༄༅།།རྒྱལ་ཡོངས་བོད་ཡིག་སྨྱན་སྦྱོར་སྐབས་ཉི་ཤུ་བའི་སྟེང་གི་ཕུལ་བྱུང་གསར་འགྱུར་བརྩམས་ཆོས་ལེགས་འདེམ་བྱེད་པའི་ཡུལ་དངོས།

སྤྱི་ཟླ8པའི་ཚེས3ནས་ཚེས4བར། རྒྱལ་ཡོངས་བོད་ཡིག་སྨྱན་སྦྱོར་མཐུན་སྦྱོར་ཚོགས་འདུ་སྐབས་ཉི་ཤུ་བའི་རིགས་སྣ་ཚོགས་གསར་འགྱུར་བྱ་དགའི་དཔྱད་བཤེར་བྱ་བ་རིམ་པ་ཡོད་པའི་སྒོ་ནས་སྤེལ་ཞིང་། སྐབས་འདིའི་སྨྱན་སྦྱོར་མཐུན་སྦྱོར་ཚོགས་འདུར་བསྡོམས་པས་བོད་ལྗོངས་དང་། ཀན་སུའུ། སི་ཁྲོན། མཚོ་སྔོན་སོགས་ཞིང་ལྗོངས་དང་གྲོང་ཁྱེར་བོད་ཡིག་སྨྱན་སྦྱོར་གྱི་འགྲན་ཞུགས་བརྩམས་ཆོས350ལྷག་ཡོད་དེ། དེར་ཚགས་པར་གསར་འགྱུར་དང་། དྲ་རྒྱ། སྨྱན་གསར། རྒྱང་སྒྲོག་བརྙན་འཕྲིན་བཅས་རིགས་ཆེན་པོ་གསུམ་འདུས།
རྒྱང་སྒྲོག་བརྙན་འཕྲིན་རིགས་ཀྱི་བྱ་དགའ་ཨང་དང་པོ་དང་གཉིས་པ། གསུམ་པ་སོགས་བྱ་དགའི་དཔྱད་འདེམ་བྱ་བར་གཞིགས་ན། བརྙན་རིས་རིགས་ཀྱི་དུས་ཡུན་རིང་ཞིང་ཚད་བཀག་ལྡན་པས། སྐར་ཆ་རེ་རེར་བལྟས་ནས་ཚར་དུ་འཇུག་རྒྱུ་ནི་ཤིན་ཏུ་དཀའ་བ་དང་། བྱ་བའི་ཚད་མང་ལ་འོས་འགན་ལྕི། ཡིན་ཡང་དཔྱད་འདེམ་ཨུ་ལྷན་གྱི་ཚོགས་མི་དག་གིས་ནན་ཏན་དང་ཞིབ་ཚགས་སྒོས་གྲོས་བསྡུར་ཁྲོད་རང་སོ་སོའི་ལྟ་ཚུལ་ལྷུག་པོར་བརྗོད།
ཚགས་པར་གསར་འགྱུར་ཚན་ཆུང་གི་དཔྱད་འདེམ་ཚོགས་གཙོ་དང་མཚོ་སྔོན་ཉིན་རེའི་ཚགས་པར་ཁང་གི་གཙོ་སྒྲིག་གཞོན་པ་ཚེ་མགོན་གྱིས་བསམ་དོན། གོ་རིམ་གང་ཞིག་ཡིན་ཡང་། མཐའ་མའི་དམིགས་ཡུལ་ནི་བོད་ཡིག་སྨྱན་སྦྱོར་མཐུན་སྦྱོར་ཚོགས་འདུའི་གསར་འགྱུར་བྱ་དགའ་དཔྱད་ཞིབ་གནང་བ་དེ་སྤྱི་བསྒྲགས་དང་འདྲ་མཉམ། དྲང་བདེན་གྱི་རྩ་དོན་མཚོན་པར་བྱས་ཏེ་ཕུལ་བྱུང་བརྩམས་ཆོས་ལེགས་འདེམ་བྱེད་པ་དང་། སྒོས་སུ་གལ་ཆེ་བ་ནི་བོད་ཡིག་སྨྱན་སྦྱོར་འཕེལ་རྒྱས་ཀྱི་ཁ་ཕྱོགས་ལ་ཁྲིད་སྟོན་གྱི་ནུས་པ་ཐོན་དགོས།
དཔྱད་འདེམ་གྱི་ཚད་གཞི་གཟབ་ནན་དང་། ཞིབ་ཚགས་ཀྱི་གསར་འགྱུར་བཅར་འདྲི་བྱ་བའི་སྤྱོད་སྟངས་མཚོན་པར་བྱ་རྒྱུ་ནི་སྐབས་འདིའི་མཐུན་སྦྱོར་ཚོགས་འདུའི་གསར་འགྱུར་བྱ་དགའ་དཔྱད་འདེམ་གྱི་བསྟན་དོན་གཙོ་བོ་ཡིན། ཚགས་པར་དཔྱད་ཞིབ་ཨུ་ལྷན་གྱི་ཚོགས་མི་དང་མཚོ་ལྷོ་བོད་ཡིག་ཚགས་པར་ཁང་གི་གཙོ་སྒྲིག་བཀྲ་ཤིས་དོན་འགྲུབ་ཀྱིས་བཤད་རྒྱུར། ང་ཚོས་ཕུལ་བྱུང་གི་གསར་འགྱུར་བརྩམས་ཆོས་ཡར་ཕུལ་ཐུབ་པ་དང་འདེམ་ཐུབ་པར་བྱས་ཏེ། དཔེ་སྟོན་གྱི་ནུས་པ་འདོན་སྤེལ་བྱེད་དགོས།
ཚགས་པར་དཔྱད་ཞིབ་ཨུ་ལྷན་གྱི་ཚོགས་མི་དང་བདེ་ཆེན་ཉིན་རེའི་ཚགས་པར་ཁང་གི་གཙོ་སྒྲིག་གཞོན་པ་ཀྲང་ཀོའོ་ཧྭ་ཡིས་བཤད་རྒྱུར། ད་ལོར་དཔྱད་འདེམ་ལ་ཞུགས་པའི་བརྩམས་ཆོས་འདི་དག་སྟེང་ནས་དུས་རབས་ཀྱི་རྣམ་པ་གསར་བ་མཚོན་པར་བྱས་ཡོད་ཅིང་། དཔྱད་ཞིབ་ཁྲོད་རྩ་དོན་གཅིག་སྲུང་དགོས་པ་སྟེ། བྱ་དགའ་ཨང་དང་པོ་དེ་འཇོན་ཐང་ལ་བརྟེན་ནས་བཤད་པ་དང་། བྱ་དགའ་ཨང་གཉིས་པ་དེ་དོ་སྙོམས་ཀྱི་རྩ་དོན་རྒྱུན་འཁྱོངས་བྱེད་དགོས། བྱ་དགའ་ཨང་གསུམ་པ་དེ་སྐུལ་ལྕགས་ཀྱི་རྩ་དོན་རྒྱུན་འཁྱོངས་བྱེད་དགོས། རེ་འདུན་དང་མི་མཐུན་པའི་བརྩམས་ཆོས་ཐད་ཀར་དོར་ཆོག  རྒྱུས་ལོན་པ་ལྟར་ན། དཀར་མཛེས་ཉིན་རེའི་ཚགས་པར་གྱི་རིམས་འགོག་པར་ངོས3པའི་བརྗོད་གཞི་གཟེངས་སུ་ཐོན་པས་ཆེས་མཐོ་བའི་སྐར་འབྲས་བླངས།
དྲ་རྒྱ་དང་སྨྱན་གསར་ཐད་ཀྱི་བརྩམས་ཆོས་ཁྲོད། སྨྱན་མཐུན་བརྙན་རིས་ཐུང་གྲས་དང་། ཐད་གཏོང་སྨྱན་མཐུན། སྨྱན་མཐུན་ཕན་ཚུན་སྤེལ་རེས། སྨྱན་མཐུན་ཆེད་བསྒྲིགས། སྨྱན་མཐུན་དྲ་ངོས། སྨྱན་མཐུན་གསར་སྐྲུན་སོགས་ཀྱི་རིགས་འདུས་ཤིང་། རྣམ་པ་སྣ་ཚོགས་དང་ཐུན་མོང་མ་ཡིན་པ་ཞིག་ཡིན། ཚན་ཆུང་འདིའི་ཚོགས་གཙོ་དང་སི་ཁྲོན་ཏང་འཛུགས་དུས་དེབ་ཁང་གི་གཙོ་སྒྲིག་གཞོན་པ་དཀོན་མཆོག་རྡོ་རྗེས་བཤད་རྒྱུར། དྲ་རྒྱ་དང་སྨྱན་གསར་ཚན་ཆུང་གིས་དཔྱད་འདེམ་བརྩམས་ཆོས་ལ་དཔྱད་རྩོམ་དང་གསར་འགྱུར། པར་ངོས། འཕྲིན་གཏོང་། སྤྱི་ཚོགས་འབྲེལ་འདྲིས། འགྱུར་རྩོམ། ཆ་འཕྲིན་སོགས་སུ་དབྱེ་ཡོད་པ་དང་། སྨྱན་མཐུན་གསར་འགྱུར་གསར་འགོད་ཀྱི་ཁྱད་འཕགས་གཙོ་བོ་ནི་དེས་སྨྱན་སྦྱོར་ཡོངས་ཀྱི་གསར་འགོད་རྣམ་པ་ཁེབས་ཡོད་ཅིང་རྣམ་པ་སྣ་ཚོགས་ཡིན།
རྒྱང་སྒྲོག་བརྙན་འཕྲིན་ཚན་ཆུང་གི་ཚོགས་གཙོ་དང་ཆབ་མདོ་རྒྱང་སྒྲོག་བརྙན་འཕྲིན་ཁང་གི་འགོ་གཙོ་ཁྱི་ལོད་གྲགས་པས་དཔྱད་ཞིབ་ཁྲོད་བསྟན་དོན། གསར་འགྱུར་ཁ་ཤས་ནི་དོན་དག་རང་སྟེང་ལ་རིན་ཐང་ཆེན་པོ་ལྡན་ཞིང་། འབྲེལ་ཡོད་མི་སྣར་ངོ་མཚར་གྱི་དངོས་པོ་ཡོད། ཡིན་ཡང་ངོས་འཛིན་ཆུ་ཚད་དང་བསམ་བློའི་ཚད་མི་འདང་བའམ་སྐད་རིགས་སོགས་ཐད་ཀྱི་དབང་གིས་བྱ་དགའ་ཨང་དང་པོ་ལོན་མ་ཐུབ་པར་དངོས་གནས་ཕངས་སེམས་སྐྱེས།
དཔྱད་ཞིབ་ཁྲོད་ཚང་མར་ཚོར་བ་ཟབ་མོ་ཞིག་བསྐྱེད་པ་ནི། རྩོམ་སྒྲིག་དང་གསར་འགྱུར་བྱེད་མཁན་ཞིག་ཡིན་ན། གལ་སྲིད་གཞི་རིམ་ལ་མི་བསྐྱོད་པ་དང་ཡུལ་དངོས་ལ་མི་ཐོན་པ། བཅར་འདྲི་བྱ་ཡུལ་གྱི་སེམས་སུ་བསྐྱོད་མ་ཐུབ་ན། བརྩམས་ཆོས་ལེགས་པོ་ཞིག་མི་འཁྱོངས། ཐེངས་འདིའི་བོད་ཡིག་སྨྱན་སྦྱོར་ཚོགས་འདུའི་གསར་འགྱུར་དཔྱད་འདེམ་གྱི་གོ་སྐབས་བརྒྱུད་དེ། གཟབ་ནན་དང་ནན་ཏན་སྒོས་སྤྱོད་ཚུལ་ལེགས་པོ་འདི་བོད་ཡིག་གསར་འགྱུར་ཁྱབ་ཁོངས་སུ་མུ་མཐུད་དུ་རྒྱུན་འཁྱོངས་བྱས་ཏེ། དངོས་གནས་དུས་རབས་ཀྱི་ཁྱད་ཆོས་མཚོན་པ་དང་། འཕེལ་རྒྱས་ཀྱི་གྲུབ་འབྲས་ངོམ་པ། སྤྱི་ཚོགས་ཀྱི་འཕེལ་རྒྱས་མཚོན་པའི་བརྩམས་ཆོས་གཟེངས་སུ་དོད་དེ། ནུས་ཤུགས་ཡོད་རྒུས་མཉམ་དུ་བོད་ཡིག་གསར་འགྱུར་དྲིལ་སྒྲོག་བྱ་བ་ལེགས་པོར་སྒྲུབ་སྟེ། དུས་རབས་ཀྱི་རྗེས་ཆོད་པའི་ཕུལ་བྱུང་བརྩམས་ཆོས་མང་པོ་འབྱུང་ཐུབ་ཐར་རེ།
རྒྱུས་ལོན་པ་ལྟར་ན། བྱ་དགའ་སྣ་ཚོགས་ཀྱི་དཔྱད་འདེམ་མཇུག་འབྲས་དེ་མཇུག་སྒྲིལ་མཛོད་སྒོའི་སྟེང་བསྒྲགས་རྒྱུ་ཡིན་པ་རེད།