རང་ཉིད་སྨྲ་བའི་ཚུལ་ལ་ལེགས་མཁས་ཤིང་།།གཞན་གྱིས་སྨྲས་ལ་རིགས་དང་མི་རིགས་རྟོགས།།སྨྲ་བའི་ངག་ལ་ཚུལ་བཞིན་ལེགས་འཇུག་པ།།ངག་གི་དཔལ་མོ་ལྟ་བུར་གྲགས་པ་འཐོབ།།...

སྨྲས་པའི་ཚིག་ལས་སྐྱེ་བོ་ཡི།།ནང་གི་བསམ་པ་ཕལ་ཆེར་ཤེས།།དེ་ལས་བྱ་དང་མི་བྱ་བ།།འགའ་ཞིག་ཁོང་དུ་ཆུད་པར་འགྱུར།།...

ཁྱེད་ལ་བསྟོད་དོ་སྨད་དོ་ཞེས།།ནང་མིས་རྟོག་པ་སྣ་ཚོགས་ངག།མི་འདྲི་མི་རྨེད་བཏང་སྙོམས་བཞག།དོན་ལྡན་ཡིན་ན་དྲི་བར་བྱ།།...

དེ་ཕྱིར་རྒྱལ་རིགས་མཁས་པ་རྣམས།།སུ་ལའང་གཏམ་གྱི་དྲི་རྨེད་དག།འགོག་པའི་ཆེ་ཐབས་མི་སྦྱོར་བར།།དུས་སུ་འདྲི་བ་མཁས་པའི་གནད།།...

ཡུལ་གྱི་བདེ་སྡུག་སྐྱོན་ཡོན་རྣམས།།ཕལ་ཆེར་དོན་མེད་ངག་ལས་གསལ།།བདེན་པའི་མི་ལ་དྲི་ཞིང་དཔྱད།།དོན་མེད་ངག་ལས་དོན་རྟོགས་མང་།།...

གང་ཞིག་དེ་བཞིན་བཟུང་བ་ན།།འཕྲལ་ཡུན་གནོད་པར་འགྱུར་བའི་ངག།བླ་མའི་གསུང་ལས་བྱུང་ན་ཡང་།།སྤང་བར་བྱ་ན་གཞན་ལྟ་ཅི།།...

བླང་དོར་གནད་ལ་ཕན་པ་ཡི།།མ་ཤེས་གསར་དུ་སྦྲོན་བྱེད་ཚིག།སྨྱོན་པའི་ངག་ལས་བྱུང་ཡང་རུང་།།རང་དོན་ཤེས་པས་དེ་ཉིད་བཟུང་།།...

འབངས་ཀྱི་བདེ་སྡུག་ཞུ་ཚིག་རྣམས།།བཤད་ཚུལ་མཁས་དང་མི་མཁས་དང་།།རྒྱབ་སྐྱོར་མགོ་འདྲེན་བཟང་ངན་གྱི།།ཚིག་གི་གཡམ་ལ་མི་རྒྱུག་པར།།བདེན་རྫུན་མཐའ་ལ་བསྐྱལ་ཏེ་དཔྱད།།དེ་ཡིས་འབངས་ཀྱི་ལེགས་ཉེས་དང་།།ཞུ་བྱེད་བློན་གྱི་ངང་ཚུལ་ཤེས།།རང་ཉིད་ཁྲིམས་ལ་མཁས་པར་འགྱུར།།...

ལྷག་པར་སྙིགས་མའི་དུས་འདི་ན།།གཞི་མེད་རྫུན་གྱིས་རྒྱལ་ཁམས་ཕུང་།།དེ་ཕྱིར་སུ་དང་གང་གིས་ཀྱང་།།སྨྲས་ཚད་རྗེས་སུ་མི་འབྲང་ལ།།སྨྲས་ཚད་རྫུན་དུའང་མི་གཟུང་བར།།བདེན་ནམ་རྫུན་པ་གང་ཡིན་པ།།མ་གསལ་བར་དུ་ཡིད་ལ་བཞག།གསལ་བར་གྱུར་ནས་དོན་ལ་འཇུག།...

གཡོན་ཅན་རྣམས་ཀྱིས་རང་འདོད་དོན།།འགྲུབ་པར་བྱ་ཕྱིར་སླུ་ཚིག་སྦྱོར།།ཕལ་ཆེར་ཕྲག་དོག་གྱ་གྱུ་ཡིས།།གཞན་ལ་གནོད་པ་འབའ་ཞིག་སྨྲ།།...

སྐྱེ་བོ་འདུ་ཤེས་སྣ་ཚོགས་པས།།བརྗོད་པའི་ཚིག་ཀྱང་སྣ་ཚོགས་སྨྲ།།ཕལ་ཆེར་བསམ་པ་དཀར་ན་ཡང་།།བློ་མི་གསལ་བས་གང་བྱུང་སྨྲ།།...

མངོན་ཤེས་མེད་པའི་སྐྱེ་བོ་ཡིས།།འཇིག་རྟེན་ལེགས་ཉེས་རྣམ་པ་ཀུན།།ངག་ཚིག་ལ་བརྟེན་རྟོགས་པའི་ཕྱིར།།སྨྲས་པའི་ངག་ལ་ལེགས་པར་བརྟག།...

སྨྲ་བའི་ངག་ལ་མཁས་པ་ཡི།།མི་བདག་དེ་ནི་འཇིག་རྟེན་ན།།ཉི་མ་བཞིན་དུ་གསལ་གྱུར་ཏེ།།དགོས་པའི་དོན་ཀུན་འགྲུབ་པར་འགྱུར།།...

སྔོན་བྱོན་ཆོས་ལྡན་རྒྱལ་རྣམས་ཀྱིས།།བཀའ་ལས་གང་བྱུང་དེ་མི་བཟློག།བཀའ་ཁྲིམས་ལེགས་བཅད་སླད་འགྱུར་ན།།བཀའ་ལ་རྩིས་ཐང་ཆུང་བར་འགྱུར།།...

མི་ཡིས་དབང་པོས་ལེགས་བརྟགས་ན།།སྨྲས་པའི་ཚིག་ལས་འགྱུར་མི་བྱ།།རྒྱལ་པོའི་སྨྲ་བ་ལན་གཅིག་ཅེས།།འཇིག་རྟེན་ན་ནི་ཡོངས་སུ་གྲགས།།...

རྒྱལ་རིགས་ཆོས་དང་ལྡན་པ་རྣམས།།འཁོར་ལ་བུ་བཞིན་བྱམས་པའི་ཕྱིར།།དང་པོར་འཇམ་པོས་བསྒོ་བ་ལས།།ཐོག་མ་ཁོ་ནར་ཚར་གཅོད་མིན།།...

ལས་བྱེད་དཔོན་དུ་བསྐོས་གྱུར་ཀྱང་།།རང་འདོད་ཁོ་ནས་ཕྱོགས་བཟུང་ན།།དེ་ལ་གནད་ཀྱི་མཚང་བརྟོལ་ཏེ།།ཕྱིན་ཆད་ལས་འདི་བཟློག་ཅེས་བསྒོ།།...

འཁོར་འབངས་གང་ཕན་སྐྱོང་བ་སོགས།།རྒྱལ་པོའི་ཆུས་ལ་ཕན་པའི་མི།།གང་ཡིན་ཤེས་ནས་དེ་དག་ལ།།ཕན་པའི་ཚིག་གིས་བསྔགས་པར་བྱ།།...

ཅི་ནས་བཅོས་སུ་མེད་རྣམས་ལ།།འོས་པའི་ཆད་པ་མ་བཅད་ན།།མི་བསྲུན་འཕེལ་བས་རྒྱལ་ཁམས་འཇིག།དེ་བས་དང་པོར་སྨྲས་བཞིན་བྱ།།...

འདི་ལས་བརྩམས་ཏེ་ངག་རྣམས་ལ།།སྐྱོན་དང་ཡོན་ཏན་རབ་མང་པོ།།སོ་སོར་ཤེས་པར་བྱས་ནས་སུ།།སྨྲ་དང་མི་སྨྲ་ཤེས་པར་བྱ།།...

ཚིག་རྩུབ་མང་ན་འཁོར་རྣམས་འབྱེར།།རྫུན་གྱིས་རང་གཞན་ཐམས་ཅད་ཕུང་།།འཁྱལ་བའི་ངག་གིས་དོན་ཉམས་སྡུད།།དེ་ཕྱིར་དེ་དག་སྤང་བར་བྱ།།...

དབྱེ་ཕྱིར་ཕྲ་མའི་ངག་རྣམས་ནི།།སྨྲ་བ་ལྟ་ཅི་མཉན་མི་བྱ།།གལ་ཏེ་མཉན་པར་འོས་པ་ལའང་།།བརྟགས་ཤིང་ངེས་པའི་བར་དུ་བསྒུག།...

བློ་བཟང་དམ་པའི་སྐྱེས་བུ་ལ།།ཟུར་ཙམ་སྨྲས་ཀྱང་ཕན་པ་ཆེ།།ཕན་ཚིག་སྨན་དང་འདྲ་བ་དེ།།བཤད་དང་ཉན་པར་བྱེད་པའང་དཀོན།།...

ཆར་གྱི་རྒྱུན་ཆེན་ཕབ་ན་ཡང་།།སྣོད་ཆུང་ནང་དུ་ཇི་ལྟར་ཆུད།།བློ་རྒྱུད་དམན་ལ་གདམས་བྱས་ཀྱང་།།ཕན་པ་རྒྱ་ཆེར་འབྱུང་མི་སྲིད།།...

དུས་སུ་མ་བབ་པ་ཡི་གཏམ།།གང་སྨྲ་དེ་ལ་ཀུན་གྱིས་བརྙས།།དུས་སུ་བབ་ཅིང་འཐད་པ་ཡི།།ངག་ཚིག་བཟང་པོས་རང་གཞན་ཕན།།...