མཚོ་སྔོན་པོའི་མཚོ་དར་ཞུ་འགོ་ཚུགས།

       འཁོར་སྐར་རྒྱང་ཚོར་ལྟ་ཞིབ་ཚད་ལེན་གྱི་གྲངས་གཞི་ལས་མངོན་པར་གཞིགས་ན། མཚོ་སྔོན་པོའི་ལྷོ་ནུབ་རྒྱུད་ཀྱི་མཚོ་དར་ཞུ་བའི་ཁྱབ་ཁོངས་ཅུང་ཆེ་བ་དང་། ཞུ་ཁུལ་གྱི་རྒྱ་ཁྱོན་སྤྱི་ལེ་གྲུ་བཞི་མ534.6ཙམ་ཟིན་པ་དེས་མཚོ་སྔོན་པོའི་སྤྱིའི་རྒྱ་ཁྱོན་གྱི11.5%བཟུང་ཡོད།

       མཚོ་སྔོན་པོའི་མཚོ་དར་ཞུ་བ་ལ“དལ་ཞུ”དང“མྱུར་ཞུ”གཉིས་སུ་ཕྱེ་ཡོད་པ་དང་། དེ་གཉིས་ཚང་མ་མཚོ་རྒྱུད་ཀྱི་དྲོད་ཚད་དང་རླུང་འགྲོས་དང་འབྲེལ་བ་དམ་ཟབ་ཡོད་པ་རེད། “དལ་ཞུ”ནི་ཉིན་རེའི་ཆ་སྙོམ་དྲོད་ཚད་བརྟན་པོའི་ངང0℃ལས་ཆེ་ཞིང་རླུང་ཤུགས་ཅུང་ཞན་པ་དང་བསྟུན། མཚོ་དར་རང་བྱུང་གིས་ཞུ་བ་ལ་ཟེར། "མྱུར་ཞུ"ནི་དྲོད་ཚད་གློ་བུར་དུ་འཕར་བའི་ཐོག་རླུང་ཆེན་པོའི་གནམ་གཤིས་བསྟན་པས། ཚ་ཤུགས་རྒྱས་པ་དང་རླུང་ཤུགས་ཀྱི་ནུས་པ་མཉམ་བསྡེབས་ཀྱིས་འཁྱགས་རིམ་གས་ཆད་དང་ཕུང་གསོག་བྱས་ཏེ་འཁྱགས་རགས་གྲུབ་པ་ལ་ཟེར། གནམ་གཤིས་དཔྱད་གཞི་ལས་མངོན་པ་ལྟར་ན། ཟླ3པའི་ཚེས21ཉིན་ནས་བཟུང་མཚོ་སྔོན་པོའི་མཚོ་ཁུལ་གྱི་དྲོད་ཚད་མཐོ་ཤོས་དེ7.5℃བར་མྱུར་དུ་འཕར་ནས་རིམ་པ་8ཡན་གྱི་ཐོལ་རླུང་གི་གཞོགས་འདེགས་འོག “མྱུར་ཞུ”ཡི་ཆ་རྐྱེན་འཛོམས་ཡོད་པ་རེད།

       འཁོར་སྐར་རྒྱང་ཚོར་ལྟ་ཞིབ་ཚད་ལེན་ལས་མངོན་པ་ལྟར་ན། མཚོ་སྔོན་པོའི་ལྷོ་ནུབ་རྒྱུད་ཀྱི་མཚོ་དར་ཞུ་བའི་ཁྱབ་ཁོངས་གྲུབ་ཚུལ་དེ་མཚོ་འགྲམ་ནས་མཚོ་ཡི་ལྟེ་གནས་སུ་ཟླུམ་དབྱིབས་སམ་ཡང་ན་ངེས་གཏན་མིན་པའི་ཐགས་དབྱིབས་ཁྱབ་ཚུལ་གྱི་གས་སྲུབས་ཁུལ་ཡིན་པ་རེད། དེའི་ནང་པུ་ཧ་ཆུ་བོ་མཚོ་སྔོན་པོའི་ནང་དུ་བཞུར་བའི་འདྲེས་མཚམས་ཁུལ་དང་། ཐེབ་རྒྱ་ཁུགས་དང་དེ་བཞིན་རྟ་ནག་མ་ཆུ་བོའི་འགྲམ་རྒྱུད་དང་ཉེ་ས་དག་ཏུ་མཚོ་དར་ཞུ་བ་མངོན་གསལ་ཡིན་ལ། མཚོ་སྔོན་པོའི་རྣ་ལུང་གི་ལྷོ་རྒྱུད་ཀྱི་མཚོ་དར་ཕལ་ཆེར་ཞུ་ཟིན་པ་རེད། ཟླ3པའི་ཚེས31ཉིན། མཚོ་སྔོན་པོའི་མཚོ་དར་ཞུ་བའི་རྒྱ་ཁྱོན་སྔར་བས་ཆེ་རུ་ཕྱིན་པ་དང་། ཤར་རྒྱུད་མཚོ་འགྲམ་གྱི་མཚོ་དར་ཞུ་བ་མངོན་གསལ་དོད་པོ་ཡིན་ལ། མཚོ་ངོས་གཙོ་བོར་རྒྱ་ཁྱོན་ཆེ་བའི་འཁྱགས་དར་དང་གས་རིས་ཐོན་ཡོད་པ་རེད།

       མཚོ་དར་ཞུ་བ་དང་ཆབས་ཅིག མཚོ་སྔོན་པོའི་གསེར་ཉར་གསོན་ཤུགས་རྒྱས་པ་དང་། ངུར་བ་དང་བྱ་ལོང་ལྟག་ཁྲ་སོགས་བྱ་རིགས་དག་གཅིག་རྗེས་གཉིས་མཐུད་དུ་འཕུར་ཡོང་ནས་འཁྱགས་སེལ་ཆུ་ཁོངས་སུ་འཚོ་སྡོད་བྱེད་ཅིང་གཟན་འཚོལ་བ་ཡིན་པས། “མཚོ་ངོས་སུ་འདབ་ཆགས་མང་པོས་ལྡིང་སྐོར་བྱེད་པའི” ཐུན་མོང་མ་ཡིན་པའི་འབྱུང་ཁམས་ཀྱི་མཛེས་རིས་ཤིག་གྲུབ་ཡོད། མཚོ་སྔོན་པོའི“མྱུར་ཞུ”སྟེ་མཚོ་དར་མྱུར་དུ་ཞུ་བའི་མཛེས་ལྗོངས་ལ་བལྟ་བའི་དུས་ཡུན་ཐུང་དུ་ཕྱིན་པ་དང་། གང་དེར་བལྟ་བའི་དུས་ཡུན་ཡག་ཤོས་ནི་ཉིན7ནས10བར་ཡིན་པ་རེད། མཚོ་སྔོན་པོའི་མཛེས་ལྗོངས་ཁུལ་དོ་དམ་ཅུས་ཀྱིས་གྲོ་འགོ་བཏོན་པར། ཡུལ་སྐོར་བས་སྔོན་ལ་ལྷ་མོ་གཞོངས་དང་ལྷ་ཆབ་ཁུགས། གླང་ཆེན་མཆེ་བ་སོགས་ནུབ་ངོགས་ཀྱི་མཛེས་ལྗོངས་ཁུལ་བདམས་ནས་ལྟ་སྐོར་བྱེད་པ་དང་། ས་ཁོངས་དེ་དག་གི་འཁྱགས་གས་ཡུལ་ལྗོངས་གཅིག་སྡུད་ཡིན་པ་མ་ཟད། མཚོ་དར་ཞུ་བའི་འཕེལ་རིམ་ཅུང་མགྱོགས་པོ་ཡོད་པ་རེད། དེ་དང་ཆབས་ཅིག མིག་སྔར་མཚོ་དར་སྲབ་མོ་ཡིན་ལ། མཚོ་འགྲམ་དང་བར་ཐག་སྤྱི་ལེ2ཡོད་པའི་ཁྱབ་ཁོངས་ཚང་མ་རྡིབ་པའི་ཉེན་ཁ་ཡོད་པས། ཡུལ་སྐོར་བ་མཚོ་དར་གྱི་སྟེང་དུ་འགྲོ་བ་གཏན་འགོག་བྱེད་དགོས་པའི་དྲན་སྐུལ་བྱས་ཡོད་པ་རེད།