བོད་སྐད་ཀྱི་སྦྱོར་བའི་ཁྲོད་དུ་མིང་གཞི་དང་མིང་གཞི་སྦྱར་བ།མིང་གཞི་དང་མིང་རྐྱེན་སྦྱར་བས་མིང་གི་སྦྱོར་བ་མང་པོ་ཞིག་མིང་གི་ཚོགས་པ་རུ་ཉར་ཡོད་ལ།གསར་བྱུང་གི་ཐ་སྙད་མང་པོ་ཞིག་ཀྱང་དོན་གྱི་ངོ་བོ་སྟོན་པའི་སྒྲ་གཉིས་ཡན་ལས་མིང་གི་གཞི་མར་གྱུར་པའི་སྒྲ་སྟེ།མིང་གཞི་གཉིས་སམ་དུ་མ་གཞི་གཅིག་ཏུ་སྦྲེལ་ནས་གསར་བྱུང་གི་མིང་དུ་གདགས་པ་དང་།མིང་གཞི་གཅིག་ལ་མིང་གི་ཆ་ཤས་ཕྱི་མ་རྐྱེན་དུ་སྦྱར་ཏེ་མིང་མཐའི་སྒོ་ནས་མིང་གི་བྱེ་བྲག་གསར་བ་བཟོ་ཞིང་།མིང་དོན་གྱི་ཁྱད་པར་འབྱེད་པས་ན།བརྡ་སྤྲོད་ཀྱི་ཁྱད་ཆོས་ལྡན་པའི་ཚིག་སྦྱོར་གྱི་གྲུབ་ཆ་གལ་ཆེན་ཞིག་གྲུབ་ཡོད་དེ།འདིར་དེང་རབས་རྒྱ་ཡིག་དང་སྐད་བརྡ་རིག་པའི་ཞིབ་འཇུག་བྱེད་ཐབས་ལ་བརྟེན་ནས་བོད་སྐད་ཀྱི་མིང་གི་གྲུབ་ཚུལ་ལས་མིང་གཞི་མཉམ་འདུས་ཀྱི་མིང་གི་གྲུབ་ཚུལ་ལ་དཔྱད་པ་ཅུང་ཟད་བཏང་ཡོད།...

ཉེ་རབས་ཀྱི་མཁས་དབང་དགེ་ཆོས་མཆོག་གིས་ཨམ་སྐད་དུ་དགྲའི་ཀློག་ལ་རྒྱའམ་དགྱ་བཞིན་འདོན་པ་རྒྱུ་མཚན་དུ་མཛད་ནས་བོད་སྐད་དུ་རྒྱ་དང་དགྲ་དོན་གཅིག་པར་གསུངས་པ་ནས་བཟུང་།རྗེས་བྱུང་བོད་ཀྱི་གཞོན་ནུ་མི་ཉུང་བ་ཞིག་གིས་བཞེད་ཚུལ་དེའི་རྗེས་སུ་འབྲངས་པ་མ་ཟད།མིག་སྔར་རྒྱ་དང་རྒྱ་ནག་ཅེས་པའི་མིང་དེ་དག་བོད་རྩོམ་གང་རུང་དུ་བྱུང་ཚེ།རྒྱ་བོད་མི་རིགས་དབར་འགལ་བ་བཟོ་བྱེད་ཀྱི་མིང་བརྡ་ཆེས་མི་རིགས་པ་ཞིག་ཏུ་འདོད་བཞིན་ཡོད།རྩོམ་ཡིག་འདིར་སྣང་ཚུལ་དེ་རིགས་ལ་གཞིགས་ཏེ།བོད་སྐད་དུ་ཤར་ཕྱོགས་མི་རིགས་ཀྱི་མིང་དུ་རྒྱ་ཟེར་བ་ནི་རྒྱའི་རབས་ལ་སྔ་བ་ཞ་རྒྱལ་རབས་ཀྱི་སྒྲ་ལས་བྱུང་ཞིང་།རྒྱ་ཞེས་པའི་ཡི་གེ་འགོད་ཚུལ་དེ་ནི་ལེགས་སྦྱར་གྱི་རྒྱལ་པོའི་སྐད་དོད་ར་ཛནྲ་ཞེས་པ་བོད་ཀྱི་སྐད་དུ་ཟུར་ཆག་པའི་ར་ཙ་དང་ར་གྱ།ར་ཇ་སོགས་འབྲི་ཚུལ་དུ་མ་བྱུང་བའི་ཁྲོད་ཀྱི་ར་ལྡན་གྱ་ལ་རྒྱ་ཞེས་པའི་འབྲི་སྲོལ་ཡིན་པ་དང་།དོན་གྱི་ངོས་ནས་ཆེ་བ་དང་ཆེན་པོར་འཇུག་ཚུལ་གྱི་སྐོར་གླེང་བརྗོད་བྱས་ཡོད།...

བོད་ཡིག་དཔེ་རྙིང་གི་པར་སྐྲུན་བྱ་བ་ནི་ལས་དོན་རླབས་ཆེ་ལ་གཟི་བརྗིད་དང་ལྡན་པ་ཞིག་ཡིན་པ་མ་ཟད།ལས་རྒྱུན་རིང་ཞིང་དཀའ་ཁག་ཅན་ཞིག་ཀྱང་ཡིན།བོད་ལ་ལྟོས་བཅས་ཀྱིས་འདིའི་ཕྱོགས་ཀྱི་ཆེད་ལས་མི་སྣ་ཉུང་བས་སྤྱི་ཚོགས་ལས་རིགས་སོ་སོའི་ནང་དུ་བོད་ཀྱི་དཔེ་རྙིང་ལ་ལྷག་བསམ་དཀར་ཞིང་འཇོན་ནུས་ལྡན་པའི་མི་རྣམས་ཀྱིས་འདིར་དོ་སྣང་དང་རྒྱབ་སྐྱོར་གནང་རྒྱུ་དང་།ལྷག་པར་ཏུ་དཔེ་རྙིང་པར་སྐྲུན་གྱི་ལས་དོན་ལེགས་པོ་བསྒྲུབས་ན་བོད་ཀྱི་རིག་གནས་སློབ་གསོ་དང་སྤྱི་ཚོགས་འཕེལ་རྒྱས།བོད་ཀྱི་སྐད་དང་ཡི་གེ་དར་འཕེལ་བཅས་ལ་ཕན་པ་རྒྱ་ཆེན་པོ་ཡོད་པས་བོད་ཀྱི་དཔེ་རྙིང་ལས་དོན་ལ་དགའ་ཞེན་ཆེ་བའི་མི་རྣམས་ཀྱིས་རྡོག་རྩ་ཆིག་སྒྲིལ་སྒོས་མུ་མཐུད་ནས་བྱ་བ་འདི་མི་ཉམས་གོང་འཕེལ་ཡོང་བར་ནུས་ཤུགས་གང་ལྕོགས་འདོན་དགོས་ཞེས་རེ་སྐུལ་དང་བཅས་གུས་པས་ཕུལ་བའོ།།...

བཅོས་བསྒྱུར་སྒོ་འབྱེད་བྱས་ཚུན་དུ་རང་རྒྱལ་གྱི་གསར་འགྱུར་བརྒྱུད་སྒྲོག་གི་ལག་རྩལ་དང་ཐབས་ལམ་སྣ་མང་ཅན་དུ་གྱུར་པ་དང་།གསར་འགྱུར་ལས་དོན་ལ་ཡང་ཐོད་བརྒལ་རང་བཞིན་གྱི་འབྲས་བུ་སྨིན་ཏེ།ཅུང་ཟད་གུ་ཡངས་པའི་རྣམ་པར་འཕེལ་ནས་དམངས་ཀྱི་འཚོ་བའི་ཁྲོད་གོ་གནས་གལ་ཆེན་ཟིན་མོད།གསར་འགྱུར་བརྒྱུད་སྒྲོག་གི་གོ་རིམ་ཁྲོད།མི་སྒེར་གྱི་གསང་བའི་ཁེ་དབང་ལ་གནོད་པ་ཐེབས་པའི་གནས་ཚུལ་བྱུང་དང་འབྱུང་བཞིན་ཡོད་པས།གནད་དོན་འདིར་སྤྱི་གཞུང་གཉིས་ནས་དོ་སྣང་བྱ་རྒྱུ་ནི་ཁ་ཚ་དགོས་གཏུགས་སུ་གྱུར་ཡོད།...

སློབ་གླུ་ནི་སློབ་གྲྭ་ཞིག་གི་བསམ་པའི་དཔལ་ཡོན་མངོན་བྱེད་ཀྱི་རྟགས་མཚན་གལ་ཆེན་ཞིག་ཡིན།སློབ་གླུའི་ཁྲོད་དུ་སློབ་གྲྭ་གང་དེའི་སློབ་སྒྲུབ་ཀྱི་འདུན་མ་དང་སློབ་སྒྲུབ་ཀྱི་ཁྱད་ཆོས།སྲོལ་བཟང་རྒྱུན་འཛིན་སོགས་འདུ་བ་ཡིན་ལ།སློབ་གསོའི་མཁའ་དབུགས་མངོན་པར་མཚོན་ཏེ་སློབ་གྲྭའི་འཕེལ་རྒྱས་ཀྱི་ཁ་ཕྱོགས་སྟོན་པའི་བསམ་བློའི་བསྒྲགས་གཏམ་རིགས་ཤིག་ཀྱང་ཡིན།དུས་དང་རྣམ་པ་ཀུན་ཏུ་སློབ་མའི་ལུས་སེམས་བདེ་ཐང་དང་སློབ་གྲྭའི་སློབ་གསོའི་སྙིང་པོ།སློབ་རའི་རིག་གནས་འཛུགས་སྐྲུན་གྱི་ཐད་ལ་ནུས་པ་བླ་ལྷག་འདོན་བཞིན་ཡོད།དེ་བས་དུས་རབས་གསར་པའི་སློབ་གྲྭའི་མཛེས་རྟོག་སློབ་གསོ་ནི་སློབ་གླུ་དང་ཁ་འབྲལ་ཐབས་མེད།...

རྩོམ་ཐུང་འདིའི་ནང་མཁས་པའི་ཚུལ་དུ་སྤྱི་ལ་གྲགས་པའི་ལྟ་ཚུལ་ཏེ་ཡི་གེ་བཏགས་པ་བ་དང་ཡི་གེ་དངོས་ཀྱི་ཁྱད་པར་གཙོ་བོར་བཟུང་ནས་བཤད་ཡོད་དེ།ཚོགས་གསུམ་དུ་ཕྱེ་བའི་ཡི་གེའི་ཚོགས་དང་སྒྲ་མཚོན་གྱི་ཡི་གེའི་གཟུགས་དེ་གཉིས་བོད་སྐད་བརྡ་སྤྲོད་གཞུང་དུ་དབྱེ་བ་གསལ་པོར་འབྱེད་དགོས་ལ།སྒོས་སུ་ཆེས་དམའ་ས་ནས་བོད་སྐད་ཡིག་ལ་ཐོས་བསམ་བྱེད་མཁན་རྣམས་ལ་ཡི་གེ་ཞེས་པའི་ཐ་སྙད་ལ་ངོས་བཟུང་བ་ནོར་བ་དང་།ཡི་གེའི་ལྷན་ཅིག་བྱེད་རྐྱེན་གྱི་རྒྱུ་ལ་གོ་བ་གཏིང་ཟབ་ཞིག་ལོན་མི་བཏུབ་པ།དེ་བཞིན་དབྱངས་གསལ་གྱི་ཁྱད་པར་དང་ངོ་བོ་ལ་གོ་ལྡོག་ཡོང་རྐྱེན།ཕྲན་ནས་རང་ནུས་གང་ལྕོགས་ཀྱིས་སྔར་གྱི་མཁས་པའི་བཞེད་དགོངས་གསལ་བར་བཀྲོལ་བ་ཙམ་ཡིན་ནོ།།...

ང་ཚོ་ཤེས་ཡོན་པའི་སྡེ་ལ་ཞིབ་འཇུག་བྱེད་པའི་རིག་པའམ་ལག་ཆ་ཡོད་པས་ཡིན་མོད།འོན་ཀྱང་བོད་སྐད་མ་གཏོགས་བོད་ཡིག་ཀ་ངོ་ཙམ་མི་ཆོད་པའི་བོད་པ་ཚོས་མི་རབས་ནས་མི་རབས་བར་སྙན་ནས་སྙན་བརྒྱུད་ཀྱི་ཚུལ་དུ་འཆད་པའི་སྐད་ཆའི་སྒྲ་གདངས་འགྱུར་ལུགས་དེ།བོད་རང་གི་བརྡ་སྤྲོད་རིག་པའི་འགྲོས་དང་མཐུན་ཞིང་ཞིབ་འཇུག་བྱས་ན་དེ་ལྟར་དུ་དཔྱད་འབྲས་འཇོག་རྒྱུའང་རྙེད་པའི་གནས་ཏག་ཏག་ཡིན་པ་དེ་ནི།ད་གཟོད་ཡ་མཚན་ནང་གི་ཡ་མཚན་སྐྱེ་དགོས་ས་ཞིག་རེད་བསམ་པ་བྱུང་།...

སྲིད་པའི་བོན་རྣམས་ཀྱིས་འཇིག་རྟེན་ཐམས་ཅད་སྒོ་ང་ལས་གྲོལ་བའི་ལུགས་དང་།བར་དུ་རྒྱ་གར་ནང་བའི་མངོན་པ་འོག་མ་དང་གདགས་པའི་མདོ་སོགས་སུ་བྱུང་བའི་འཇིག་རྟེན་ཆགས་རབས།ཕྱི་ནང་ཐུན་མོང་གི་རྒྱུད་དུས་འཁོར་ལུགས་སུ་བྱུང་བའི་འཇིག་རྟེན་ཆགས་རབས་དང་།དེའི་གཟའ་སྐར་རྒྱུ་སྟངས་སོགས་ནི་གནའ་བོའི་ཤེས་རིག་གི་བྱུང་བ་དང་འགྱུར་བ་མཚོན་པའི་སྒྲུབ་བྱེད་ཁུངས་མ་ཡིན་ལ།འདིར་དམངས་ཁྲོད་ཀྱི་སྐར་མའི་བརྟག་ཐབས་བཀོད་པ་སྟེ།སྲོད་ལ་སྐར་མདའ་ཙམ་ནི་བཀྲ་ཤིས་ལ།།ནམ་ཕྱེད་ཙམ་གྱི་སྐར་མདའ་ཅི་ཙམ་ན།།སྐར་མདའ་ཕན་ཚུན་ཚུར་འཁྲུག་མང་བྱེད་ན།།ཡུལ་ཕྱོགས་དེ་ནི་ཐན་པ་ཆེ་བའི་ངོ་།།སྐར་མ་མང་ཞིང་དལ་ན་མཆོག་ཏུ་བཟང་།།སྐར་མདའ་སྒྲ་དང་བཅས་ཏེ་ཚུར་ལྷུང་ན།།ཆུ་སྐམ་རྩི་ཤིང་འཆག་པའི་ཐན་ཆེའམ།།སོགས་དང་འབྲེལ་བའི་སྐར་མའི་གཏམ་རྒྱུད།ངོས་འཛིན།གདགས་མིང་སོགས་ཡུལ་སྲོལ་ནས་བྱུང་བ་གང་ཡོད་བསྡུ་རུབ་གནང་ནུས་ན།བོད་ཀྱི་རིག་གཞུང་དང་ལོ་རྒྱུས་ཀྱི་ངོ་བོ་གསལ་བོ་ཡོང་བར་ཕན་ཐོགས་ཅི་བས་ཆེ་སྙམ།...