དེབ་གསར«མཚོ་སྔོན་པོའི་ངག་རྩོམ་མེས་པོའི་ཁ་རྒྱན»ཞེས་པ་པར་སྐྲུན་བྱས།

       ཉེ་ཆར། བོད་ཀྱི་དམངས་ཁྲོད་བཤད་པ་སྒྱུ་རྩལ་ལ་བྱང་ཆ་ལྡན་པའི་ལྡོང་ངེ་ཀུན་བཟང་རྒྱལ་དང་ལྡོང་ངེ་ལྷ་མོ་གཉིས་ཀྱིས་གསར་རྩོམ་དང་བསྡུ་སྒྲིག་བྱས་པའི«མཚོ་སྔོན་པོའི་ངག་རྩོམ་མེས་པོའི་ཁ་རྒྱན»ཞེས་པ་མཚོ་སྔོན་མི་རིགས་དཔེ་སྐྲུན་ཁང་ནས་པར་སྐྲུན་འགྲེམས་སྤེལ་བྱས།

       ལར་བོད་ཀྱི་ངག་རྒྱུད་རྩོམ་རིག་ཅེས་པའང་རྒྱ་ཆེ་ལ་གཏིང་ཟབ་པ་ཤ་སྟག་ཏུ་འདུག་པས། ཁོ་བོ་ལྟ་བུས་འདིའི་སྐོར་ལ་བརྟག་དཔྱད་མེད་པའི་གཏམ་བཤད་ནི་ཅིས་ཀྱང་རྔོ་མི་ཐོགས་པས་མི་མཛའ་མོད། «མཚོ་སྔོན་པོའི་ངག་རྩོམ་མེས་པོའི་ཁ་རྒྱན»གྱི་བསྡུ་སྒྲིག་བྱེད་མཁན་ལྡོང་ངེ་ཀུན་བཟང་རྒྱལ་ལགས་ཀྱིས་ལན་འགར་རེ་བཅོལ་ནན་སྐུལ་བྱས་པའི་ངོ་ཟློག་མ་ནུས་སྟབས། དེབ་འདིར་བསྡུས་པའི་ངག་རྩོམ་ཅི་རིགས་ལས་མཐོང་བའི་ཁྱད་ཆོས་འགའ་དང་ཡང་ན་དེ་དག་ལས་འཕྲོས་པའི་དྲན་ཚུལ་རེ་འགའ་ཞིག་སྔོན་འགྲོའི་གཏམ་དུ་བརྫུས་ནས་སྨྲ་བ་ལ། དེབ་འདིའི་ནང་དུ་བསྡུས་པའི་ངག་རྩོམ་ཕལ་ཆེར་ནི་ངག་རྒྱུད་རྩོམ་རིག་གི་ཁོངས་སུ་གཏོགས་པས་དེ་དག་ལ་ཐུན་མོང་གིས་གསར་རྩོམ་བྱས་པའི་ཁྱད་ཆོས་དང་ངག་ནས་ངག་བརྒྱུད་དེ་དར་ཁྱབ་དང་ཡང་ན་རྒྱུན་འཛིན་བྱེད་པའི་ཁྱད་ཆོས་ཀྱང་ཡོད་པས། ས་ཁུལ་རང་བཞིན་དང་ཡང་ན་དུས་རབས་རང་བཞིན་གྱི་འགྱུར་བའང་ངེས་ཅན་ཞིག་གཞོལ་མེད་དུ་བྱུང་ཡོད་པ་དེབ་འདིའི་མཚན་བྱང་དང་སྲིད་པའི་ཆགས་གླུ་བསྐལ་པའི་མེ་ལོང་། བུད་མེད་དུས་ཆེན་གྱི་ཤིས་ཚིག་གསེར་གྱི་དྲིལ་ཆུང་། དྲུག་གཙིག་བྱིས་པའི་དུས་ཆེན་གྱི་ཤིས་ཚིག་ངག་གི་རོལ་མོ་སོགས་ཞིབ་ཏུ་བཀླགས་ཤིང་ཅུང་ཟད་དཔྱད་པས་ཤེས་ནུས་སོ། །འདི་ལ་ཡུལ་དུས་ཀྱི་ཁྱད་ཆོས་ཞེས་ཀྱང་བཤད་ཆོག་སྙམ་ཞིང་། ལྷ་སྒྲུང་རིག་གཞུང་གི་སྒྲོམ་གཞི་ལས་བརྒལ་ནས་རིག་གནས་སྐྱེ་ཁམས་རིག་པ་སོགས་ཀྱི་ཐབས་ལམ་གསར་པས་དཔྱད་ཞིབ་བྱས་ན་དོན་སྙིང་དང་རིན་ཐང་ཆེན་པོ་ལྡན་པར་འདོད།
       གཞུང་ལུགས་དང་བསྟུན་ཏེ་བཤད་ན། ངག་རྒྱུད་རྩོམ་རིག་སྤྱིར་ལོ་རྒྱུས་དྲན་འཛིན་དང་། ལུགས་སྲོལ་སྒྲིག་འཛུགས། གོ་བསྐོན་གསེད་འགྲོལ། སྤང་བླང་བསླབ་འདོམས་སོགས་ཀྱི་སྤྱི་ཚོགས་བྱེད་ནུས་ཡོད་པར་བསྙད་པ་བཞིན། དེབ་འདིར་བསྡུས་པའི༼བཤད་པ༽ནི་ལྷག་པར་བྱེད་ནུས་དེ་དག་མངོན་གསལ་གཅིག་བསྡུས་ཀྱིས་མཚོན་ནུས་པའི་རྩོམ་སྟངས་བྱེ་བྲག་པ་ཞིག་ཏུ་མཐོང་བས། ཡུལ་དུས་ཀྱིས་བསྐལ་བའི་སྲིད་པའི་ཆགས་རིམ་སོགས་དང་འབྲེལ་བའི་ཐུན་མོང་གི་དྲན་འཛིན་དང་། ལྷག་པར་ཉེ་བར་ལྷགས་པ་དེང་གི་སྤྱི་ཚོགས་ཀྱི་ལྷ་ཆོས་མི་ཆོས་ཀྱི་འཕྲོ་མཐུད་དང་འགྱུར་བཅོས། དཔེར་ན་མི་རིགས་གང་ཞིག་གི་སྐད་དང་ཡི་གེའི་རྒྱུན་འཛིན་དར་སྤེལ། དཔེར་ན་ཡུལ་ལུང་གང་ཞིག་གི་སྐྱེ་ཁམས་ཁོར་ཡུག་སྲུང་སྐྱོང་སོགས་བྱ་གཞག་ལས་དོན་ཆེ་ཆེ་དྲག་དྲག་དང་གལ་ཆེན་འགངས་ཆེན་མང་པོ་ལའང་སྣེ་མང་རྙོག་འཛིང་དུ་འབྲེལ་ནས་ཡོད་པས། དེ་དག་ལ་བརྗོད་ཀྱིས་མི་ལང་བའི་རིན་ཐང་ཡོད་ པར་འདོད་ཅིང་། ངེད་ཅག་གིས༼བཤད་པ༽དེའི་རིགས་ཀྱི་ལག་ལེན་སོགས་འཁྲབ་སྟོན་ཙམ་དང་། ཁྲོམ་བཤད་ཙམ་དང་། ཆོ་ག་ཕྱག་ལེན་ཙམ་གང་རུང་ཞིག་ཏུ་མཐོང་ནས། དེ་ཚོད་ཀྱི་ལོངས་སྤྱོད་ཅིག་ཉམས་སུ་མྱོང་བཞིན་ཚིམས་པར་གྱུར་ན་ཤིན་ཏུ་ནས་ཕངས་ཆེ་ཟེར་འདོད།
       ངག་རྩོམ་འདི་དག་ཕ་མེས་བཀའ་དྲིན་ཅན་དེ་དག་ནས་ད་བར་དུ་ཟམ་མ་ཆད་པར་རྒྱུན་འཛིན་བྱས་ཏེ་ཡོང་ཐུབ་པ་ནི། མི་རབས་མི་རབས་ཀྱི་རྒྱུད་འཛིན་པ་དེ་དག་གི་བཀའ་དྲིན་ཡིན་པ་ཅིས་ཀྱང་རྟོགས་དགོས། འགྱུར་བ་སྐྱེན་པའི་དུས་རབས་ཤིག་ལ། ༼བཤད་པ༽འདི་འདྲ་འཚོལ་སྡུད་བྱས་ཏེ་ཡིག་ཐོག་ལ་ཕབ་པ་དང་། དེ་ནས་པར་སྐྲུན་འགྲེམ་སྤེལ་བྱ་བའམ། ཡང་ན་གྲངས་འཛིན་ཅན་དུ་སྒྱུར་བའི་ལས་ལ་འབད་པའང་། དུས་དང་བསྟུན་པའི་ངག་རྩོམ་སོགས་ཤུལ་བཞག་རིག་གནས་སུ་བསྙད་པ་ཡོད་ཚད་ཀྱི་རྒྱུན་འཛིན་དང་དར་སྤེལ་དུ་གཏོང་བའི་ཐབས་ལམ་ཞིག་ཅིས་ཀྱང་ཡིན་དགོས་པར་འགྱུར་ན། དེབ་འདིའི་སྡུད་སྒྲིག་དང་པར་སྐྲུན་འགྲེམ་སྤེལ་ཁོ་ནའི་ཐད་ནས་ཀྱང་། ཁོང་ལྡོང་ངེ་ཀུན་བཟང་རྒྱལ་དང་ལྡོང་ངེ་ལྷ་མོ་གཉིས་ལ་ཆེད་དུ་བཀའ་དྲིན་བདག་རྐྱེན་ཆེ་ཞུ་རྒྱུ་ཡིན།
       གཞན་ད་དུང་སྐབས་བསྟུན་དུ་ངེས་པར་ཞུ་སྙིང་འདོད་པ་ནི། དེབ་འདིའི་མི་སྣ་ངོ་སྤྲོད་ཀྱི་སྐབས་སུ་གནད་ཅན་དུ་ཡི་གེར་ཕབ་འདུག་པའི་ཉིན་ལུང་གི་རྒན་རབས་པ་གྲགས་ཅན་ཚེ་དབང་ཁོང་གི་ལོ་རྒྱུས་བསྡུས་པ་སོགས་ནི་དེ་དེ་བཞིན་དུ་ཡིན་ངེས་ཏེ། ཁོང་གི་བུ་བུ་མོ་རྣམས་ལ་གསལ་ཆ་ཡོད་པ་ལྟ་བུ་ཞིག་ཁོ་བོར་ཆ་རྒྱུས་མེད་ཀྱང་། ཁོ་བོ་ལོ་ན་ཆུང་བའི་དུས་སློབ་གྲྭར་སོང་མ་སོང་གི་ཁ་མཚམས་དེ་དུས་ནས་བཟུང་སྟེ་སློབ་ཆེན་འགྲིམ་པ་ཙམ་གྱི་བར་དུ། སྐབས་ཐོག་སྐབས་ཐོག་ལ་རང་གི་ཕ་མ་གཉིས་དང་། ལྷག་པར་རང་གི་ཁུ་བོ་དྲིན་ཅན་རྨོག་རུ་བཀྲ་ཤིས་རྒྱལ་སོགས་རྒན་རབས་རེ་འགའི་ཞལ་བརྡ་གསུང་གླེང་ལས་ཁོང་དང་འབྲེལ་བའི་སྙན་པ་མང་ཙམ་ཞིག་ཐོས་མྱོང་ཡོད་ཅིང་། ཁོང་བློ་རིག་གསལ་ཞིང་གཏམ་ལ་མཁས་པ། སྤོབས་པ་ཆེ་ཞིང་གཞུང་རྒྱུད་དྲང་བ། དགེ་ལ་སྤྲོ་ཞིང་ཀུ་རེ་ཁ་མཚར་ལ་མཁས་པ་ཞིག་ཡིན་པའི་བག་ཆགས་ཙམ་ཞིག་ཁོ་བོར་ཡོད་ནའང་། ད་ལྟ་ཁོང་གི་མཛད་འཕྲིན་སོགས་ཡིག་ཐོག་ནས་མང་ཙམ་གསལ་ལེར་མཐོང་དུས། དོན་ལ་ཁོང་ནི་སྤྱི་དོན་ལ་རེམ་ཞིང་མི་ཆོས་མཁས་པ་མ་ཟད། གང་མཁྱེན་ཕལ་ཆེར་མེས་པོའི་སྲོལ་རྒྱུན་ཇི་བཞིན་དུ། དུས་ཁྱད་པར་བའི་ནང་ལའང་ལག་ལེན་དུ་ཐེབས་པར་འབད་པ། ལྷ་ཆོས་ཀྱི་ལོ་རྒྱུས་རྟོགས་ཤིང་ལེགས་ཉེས་བླང་དོར་གྱི་གནད་མི་འཆོལ་བ་ཞིག་ཡིན་པ་སོགས་ལ་ངེས་ཤེས་གསར་པ་བྱུང་། དེ་ནི་མཁས་པའི་དབང་པོ་ས་པཎ་མཆོག་གིས་ཇི་སྐད་དུ། སྐྱེ་བོ་ཡོན་ཏན་ཡོད་མེད་པའི། །བླང་དོར་བློ་གྲོས་ལྡན་པ་མཁས། །རྡུལ་དང་འདྲེས་པའི་ལྕགས་ཕྱེ་རྣམས། །ཁབ་ལེན་རྡོ་ཡིས་ལེན་པར་ཤེས། །གསུངས་པ་ནང་བཞིན་དུ་སོང་བར་མཐོང་བས། ད་ལྟ་ཁོང་གི་གསུང་གི་མཛད་པ་སོགས་རྡོ་ལག བརྒྱུད་དང་ཆུ་ལམ་ཞུགས་ཀྱི་ཚུལ་དུ་ད་དུང་མུ་བསྐྱངས་དང་སྐྱོང་བཞིན་པའི་གནས་ཚུལ་སོགས་གྲོང་ཁྱེར་ཞིག་ནས་སྟབས་ལེགས་ཀྱིས་མཐོང་བས། དགའ་སྐྱོ་འདྲེས་མའི་སེམས་ཁམས་ཤིག་གི་ངང་ལ་རྗེས་སུ་ཡི་རང་ངམ། ཡང་ན་རྗེས་དྲན་དང་ཡང་ན་ཕངས་སེམས་ཀྱིས་བསླངས་པ་གང་རུང་ཞིག་ཏུ་གཏོགས་པའི་སེམས་གཏམ་ཞིག་ཀྱང་ཉན་མཁན་ལྟ་མཁན་ལ་ལྟོས་པ་མེད་པར་ཞུས་པ་ལགས་སོ། །