མཚོ་སྔོན་པོ་དྲ་བས་མེ་ཕོ་རྟ་ལོའི་ལོ་གསར་ལ་ཕུལ་བའི་ཞུ་ཚིག

       བོད་རབ་རྒྱན་མེ་ཕོ་རྟ་ལོའི་བཀྲ་ཤིས་གནམ་ལོ་གསར་བ་ཚེས་ལ་ཉེ་བའི་སྐབས་འདིར། མཚོ་སྔོན་པོ་དྲ་བའི་བྱ་གཞག་ལ་ཐུགས་ཁུར་དང་རྒྱབ་སྐྱོར་གནང་བའི་སྤྱི་ཚོགས་ལས་རིགས་ཁག་གི་སྤུན་ཟླ་རྣམས་ལ་ལོ་སར་གྱི་འཚམས་འདྲི་ཞུ་བ་དང་ཆབས་ཅིག ལོ་གསར་བའི་ནང་ལེགས་ཚོགས་ཇི་སྙེད་འཛོམས་པའི་བཀྲ་ཤིས་རྟེན་འབྲེལ་གྱི་ཁ་གཡང་འབོད།

       འདས་ཟིན་པའི་ལོ་གཅིག་རིང་། མཚོ་སྔོན་པོ་དྲ་བས་དྲ་རྒྱའི་བདེ་འཇགས་སྐོར་གྱི་དགོངས་པ་གལ་ཆེན་ལ་སློབ་སྦྱོང་དང་ལག་བསྟར་གཏིང་ཟབ་བྱས་ཏེ། རང་ཁུལ་གཙོ་བྱས་ཏེ་རྒྱལ་ཕྱི་ནང་གི་གསར་འགྱུར་གཙོ་གྲས་ཁག་དང་། བོད་འབྲེལ་ས་ཁུལ་གྱི་སྲིད་འབྱོར་རིག་གསུམ་གཙོ་བྱས་པའི་གསར་འགྱུར་སྣ་ཚོགས། གནའ་དེང་གི་མཁས་པ་མང་པོའི་གསུང་རྩོམ། དྲ་ལམ་ན་རྒྱུག་ཆེ་ཞིང་ཀློག་མཁན་མང་པོས་དགའ་བསུ་ཆེས་ཆེར་གནང་བའི་རྩོམ་ཡིག་སྣ་ཚོགས། དེ་མིན་གཞུང་ཕྱོགས་ཀྱིས་བཀས་བཅད་བྱས་པའི་གསར་བྱུང་བརྡ་ཆད། གསར་པར་དཔེ་དེབ་སྣ་ཚོགས། རིག་གནས་སློབ་གསོའི་སྐོར་གྱི་ཤེས་བྱ། གཞན་ཡང“ཉིན་རེའི་སློབ་སྦྱོང”དང“གསུང་ཚིག” “གཏམ་དཔེ།” “ལེགས་བཤད།” “མཚོ་ལྷོའི་སྲིད་དོན”ཞེས་པ་སོགས་སུ་སྔར་མུས་བཞིན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་སྣ་ཚོགས་དང་རྒྱའི་གསུང་ཚིག་བོད་འགྱུར་མ། རྒྱལ་པོ་ལུགས་ཀྱི་བསྟན་བཅོས་སོགས་རྒྱ་བོད་ཤན་སྦྱར་གྱི་ལམ་ནས་བཀོད་པ་བཅས་ཁྱོན་བསྡོམས་གསར་འགྱུར་ཆིག་སྟོང་ལྔ་བརྒྱ་ལས་བརྒལ་བ་དུས་ཐོག་ཏུ་དྲ་བར་བཀོད་དེ་རྒྱ་ཆེའི་ཀློག་མཁན་ཀུན་གྱི་སྤྱན་ལམ་དུ་བསྟར་གང་ཐུབ་བྱས།

       དེ་བཞིན་དུ་ད་ལོ་ཡང“མཚོ་སྔོན་པོ་དྲ་བ”རྟགས་མའི་དྲ་ལམ་སྒྱུར་རྩོམ་འགྲན་བསྡུར་སྐབས་གཉིས་པ་བདེ་ལེགས་ངང་བསྡུས་ཤིང་། རྒྱ་ཆེའི་ཀློག་མཁན་མང་པོས་དགའ་བསུ་ཚད་མེད་ཐོབ་པར་མ་ཟད། ལོ་ཙཱའི་འབྲེལ་ཟམ་འདི་བརྒྱུད་ནས་ལོ་རྒྱུས་དང་དེང་རབས་ཟུང་འབྲེལ་བྱས་ཏེ། རིག་གནས་རྒྱུན་འཛིན་དང་གསར་གཏོད་ལ་སྐུལ་འདེད་གཏོང་བར་འབད་འབུངས་གང་ཐུབ་བྱས་ཡོད།