དེབ་འདི་ནི་བོད་ཡིག་གི་ལམ་ནས་གསར་འགྱུར་རྩོམ་འབྲི་ལ་འཇུག་པའི་ལས་དང་པོ་པ་རྣམས་ཀྱི་བློ་ཚོད་དང་བསྟུན་ནས་བྲིས་པ་ཡིན་པས།མཁས་པས་བརྟགས་ན་དོན་བཟང་བ།བླུན་པོས་ཉན་ན་གོ་སླ་བ།གནད་འདུས་ལ་འཛིན་བདེ།འབྲེལ་ཆགས་ལ་ཚིག་སྙན་པ་སོགས་མཁས་རྨོངས་བར་མའི་སྐྱེ་བོ་མཐའ་དག་གི་ཡིད་འཕྲོགས་ཤིང་།ནམ་ལངས་པ་ལ་ཉི་མ་ཤར་བ་བཞིན་ཐུགས་ལ་ཟིན་པ་ཞིག་འཁྱོངས་པ་ཤིན་ཏུ་དཀའ།དེབ་འདི་རྩོམ་འབྲི་བྱེད་སྐབས་བྱ་བའི་བྲེལ་ཟིང་ཆེ་ཞིང་། ལྷག་པར་དུ་འབྲེལ་ཡོད་ཆེད་ལས་ཀྱི་ཤེས་བྱའི་ཆུ་ཚད་དམན་པས།དེབ་འདིར་ལོག་བཤད་དང་ཉེས་བཤད།ཆད་ལྷག་འཁྲུལ་སོགས་ཀྱི་སྐྱོན་ཅི་རིགས་ཡོད་སྲིད། དེ་བས་རྣམ་དཔྱོད་དང་ལྡན་པའི་མཁས་པ་དག་གིས་དགོངས་འཆར་བསྲི་བ་མེད་པར་འཚལ།...

ཉེ་ཆར་མཚོ་སྔོན་དགེ་འོས་སློབ་ཆེན་མི་རིགས་དགེ་འོས་སློབ་གླིང་གི་དགེ་རྒན་ཆེན་མོ་གཞོན་པ་ས་བགོས་ནོར་བུ་དབང་ལྡན་ལགས་ཀྱི་རིག་གཞུང་ཆེད་དེབ«དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོའི་སྙན་རྩོམ་ཞིབ་འཇུག»ཅེས་པ་མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན།ཆེད་དེབ་འདིར་དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོས་མཛད་པའི་སྙན་རྩོམ་གྱི་ལྟ་གྲུབ་དང་།དགོངས་སྤྱོད་སོགས་བརྗོད་བྱ་དོན་གྱི་ཡོན་ཏན།རྫོགས་པ་ཆེན་པོའི་ཆོས་སྐད་འབའ་ཞིག་གིས་གྲུབ་པའི་རྗོད་བྱེད་ཚིག་གི་ཁྱད་ཆོས།རིག་པ་རང་བྱུང་གི་རྩལ་ལས་བརྡོལ་བའི་རྡོ་རྗེའི་ཐོལ་མགུར་གྱི་རྩོམ་སྟངས་བཅས་སྤྱི་ཕྱོགས་ནས་བསྟན་པ་དང་།བྱེ་བྲག་ཏུ་གསང་སྔགས་རྡོ་རྗེ་ཐེག་པའི་ལྟ་སྒོམ་སྤྱོད་འབྲས་ཀྱི་ངང་ཇི་ལྟར་སྐྱོང་ཚུལ།དེ་དག་ཇི་ལྟར་ཉམས་བཞེས་དགོས་ཚུལ།ཉམས་ལེན་དང་མི་མཐུན་པའི་ཚུལ་མིན་གྱི་སྙིགས་སྤྱོད་ཇི་ལྟར་སྤང་བླང་དགོས་ཚུལ་སོགས་ཐར་ཆགས་སུ་བཀོད་ཡོད།...

ཤེས་རྟོགས་བྱུང་བར་གཞིགས་ན།སྤྱི་ཚོགས་དཔལ་འབྱོར་དང་རིག་གནས་འཕེལ་རྒྱས་ཀྱི་རླབས་རྒྱུན་ཆེན་པོ་དང་བསྟུན་ནས།ལོ་ངོ་སྟོང་ཕྲག་བརྒྱུད་པའི་ཐང་གའི་རི་མོའི་སྒྱུ་རྩལ་དེ་སྔ་མོ་ནས་མང་ཚོགས་ཀྱི་ཕྱོགས་སུ་བསྐྱོད་ཡོད་ལ་འཛམ་གླིང་གི་ཕྱོགས་སུའང་བསྐྱོད་ཡོད།འོན་ཀྱང་ཐང་གའི་སྒྱུ་རྩལ་སྐོར་གྱི་རིགས་པའི་གཞུང་ལུགས་ཀྱི་བརྩམས་ཆོས་ཧ་ཅང་ཉུང་བས་མང་ཚོགས་ཀློག་པ་པོས་ཐང་གའི་རིག་གནས་དང་།མཛེས་དཔྱོད་ཤེས་རྟོགས་གཏིང་ཟབ་བྱེད་དཀའ་བས་རི་མོར་བལྟས་ནས་དབུགས་རིང་འབྱིན་རྒྱུ་ལས་མ་འདས།དེར་བརྟེན།ཐང་གའི་སྒྱུ་རྩལ་གྱི་འབྲེལ་ཡོད་བརྩམས་ཆོས་རྩོམ་སྒྲིག་དང་དཔེ་སྐྲུན་བྱ་རྒྱུ་དེ་ཕུལ་བྱུང་གི་སྲོལ་རྒྱུན་མི་རིགས་རིག་གནས་དེ་རྒྱུན་འཛིན་དང་དར་སྤེལ་གཏོང་རྒྱུར་དོན་སྙིང་གལ་ཆེན་ལྡན་ཡོད།...

«མཚན་ཞག་སྟོང་གི་གཏམ་རྒྱུད»ཅེས་པའི་དཔེ་དེབ་འདི་ནི་བོད་རང་སྐྱོང་ལྗོངས་བོད་སྐད་ཡིག་རྩོམ་སྒྱུར་ཅུས་དང་བོད་ལྗོངས་མི་དམངས་དཔེ་སྐྲུན་ཁང་གིས་མཉམ་འབྲེལ་ཐོག་དཔེ་སྐྲུན་བྱེད་པ་ཞིག་ཡིན་ཞིང་།ཁྱོན་དེབ་གསུམ་ཡོད།དེབ་འདི་བོད་ཞི་བས་བཅིངས་འགྲོལ་བཏང་ཚུན།མི་སྒེར་གྱིས་ལེགས་སྒྲུབ་གནང་བའི་ཡིག་སྒྱུར་གྱི་བརྩམས་ཆོས་ཆེ་ཤོས་གྲས་ཤིག་ཡིན་ལ་གང་དེ་དཔེ་སྐྲུན་མཛད་པ་དེས་བོད་ལྗོངས་ཀྱི་རྩོམ་རིག་ལོ་ཙཱའི་ལོ་རྒྱུས་ཀྱི་སྟོང་ཆ་བསྐངས་བ་མ་ཟད།བོད་མི་རིགས་ཀྱི་ལོ་ཙཱའི་བྱ་གཞག་ལ་ལེགས་སྐྱེས་ཆེན་པོ་འབུལ་གནང་མཛད་ཡོད།...

སྤྲེལ་རྫོང་དགོན་པ་ཕྱག་བཏབ་ནས་ལོ་འཁོར་བརྒྱ་ལོན་པའི་རྗེས་དྲན་དཔེ་ཚོགས་མི་འགྱང་བར་འགྲེམ་སྤེལ་བྱེད་རྒྱུ་ཡིན་ལ།དེབ་འདི་དག་ནི་ཆོས་སྡེ་འདི་དང་འདི་ནས་དྲིན་གྱིས་བསྐྱངས་པའི་དགེ་རྒན་དང་བླ་མ་བཀའ་དྲིན་ཅན་དག་ལ་དྲིན་གཟོའི་ཕྱིར་དང་།དམིགས་ཀྱིས་ད་ལོ་རང་རེའི་དགོན་པ་འདི་ཕྱག་བཏབ་ནས་ལོ་འཁོར་བརྒྱ་ལོན་པའི་རྗེས་དྲན་དུ་འདི་ཀའི་གྲྭ་རྐྱང་དཀྱུས་མ་འགས་བརྩམས་པ་ཡིན་པས་དཔྱོད་ལྡན་ཀློག་པ་བོ་ཡོངས་ཀྱིས་ཐུགས་ཁུར་དང་རྒྱབ་སྐྱོར་གནང་བར་བཀའ་དྲིན་ཆེ་ཞུ་བ་ཡིན་ལགས།...