«སྒྲིག་ཁྲིམས་འཛུགས་སྐྲུན་ལ་ཤུགས་རྒྱག་པ་དང་། སྒྲིག་ཁྲིམས་བརྩི་བ་དང་སྒྲིག་ལམ་སྲུང་བ་དེ་སྔར་ལས་གལ་ཆེ་བའི་གོ་གནས་སུ་འཇོག་དགོས།»

       མིག་སྔར། ཆབ་སྲིད་ཀྱི་སྒྲིག་ཁྲིམས་དང་ཆབ་སྲིད་ཀྱི་སྒྲིག་ལམ་བརྩི་སྲུང་བྱེད་པའི་ཐད་དུ་གཙོ་བོར་གཤམ་གསལ་ཕྱོགས་ལྔ་བྱེད་ཐུབ་དགོས་པ་སྟེ། གཅིག་ནས་ངེས་པར་དུ་ཏང་ཀྲུང་དབྱང་གི་དབང་གྲགས་སྲུང་སྐྱོང་བྱེད་དགོས་པ་ལས། ཏང་ཀྲུང་དབྱང་གི་བླང་བྱ་དང་རྒྱབ་འགལ་གྱིས་སྒྲུབ་ལུགས་གཞན་པ་ཞིག་གཏན་ནས་སྤེལ་མི་ཆོག་པ་དང་། ཏང་ཡོངས་ཀྱི་བློ་མཐུན་སྤྱི་དང་ཁྱད་པར་དུ་རིམ་པ་ཁག་གི་འགོ་ཁྲིད་ལས་བྱེད་པས་དུས་དང་རྣམ་པ་ཀུན་ཏུ་བསམ་བློ་དང་ཆབ་སྲིད་དང་བྱ་སྤྱོད་གསུམ་ཐད་ནས་ངེས་པར་དུ་ཏང་ཀྲུང་དབྱང་དང་ཚད་མཐོའི་གཅིག་གྱུར་བྱེད་དགོས་པ་དང་། ཏང་ཀྲུང་དབྱང་གི་བཀོད་འདོམས་ལ་ཉན་དགོས་པ་ལས། ངོ་ལྐོག་གཡོ་ལྷད་དང་རང་འདོད་རང་སྒྲུབ་བྱས་མི་ཆོག་པ་དང་། ཏང་ཀྲུང་དབྱང་གི་སྲིད་ཇུས་བྱེད་ཕྱོགས་ཆེན་པོར་སྐུར་བ་འདེབས་མི་ཆོག་ཅིང་། ཀྲུང་དབྱང་གི་དགོངས་དོན་དང་རྒྱབ་འགལ་དུ་སོང་བའི་གཏམ་བརྗོད་ཡོངས་གྲགས་སུ་སྤེལ་མི་ཆོག །གཉིས་ནས་ངེས་པར་དུ་ཏང་གི་མཐུན་སྒྲིལ་སྲུང་སྐྱོང་བྱེད་དགོས་པ་ལས། ཏང་ནང་ཁུལ་དུ་སྒེར་གྱི་སྟོབས་ཤུགས་གསོ་སྐྱོང་གཏན་ནས་བྱས་མི་ཆོག་པ་དང་། ཕྱོགས་བཞི་མཚམས་བརྒྱད་རྒྱུན་འཁྱོངས་བྱས་ཏེ་ཏང་ལ་བློ་དཀར་སེམས་དཀར་བྱེད་པའི་བློ་མཐུན་ཡོངས་ལ་མཐུན་སྒྲིལ་དང་མང་ཤས་ལ་མཐུན་སྒྲིལ་བྱེད་དགོས་པ་ལས། མི་ཁུངས་ལྟར་ཚད་ཐིག་བཟོ་མི་ཆོག་པ་དང་། རྣམ་པ་གང་རུང་གི་ཕྱོགས་རེས་བྱེད་སྒོ་སྤེལ་མི་ཆོག །གསུམ་ནས་ངེས་པར་དུ་རྩ་འཛུགས་ཀྱི་ལས་རིམ་བརྩི་སྲུང་བྱེད་དགོས་པ་ལས། རང་དགར་ཇུས་འདོན་དང་རང་སྣང་གང་ཤར་གཏན་ནས་བྱས་མི་ཆོག་པ་དང་། གནད་དོན་ཆེན་པོ་ལ་ཆ་མཚོན་ན་དགོངས་སྐོར་སྙན་སེང་ཞུ་དགོས་རིགས་ཞུ་དགོས་པ་ལས། དབང་མཚམས་ལས་བརྒལ་ནས་དོན་གཅོད་པ་དང་སྔོན་ལ་བསྒྲུབས་ཏེ་རྗེས་ལ་དགོངས་སྐོར་ཞུ་བ་དེ་མི་རུང་བ་ཡིན། བཞི་ནས་ངེས་པར་དུ་རྩ་འཛུགས་ཀྱི་ཐག་བཅད་ལ་བརྩི་བཀུར་བྱེད་དགོས་པ་ལས། རྩའཛུགས་མ་ཡིན་པའི་བྱེད་སྒོ་གཏན་ནས་སྤེལ་མི་ཆོག་པ་དང་། རྩ་འཛུགས་ལ་གོང་གཏམ་ཚོང་རྒྱག་བྱེད་མི་ཆོག་ཅིང་། རྩ་འཛུགས་ཀྱི་གཏན་འཁེལ་དང་འགལ་མི་ཆོག་ལ། གནད་དོན་དང་འཕྲད་ཚེ་རྩ་འཛུགས་འཚོལ་བ་དང་རྩ་འཛུགས་ལ་རྒྱབ་རྟེན་བྱེད་དགོས་པ་ལས། རྩ་འཛུགས་ལ་མགོ་སྐོར་གཏོང་མི་རུང་ལ་རྩ་འཛུགས་ལ་འགྲན་རྒོལ་བྱས་མི་ཆོག །ལྔ་ནས་ངེས་པར་དུ་ཉེ་དུ་དང་ཉེ་འཁོར་གྱི་ལས་བྱེད་མི་སྣར་བདག་པོ་ཡག་པོ་རྒྱག་དགོས་པ་ལས། ཁོ་ཚོར་དབང་སྤྱོད་ལ་ཐེ་ཇུས་དང་སྒེར་དོན་སྒྲུབ་པ་གཏན་ནས་བྱེད་དུ་བཅུག་མི་ཆོག་པ་དང་། ཁོ་ཚོ་རྒྱ་ཡན་དུ་བཏང་ནས་སྲིད་ཇུས་གཏན་འབེབས་དང་མི་དོན་བཀོད་སྒྲིག་ལ་ཤུགས་རྐྱེན་གཏོང་བ་དང་རྒྱུན་ལྡན་གྱི་ལས་དོན་ལ་ཐེ་ཇུས་བྱེད་དུ་བཅུག་མི་ཆོག་ཅིང་། ཁོ་ཚོས་དམིགས་བསལ་གྱི་ཐོབ་ཐང་ཐོག་ནས་ཁྲིམས་དང་མི་མཐུན་པའི་ཁེ་ཕན་གཉེར་བ་ཤུགས་ནས་ཁས་ལེན་བྱས་མི་ཆོག །