༄༅། །ལེགས་སྦྱར་ཐ་སྙད་འཁྲུལ་སེལ་བཞུགས་སོ། །

       སྤྱིར་བོད་ལྟ་བུར་མཚོན་ན་ཐུན་མིན་དང་ཐུན་མོང་གི་རིག་གནས་གང་དང་གང་ཡིན་རུང་ལེགས་སྦྱར་གྱི་ཐ་སྙད་མང་པོ་ཞིག་ནང་འདྲེན་བྱས་ཤིང་། དེ་དག་ལེགས་པར་རྟོགས་ཐུབ་པའི་ཆེད་དུ་སྒྲ་རིག་པའི་གཞུང་ལུགས་མང་པོ་བོད་ཡིག་ཏུ་འགྱུར་ཅིང་དཔྱད་བརྗོད་ཀྱི་རྣམ་དཔྱོད་དཔོག་པར་དཀའ་བའི་བརྩམས་ཆོས་ཀྱང་གྲངས་ལས་འདས། སྒོས་སུ་ལེགས་སྦྱར་གྱི་སྐད་ཡིག་ཇི་བཞིན་འབྲི་ཀློག་བྱ་ཐབས་ཀྱི་འཇུག་སྒོ་ནི་དེ་བས་སྨྲ་མི་དགོས་པར་བརྟེན། བོད་ནི་ལེགས་སྦྱར་སྐད་ཡིག་གི་བང་མཛོད་ཅིག་ཏུ་བརྗོད་ནའང་ཐལ་ཆ་ཆེན་པོ་མི་འགྱུར། དེས་ན་སྐབས་སུ་བབས་པའི་བརྗོད་བྱའི་ནང་དོན་ནི་འགོས་ལོ་ཙཱ་བ་གཞོན་ནུ་དཔལ་མཆོག་གིས་མཛད་པའི་སྒྲ་གཞུང«སྒྲ་ལ་འཇུག་པའི་སྒོ་ལེགས་སྦྱར་ལྟ་བའི་མེ་ལོང་ཞེས་བྱ་བ་བཞུགས་སོ། །»ཞེས་པ་དེ་ཡིན། སྒྲ་གཞུང་འདི་ཉིད་ནི་འགོས་ལོ་མཆོག་གིས། འདིར་ནི་ཉེར་མཁོ་ཆེ་ལོང་ཙམ། །སྒྲ་མདོ་རྣམས་དང་སྦྱར་བྱས་ནས། །གཞན་ཕན་བསམ་པས་བྲིས་པ་ལ། །ཤེས་ལྡན་གཟུར་གནས་དགྱེས་པར་མཛོད། །ཅེས་གསུངས་པ་ལྟར་ཡོངས་གྲགས་ཀྱི་སྒྲ་གཞུང་ངམ་ལེགས་སྦྱར་བརྡ་སྤྲོད་རིག་པ་དང་མི་འདྲ་བར་ལེགས་སྦྱར་གྱི་གཟུངས་སྔགས་དང་ཐ་སྙད་སོགས་ཆེས་སྤྱོད་མཁོ་ཆེ་ཞིང་འཁྲུལ་གཞི་ཅན་རྣམས་ཀྱི་ཆེད་དུ་དམིགས་ཏེ་རྣམ་པ་བཞིའི་རིགས་ཅན་ནས་ལེགས་པར་གསལ་བའི་སྒྲ་གཞུང་འཁྲུལ་སེལ་ཞིག་ཏུ་མཆིས། འདིར་དེ་འདྲའི་རིགས་ཅན་བཞི་ཡི་ཡ་གྱལ་ཐ་སྙད་ཀྱི་འཁྲུལ་སེལ་རྣམས་ཕྱོགས་གཅིག་ཏུ་བསྒྲིགས་ནས་གཤམ་གྱི་རེའུ་མིག་ཏུ་བཀྲམ་སྟེ་དོན་གཉེར་ཅན་ཀུན་ལ་ཕན་པའི་རྒྱུར་གྱུར་ཅིག །