བོད་ཀྱི་སྙན་ངག ​​​​​​​འཆི་མེད།

གོས་དང་གོང་བ་ཚ་རུ་སྟག་ལྤགས་ཅན། །
སོ་དང་སེན་མོར་མར་དྲི་རྩམ་དྲི་ཅན། །
གངས་དཀར་ལྷུན་པོ་དཔའ་དང་སྤོངས་པས་བཟུང་། །
ང་ཡི་མེས་པོ་གནམ་འོག་སྙན་ངག་ཡིན། །

གཏིང་མཐའ་བྲལ་བའི་རྣམ་དཔྱོད་འོད་སྣང་གིས། །
རྒྱུ་འབྲས་བློ་མིག་སྒོ་གླེགས་ཡངས་པོར་ཕྱེ། །
གད་རྒྱངས་ཙམ་གྱིས་ཕ་རོལ་བཅོམ་པ་ཡི། །
ལོ་རྒྱུས་མེ་ལོང་འདི་ཡང་སྙན་ངག་གོ །

བློ་གྲོས་དཔའ་མཛངས་བོད་ཀྱི་སྙན་ངག་སྟེ། །
ས་གཞི་ཆུ་མོ་རི་བྲག་སྙན་ངག་ཡིན། །
མེ་ཏོག་སྤང་ཤ་ནགས་ཀློང་ཆུ་མ་རི། །
སྔོ་ལྗང་གཡེར་མོ་ཞིང་ས་སྙན་ངག་ཡིན། །

ཕ་མའི་བྱམས་བརྩེ་ཕོ་མོའི་ཁྲེལ་གཞུང་ནས། །
ཚེ་མཐར་ཕན་ཚུན་བློས་མི་ཐོངས་པའི་བར། །
ལྷད་མེད་འཚོ་བ་བོད་ཀྱི་སྒེར་སྲོལ་ཀུན། །
བྲིས་ན་མི་ཚར་ངོ་མཚར་སྙན་ངག་ཡིན། །

གསུང་རབ་པོ་ཏིའི་བྲག་རི་སྙན་ངག་ཡིན། །
ཨ་མའི་མིག་ཆུ་དེ་ཡང་སྙན་ངག་སྟེ། །
བསྐལ་བའི་མཐར་ཡང་སྲོག་ལ་བརྒྱུས་པ་ཡིན། །
དབྱངས་གསལ་སོ་བཞི་འདི་ཡང་སྙན་ངག་ཡིན། །

ཡོང་ཁུངས། ཟ་མ་ཏོག་འཕྲིན་སྟེགས།