«མང་ཚོགས་ལམ་ཕྱོགས་ནི་རང་གི་སྲོག་རྩ་དང་རྩ་བའི་བྱ་བའི་ལམ་ཕྱོགས་ཡིན»

       ཕྱི་ཚུལ་རིང་ལུགས་ཀྱི་མངོན་ཚུལ་ནི། གཙོ་བོར་ཤེས་པ་དང་ཉམས་ལེན་ཐ་དད་དུ་གྱུར་པ་དང་། དོན་འབྲས་ལྷུར་ལེན་མི་བྱེད་པ། ཚོགས་འདུ་དང་ཡིག་ཆ་མང་བ། ལྟར་སྣང་མཛེས་ལམ་ལ་དགའ་བ། མིང་གྲགས་ལ་རྔམ་པ། མི་བདེན་རྫུན་སྒྲིག་བྱེད་པ་བཅས་ཡིན། འགའ་ཞིག་གིས་ཏང་གི་རིགས་པའི་གཞུང་ལུགས་དང་། བྱ་བ་ཡག་པོར་སྒྲུབ་པར་མཁོ་བའི་ཤེས་བྱ་ཡོན་ཏན་སློབ་སྦྱོང་ནན་ཏན་མི་བྱེད་པ་དང་། སློབ་སྦྱོང་བྱས་ཀྱང་ཁ་ཁྲལ་ཁ་ཆོས་ཙམ་གྱི་དོན་དུ་ལྟ་ཙམ་བྱེད་པ་ལས། སྦྱོང་བ་ཡུན་མི་བརྟན་པ་དང་། གོ་བ་རྣལ་མ་མི་ལེན་ལ། ལག་ལེན་ཁྲོད་དུ་ནན་ཏན་གྱིས་བེད་སྤྱོད་བྱེད་མི་འདོད་ལ་བྱེད་ཡང་མི་ནུས་པ། ལ་ལ་ཞིག་ཚོགས་འདུར་བརྟེན་ནས་ཚོགས་འདུ་དོན་འཁྱོལ་དང་། ཡིག་ཆར་བརྟེན་ནས་ཡིག་ཆ་དོན་འཁྱོལ་བྱེད་པར་གོམས་པ། འུད་ཤོབ་དང་ཀྲོག་ཀྲོག་ལ་དགའ་བ། མགོ་ཁྲིད་གདན་འདྲེན་ཞུས་ནས་གསུང་བཤད་བཀོད་སྒྲིག་བྱེད་པ་དང་། གསར་འགྱུར་ཡིག་རིགས་འགྲེམས་པ། བརྙན་འཕྲིན་ནང་ནས་གདོང་བསྟན་རྒྱུ་སོགས་ནི་དོནཆེན་ནང་གི་དོན་ཆེན་ལ་འཛིན་པ་དང་། མཇུག་མཐར་ལས་མཐའ་མི་འཁྱོངས་བར་རང་སོར་བསྐྱུར་འགྲོ་བ་རེད། ཁ་ཅིག་གིས་བྱ་བ་འཛིན་དུས་དོན་འབྲས་མི་གཉེར་བ་དང་། འགལ་བ་དང་གནད་དོན་ཐག་གཅོད་ལ་འབད་བརྩོན་མི་བྱེད་པ། མགོ་ཁྲིད་ལ་བག་ཆགས་ཟབ་མོ་འཇོག་མི་ཐུབ་པའི་བྱ་བ་མི་སྒྲུབ་པ། ཤུགས་རྐྱེན་ཆེན་པོ་ཐེབས་མི་ཐུབ་པའི་བྱ་བ་མི་སྒྲུབ་པ། བྱ་བའི་སྙན་ཞུའམ་ལོ་མཇུག་ཕྱོགས་བསྡོམས་ཀྱི་སྐབས་སུ་ངོ་མི་ཐོན་པའི་བྱ་བ་མི་སྒྲུབ་པ། མཛད་སྒོ་གཅིག་རྗེས་གཉིས་མཐུད་དང་། ཕྱོགས་བསྡོམས་གཅིག་རྗེས་གཉིས་མཐུད། བྱ་དགའ་གཅིག་རྗེས་གཉིས་མཐུད་ཡིན་ཀྱང་། མཐའ་མཇུག་ཚང་མ“ཁོ་ལེ་ཁུང”ཆགས་ཀྱི་ཡོད། ཡང་འགའ་ཞིག་གཞི་རིམ་དུ་བརྟག་དཔྱད་ཞིབ་འཇུག་ལ་འགྲོ་དུས་ཁྲལ་མངོན་སླ་བཅོས་བྱས་ཏེ། གཞི་རིམ་དུ་འགྲོ་བ་ནི་པར་རེ་ལེན་པ་དང་གདོང་རེ་སྟོན་ཆེད་ཡིན་པ་དང་། རླངས་འཁོར་ལ་བསྡད་ནས་སྐོར་བ་རྒྱག་པ་དང་། ཤེལ་སྒོའི་ནང་ནས“ཕྱི་ངོས”དང“སྒེའུ་ཁུང”ཙམ་ལ་ལྟ་བ་ལས“སྦུག”དང“གྲུ་ཟུར”ལ་མི་ལྟ་བས། མང་ཚོགས་ཀྱིས་དེ་ལ“བརྟག་དཔྱད་ཞིབ་འཇུག་ཤོག་བུས་བཅད།། སྲིད་ཇུས་ལག་བསྟར་རི་བོས་བཅད།”ཅེས་ཟེར་གྱི་ཡོད། ཁ་ཅིག་གིས་གོང་ཞུ་བྱས་དོན་དེ་གནས་ཚུལ་རྫུན་མ་དང་། གྲངས་ཀ་རྫུན་མ། དཔེ་མཚོན་རྫུན་མ་བཅས་ཡིན་པ་ཤེས་བཞིན་དུ་སྣང་མེད་ཟོལ་འཇོག་བྱེད་པ་དང་། ཐ་ན་བློ་ངན་ཡོད་རྒུ་རྩལ་སྤྲུགས་ཀྱིས་བྱས་འབྲས་རྫུན་མ་བཟོས་ཏེ་བདེ་མདོག་བཟང་མདོག་བྱེད།