བླ་བྲང་གི་རྒྱན་གོས་རྒྱལ་སྤྱིའི་གར་སྟེགས་སུ་ངོམ།

       འདི་ནི་མཐོ་སྒང་དང་འཛམ་གླིང་གི་གླེང་མོལ་ཐེངས་ཤིག་ཡིན་ལ། འདི་ནི་སྲོལ་རྒྱུན་དང་མ་འོངས་པའི་བར་གྱི་ལག་འཇུ་ཐེངས་ཤིག་ཡིན། ཉེ་ཆར། བླ་བྲང་དགྱེས་འཛོམས་ཞེས་པའི་བསང་ཆུ་རྫོང་གི་ཆེད་དམིགས་ཚོང་འགུག་ངོ་སྤྲོད་ཚོགས་འདུ་པེ་ཅིན་དུ་འཚོགས། ཀྲུང་གོའི་གནས་མཆོག་བླ་བྲང་།འཛམ་གླིང་བོད་རིག་པའི་གཙིག་རྒྱན་གྱིས་མངོན་མིན་ཤུལ་བཞག་རིག་གནས་ཀྱི་མཛེས་པ་དང་རྒྱན་གོས་ཀྱི་གཟི་དཔལ་བསྣམས་ནས་འཛམ་གླིང་ལ་བསང་ཆུའི་སྣ་མང་རིག་གནས་ཀྱི་སྣང་བརྙན་ལེགས་པོ་ངོམ།

       ཐེངས་འདིའི་བྱེད་སྒོ་ནི་ཀྲུང་གུང་བསང་ཆུ་རྫོང་ཨུ་དང་རྫོང་མི་དམངས་སྲིད་གཞུང་གིས་གཙོ་སྒྲུབ་བྱས་ཤིང་། རྫོང་རིག་གནས་ལུས་རྩལ་རྒྱང་སྒྲོག་བརྙན་འཕྲིན་དང་ཡུལ་སྐོར་ཅུའུ་དང་། རྫོང་དངུལ་གཏོང་དང་མཉམ་ལས་བརྗེ་རེས་ཅུའུ། ཀན་ལྷོ་ལམ་ན་རིག་གནས་བརྒྱུད་སྒྲོག་ཚད་ཡོད་འགན་འཁྲི་ཀུང་སིས་སྒྲུབ་འགན་ཁུར་ཡོད།

       ཐེངས་འདིའི་བྱེད་སྒོའི་དམིགས་ཡུལ་ནི་བསང་ཆུའི་སྣ་མང་ཕུན་སུམ་ཚོགས་པའི་དམངས་སྲོལ་རིག་གནས་དང་རང་བྱུང་ཡུལ་ལྗོངས་འགྲེམ་སྟོན་དང་། ཁྱད་དུ་འཕགས་པའི་རིག་གནས་ཡུལ་སྐོར་ཐོན་ཁུངས་དང་རིག་གནས་ཡུལ་སྐོར་ཐོན་ལས་ཁྱད་ལྡན་དང་ཚོང་འགུག་དངུལ་འདྲེན་ལས་གཞི་ངོ་སྤྲོད་བྱེད་པ། དུས་མཚུངས་སུ་བླ་བྲང་གི་རྒྱན་གོས་རིག་གནས་རྒྱུན་འཛིན་དང་དར་སྤེལ་བཏང་ནས་རྒྱལ་ཕྱི་ནང་གི་སྨྱན་སྦྱོར་བ་དང་ལྟད་མོ་བར་བསང་ཆུའི་རིག་གནས་ཡུལ་སྐོར་ཐོན་ཁུངས་དང་མངོན་མིན་ཤུལ་བཞག་རིག་གནས་ཀྱི་ཆ་འཕྲིན་བརྒྱུད་སྒྲོག་བྱས་ཏེ་མི་སྔར་ལས་མང་པོའི་དོ་སྣང་ཐོབ་པ་དང་ཚབ་ཞུགས་བྱེད་དུ་འཇུག་ཆེད་རེད།

       བསང་ཆུ་རྫོང་ནི་མཚོ་བོད་ས་མཐོའི་ཤར་ཕྱོགས་ཀྱི་མཛེས་སྡུག་ལྡན་པའི་ས་ཆ་ཞིག་ཡིན་པ་དང་། བླ་བྲང་དགོན་པ་ལས་མཚན་གྱི་སྙན་པ་ཕྱོགས་བཅུར་ཁྱབ་ཅིང་། བོད་ཀྱི་སྲོལ་རྒྱུན་རིག་གནས་ཀྱི་གཏེར་མཛོད་ཅིག་ཀྱང་ཡིན། ཐང་ག་ཡི་མཛེས་སྡུག་ལྡན་པའི་ཚོན་མདོག་དང་། བོད་ཀྱི་ས་གདན་གྱི་ཞིབ་ཚགས་ཆེ་བའི་འཐག་རྩལ། རྡུང་བཟོའི་ལག་རྩལ་བཟང་པོའི་འདོགས་ཆ་སོགས་དེང་རབས་ཀྱི་ཇུས་འགོད་དང་འཕྲད་སྐབས་བསང་ཆུའི་མངོན་མིན་ཤུལ་བཞག་རིག་གནས་ལ་དུས་རབས་དང་མཐུན་པའི་དར་སྲོལ་གྱི་གཤོག་ཟུང་སྤྲད་དེ2025ལོའི་ཀྲུང་གོ་རྒྱལ་སྤྱིའི་གྱོན་ཆས་གཟའ་འཁོར་གྱི་གར་སྟེགས་སུ་བུད་དེ་འཛམ་གླིང་ལ་བོད་ཀྱི་རྒྱན་གོས་རིག་གནས་ཀྱི་མཛེས་པ་ཅི་དགར་ངོམ།

       གསར་གཏོད་ཀྱི་ལག་ལེན་འདི་ནི་མངོན་མིན་ཤུལ་བཞག་རིག་གནས་ཀྱི་རྒྱུན་འཛིན་བྱེད་ཐབས་ལེགས་པོ་ཤིག་ཡིན་ལ། སྲོལ་རྒྱུན་རིག་གནས་ལ་གསར་གཏོད་རང་བཞིན་གྱི་བསྒྱུར་བཀོད་བྱེད་པར་སྲུང་སྐྱོབ་དང་གསར་སྤེལ་ཁྲོད་ནས་ཐབས་ལམ་ཡང་དག་ཞིག་འཚོལ་དགོས་ཏེ། ལོ་རྒྱུས་ཀྱི་སྦུབས་སུ་སིམ་མི་རུང་ལ་ཚོང་རའི་ཁྲོད་ཁ་ཕྱོགས་ཀྱང་འབོར་མི་ཉན་པར་དེང་རབས་ཐོན་ལས་ཀྱིས་གསོན་ཤུགས་སྤྲོད་དགོས་པ་ཞིག་རེད།

       དར་སྲོལ་གསར་བའི་རྒྱན་གོས་འདི་དག་ནི་སྲོལ་རྒྱུན་ལག་ཤེས་ལ་དེང་རབས་ཀྱི་མཛེས་རྒྱན་སྤྲས་པ་སྟེ། ཇུས་འགོད་པ་ཚོས་བོད་པའི་སྲོལ་རྒྱུན་གྱི་འཁེལ་འཐག་བཟོ་རྩལ་ལས་གྲུབ་པའི་རྒྱུ་ཆ་རྨང་གཞི་བྱས་ཤིང་། དེང་རབས་ཀྱི་གཏུབ་གཅོད་ཐབས་དང་རྒྱུན་མཐུད་རང་བཞིན་གྱི་འདུ་ཤེས་སྤྱད་ནས་མི་རིགས་ཀྱི་བརྡ་རྟགས་དང་རྒྱལ་སྤྱིའི་མཛེས་དཔྱོད་ལྡན་པའི་གྱོན་ཆས་རིགས་སྣ་ཚོགས་བཏོན་ཡོད།

       བླ་བྲང་གི་རྒྱན་གོས་འགྲེམ་སྟོན་བྱེད་པའི་འགྲུལ་བཞུད་འདི་ནི་ཐོན་ལས་སྐྱེ་ཁམས་ཀྱི་རིམ་སྤར་ལམ་བུ་ཞིག་ཡིན་ལ། རིག་གནས་ཡུལ་སྐོར་མཉམ་འདྲེས་གྱིས་བསང་ཆུར་འཕེལ་རྒྱས་ཀྱི་སྒུལ་ཤུགས་གསར་བ་བསྩོལ་ཐུབ། ཀྲུང་གོ་རྒྱལ་སྤྱིའི་གྱོན་ཆས་གཟའ་འཁོར་འདི་བརྒྱུད་ནས་བོད་པའི་ལྷད་མེད་ཀྱི་མ་བཅོས་རྒྱུ་ཆ་དག་སྔོན་ཐོན་འཁེལ་འཐག་བཟོ་རྩལ་དང་སྡེབ་ནས་རིན་གོང་སྔར་ལས་ཆེ་བའི་ཐོན་རྫས་ལས་སྣོན་གྱི་ལམ་དུ་བསྐྱོད་ཐུབ་བོ། །