བསམ་གཞིག་བྱེད་ནས་བཀོལ་སྤྱོད་གཏོང་དགོས་སྙམ་མོ། །