གཙུབ་ཤིང་གཙུབས་པའི་མེ་སྟག འདམ་འཇིལ་ལི།

སྲིད་པའི་མཐོང་ཐོས་དྲན་རེག་གི་རྣམ་ཤེས་ཚོགས་ཀྱི་བདག་མོ་ཉིད་སླེབས་བྱུང
ཁྱེད་རང་བླ་གནས་སྲུང་སའི་དབུས་སུ་ཕེབས་པའི་ཉིན་དེ་ལ
བདག་མེད་ཀྱི་ཐ་སྙད་རེ་རེ་ཡང་གསར་རྩོམ་གྱི་ཨ་མའི་གཅེས་ཕྲུག་ཏུ་གྱུར
ཁྱེད་རང་ནམ་ཞར་འཇིག་རྟེན་ལྟར་སྣང་གི་གྲུ་ཟུར་ཀུན་ཏུ་མྱུལ་བའི་ཚེ་ན
ཚོར་ཤེས་གྲོལ་བའི་གནས་སུ་འཇིག་རྟེན་མཐུན་འཇུག་གི་འབྲས་བཟང་སྨིན
དེ་ཡང  ནམ་ཞིག་གི་ཚེ་ལ
ཁྱེད་ཉིད་འཁྱམས་པོ་ང་ཚོའི་མགོན་དུ་འཆར་ཡན་རྫོགས་པའི་རྗེ་མོར་བསྐོས
ཁྱོད་ཀྱིས་དཔྱོད་ཤེས་ཀྱི་ཁམས་སུ་རྟོག་འཆར་གྱིས་དབང་བསྒྱུར་མགོ་ཚུགས

ཀྱེ་ཀྱེ  ཁྱེད་ཉིད་རྒྱལ་ཁམས་མཐོང་བའི་མེ་ལོང་ཞིག་སྟེ
ཤེས་རབ་ཀྱི་མངའ་ཐང་བསྐྱེད་པའི་དུས་རབས་ཀྱི་འགྱུར་བག་ཁྲོད་དུ
ཞེ་བློན་གི་གུས་བཀའ་ལུང་སྒྲོག་པའི་དཔའ་གླུ་རིང་མོ་བཏེགས་པ་ན
ནང་བློན་ཞབས་ཀྱུས་རིགས་ལ་ཞབས་ཏོག་སྒྲུབ་པར་བྲེལ་ཤ་ལངས
སོ་བློན་འགྲེང་བུས་རང་ཚུགས་སྲུང་བའི་བ་དན་མཁའ་རུ་བསྒྲེངས
མཛངས་བློན་ན་རོས་མཁའ་སྐྱོད་རེ་འབོད་ཨ་སྔོན་དབྱིངས་སུ་ཁྱབ
གསལ་བྱེད་སུམ་ཅུར་དབང་བའི་ཚོར་སྐྱེན་ཁྱུ་ཚོགས་གར་ལ་བསྒྱུར
དེ་ལྟ་དེ་ལྟར་གྱི་ཇི་སྙེད་ཅིག་གིས
སྤྱི་པའི་མགོ་འཕང་བསྟད་དེ་སྒལ་ཚིགས་སྲོང་པོར་བསྲིངས་སུ་ཆུག
ང་ཚོར་བསམ་བློའི་མེ་སྟག་འཚུབ་པའི་ལོངས་སྤྱོད་འདི་ལས་མ་ཆོག་པ་ཅི་ཡོད་ཨང 

ཚོར་འདུའི་གཙུབ་ཤིང་གཙུབས་པའི་སྣེ་རུ་མེ་སྟག་མཆེད་པ་ནས་བཟུང་སྟེ
མང་པོ་ཞིག་གིས་བདེན་རྫུན་བསླུ་མེད་ཀྱི་རྟོགས་པ་ལས་སད་སོང་ཟེར  
ཁ་ཤས་ཤིག་གིས་གནམ་ས་གོ་འབྱེད་པའི་སྙིང་བོ་ལག་ཏུ་ལོན་སོང་ཟེར 
ཉུང་མཐར་ཡང  དཀར་ནག་གི་དབྱེ་བ་ཁོར་སོང་ཟེར་མཁན་མང་མང་འདྲ
དེ་ཡང  ཁྱེད་ཉིད་སྐྱབས་སུ་བཅོལ་བ་ལས་དད་ལོག་བྱེད་མཁན་མེད་པ་འདྲ
ད་དུང  བསམ་དོན་གྲུབ་པའི་རི་མོ་དེ་ལ་ནག་ནོག་བཟོ་མཁན་ཡེ་ནས་བྱུང་མེད
 
རེད་དེ  ད་ཀོ་རང་མོས་སྙན་ངག་གི་རྗེ་མོའི་དབང་ཐང་དར་ལ་བབས་འདུག
ཁྱོད་ཡོད་པས  སྙིགས་མའི་ས་རྡུལ་གསེང་ནས་ཉི་ཟེར་འཐུ་བའི་དཔེ་ཆགས
ཁྱོད་ཡོད་པས  མུ་མེད་མཚན་མོའི་ཡོལ་བ་བརྟོལ་བའི་མིག་གི་རྣོ་ངར་བསྐྱེད
དེར་བརྟེན  བདེན་པ་ཕུག་པའི་ཐ་སྙད་རེ་རེ་ཁྱོད་ཀྱི་ཕང་བ་རུ་མཚར་དུ་དངར

གངས་རྒྱན་མེ་ཏོག་ལགས  ཁྱོད་ཀྱི་པང་ནས་རྟག་ཏུ་སྐྱིད་ཅིག་ཡོད་པར་ཞུ
ང་ཚོའི་སེམས་སུ་མ་ཤོང་བ་མཐའ་དག་ཁྱོད་ཀྱི་ལག་མཐིལ་ནས་སྨིན
གཞན་གྱིས་སྨོན་པའི་ཚོར་ཤེས་རེ་རེ་ཁྱོད་ཀྱི་ཞབས་འདེབས་སུ་ཕུལ
འདས་སོང་གི་ལོ་ཟླའི་མཛད་བཟང་དུས་རབས་ཀྱི་མེ་ལོང་ངོགས་སུ་ཕབ
མ་འོངས་པའི་རེ་འབོད་ཁྲི་སྟོང་ཐེག་པའི་རྒོད་པོས་གནམ་འཕང་བསྟད

ཁྱོད་ཀྱི་ལྷག་བསམ་དང་ཀུན་སློང་གིས་འབོགས་པའི་མཐོང་ལམ་ཇེ་ཡངས་རེད
གངས་རྒྱན་མེ་ཏོག་ལགས  ཁྱོད་ཀྱི་མཚན་སྙན་གངས་ཚོགས་ལས་འབྱོངས
གངས་རྒྱན་མེ་ཏོག་ལགས  ཁྱེད་ཉིད་བྲག་ཐེམ་གྱི་བང་རིམ་དུ་ཐགས་སུ་བཀྲ
གངས་རྒྱན་མེ་ཏོག་ལགས  ཁྱོད་རང་གཡའ་སྤང་གི་ཁ་མཚམས་སུ་འཛུམ
གངས་རྒྱན་མེ་ཏོག་ལགས  ཁྱོད་རང་བྲག་སྲུབས་སུ་འཚངས་ནས་བརྡོལ
ད་དུང  དེའི་ལས་འཕྲོ་རུ་མཐུད་པའི་ཐོས་པ་དོན་ལྡན་གྱི་གཏམ་རྒྱུད་རིང་མོ་མཛད

དུས་ད་ལྟ་ཉིད་དུ  ཁྱོད་ཀྱི་མངའ་ཐང་དུ་ཤེས་རབ་ཀྱི་སྤང་ལ་མེ་ཤོར་བ་འདྲ་ཞིག་བྱུང
མ་འོངས་པར་ཡང  སྲིད་རྩེའི་བརྩོན་འགྲུས་བྲག་ལ་མདའ་མོ་ཟུག་འདྲ་ཞིག་འབྱུང་སྲིད
འདི་ཀོ་བླ་མས་གསུངས་པའི་ལུང་གཏམ་མིན་ལ་གྱི་ན་བས་ཚོད་དཔག་བྱས་པའང་མིན
དེ་ནི  ང་ཚོས་ཚོད་བགམ་ཐུབ་པའི་ལས་ཚེགས་སླ་མོ་ཞིག་མ་ཡིན་ཏེ
འཚོ་བའི་སྤང་ཐང་གི་རྟ་རྒོད་རེ་རེར་ཁ་ལོ་བཏུལ་སྟངས་ཤིག་ཡིན་པར་ངེས

དྭངས་གཙང་གི་སེམས་ངོགས་སུ་བཞད་པའི་གངས་རྒྱན་མེ་ཏོག་ལགས
ཉི་མའི་དཀྱིལ་འཁོར་གང་ཚེ་འོད་ཀྱི་དྲ་བ་འགྱེད་པའི་སྣང་ཚུལ་ལས
གྲང་ལྷགས་ལས་མ་ཟད་པའི་བློ་གྲོས་རེ་རེ་ཟེར་མའི་མདངས་སུ་འཚེར
ཐ་མལ་གྱི་མུན་པའི་མིག་ཟུང་ལས་ཀྱང་ཤེས་རབ་ཀྱི་འོད་སྣང་རབ་ཏུ་འཕྲོ
དེ་ནི  སྒྱུ་རྩལ་གྱི་ཕོ་ཉ་རེ་རེས་ཁྱེད་ལ་དྲིན་གཟོ་སྟངས་རེ་རེ་ཡིན་པར་ངེས

ཁྱེད་ཉིད་རིམ་བཞིན་འཇིག་རྟེན་འཁོར་བ་ཁབ་ཀྱི་རྩེ་མོར་བསྙེགས
བསྟན་འཛིན་གྱི་སྐྱེ་བུ་སུ་ཞིག་གིས་ཁྱེད་ལ་སེམས་པ་གླན་མྱོང
སོ་སྐྱེས་ཕལ་བ་སུ་ཞིག་གིས་ཁྱེད་ལ་སྙིང་གཏམ་བཀྲལ་མྱོང
གཞན་དབང་དུ་མ་སོང་བའི་ཚོར་བའི་དག་སྣང་རེ་རེ
ལོ་ཆུང་གཞོན་ནུ་ཚོའི་རུས་རྐང་གི་གཏིང་ལ་ཟུག་ཅིང་བསྐྱེད

རེད་ཡ  གསར་རྩོམ་གྱི་ཆུ་ཕྲན་ཉི་མ་རྟག་པར་འདུས་པས
ཡིད་འོང་གི་ལོ་ཟླའི་སྒྱུ་འཕྲུལ་དེ་ཉིད་མཚོ་མོ་རུ་བསྒྱུར
འཁོར་བའི་ཡིད་བརྙན་གྱི་མེ་ཏོག་གི་འདབ་མ་ལྷུག་ལྷུག་གྲོལ
དཔྱོད་ཤེས་ཀྱི་ཆུ་ཀླུང་ཆེན་མོ་དེ་ཡང་རྩོལ་མེད་ཀྱི་མྱོང་རོལ་དག་མ་ཞིག

དོན་དམ་དུ  བསམ་གཞིག་གི་རབ་ཁ་བརྒལ་བའི
ཁྱོད་ནི་ལྷ་ཀླུ་གཉན་བཙན་གྱིས་གནངས་པ་ཞིག་མིན
ལྟོས་དང  སྦྱོར་དངོས་འཇུག་གསུམ་གྱི་འཚར་ལོངས་སུ
རྩོམ་སྒྲིག་པ་རིམ་བྱུང་གི་རྔུལ་ཁྲག་གི་མེ་ཏོག་གཏོར་རྗེས
ཁྱོད་ནི་བགེགས་རིགས་ཀྱི་བཙན་ས་རུ་རྙེད་པ་ཞིག་ཡིན
དེའི་ཕྱིར  ང་ཚོས་དད་པའི་དམ་ཚིག་རྡོ་རྗེ་བྲག་ལ་བརྐོ་འོས

སླད་མར  ཁྱོད་ཀྱིས་འགྲོ་དོན་འཕྲིན་ལས་ད་དུང་འདི་དག་གིས་ག་ལ་ཚད
ཁྱོད་ཀྱིས་ཚོར་ཤེས་ཀྱི་རྩེ་རུ་བདུད་རྩི་ཟིལ་མ་ལེན་པའི་ལུགས་སྲོལ་བཏོད
ད་ནི་ཁྱེད་རང་མཐོན་པོ་རི་ཡི་རྩེ་མོའི་དཔའ་མཁར་བརྟན་པོ་ཞིག་ཏུ་གྲུབ
བདེ་མོ་སྤང་དང་དམའ་མོ་གཞུང་གི་གཙང་མོ་ཆུ་བཞིན་ལྷུང་ལྷུང་འབབ

ཕྱིར་འདང་རེ་བརྒྱབ་ན  སྐལ་བ་བཟང་པོ་ཁྱོད་ཀྱི་འབྲས་བཟང་གིས་བཞེངས་ཟིན
དཀྱུས་ཀྱི་བློ་ཁ་འཁོར་སར་ཁྱོད་ཀྱི་བྱིན་རླབས་དེ་མ་འོངས་པར་ཅི་ལ་མི་ཆེ་ཨང
རེད་ཡ  ཁྱོད་ཀྱི་གེ་སར་བཞད་པའི་དྲི་བསུང་ཚྭ་འདམ་གཤོང་སར་གདེང་ཐོབ་སྟེ
དུས་དང་རྣམ་པ་ཀུན་ཏུ་གཙུབ་ཤིང་གཙུབས་པའི་མེ་སྟག་ཕྱོགས་མཚམས་ཀུན་ལ་ཡེར རྩོམ་ཁུངས། ༢༠༢༦ལོའི«གངས་རྒྱན་མེ་ཏོག»དེབ་དང་པོ།