དེབ་གསར། «གཙང་སྟོད་ཟིན་ཏིག»

       ཉེ་ལམ། བསམ་གྲུབ་རྒྱལ་དང་བཀྲ་ཤིས་དོན་གྲུབ་ཀྱིས་གཙོ་སྒྲིག་བྱས་པའི་གཙང་སྟོད་དར་མ་མགོན་པོ་མཆོག་གི་གསུང་རྩོམ«གཙང་སྟོད་ཟིན་ཏིག»ཅེས་པ་སི་ཁྲོན་མི་རིགས་དཔེ་སྐྲུན་ཁང་ནས་པར་སྐྲུན་འགྲེམས་སྤེལ་བྱས།

       «གཙང་སྟོད་ཟིན་ཏིག»ཅེས་པ་ནི། གཙང་སྟོད་དར་མ་མགོན་པོ(དུས་རབས12པའི་མཇུག13པའི་སྟོད་ཙམ)མཆོག་གིས་ཡུལ་དང་དུས་ངེས་པ་ཞིག་ལ་སྟན་ཐོག་གཅིག་ཏུ་མཛད་པ་ཞིག་མ་ཡིན་པར་རང་གི་བླ་མ་ཞང་སྟོན་ཞིག་པོ་སོགས་ཀྱི་ཞལ་རྒྱུན་ཡི་གེར་བཀོད་པའམ། བུ་བཟང་འོད་དང་སློབ་མ་མར་ལུང་སེ་བོ་དང་བསོད་ནམས་འབུམ་མེ་སོགས་ཀྱི་ངོར་སྐབས་བསྟུན་གྱིས་མཛད་པ་ཞིག་ཡིན་པས། གཞུང་ཧྲིལ་བོའི་ཆོས་ཚན་སོ་སོའི་དོན་དང་སྔ་ཕྱིའི་བར་ལ་གཏན་ཚིགས་ཀྱི་འབྲེལ་བ་ཚགས་དམ་པོ་མེད་པར་ཟིན་བྲིས་ཀྱི་རྣམ་པར་གནས་ཤིང་། ད་ལྟ་དངོས་སུ་པར་བསྐྲུན་བྱས་པའི་བུ་ཡིག་མི་འདྲ་བ་ལྔ་བཞུགས་ཀྱང་། ཞུས་དག་པ་སོགས་ཀྱི་རྐྱེན་གྱིས་ཡི་གེ་མ་དག་པ་དང་། དཔེ་རྙིང་གི་ཉམས་བོར་བ། བརྡ་རྙིང་བར་བཅོས་ནོར་ཤོར་བ། ས་བཅད་གོང་འོག་འཁྲུགས་པ་སོགས་དཔེ་རྙིང་སྲུང་སྐྱོབ་དང་དག་སྒྲིག་གི་ལས་དང་འགལ་བ་མང་དུ་སྣང་བ་ལགས་ན། ད་ཐེངས་འདིར་བསྡུ་སྒྲིག་བྱས་པའི«གཙང་སྟོད་དར་མ་མགོན་པོའི་ཟིན་ཏིག་དང་ཡང་ཏིག»ཅེས་པ་འདི་ནི། ཨ་མེ་རི་ཁའི་བེ་སི་ཁང་ཞིན་མལ་ཊི་སིན་སློབ་ཆེན་གྱི་མེ་མོ་རིལ་དཔེ་མཛོད་ཁང་དུ1976ལོར་ཉར་བའི་མ་དཔེ་ལ་གཞིར་བཟུང་ནས་དེབ་འདིའི་རྩོམ་སྒྲིག་ཚན་ཆུང་གིས་ལྕགས་པར་དུ་བཏབ་པ་ཞིག་ཡིན།

       དེའང་དུམ་པ་ཆུང་ངུ་གཉིས་ཡོད་པ་ལས་དུམ་པ་དང་པོར་གསོ་བ་རིག་པ་ལ་འཇུག་པའི་རྩོད་སྤོང་སོགས་ཆོས་ཚན་བཞི་བཅུ་ཞེ་གཉིས་དང་། དུམ་པ་གཉིས་པར་ཁ་ནད་གསོ་བའི་ཟིན་ཏིག་སོགས་ཆོས་ཚན་ཉི་ཤུ་རྩ་ལྔའི་བདག་ཉིད་དུ་གྲུབ་ཅིང་། དུམ་པ་གཉིས་ཀ་སྣ་ཐུང་ཡིན་པ་ལ་དུམ་པ་དང་པོར་ལྡེབ་གྲངས250ཙམ་དང་། ལྡེབ་ངོས500ཙམ། དུམ་པ་གཉིས་པར་ལྡེབ་གྲངས170ཙམ་དང་ལྡེབ་ངོས339ཙམ་མཆིས་ཤིང་། ད་ལྟའི་བུ་ཡིག་རྣམས་དང་བསྡུར་ན། ལ་ལ་ཁ་བྱང་མི་མཐུན་པ་དང་། ཁ་ཅིག་མཆོད་བརྗོད་མི་འདྲ་བ། འགའ་ཞིག་མཇུག་གི་སྦྱར་བྱང་དང་སྨོན་ཚིག་སོགས་མི་གཅིག་པའམ་ཆད་ལྷག་ཡོད་པ་ལྟ་བུ། ལ་ལ་མཚན་འདྲ་ཡང་ནང་གི་དོན་མི་འདྲ་བ་ལྟ་བུ་མང་དུ་མཆིས་པས་ད་ཐེངས་དཔེ་རྙིང་གི་ཉམས་མ་བོར་བའི་རྩ་དོན་སྲོག་ཤིང་དུ་བཟུང་སྟེ་གཞུང་གི་རྩ་ཚིག་དང་མཆན་ཡིག་སོགས་ལ་བཟོ་བཅོས་དང་འཕྲི་སྣོན་གང་ཡང་མ་བྱས་པར་སོར་བཞག་བྱས་ཏེ་དབུ་ཅན་དུ་ཕབ་པ་ཡིན་ལ། དཔེ་རྙིང་ཞིབ་འཇུག་གི་ལས་ལ་འབད་པ་དག་གི་ངོར་མཇུག་ཏུ་མ་ཡིག་ཀྱང་བཀོད་ཡོད་དོ། །