ངོས་དང་པོ > དམངས་སྲོལ། > དམངས་སྲོལ་ཞིབ་འཇུག > མཆིག

མཆིག

རྩོམ་པ་པོ།： ཡོང་ཁུངས།：མཚོ་སྔོན་བོད་ཡིག་ཚགས་པར། དུས་ཚོད།：2026-09-29 08:40:09 ཀློག་གྲངས།：

མཆིག་ནི་འབྲུ་རིགས་སོགས་ཞིབ་མོར་འཐག་བྱེད་ཀྱི་ཡོ་བྱད་ཅིག་ཡིན། དེ་ནི་བོད་ཀྱི་སྤྱི་ཚོགས་ཙམ་མ་ཟད་འགྲོ་བ་མིའི་རིགས་ཀྱི་སྤྱི་ཚོགས་འཚོ་བའི་ཁྲོད་བྱུང་སྔ་བའི་ལག་ཆ་གལ་ཆེན་ཞིག་ཀྱང་ཡིན་མོད། འོན་ཀྱང་ལུང་པ་རེ་ལ་ཆུ་རེ་དང་ས་ཆ་རེ་ལ་དཔེ་རེ་ཞེས་པ་ལྟར་བོད་རང་གི་མཆིག་ལ་གཞན་དང་མི་མཐུན་པའི་ཁྱད་ཆོས་འགའ་རེ་ལྡན་པ་རེད།

མཆིག་གི་དབྱེ་བ་ལ་ལག་སྐོར་དང་ཆུ་ཤུགས་ཀྱི་བསྐོར་བའི་ཆུ་མཆིག་སྟེ་རིགས་གཉིས་ཡོད་ཅིང་། དེ་ནི་ཡས་མཆིག་དང་མས་མཆིག་ཅེས་རྡོ་ལེབ་གཉིས་ཀྱིས་གྲུབ་པ་རེད། དེར་ཡང་མཆིག་གི་གྲུབ་ཚུལ་ཐད་ནས་རྣམ་པ་མི་འདྲ་བ་གཉིས་ཡོད་པ་སྟེ།

ཡས་མཆིག་དང་མས་མཆིག་ལ་ཆེ་ཆུང་གི་ཁྱད་པར་ཡོད་པ་དང་། གཞན་པ་ནི་ཆེ་ཆུང་གི་ཁྱད་པར་མེད། ཁྱད་པར་ཡོད་མེད་གང་ཡིན་ཡང་མཆིག་ལྟེ་ཞེས་ལྟེ་བ་ཞིག་དང་། མཆིག་ཡུ་དང་མཆིག་ཐག་ཅེས་ལག་པ་འཇུ་ས་ཞིག མཆིག་ཁུང་ཞེས་ཡོས་སོགས་འཐག་བྱ་བླུགས་ས་ཞིག ཁོད་ར་ཞེས་ལག་བསྐོར་ཀྱི་གདན་དུ་འདིང་བྱའི་ཀོ་བ་ཞིག མཆིག་སྒྱེ་ཞེས་ཆུ་མཆིག་གི་ནང་དུ་ཡོས་སོགས་འཐག་བྱ་བླུགས་བྱེད་ཅིག སྤྱིར་བཏང་དུ་མཆིག་བཀོལ་ནས་འབྲུ་རིགས་གྲོ་ནས་སོགས་འཐག་པར་བྱ་ཞིང་། དེ་ལས་གཞན་ཕྱུར་བ་དང་གྲོ་མ་སོགས་ཀྱང་འཐག་པ་ཡིན་ལ། དེ་དག་སོ་སོའི་རགས་ཞིབ་མི་འདྲ་བར་འཐག་བྱེད་ཀྱི་མཆིག་ཀྱང་རྩེ་མཆིག་རྟེན་མཆིག(སྒྲ་གདངས་ལྟར་བཀོད)ཅེས་སོ་སོར་ཡོད་པ་རེད། འཐག་སྐབས་གྲོ་ཞིབ་ཕྱོགས་སོ་སོ་ནས་འཐོར་བ(ཡས་མཆིག་མས་མཆིག་ཆེ་ཆུང་མེད་པ)ནི་འབྲོག་ཁུལ་དུ་དར་ཆེ་ལ། ཝ་ཁ་ནས་འཐོར་བ་ཅན(ཡས་མཆིག་མས་མཆིག་ཆེ་ཆུང་ཅན)ནི་རོང་ཁུལ་དུ་དར་ཆེ།

སྤྱི་ཚོགས་རྙིང་པར་གཙོ་བོ་ལག་མཆིག་དར་ཁྱབ་ཆེ་ལ། དུད་ཚང་རེ་ལ་ལག་མཆིག་རེ་ཡོད་ཅིང་། རང་ཉིད་ཀྱི་ཁ་ཟས་ལྟ་བུ་འཐག་དགོས་པ་ན་བུད་མེད་རྣམས་ཀྱིས་དུས་བསྟུན་ལྟར་ཡོས་གཞོང་བ་གང་རེ་བཏགས་རྗེས་རྩམ་པ་ཟ་བ་ཡིན་ལ། དེ་མ་ཡིན་པའི་རྒྱགས་དང་ཚོང་ལ་དགོས་པ་དག་སྡེབ་འཐག་དང་ཆུ་འཐག་བྱེད་པ་ཡིན། ཆུ་འཐག་ནི་སྔོན་མ་ནས་ཡོད་ཀྱང་དེ་ཙམ་དར་ཁྱབ་བྱུང་མེད།

འབྲེལ་ཡོད་འོས་སྦྱོར།

暂无相关信息roking

འབྲེལ་གཏུག་ཁ་པར།：0974-8512858

འཕྲིན་སྐུར་ཡིག་ཟམ།：amdotibet@163.com