འགྱུར་མེད་རབ་བརྟན་གྱིས་བསྒྱུར་བའི་ལུག་ཚེ་ཐར་ཞེས་པའི་བརྩམས་སྒྲུང་།

　　“ཕོ་འབྲས”ཟེར་བའི་ཡིག་འབྲུ་གཉིས་པོ་ངའི་མིག་ལམ་དུ་མངོན་བྱུང་བས་སྙིང་གློ་བུར་དྲག་ཏུ་ལྡིང་བར་བྱེད།   ངས་སེམས་སུ་འཆི་བདག་རང་དང་ཤིན་ཏུ་ཉེ་བས་ང་ཤི་སོང་ན་ལུག་ཚེ་ཐར་ཇི་ལྟར་བྱེད་བསམས་བྱུང༌།   ཞེན་ཆགས་དེས་ངའི་སེམས་ཁམས་ཉོག་འཛིངས་སུ་བཏང་ནས་དྲན་འཕྲུལ་སྣ་ཚོགས་འབྱུང་མགོ་ཚུགས།   ངས་འཆི་ཁར་རང་ཉིད་ནི་ཞེན་མེད་ཆགས་མེད་ཅིག་ཏུ་སྒྱུར་མི་ཐུབ་པ་ཤེས་སོང༌།   ངས་སྨན་པར་ཅེ་རེ་ལྟ་བཞིན“ང་ད་དུང་ཉིན་ག་ཚོད་ལ་འཚོ་ཐུབ་བམ”ཞེས་དྲིས།   སྨན་པས“གདེང་ཚོད་མི་འདུག སྨན་བཅོས་ལེགས་པོ་བསྟེན་ན་སྨན་བཅོས་མ་བསྟེན་པ་ལས་ལྡབ་འགྱུར་གྱིས་བཟང”ཞེས་ཟེར།   ང་སྨན་ཁང་དུ་སྡོད་མི་རུང༌།   སྨན་ཁང་དུ་བསྡད་ཚེ་ཉིན་ལྟར་ངའི་ལུས་སྟེང་དུ་སྨན་ཆུ་མང་བོ་གཏིག་ངེས་ཏེ།   དེ་ལྟར་བྱས་ན་ངའི་ཚད་ཡོད་པའི་དུས་ཚོད་ནི་སྨན་ཁང་ལས་ཟད་འགྲོ།   ད་དུང་ཉིན་རྒྱུན་སྐོར་བར་འགྲོ་མི་ཐུབ་ཅིང་ལྷ་ལའང་མཆོད་འབུལ་བྱེད་མི་ནུས།   དེ་ལྟ་བས་ན་ངའི་ལུས་པོ་མ་འཇིག་གོང་དུ་སེམས་པ་རྒ་ཤི་ཐེབས་འགྲོ་བ་ཡིན།   དེ་བས་ངས“སྨན་པ་ལགས།   དེ་རིང་ང་ལ་ན་ཟུག་འཇོག་བྱེད་ཀྱི་སྨན་ཁབ་ཅིག་རྒྱོབས་དང༌།   ང་ནང་དུ་ལོག་ནས་ཁྱིམ་དོན་ཐག་གཅོད་བྱས་རྗེས།   སང་ཉིན་སྨན་ཁང་དུ་སྡོད་པར་འོངས”ཞེས་དོན་དེ་ལ་གཟུར་ཆེད་སྨན་པར་རྫུན་གཏམ་མགོ་བརྩམས།   སྨན་པས་ཕལ་ཆེར་ངའི་ཐབས་ངན་དེའི་ཕུགས་དོན་ཧ་གོ་སོང་བ་འདྲ་བས“ཁྱོད་ཀྱིས་རང་སྲོག་རྩེ་སྤྱད་མ་བྱེད”ཅེས་བསླབ་བྱ་གནང་བྱུང༌།   ངས་ཁས་ལེན་དང་དམ་བཅའི་སྐད་ཆ་མང་རབས་ཤིག་བཤད་མཐར་གཞི་ནས་སྨན་ཁང་དང་གྱེས་ཐུབ་པ་བྱུང༌།  
　　ལུག་གིས་ཁྱིམ་མཚེས་ཚོས་ང་བསྐྱོར་ནས་ཡོང་པ་མཐོང་བས་བྲེལ་མྱུར་གྱིས་ཡར་ལངས་ཏེ་ངའི་གན་ལ་བཅར་བྱུང༌།   ངན་རྟགས་ཤོར་པའི་མིག་ཆུ་རང་དབང་མེད་པར་མིག་རྐོང་ལས་བཞུར་འོངས་ནས་ངའི་གཉེར་མའི་ཁེངས་པའི་ངོ་གདོང་བརླན་པར་གྱུར།   བཟང་མོར་མཚོན་ན་ཡང་དེ་ལྟར་ང་ཚོས་སྨན་ཁང་ནས་བསྐྱོར་ཡོང་བ་ཡིན་ལ།   མཐའ་མཇུག་གི་དབུགས་རྟ་རྔ་འདྲ་བོའང་རང་ཁྱིམ་དུ་ཆད་པ་རེད།   ངས་དེ་ལྟར་མིག་ཆུ་བཏོན་པ་ནི་ཡག་པོ་ཞིག་ཏུ་སོང་མེད་དེ།   ཁྱིམ་མཚེས་ཚོས་ང་འཆི་བར་སྐྲག་འདུག་སྙམ་ངེས།   ཁོ་ཚོས་ཁྱོད་གཞོགས་སུ་གཡུགས་ཏེ་ང་ཁྱིམ་དུ་བསྐྱལ།   ངས་ཁྱོད་ཀྱི་མིག་ཆུ་འཁོར་བའི་མིག་ཟུང་དང་ཐུར་དུ་སྒུར་བའི་མགོ་བོ་མཐོང་སོང༌།   ཁྱིམ་མཚེས་ཚོས་ངའི་མཐའ་རུ་བསྐོར་ཏེ་སང་ཉིན་སྨན་ཁང་དུ་འགྲོ་དགོས་པའི་སྐུལ་མ་གནང༌།   འགའ་རེ་ད་དུང་རང་ཁྱིམ་དུ་བརྒྱུགས་ཏེ་ང་ལ་བྱ་སྒོང་དང་འབྲི་མར།   ཚག་ཤ་སོགས་ཁྱེར་ཡོང་ལ།   ཁོ་ཚོས་ད་དུང་ཁྱོད་ལ་བྱམས་སྐྱོང་བྱེད་ངེས་ཀྱི་ཁས་འཆེས་བྱུང༌།   སྐད་ཆ་དེ་དག་གིས་ངའི་སེམས་ཀྱི་ཁུར་བོ་ལྡབ་འགྱུར་གྱིས་ཇེ་ཡང་ལ་བཏང་སོང༌།   ཁྱིམ་མཚེས་ཚོས་བདག་ལ་ངལ་ཡག་པོ་ཞིག་གསོ་རུ་འཇུག་ཆེད་སྔ་གཞུག་བྱས་ནས་རང་རང་གི་ཁྱིམ་བསྙེགས་སོང༌།
　　ངས་སྒེའུ་ཡོལ་འཐེན་ཞིང་གློག་སྒོ་ཕྱེ།   ཕོ་བར་ད་དུང་ན་ཟུག་ཏོག་ཙམ་འདུག ངས་ཁྱོད་ཁྱིམ་དུ་ཁྲིད་འོངས་ནས་རང་ཉིད་ཤིང་གི་མལ་ཁྲིའི་སྟེང་དུ་བསྡད།   ཁྱོད་ངའི་རྐང་བའི་འཁྲིས་སུ་ཉལ་ཞིང་མགོ་བོ་བཀྱགས་ཏེ་ང་ལ་བལྟས་འདུག ངས་ཁོག་སྟོད་ནང་དུ་བཀུག་ནས་ཁྱོད་ཀྱི་ལུས་པོར་འཕྲུག་པ་ལ།   ཁྱོད་ནི་ཡིད་ཚིམས་ཏེ་མིག་ཟུང་བཙུམས་ནས་བསྡད་བྱུང༌།   ངས་ཡིད་འགུལ་ཐེབས་པའི་ངང“རང་ཉིད་དུས་ནམ་ཞིག་ལ་གློ་བུར་དུ་ཤི་འགྲོ་བ་མི་ཤེས་པས།   གསོན་པའི་དུས་སུ་ངས་ཁྱོད་ཁྲིད་ནས་དགེ་བ་མང་བོ་སྒྲུབ་ཅི་ཐུབ་བྱེད།   དེ་ལྟར་བྱུང་ན་ཁྱོད་ཀྱི་ལས་ངན་པའི་སྡིག་སྒྲིབ་དག་ནས་སྐྱེ་བ་ཕྱི་མར་བདེ་འགྲོའི་གནས་སུ་སྐྱེ་སྲིད།   གལ་ཏེ་ང་ཤི་ནའང་ཁྱོད་རྒས་ནས་འཆི་བའི་བར་དུ་ཁྱིམ་མཚེས་དག་གིས་གསོ་སྐྱོང་བྱེད་སྲིད།   སྐྱེ་བ་འདིར་འུ་གཉིས་ནི་སྐྱེ་བ་སྔོན་མའི་ལས་ཀྱིས་ཕྲད་པ་སྟེ།   སྐྱེ་བ་ཕྱི་མའམ་ཡང་ན་སྐྱེ་བ་འགའི་རྗེས་སུ་ཡང་བསྐྱར་ལས་ཀྱིས་འཕྲད་ངེས་ཡིན”ཅེས་ལབ་པར།   ཁྱོད་ཀྱིས་ངའི་བཤད་པ་ཕལ་ཆེར་གོ་སོང་བ་འདྲ།   ཡར་ལངས་ནས་ལག་པ་གཉིས་ཀ་ངའི་རྐང་བའི་སྟེང་བཞག་ཅིང་མིག་ལ་མཆི་ཞག་འཁོར་བྱུང༌།   ང་ཁྱོད་ཀྱི་སྐེ་ལ་འཁྱུད་ནས་ངུས་པ་ཡིན།   ཁྱོད་ཀྱི་དྲོད་འཇམ་གྱི་དབུགས་རྔུབ་ལེན་བྱེད་དུས་ངའི་ངོ་འགྲམ་དུ་རྒྱུ་བ་ནི།   བཟང་མོའི་དབུགས་ཀྱི་རྔུབ་ལེན་བྱེད་ཚུལ་དང་གཉིས་སུ་མ་མཆིས་པས་དེས་ངའི་སེམས་ཁམས་བདེ་ལ་བཀོད་སོང༌།   ངས“སེམས་ཅན་ཐམས་ཅད་མུ་གེ་དང་འཐབ་རྩོད།   མི་འདོད་ནད་ཀྱི་སྡུག་བསྔལ་སོགས་ལས་རིང་དུ་འབྲལ་བའི་སྨོན་ལམ་བརྒྱབ་ལ།   དེ་དང་མཉམ་དུ་ཁྱོད་སྐྱེ་བ་ཕྱི་མར་ཕྱུག་པོའི་ཁྱིམ་ཚང་ཞིག་དང་ཕ་མ་བྱང་སེམས་ཅན་གྱི་དྲུང་དུ་སྐྱེ་བ་དང༌།   ཆོས་ས་ཆོས་ཡུལ་ཞིག་ཏུ་སྐྱེ་བར་སྨོན་ལམ་ཡང་བརྒྱབ ”ང་ངོ་མ་སང་ཉིན་འཆི་ངེས་པ་དང་འདྲ་བར་ཁྱོད་ལ་སྐད་ཆ་མང་བོ་མང་བོ་ཞིག་བཤད་ཟིན།   ཕྱི་རུ་ཁྱིའི་ཟུག་སྐད་ཅིག་གྲག་འོངས་པ་ཡིས་དུས་ཡུན་རིང་བོ་ཞིག་འགོར་སོང་བ་རྟོགས་པར་བྱས་པས་ངེད་གཉིས་ཀྱིས་ངལ་གསོ་རྩིས་བྱས།   ངས་ཁྱོད་སྒོ་རུ་ཁྲིད་ནས་སྔ་ས་ནས་ཉལ་དུ་བཅུག་ང་སྨན་ཁང་དུ་མ་སོང༌།   ཚོར་སྣང་འཚུབ་པོ་ཞིག་གིས་ཉིན་དེ་ནས་བཟུང་ངས་ཁྱོད་ཁྲིད་དེ་དགོན་ཆེན་སོ་སོར་མཇལ་སྐོར་ལ་འགྲོ་དགོས་པར་བསྐུལ།   དུས་མཆོད་ལ་འཕྲད་དུས་ངས་སྔོ་ཚལ་ཁྲོམ་ར་ནས་ཉ་རྒྱ་མ་འགའ་ཉོས་ཤིང་ཁྱོད་ལ་བཀལ་ཏེ་སྐྱིད་ཆུའི་ཁར་ཚེ་ཐར་གཏོང་བར་ཕྱིན།   ཉ་ཚེ་ཐར་དེ་དག་དགའ་སྤྲོའི་ངང་འགྱིག་ཁུག་ལས་ཐོན་ཏེ་རྔ་མ་གཡུག་བཞིན་ཆུ་འགྲམ་གྱི་རྩྭ་ནང་དུ་འཛུལ་མ་ཐག་མཐོང་སྣང་ལས་ཡལ་འགྲོ།   དེ་ལྟར་ཚེ་སྲོག་བརྒྱ་ཕྲག་འགའ་ཞིག་ངེད་གཉིས་ཀྱིས་འཆི་བདག་གི་ཁ་ལས་བསྐྱབས་ཤིང༌།   ཁོ་ཚོ་འཇིགས་སྐྲག་དང་རེ་ཆད་ཀྱི་མཐའ་ནས་གྲོལ་ཏེ་སླར་ཡང་མཐིང་མདོག་གི་མཚོ་ཀློང་དུ་འཚོ་བ་གསར་བ་རོལ་པར་ཆས།   འུ་གཉིས་ཀྱིས་དྭངས་གཙང་གི་སྐྱིད་ཆུའི་ནང་དུ་སྤྲིན་དཀར་དང་ཨ་སྔོན་གྱི་ལྡོག་གཟུགས་ཡོད་པར་བལྟས།   བསིལ་རླུང་གིས་ཆུ་ངོས་སྐྱོམ་དུས་སྤྲིན་དཀར་དང་ཨ་སྔོན་འགུལ་མགོ་བརྩམས།   རྒྱ་ལྕང་གི་ལོ་མས་བྲོ་གར་འཁྲབ་ཞོར་ཤུར་ཤུར་གྱི་གླུ་སྒྲ་སྒྲོག   ཆུ་འགྲམ་གྱི་རྩྭ་ལྗང་སྟུག་པོའི་ཁྲོད་དུ་ཕྱེ་ལེབ་འགས་ཡིད་འཕྲོག་པའི་སྒོར་བྲོ་འཁྲབ་པས།   འུ་གཉིས་ནི་ཡིད་དགའ་ཞིང་ཁམས་སྐྱིད་ལ་སེམས་གཏིང་དུ་བྱམས་དང་སྙིང་རྗེ་ཡིས་ཡོངས་སུ་ཁེངས།   ང་ཆུ་འགྲམ་དུ་སྐྱིལ་ཀྲུང་ལ་བསྡད་དེ་ནས་ཆང་དལ་མོར་འཐུངས།   ལག་ནང་གི་ཕྲེང་བ་མྱུར་གྱིས་དྲངས་པས་ཕྲེང་རྡོག་རེ་རེ་ཕྲད་པའི་ཐག་སྒྲ་གཉོམ་པོས་ངའི་སེམས་ལྷོད་ལ་འབབ་པར་བྱས།   ཁྱོད་ཀྱིས་སོས་དལ་ངང་མགོ་སྒུར་ནས་རྩྭ་ཟ་བཞིན་འདུག་ཅིང༌།   ལན་རེར་རྣ་བ་ཀེར་ནས་བྱ་འཕུར་བ་ལྟར་བགྲོད་པའི་རླངས་འཁོར་ལ་ལྟ་བར་བྱེད།   ཉི་མ་ནུབ་རིར་ཡིབ་ལ་ཉེ་དུས་འུ་གཉིས་དལ་མོར་ཁྱིམ་དུ་ལོག་པ་ཡིན།   ལོ་དེའི་དབྱར་མཇུག་ཏུ།   ཚེ་སྨོན་གླིང་གི་བླ་མས་ཆོས་གསུང་སར་ངས་ཁྱོད་ཁྲིད་ནས་ཉན་དུ་ཕྱིན།   དགོན་པའི་ར་སྐོར་ནང་མི་ཚོགས་ཀྱིས་གང་འདུག་པས་འུ་གཉིས་གྱང་རའི་གྲུ་ཟུར་ཞིག་ཏུ་བསྡད།   བླ་མས་ཆོས་གསུང་དུས་ཁྱོད་ས་ལ་ཉལ་ཞིང་རྣ་བ་ཀེར་ནས་འཇམ་ཅག་གེར་འདུག་པ་དང་མིག་གིས་བར་མཚམས་མེད་པར་ཁྲི་ཐོག་གི་བླ་མར་ཡང་ཡང་ལྟ་བར་བྱེད།   སྐབས་ཤིག་ལ་ཁྱོད་སྡོད་པར་སུན་ནས་མི་ཚོགས་ནང་སྐོར་བ་བྱས་ལ།   ཅང་མ་འགོར་པར་ཡང་བསྐྱར་ངའི་གན་དུ་བསླེབས་ཡོང༌།   ཁྱོད་ཀྱི་རྣམ་འགྱུར་དེར་མི་རྣམས་ཧ་ལས་པའི་མཚུངས་སུ་ད་དུང་བརྩེ་བ་སྐྱེ་བཞིན་མཆིས།   ཉིན་འཕྲོ་མ་དག་ལ་ཆོས་ཉན་མཁན་ཚོས་ཁྱོད་ལ་རྩྭ་གསར་བ་དང་སྔོ་ཚོད་ཁུར་ཡོང་སྟེ་ཁྱོད་ཀྱི་མདུན་དུ་སྤུངས།   དེར་མ་ཟད་ཁྱོད་ཀྱི་རྒྱབ་ལ་བྱིལ་བྱིལ་གཏོང་ཞོར“ཆོས་དང་ལས་འབྲེལ་ཡོད་ན།   འབྲས་བུ་དགེ་བ་འབྱུང་སྲིད”ཅེས་བཤད་བྱུང༌།   དགོན་པའི་གྲྭ་པ་དག་གིས་ཁྱོད་ལ་སྙིང་རྗེ་ཆེན་པོ་བསྒོམས་ནས།   ཁྱོད་ལྷ་ཁང་ནང་མཇལ་པ་དང་སྐོར་བར་འགྲོ་ཆོག་པར་བྱས།   ད་དུང་ཁྱོད་ལ་རྣ་སྐུད་དམར་པོ་ཞིག་ཀྱང་གནང་སོང༌།   འུ་གཉིས་ཉིན་རྒྱུན་བྲེལ་བ་ཤིན་ཏུ་ཆེ།   དུས་ཚོད་ནི་མིག་ཕྱེ་བཙུམ་མཚམས་སུ་སྟོན་ཟླ་བར་མར་བསླེབས་སོང༌།   ངའི་ཕོ་བར་ན་ཟུག་ཡོད་རུང་སྔོན་ཆད་དང་འདྲ་བའི་དྲག་པོ་མི་འདུག   བཟང་མོས་རྨི་ལམ་བཅོལ་མ་ཡང་བསྐྱར་བཞག་མ་སོང་བས།   མི་ལུས་ཤིག་ལོན་པར་འགྱུར་བར་ཡིད་ཆེས་ཀྱིས་ཁེངས།   ངས་བཟང་མོའི་ཞེན་ཆགས་དེ་ཅུང་ཙམ་ལྷོད་པ་དང་མཉམ་དུ།   ཁྱོད་ལ་ཆགས་པའི་སེམས་ནི་ཉིན་རེ་ལས་ཉིན་རེར་ཇེ་ཟབ་ཏུ་འགྲོ་བཞིན་མཆིས།   ང་ཤི་སོང་ན་ཁྱོད་ལ་བདག་སྐྱོང་བྱེད་མི་མེད་པ་དང༌།   ཁྱོད་ལ་བརྙས་བཅོས་བྱེད་མཁན་འབྱུང་བ།   ཁྱོད་ར་སྐོར་ལས་ཕྱིར་འཕུད་བྱེད་ངེས་པ་སོགས་ཀྱི་སེམས་ཁུར་བྱུང༌།   སེམས་ཁུར་དེ་དག་ནམ་ཡང་ངའི་ཡ་ཆུང་སེམས་སུ་འཁོར་པས།   ང་ལོ་འགའ་ལ་འཆི་མི་རུང་བར་ཧུར་བརྩོན་བྱེད་དགོས་ངེས་ཀྱི་སྐུལ་མ་རང་གིས་རང་ལ་བཏང༌།   ཉིན་རྒྱུན་ངས་མཆོག་གསུམ་ལ་ང་འཇིག་རྟེན་དུ་ཉིན་འགར་སྡོད་ཐུབ་པའི་སྐྱབས་འཇུག་དང་གསོལ་འདེབས་བྱས་པ་ཡིན།   སྟོན་ཟླ་བར་མའི་དུས་སུ།   ངས་ཁྱོད་ཁྲིད་ནས་གླིང་སྐོར་ལ་རྐྱོང་ཕྱག་འཚལ་དུ་འགྲོ་འདོད།   ངས་ཁྱོད་ལ་དོན་དེ་བཤད་སྐབས་ཁྱོད་ཀྱི་མིག་ཟུང་ལ་རེ་བས་ཁེངས་འདུག ངས་ཁྱོད་ལ་གལ་ཏ་གསར་བ་ཞིག་བཟོས་པ་དང༌།   ང་ལའང་རས་མཁྲེགས་པོའི་ཤམ་ཐབས་ཤིག་བཟོས་པས་གྲ་སྒྲིག་ཡོད་ཚད་ཚགས་སུ་ཆུད་པ་ཡིན།  
　　ནམ་ད་དུང་ལངས་མི་འདུག   མུན་པ་ནས་རིམ་གྱིས་སྐྱ་མདོག་ཇེ་ཆེར་གྱུར།   ངས་གོམ་པ་གཉིས་རེའི་མཚམས་སུ་ཕྱག་རེ་འཚལ་བས་ཤིན་ཏུ་དལ།   ཁྱོད་ངའི་འཁྲིས་སུ་དལ་མོར་ཡོང་གིན་འདུག་ཅིང་སྐབས་རེར་ང་ལ་མིག་གིས་ལྟ་བར་བྱེད།   ཁྱོད་ཀྱི་རྒྱབ་ཀྱི་གལ་ཏ་གཡོན་པར་རྩམ་ཁུག་ཆུང་ངུ་ཞིག་དང་ཇ་ཚ་དེམ་གང༌།   གཡས་སུ་སྔོ་ཚལ་རྡོག་གཅིག་དང་ཆུ་འགྱིག་དམ་གང་བསྡུས་ཡོད།   ཉི་མ་ཤར་དུས་ངེད་གཉིས་ཀྱིས་ཕྱག་འཚལ་ནས་རྡོ་སེང་གེ་ལམ་གྱི་ལྷོ་སྣེར་བསླེབས་སོང༌།   འགྲུལ་སྐྱེལ་རླངས་འཁོར་རེ་རེ་ལམ་འགྲམ་དུ་བསྡད་བྱུང་བ་ལ།   ནང་ནས་རྒྱལ་ཁབ་ཕྱི་ནང་གི་སྐུ་མགྲོན་མང་བོ་མར་བབས་བྱུང༌།   ཁོ་ཚོས་འུ་གཉིས་མཐོང་བས་ཕྱོགས་གཅིག་ཏུ་རུབ་ནས་པར་ལེན་པ་མཚམས་མི་འཆད།   ངས་གོམ་པ་གཉིས་རེའི་བར་ནས་རྐྱོང་ཕྱག་རེ་འཚལ་ནས་འགྲོ་དུས།   ཁྱོད་ངའི་རྗེས་སུ་འབྲངས་ནས་ཡོང༌།   སྐུ་མགྲོན་ལ་ལས་འུ་གཉིས་ལ་དངུལ་གྱི་སྦྱིན་པ་བཏང་ཡོང་བར།   ངས་དངུལ་ལེན་ཞོར་དུ་ལག་ཟུང་ཐལ་མོ་སྦྱར་ཏེ“ཐུགས་རྗེ་ཆེ”ཞེས་སྨྲས།  
　　དངུལ་དེ་དག་འུ་གཉིས་ཀྱིས་ཉིན་ཞིག་དགོན་པར་དབུལ་ཆོག འུ་གཉིས་ཀྱིས་ཕྱག་འཚལ་བཞིན་ཕྱིན་པས་ཁོ་ཚོ་རྗེས་སུ་བཞག་སོང༌།   ངས་ཁྱོད་ཡུན་རིང་ཙམ་བསྐྱང་བར་འདོད་པས།   མཆོག་གསུམ་ལ་ང་དུས་ཡུན་ཅུང་རིང་བར་གསོན་ཐུབ་པའི་གསོལ་བ་དང་སྨོན་ལམ་བཏབ།  
　　ངེད་གཉིས་གཞུང་ལམ་འགྲམ་དུ་བསྡད་ནས་ཉིན་གུང་གི་ཟ་མ་ཟོས།   ང་སྐྱིལ་ཀྲུང་གིས་མིའི་བགྲོད་ལམ་དུ་བསྡད་དེ་ཁྱོད་ཀྱིས་ཁུར་པའི་གལ་ཏ་ལས་ཁྱོད་ལ་སྔོ་ཚལ་བླངས་ནས་གཏུབས་ཏེ་བྱིན།   ཁྱོད་ནི་ལྟོགས་དྲགས་པས་ཁམ་འགའ་བྱས་ནས་ཟོས་ཚར་དུ་བཅུག   དེར་ངས་ཐད་ཀར་སྔོ་ཚལ་རྡོག་རྡོག་དེ་ཁྱོད་ཀྱི་མདུན་དུ་བཞག་ཅིང་རང་གིས་རྩམ་པ་ཟ་མགོ་བརྩམས།   ལམ་འགྲོ་པས་ངེད་གཉིས་ལ་ཕྱི་མིག་འཕེན་ཞོར་བྲེལ་ཚུབ་ཀྱིས་བསྐྱོད་འགྲོ།   མཐུད་ནས་ངས་ཁྱོད་ལ་རྩམ་རྡོག་འགའ་བྱིན་ཅིང་ཆུ་འགྱིག་ཁུག་ནང་དུ་བླུགས་ཏེ་ཁྱོད་འགྲངས་ཐག་ཆོད་པ་ཞིག་བྱས། མཐར་ངེད་གཉིས་ཀྱིས་ལྕང་མའི་བསིལ་གྲིབ་འོག་ཏུ་ངལ་གསོས། གཞུང་ལམ་ཐོག་གི་མི་ཚོགས་དང་རླངས་འཁོར་གྱི་འུར་སྒྲས་འུ་གཉིས་ལ་སོས་དལ་བའི་ངལ་གསོ་རུ་མ་བཅུག ངས་ཡང་བསྐྱར་ཕྱག་འཚལ་མགོ་བརྩམས། ཉི་མའི་ཚ་ཟེར་གྱིས་ངའི་རྒྱབ་ཏུ་ལྭ་བ་འབྱར་བར་བྱས་ཤིང་། ཚ་སྲེག་གི་ཨར་འདམ་ལམ་བུས་ངའི་བྲང་ཁ་སྲེག་པར་བྱེད། ཡིན་ནའང་བར་ཆད་དེ་དག་ནི་ཅི་ཡང་མིན་ཏེ། ངས་མུ་མཐུད་ནས་ཕྱག་བཙལ་བའི་མཇུག་གྲུབ་པ་བྱ་དགོས།
　　ཉིན་གཉིས་པར་ངེད་གཉིས་ཀྱིས་ཡང་བསྐྱར་ཁ་སང་གི་ས་མཚམས་ནས་མགོ་བཙུགས་ཏེ་རྐྱོང་ཕྱག་འཚལ།  ངེད་གཉིས་ཀྱི་ལོགས་སུ་རྐྱོང་ཕྱག་འཚལ་བཞིན་པ་དག་ནི།   གྱོན་ཆས་གོན་ལུགས་ལས་རྒྱང་རིང་གི་ཁམས་ཕྱོགས་ནས་ཡོང་བའི་མཇལ་པ་དང་འདྲ།   ཚག་ཚག་གི་ཕྱག་ཤིང་ཀི་སྒྲའི་ཁྲོད་དུ་ང་ཚོ་མདུན་དུ་བསྐྱོད་དེ་ཡུན་གྱིས་སྐྱ་རེངས་ཤར་སོང༌།   ཉི་གཞོན་ཤར་རིའི་ཕྲག་ནས་འཕགས་ཏེ་གསེར་མདོག་གི་འོད་ཟེར་སྤྲོས་ཡོང་བ་དང་བསྟུན་ནས།   མིག་མདུན་གྱི་གཞུང་ལམ་གློ་བུར་གསེར་མདོག་ཏུ་གྱུར།   ཁྱོད་ཀྱི་དངུལ་མདོག་གི་ལུས་པོ་ཉི་ཟེར་ཁྲོད་འགུལ་གྱིན་འདུག་སྟེ།   ལྷད་མེད་དྭངས་གཙང་གི་པད་དཀར་ཆུན་པོ་ཞིག་དང་མཚུངས་པར་རྡུལ་གྱི་དྲི་ཙམ་ཡང་མ་གོས་པར་ཡོད།

2010ལོའི་སྦྲང་ཆར་དེབ་བཞི་པའི་སྟེང་བཀོད་ཡོད། 
ཚེ་རིང་ནོར་བུས་བརྩམས། འགྱུར་མེད་རབ་བརྟན་གྱིས་བསྒྱུར།