ངོས་དང་པོ > སྒྱུ་རྩལ། > ལག་ཤེས། > སྐུ་འབུམ་བྱམས་པ་གླིང་གི་མེ་ཏོག་མཆོད་པའི་བྱུང་བ།

སྐུ་འབུམ་བྱམས་པ་གླིང་གི་མེ་ཏོག་མཆོད་པའི་བྱུང་བ།

རྩོམ་པ་པོ།： ཡོང་ཁུངས།：མཚོ་སྔོན་ཞིང་ཆེན་སྲིད་གཞུང་དྲ་བ། དུས་ཚོད།：2026-03-03 10:24:58 ཀློག་གྲངས།：

མེ་ཏོག་མཆོད་པའི་བྱུང་འཕེལ།

སྤྱི་ལོ1409ལོར་རྗེ་ཙོང་ཁ་པ་ཆེན་པོས་བདག་ཅག་གི་སྟོན་པའི་ཡོན་ཏན་དང་བཀའ་དྲིན་སོགས་རྗེས་དྲན་ཞུ་ཆེད་དུ། ལྷ་སའི་གཙུག་ལག་ཁང་དུ་ཆོ་འཕྲུལ་སྨོན་ལམ་ཆེན་མོ་འཚོགས་པ་དང་། སྐབས་དེར་རྗེ་ཙོང་ཁ་པ་ཆེན་པོའི་མཚན་ལམ་དུ་ས་གཞིའི་སྟེང་གི་ཚེར་སྡོང་དག་མར་མེ་རུ་གྱུར་བ་དང་། རྩྭ་དང་རྩི་ཤིང་ཐམས་ཅད་མེ་ཏོག རྡོ་དང་ཟེགས་མ་ལ་སོགས་རིན་པོ་ཆེ་འོད་འཚེར་བ། གཞན་ཡང་གཙུག་ལག་ཁང་གི་ལྷ་སྐུ་རྣམས་སངས་རྒྱས་བྱང་སེམས་དངོས་ཀྱི་རྣམ་པར་གྱུར་ཞིང་མཆོད་པ་དང་མཆོད་ཡུལ་ཕུན་སུམ་ཚོགས་པའི་རྨི་ལམ་ངོ་མཚར་བ་ཞིག་རྨིས། དེའི་ནངས་མོར། རྗེ་ཉིད་ཀྱིས་འཁོར་རྣམས་དང་ལྷ་བཟོ་མཁས་པ་མང་པོར་ཁོང་གི་རྨི་ལམ་དུ་བྱུང་བ་ལྟར་གཙུག་ལག་ཁང་གི་ཕྱི་ནང་ཀུན་ཏུ་གསོལ་མར་གྱི་ནང་དུ་བཟང་དྲུག་དང་རང་བྱུང་རྡོ་ཚོན་སྣ་ཚོགས་བསྲེས་ཏེ་འདོད་ཡོན་སྣ་ལྔ་སོགས་བཟོ་བར་བསྐུལ་ཏེ་བཞེངས་པ་དག་ནི་ཁོང་ཉིད་ཀྱི་རྨི་ལམ་ཇི་ལྟ་བ་བཞིན་ལེགས་འགྲུབ་བྱུང་བས་ཐུགས་དགྱེས་པར་བྱུང་ཞིང་། མཆོད་ཡུལ་ཐམས་ཅད་མཉེས་པར་བྱས་ཏེ་བསྟན་པ་རྒྱས་པ་དང་སེམས་ཅན་ཐམས་ཅད་ལ་ཕན་བདེ་འབྱུང་བའི་བསྔོ་སྨོན་རྣམ་པར་དག་པ་རྒྱས་པར་མཛད། དེ་དུས་དད་ལྡན་སེར་སྐྱ་མང་ཚོགས་ཁྲི་ཕྲག་གིས་ལྷན་དུ་རྣམ་དཀར་དགེ་བའི་ལས་ལ་བརྩོན་པར་བྱས་ཏེ་ལྷ་ལྡན་སྨོན་ལམ་ཆེན་མོ་འཚོག་པའི་སྲོལ་གཏོད་ཅིང་། མར་བཟོས་མེ་ཏོག་མཆོད་པའང་སྐབས་དེར་རྒྱ་ཆེར་དར་བར་གྲགས།

དེ་ནས་བཟུང་དབུས་ཀྱི་འབྲས་སྤུངས་དགོན་དང་སེ་ར་དགོན། དགའ་ལྡན་དགོན། བཀྲིས་ལྷུན་དགོན། ཁམས་ཀྱི་ཆབ་མདོ་བྱམས་པ་གླིང་། ལི་ཐང་དགོན། བདེ་ཆེན་སུམ་རྩེན་གླིང་། རྔ་བ་ཀིརྟི་དགོན། ཀན་ལྷོའི་བླ་བྲང་དགོན།ཅོ་ནེ་དགོན། བྱ་ཁྱུང་དགོན། དགོན་ལུང་དགོན། རོང་བོ་དགོན། རྭ་རྒྱ་དགོན་སོགས་མདོ་དབུས་ཁམས་གསུམ་གྱི་དགོན་སྡེ་ཆེ་ཆུང་སྟོང་ཕྲག་མང་པོས་ལོ་རེའི་ཟླ་དང་པོའི་ཚེས་བཅོ་ལྔར་མེ་ཏོག་མཆོད་པ་བཤམས་པའི་ཕྱག་སྲོལ་ཡོད།

སྐུ་འབུམ་བྱམས་པ་གླིང་གི་མེ་ཏོག་མཆོད་པ།

སྐུ་འབུམ་བྱམས་པ་གླིང་གི་མར་བཟོས་མེ་ཏོག་མཆོད་པ་ནི་སྤྱི་ལོ1594ལོ་ནས་བཟུང་བཤམས་པའི་སྲོལ་དར། དགོན་པ་དེའི་གྲྭ་བཙུན་རྣམས་ཀྱིས་མར་བཟོས་ཀྱི་བཞེངས་སྐྲུན་བྱས་པའི་སྐུ་བརྙན་དང་མེ་ཏོག ལྗོན་ཤིང་དང་རི་ཆུ། འདབ་ཆགས་དང་རི་དྭགས་སྣ་ཚོགས་ཀྱི་རྣམ་པ་ལ་གསོན་ཉམས་ལྡན་ཞིང་ཡིད་དབང་འགུག་པའི་གཏམ་རྒྱུད་ཀྱིས་ཀུན་ནས་ཕྱུག་ཡོད་ཅིང་། ལོ་རེ་བཞིན་རྒྱ་ཆེ་ཞིང་དར་རྒྱས་སུ་ཕྱིན་ནས་བཟོ་སྐྲུན་གྱི་ཐད་ལ་སྔར་ལས་ཞིབ་ཚགས་ལྡན་ལ། ཚོན་མདོག་དང་གཞི་དབྱིབས་སོགས་སྣ་མང་ཕུན་སུམ་ཚོགས་པས་ངོ་མཚར་ཆེ་བའི་ནང་བསྟན་སྒྱུ་རྩལ་གྱི་ཁྱད་ཆོས་མངོན།

མར་བཟོས་མེ་ཏོག་མཆོད་པ་ནི་སྐུ་འབུམ་བྱམས་པ་གླིང་གི་ཆོ་འཕྲུལ་སྨོན་ལམ་ཆེན་མོའི་སྐབས་ཀྱི་མཛད་སྒོ་གལ་ཆེན་ཞིག་ཡིན་ཞིང་། དེ་ལ་ལོ་རྒྱུས་ཀྱི་རིན་ཐང་དང་རིག་གནས་ཀྱི་རིན་ཐང་། སྒྱུ་རྩལ་གྱི་རིན་ཐང་ཕུན་སུམ་ཚོགས་ལ། ཙོང་ཆུའི་འགྲམ་རྒྱུད་ཁུལ་གྱི་ཆོས་ལུགས་རིག་གནས་དང་དམངས་སྲོལ་རིག་གནས། སྒྱུ་རྩལ་རིག་གནས། དུས་ཆེན་དང་རྟེན་འབྲེལ་བཅས་ཀྱི་བྱེད་སྒོ་གལ་ཆེན་ཞིག་ཏུ་གྱུར་ཡོད་པས། རྒྱ་ཆེ་བའི་དད་ལྡན་མང་ཚོགས་རྣམས་ཀྱི་བསོད་ནམས་ཀྱི་ཞིང་མཆོག་དང་། ཡུལ་སྐོར་བ་རྣམས་ཀྱི་མར་བཟོས་སྒྱུ་རྩལ་ལ་རོལ་མྱོང་དང་ཞིབ་འཇུག་བྱེད་སའི་སྟེགས་བུ་ཆེན་པོ་ཞིག་ཏུ་གྱུར།

སྐུ་འབུམ་བྱམས་པ་གླིང་གི་མེ་ཏོག་མཆོད་པ་བཞེངས་མཁན་གྱི་ལྷ་བཟོ་ལ་རྗེ་བཙུན་དང་སྒོ་མང་འཛིན་གྲྭ་གཉིས་སུ་ཕྱེས་ཡོད་ཅིང་། འཛིན་གྲྭ་རེར་ལྷ་བཟོ་གྲྭ་བཙུན་ཉི་ཤུ་ཡས་མས་ཡོད་པ་དང་། ལྷ་བཟོའི་འགན་འཛིན་པས་གཙོ་སྐྱོང་འོག་དགེ་སློབ་བར་ངག་ཐོག་དང་ལག་ཐོག་ནས་བརྒྱུད་འཛིན་བྱེད་བཞིན་ཡོད། ལོ་རེའི་ལུགས་རྙིང་གི་ཟླ10ཚེས25ཉིན་ནས་ཕྱི་ལོའི་ཧོར་ཟླ་དང་པོའི་ཚེས15ཉིན་གྱི་བར་ལྷ་བཟོ་རྣམས་ཀྱིས་མར་བཟོས་མེ་ཏོག་མཆོད་པ་བཟོ་བཞིན་ཡོད། དུས་ཡུན་འདིའི་རིང་འཛིན་གྲྭ་གཉིས་ཀྱི་ལྷ་བཟོ་རྣམས་ཀྱིས་དད་པའི་ཀུན་སློང་གི་སྒོ་ནས་ཕན་ཚུན་བར་གསང་རྒྱའི་རང་བཞིན་དང་འགྲན་རྩོད་རང་བཞིན་གྱི་རྣམ་པ་མི་འདྲ་བའི་སྒོ་ནས་གསར་གཏོད་ལ་གཞོལ་བ་ཡིན་པས་ན། སྒྱུ་རྩལ་གྱིས་ཀུན་ནས་ཕྱུག་པའི་མར་བཟོས་མེ་ཏོག་གི་མཆོད་པ་འདིས་སྐུ་འབུམ་དགོན་པའི་མེ་ཏོག་མཆོད་པ་བཤམས་པའི་ལག་རྩལ་རྒྱུན་འཛིན་དང་འཕེལ་རྒྱས་ཐད་ལ་སྐུལ་འདེད་བཏང་ཡོད།

ཤེས་གསལ་ལྟར་ན། མེ་ཏོག་མཆོད་པའི་བཤམས་ཁང་ནི1988ལོར་བཙུགས་པ་དང་། 2013ལོར་རྒྱལ་ཁབ་ཀྱིས་སྒོར་ཁྲི1200བཏང་ནས་བསྐྱར་སྐྲུན་བྱས། 2006ལོར་སྐུ་འབུམ་བྱམས་པ་གླིང་གི་མར་རྒྱན་མེ་ཏོག་མཆོད་པས་ཐུན་མིན་གྱི་སྒྱུ་རྩལ་རིན་ཐང་དང་གཏིང་ཟབ་ལ་རྒྱ་ཆེ་བའི་རིག་གནས་ཀྱི་རྫོང་མཐུག་པོ་ལ་བརྟེན་ནས་རྒྱལ་ཁབ་ཀྱི་གཟུགས་འདས་རིག་གནས་ཤུལ་བཞག་གི་མིང་ཐོར་ཚུད། དེའི་ཡར་སྔོན་ཏེ1990ལོ་ནས1994ལོར། པེ་ཅིང་དང་ཧྲན་ཀྲེང་བཅས་སུ་མེ་ཏོག་མཆོད་པ་འདི་ཡུལ་དེའི་མང་ཚོགས་ལ་གཟིགས་འབུལ་གནང་མྱོང་། 2016ལོར་རྒྱལ་ཁབ་སྒྱུ་རྩལ་ཐེབས་རྩ་ཡི་རྒྱབ་སྐྱོར་ཤུགས་ཆེན་ལ་བརྟེན་ནས་ཧྥ་རིན་སིའི་ཕ་ལི་དང་། འཇར་མན་གྱི་ཕོ་ལིན་བཅས་སུ་བསྐྱོད་དེ་གཞི་ཁྱོན་ཆེ་ཤོས་ཀྱི་སྒོ་ནས་རྒྱལ་སྤྱི་སྡིངས་ཆར་ངོམ་ཞིང་། རྒྱལ་སྤྱིའི་སྟེང་དགའ་བསུ་ཚད་མེད་ཐོབ་པར་མ་ཟད། ཀྲུང་གོའི་སྲོལ་རྒྱུན་རིག་གནས་བརྒྱུད་སྒྲོག་གི་ཐད་ལ་ལག་རྗེས་ཆེན་པོ་བཞག