སྟོབས་དང་རྩལ་གྱི་མཛེས་པ། གཅན་རང་སད།

རྩོམ་པ་པོ་ངོ་སྤྲོད།
       ཨ་སྐྱེས་བྱམས་པ་དགེ་ལེགས། (པིར་མིང་། གཅན་རང་སད)ལགས་ནི་མཚོ་སྔོན་གཅན་ཚ་རུ་སྐྱེས་ཤིང་། སྤྱི་ལོ1987ལོ་ནས1990ལོའི་བར་རྨ་ལྷོ་མི་རིགས་དགེ་ཐོན་སློབ་གྲྭ་རུ་སློབ་གཉེར་མཛད། སྔ་གཞུག་ཏུ་རོང་པོ་དགོན་ཆེན་དང་ངྷི་ཚ་བཀྲ་ཤིས་ཆོས་སྡིངས་སོགས་ནས་ཚད་མ་དང་དབུ་ཕར་གཙོ་བོར་གྱུར་པའི་ནང་དོན་རིག་པའི་ཆེད་ལས་སྦྱངས། སྤྱི་ལོ1997-2001བར་རི་བོ་རྩེ་ལྔ་དང་ཀྲེ་ཅང་ཏའོ་པོད་ཅཱང་སི་སོགས་ནས་བོད་རྒྱ་ནང་བསྟན་ཡིག་བསྒྱུར་ཕྱོགས་ལ་དོན་གཉེར་བྱས། སྤྱི་ལོ2003ལོ་ནས2009ལོའི་བར་ཀྲུང་གོའི་བོད་རིག་པ་ཞིབ་འཇུག་ལྟེ་གནས་བཀའ་བསྟན་དཔེ་སྡུར་ཁང་དུ་བྱ་བ་བསྒྲུབས། སྤྱི་ལོ2010ལོ་ནས་བཟུང་སྔ་གཞུག་ཏུ་བོད་ལྗོངས་དཔལ་བརྩེགས་དཔེ་རྙིང་ཞིབ་འཇུག་ཁང་གི་ཁོངས་གཏོགས་མཐོ་སྒང་ཨ་མའི་སློབ་གླིང་གི་གདན་ཞུས་དགེ་རྒན་དང་མཚོ་སྔོན་ཞིང་ཆེན་གཙང་གསུམ་མི་རིགས་སློབ་འབྲིང་གི་དགེ་རྒན། གཅན་ཚ་རྫོང་མི་རིགས་སློབ་འབྲིང་གཉིས་པའི་བོད་ཡིག་དགེ་རྒན་སོགས་ཀྱི་འགན་བསྣམས་མུས་སུ་མཆིས། ད་བར་དུ་རྒྱལ་ཁབ་དང་ཞིང་ཆེན་རིམ་པའི་བོད་ཡིག་གི་དུས་དེབ་དང་ཚགས་པར་སྟེང་རྩོམ་ཡིག་བརྩམས་ཆོས180ལྷག་སྤེལ་བ་དང་། སྤྱི་ལོ2016ལོར་ཚངས་སྲས་བུམ་པ་རྟགས་མའི་སྲོལ་རྒྱུན་སྙན་ངག་འགྲན་སྡུར་ཁྲོད་བྱ་དགའ་ཨང་དང་པོ་ཐོབ། 2017ལོར་རྒྱལ་ཡོངས་བོད་ཀྱི་སྙན་རྩོམ་འགྲན་སྡུར་ཁྲོད་བྱ་དགའ་ཨང་གཉིས་པ་བླངས། 2018ལོར་སྐབས་དགུ་པའི«སྦྲང་ཆར»རྩོམ་རིག་གསར་རྩོམ་གྱི་བྱ་དགའ་རེག སྔ་ཕྱིར«ཤམ་བྷ་ལའི་ཅོང་སྒྲ»དང«ལང་ཚོའི་ཞབས་རྗེས» «མི་ཡུལ་འགྲིམ་པའི་གད་རྒྱངས» «དབྱངས་ཅན་མ་འཚོལ་བ» «ཤིང་སྐྱ་ཆུ་རིས» «ཚངས་སྲས་མཆོད་པ» «ནོར་བུ་ཁྱུང་བསྐྱུགས» «མེ་ལོང་དགུ་རྡུང» «བོད་ཡིག་གི་བཀའ་བསྟན་ངོ་སྤྲོད་དྭངས་གསལ་ཤེལ་གྱི་མེ་ལོང» «བསྟན་འགྱུར་དཀར་ཆག་བོད་རྒྱ་ཤན་སྦྱར་མ» «བོད་བརྒྱུད་ནང་བསྟན་ཆོས་སྤྱོད་ཆེན་མོ་རྒྱ་འགྱུར་མ» «རྗེ་བཙུན་ཡར་ཁ་རིན་པོ་ཆེའི་རྣམ་ཐར» «གསང་སྒྲོགས་བློ་བཟང་ལུང་རྟོགས་བསྟན་པའི་རྒྱལ་མཚན་གྱི་རྣམ་ཐར»བཅས་པར་དུ་བསྐྲུན་མྱོང་།