དེ་བས་བག་ཡོད་སེམས་ཀྱིས་སུ།།སྤྱོད་ལམ་ཀུན་ཏུ་མཛེས་བྱ་སྟེ།།སངས་རྒྱས་ཀྱིས་ཀྱང་གདུལ་བྱ་ཕལ།།སྤྱོད་ལམ་གྱིས་ནི་འདུལ་བར་མཛད།།...

ཆོག་ཤེས་ལྡན་ན་འབྱོར་པའི་མཆོག།རན་ཚོད་ཟིན་ན་བྱ་བའི་རབ།།བྱ་བ་སྙོམས་ན་ཕྱི་ཐག་རིང་།།ཕན་སེམས་ཆེ་ན་རྗེ་བོའི་ཕུལ།།...

ས་སྟེང་འདོད་པའི་ལོངས་སྤྱོད་ཀུན།།སྐྱེ་བོ་གཅིག་ལ་བདོག་གྱུར་ཀྱང་།།ངོམས་པ་མེད་པར་སླར་ཡང་བརྐམ།།དེ་བས་འདོད་ལ་ཆོག་ཤེས་བྱ།།...

འདོད་པ་རྣམས་ནི་ཆེར་བསྟེན་ན།།ཕྱིར་ཞིང་རྩྭ་ལ་མེ་བཞིན་འཕེལ།།དེ་ཡིས་དཔལ་དང་གྲགས་པ་ཉམས།།དེ་ཕྱིར་ཆོག་ཤེས་བྱས་ན་བདེ།།...

འདོད་པ་ཕུང་ཀྲོལ་ཀུན་གྱི་རྒྱུ།།རྒྱལ་བས་ཀིམ་པའི་འབྲས་འདྲར་གསུང་།།འདོད་ལ་ཞེན་པ་མ་ལོག་ཀྱང་།།ཧ་ཅང་འདོད་ཆེན་ཉིད་མི་བྱ།།...

སྤྱོད་པ་བག་དང་ལྡན་པ་ལ།།མཐའ་དག་སྐྱེ་བོས་བཀུར་འགྱུར་ཞིང་།།བག་མེད་རྣམས་ཀྱང་དེ་མཐོང་ཚེ།།འཇིགས་བཅས་ཟིལ་གྱིས་གནོན་པར་འགྱུར།།...

དེ་དག་རྣམས་ཀྱིས་མཚོན་ནས་སུ།།ཆོས་མིན་བྱ་བ་ཀུན་ཀྱང་སྤང་།།བྱ་བ་མིན་དང་བྱ་འོས་པ།།གང་ལ་ཞུགས་ཀྱང་གོམས་ནས་འཕེལ།།དེ་བས་དྲན་ཤེས་བག་ཡོད་ཀྱིས།།རང་རྒྱུད་འཆོས་ན་བཟང་པོར་འགྱུར།།...

དེ་ཕྱིར་མགོན་པོ་ཀླུ་སྒྲུབ་ཀྱིས།།རྒྱན་པོ་འགྱེད་དང་འདུས་ལ་ལྟ།།ལེ་ལོ་དང་ནི་སྡིག་གྲོགས་བསྟེན།།ཆང་འཐུང་མཚན་མོར་རྒྱུ་བ་ནི།།གྲགས་པ་ཉམས་པའི་རྒྱུ་དྲུག་ཅེས།།བཤེས་པའི་སྤྲིངས་ཡིག་དག་ལས་གསུངས།།...

འདུས་པའི་ཚོགས་ལ་ལྟ་བ་སོགས། །འཕྱར་གཡེང་ཆེ་ན་སྡོད་མི་ཚུགས།།ཤིང་བལ་རླུང་གིས་བསྐྱོད་འདྲ་བའི།།རྒྱལ་རིགས་སྤྱོད་པ་ཇི་ལྟར་མཛེས།།...

སྡིག་པའི་གྲོགས་པོ་བསྟེན་གྱུར་ན།།སྡོང་པོ་སྲིན་གྱིས་ཟོས་པ་ལྟར།།ལེགས་ཚོགས་འགྲིབ་ཅིང་ཉེས་པ་འཕེལ།།སྐྱོན་ཀུན་རྩ་བ་གྲོགས་ངན་ཡིན།།...

ཉིན་རེ་བཞིན་ཡང་དྲན་ཤེས་ཀྱིས།།བསླབ་དང་བཟླས་སྒོམ་ཅི་ནུས་བྱ།།འབངས་ཀྱི་སྐྱེ་བོའི་དོན་ལ་བརྟག།ལེ་ལོ་བྱས་ན་དོན་ཀུན་འཆོར།།...

ཉིན་གྱི་དུས་སུའང་ཕྱོགས་ཀུན་ཏུ།།ས་བདག་རྒྱུ་བ་མི་མཛེས་ན།།མཚན་མོའི་དུས་སུ་འབྱུང་པོ་བཞིན།།ཀུན་ཏུ་འཁྱམས་པ་ལྟ་ཅི་སྨོས།།...

ཆང་གིས་སེམས་འཆལ་བག་མེད་སྐྱེ།།དེས་ནི་བླང་དོར་སྤྱོད་པ་ཉམས།།རང་བློ་མུན་པར་བྱས་པ་ལ།།བླུན་པོ་རྣམས་ཀྱིས་བདེ་བར་བསྒོམ།།...

དུས་ཀྱི་དགའ་སྟོན་མ་གཏོགས་པ།།རྒྱུན་ཆགས་རྩེད་མོས་གཡེངས་གྱུར་ན།།ཕལ་བ་ཡིན་ཡང་དོན་ཉམས་ན།།ཆེ་བའི་རིགས་ལ་སྨོས་ཅི་དགོས།།...

འཁོར་བཟང་སྤྱོད་པ་བཟང་མཐོང་ནས།།སྐྱེ་རྒུ་ཀུན་ཀྱང་དགའ་བ་སྐྱེད།།དེ་ཕྱིར་ཡ་རབས་སྤྱོད་པ་ཅན།།ཁོ་ན་འཁོར་དུ་བསྡུ་བར་བྱ།།...

ཀུན་སྤྱོད་ངན་པའི་སྐྱེ་བོ་རྣམས།།འཁོར་དུ་བསྡུ་བར་མི་བྱ་སྟེ།།འཁོར་གཡོག་ངན་པའི་སྐྱོན་དག་གིས།།​​​​​​​རྒྱལ་པོ་ལ་ཡང་འཕྱར་ཀ་གཏོང་།།...

མ་རབས་མཐོ་བའི་སར་བཞག་ན།།སྤྱོད་ངན་ཇེ་བས་ཇེ་མང་འཕེལ།།ཐེའུ་རང་ཕུག་གི་ལྷར་བསྟེན་ན།།འཁུ་ལྡོག་ཆོ་འཕྲུལ་ཇེ་ཆེར་འགྲོ།།...

བློ་ལྡན་གོ་འཕང་མཐོ་གྱུར་པ།།དེ་ལྟ་དེ་ལྟར་སྤྱོད་པ་བཟང་།།ནོར་བུ་རྒྱལ་མཚན་རྩེར་མཆོད་ན།།དགོས་རྒུ་ཡིད་བཞིན་སྩོལ་བར་བྱེད།།...

དེ་ཕྱིར་སེམས་དཔའ་མཆོག་རྣམས་ལ།།འཕྱོར་པོའི་འདུ་ཤེས་མི་མངའ་ཡང་།།འཇིག་རྟེན་ཡིད་རབ་དྲང་བའི་ཕྱིར།།ཡ་མཚན་ཆ་ལུགས་སྟོན་པར་མཛད།།...

བསམ་པ་ཆུང་ངུའི་འཇིག་རྟེན་རྣམས།།ནང་གི་ཡོན་ཏན་མི་ཤེས་པས།།ཕྱི་ཚུལ་བཟང་པོ་འཇིག་རྟེན་དང་།།མཐུན་པར་བྱས་ན་འཇིག་རྟེན་མགུ།།...

སྣ་ཚོགས་སྐད་དུ་གཏམ་སྨྲས་ཀྱང་།།ཀླ་ཀློ་མགུ་བར་མི་འགྱུར་ལ།།ཀླ་ཀློ་རང་གི་སྐད་སྨྲས་ན།།དེ་ཉིད་མགུ་བར་འགྱུར་བ་བཞིན།།...

རྒྱན་ཆས་བཟང་པོས་བརྒྱན་པ་ཡི།།འཁོར་ནི་གཙོ་བོའི་ཆེ་རྟགས་འགྱུར།།རྟ་ལ་རྒྱན་གྱིས་བརྒྱན་པ་ནི།།བདག་པོ་ཉིད་ལ་མཛེས་པ་བཞིན།།...

ནོར་མེད་རྒྱན་དགའ་ཆེ་བ་དང་།།འབྱོར་ལྡན་ཧྲུལ་པོའི་ཆས་ཞུགས་པ།།གཉིས་ཀ་འཇིག་རྟེན་བཞད་གད་རྒྱུ།།དེ་ཕྱིར་རྒྱན་ཆས་འཚམ་པར་སྤྱད།།...

ནང་ན་ཡོན་ཏན་ཀུན་ལྡན་ཡང་།།ཆ་ལུགས་ངན་ན་ཀུན་གྱིས་བརྙས།།དེ་ཕྱིར་འབྱོར་པའི་འོས་དང་བསྟུན།།ཆས་རྒྱན་ཡ་རབས་ལུགས་སུ་བྱ།།...

སྐྱེ་བོའི་ཆ་ལུགས་ལྟས་དག་ལས།།ཕྱི་ནས་འབྱུང་འགྱུར་བཟང་ངན་མངོན།།དེ་བས་གནའ་བོ་ཡ་རབས་ཀྱི།།ལུགས་སྲོལ་དག་ལས་འདའ་མི་བྱ།།...