སྤྲུལ་སྐུ།

བཞི།

     ཞོགས་པའི་ཉི་མ་རྒྱུན་གཏན་ལྟར་དབང་ཕྱོགས་རི་རྩེ་ནས་དལ་གྱིས་མཁའ་ལ་འཕགས་བྱུང་། ཉི་འོད་ ངར་མོ་དེ་ཁོ་རང་འཚོ་གནས་བྱ་ཡུལ་གྱི་རྩྭ་ཐང་དེའི་ཐོག་འཕྲོས་དུས། ཁོས་ད་གཟོད་རྩྭ་ཐང་གི་ཞོགས་པའི་རྣམ་པ་ནི་ཅི་འདྲའི་མཛེས་ཤིང་སྡུག་པ་ཞིག་ཡིན་པ་གཞི་ནས་རྟོགས་བྱུང་། གྲྭ་རྒན་ཞིག་གིས་ཁོ་རང་གི་སྐྲ་ལོ་རིང་བོ་དེ་ཕང་སེམས་ཅི་ཡང་མེད་པར་དུམ་བུ་དུམ་བུར་བྱས་ནས་བྲེག་བྱུང་བས། ཁོའི་སེམས་ལ་ཧ་ཅང་བཟོད་མི་ཐུབ་པའི་སྐྱོ་སྣང་ཞིག་ངམ་ཤུགས་ངང་སྐྱེས་ནས། ཁོས་དེ་འཕྲལ་ཨུ་ཚུགས་ཀྱིས་ཨམ་གཙིགས་ཤིག་བསྡམས་ཞོར་མིག་ཟུང་དལ་གྱིས་བཙུམས་བྱུང་། སྐྲ་ལོ་བཞར་ཟིན་རྗེས། ཁོས་རང་ཉིད་ཀྱི་མགོ་བོ་ཧ་ཅང་ཡང་མོ་ཞིག་ཏུ་གྱུར་ཡོད་པའི་ཚོར་སྣང་སྐྱེས་བྱུང་ལ། རླུང་བུ་སིལ་སིལ་དུ་ལྡང་ཐེངས་རེར་ཁོའི་མགོ་བོའི་ཁྱོན་ལ་གྲང་ཅང་ཅང་གི་ཚོར་བ་སྐྱུར་མོ་ཞིག་སྦྱིན་འོང་། གྲྭ་རྒན་གཞན་ཞིག་གིས་ཐལ་རྡུལ་གྱིས་འཚོས་པའི་ཁོ་རང་གི་སློག་པ་དེ་མར་ཕུད་དེ་སྔ་མོ་ནས་སྟ་གོན་བྱས་པའི་ངུར་སྨྲིག་གི་ན་བཟའ་སོ་མ་ཞིག་ལུས་ལ་བསྐོན་བྱུང་། ལྭ་བ་དེ་འདྲ་ཁོས་ལུས་ལ་གྱོན་པ་ཐེངས་དང་པོ་ཡིན་པས། ཁོའི་ལུས་པོའི་ཁྱོན་ལ་བདེ་པོ་ཞིག་གཏན་ནས་མ་བྱུང་། ཁོ་རང་གི་ཕ་མ་ནས་གཙོས་པའི་དད་ལྡན་པ་མང་དག་ཅིག་གིས་ལག་ཏུ་བཀྲ་ཤིས་པའི་དཀར་གཙང་གི་མཇལ་དར་རེ་འཁྱེར་ནས་ཁོ་རང་གི་ཁྲིས་སུ་གུས་ཕྱག་ཡང་ཡང་ཕུལ་བཞིན་འདུག ཁོ་ལ་མཚོན་ན་དེ་ནི་རྨི་ལམ་ཞིག་དང་ཅི་འདྲའི་འདྲ། དད་ལྡན་པ་མང་པོས་ཁོ་རང་ལ་གུས་ཕྱག་འཚལ་དགོས་དོན་ཅི་ཞིག་ཡིན་མིན་ཁོས་ཤེས་ཀྱིན་མིན་འདུག
     ཁོས་དད་ལྡན་པ་དེ་དག་གི་ཀློང་དུ་མིག་ཟུང་ཡང་ཡང་ལྟ་བཞིན་ཅི་ཞིག་འཚོལ་བཞིན་ཡོད་པ་ལྟར་སྣང་། འོན་ཀྱང་ཁོས་འཚོལ་གྱིན་པ་དེ་ནི་ཕན་ཐོགས་ཡིན་པ་སྨྲ་མི་དགོས། དྲང་མོ་བཤད་ན། ད་ཆ་ཁོས་ཕན་ཐོགས་མཐོང་འདོད་ཧ་ཅང་ཆེ། འོན་ཀྱང་། ད་ཆ་ཁོས་རང་ཉིད་མི་བུ་སྤྱིར་བཏང་བ་ཞིག་མིན་པ་ཤེས་ཀྱི་ཡོད་པ་འདྲ། ཁོ་རང་གི་ཁྲིས་སུ་ལངས་ནས་ཡོད་པའི་གྲྭ་རྒན་དེ་དག་དང་དད་ལྡན་མང་ཚོགས་ཚོས་ཁོ་རང་གི་མིང་ནས་མ་འབོད་པར“བསམ་ལྡིང་རིན་པོ་ཆེ། བསམ་ལྡིང་སྤྲུལ་སྐུ”ཞེས་འབོད་ཀྱིན་འདུག ཐ་ན་ཁོ་རང་གི་ཕ་མ་གཉིས་ཀྱིས་ཀྱང་སྔོན་ཆད་ལྟར་“ངའི་བུ། ངའི་གཅེས་ཕྲུག”ཅེས་མི་འབོད་པར།“རིན་པོ་ཆེ། རིན་པོ་ཆེ”ཞེས་འབོད་ཀྱིན་འདུག་པས། ཁོ་ལ་གློ་བུར་དུ་ཕ་མ་གཉིས་ཀྱིས་རང་དང་བར་ཐག་རྒྱང་དུ་བཀྱེད་བཞིན་པའི་ཚོར་སྣང་ཞིག་ངང་གིས་སྐྱེས་བྱུང་། ཉིན་དེ་དག་ཁོ་ལ་མཚོན་ན་གསང་བ་དང་སྒྱུ་འཕྲུལ་གྱིས་ཕྱུག་པའི་ཉི་མ་འགའ་རེད། ཁོ་རང་ནི་ཕ་མ་གཉིས་པོས་རྒྱང་དུ་སྤྱུགས་པའི་དྭ་ཕྲུག་ཞིག་དང་ཁྱད་ཅི། ཁོ་རང་དེ་ལྟར་ངུ་ཤུམ་རྒྱག་ཞོར་མ་འདོད་བཞིན་དུ་རྟ་ལ་བཞོན་ནས་བསམ་ལྡིང་དགོན་པའི་ཕྱོགས་སུ་ལམ་ལ་ཞུགས་སོང་།
     ཁོའི་མིག་ཀོང་ལ་འཁྱིལ་འདུག་པའི་མཆི་མ་ནི་རྡོག་པོ་རེ་རེ་བྱས་ཏེ་མཁུར་ངོས་སུ་འགྲིལ་འོང་།

ལྔ།

     ཁོ་དང་གྲྭ་རྒན་རྣམས་རྟ་ལ་ཞོན་ནས་ཆུ་ཚོད་གསུམ་ཙམ་འདས་རྗེས་གཞི་ནས་བསམ་ལྡིང་དགོན་དུ་སླེབས་བྱུང་། བསམ་ལྡིང་དགོན་པ་ནི་ནགས་ཚལ་གྱིས་བཀླུབས་པའི་རི་འདབས་ཤིག་ན་ཆགས་འདུག་ཅིང་། དགོན་སྡེའི་མཐའ་འཁོར་དུ་ཤོལ་བོ་དང་སྦྱར་བ། རྒྱ་ལྕང་སོགས་མང་དག་ཅིག་འདུག རྒྱང་རིང་ཞིག་ནས་གསེར་འོད་ཆེམ་ཆེམ་དུ་འཕྲོ་བའི་དགོན་སྡེ་དེའི་རྒྱ་ཕིབས་དག་མཐོང་ཐུབ། དེ་ནི་ངོ་མ་མིག་ངོར་མཛེས་པ་ཞིག་རེད། ཁོ་རང་ད་རེག་བར་དུ་དགོན་སྡེ་གང་དུའང་ཆོས་མཇལ་ལ་འགྲོ་མ་མྱོང་། སྔོན་ཆད་ཁོ་རང་གི་ཁྱིམ་གྱི་གྱང་ངོས་སུ་སེ་འབྲས་དགེ་གསུམ་དང་བཀྲ་ཤིས་ལྷུན་པོ་ལ་སོགས་པའི་དགོན་སྡེའི་སྐུ་པར་འགའ་རེ་སྦྱར་ཡོད་པས། སྐུ་པར་ངོས་ཀྱི་དགོན་སྡེ་དེ་དག་དང་བསྡུར་ན་ཁོ་རང་འགྲོ་སའི་བསམ་ལྡིང་དགོན་པ་ནི་དེ་འདྲའི་གཞི་རྒྱ་ཆེ་བ་ཞིག་མ་ཡིན། ཁོ་ཚོ་དགོན་སྡེའི་སྒོ་འགྲམ་དུ་སླེབས་དུས་གང་ནས་འོང་མིན་ཆ་མི་འཚལ་བའི་དད་ལྡན་འཇལ་པ་མང་དག་ཅིག་གནས་དེར་འདུས་ནས་ཁོ་རང་གི་ཕྱོགས་སུ་ཁ་བཏགས་འཕངས་བཞིན་གུས་ཕྱག་ཡང་ནས་ཡང་དུ་འཚལ་བཞིན་འདུག
     རླུང་བུ་སིལ་སིལ་རེ་ལྡང་འོང་དུས་དགོན་དེའི་ཕྱོགས་བཞི་ཀུན་ནས་“ཐིང ཐིང”ཞེས་དྲིལ་བུའི་སྒྲ་སྙན་མོ་རེ་རྣ་བར་ཐོས་འོང་།
     གྲྭ་རྒན་གཉིས་ཀྱིས་ཁོ་རང་གི་ལག་ནས་བཟུང་སྟེ་ཁོ་རང་བཞུགས་ཁྲིའི་ཐོག་བསྐྱལ་བྱུང་། དད་ལྡན་པ་མང་དག་ཅིག་གིས་ཞྭ་མོ་མར་ལ་ཕུད་ནས་ལག་ཟུང་ཐལ་མོ་སྦྱར་ཏེ་ཁོ་རང་གི་ཁྲིས་སུ་བཅར་ནས་མགོ་བོ་དུད་དེ་གུས་ཕྱག་ཡང་ཡང་འཚལ་བཞིན་འདུག“མི་རྒན་མང་པོ་དེ་འདྲས་ཁོ་རང་བླ་ནས་བླ་རུ་བཀུར་དགོས་དོན་ཅི་ཡིན”ཁོས་དེ་ལྟར་བསམས། དད་ལྡན་པ་ཚོར་འཇལ་ཁ་གནང་གྲུབ་རྗེས། གྲྭ་རྒན་དེས་ཁོ་རང་གློག་འོད་མེད་པར་མར་མེས་བཀང་བའི་གྲྭ་ཤག་ཅིག་ཏུ་ཁྲིད་དེ“དེ་རིང་ནས་བཟུང་སྐུ་ཉིད་འདི་གར་གནས་བཅའ་དགོས”ཞེས་བཤད། ནམ་རྒྱུན་ཡིན་ན་ཁོ་རང་ཨ་ཕ་དང་ཨ་མའི་ཁྲིས་སུ་ཉལ་གྱིན་ཡོད་པས། དོ་ནུབ་ཁོ་རང་གཅིག་པུ་མར་མེའི་འོད་མདངས་ཀྱིས་བཀང་བའི་གྲྭ་ཤག་དེའི་ནང་ཉལ་དགོས་པ་ཡིད་ལ་དྲན་ན་ཁོའི་སེམས་ལ་གློ་བུར་དུ་ཞེད་སྣང་ཅིག་དང་ཁེར་རྐྱང་གི་བསམ་པ་དྲག་པོ་ཞིག་ངང་གིས་སྐྱེས་བྱུང་། ལྷག་པར་དུ་གྲྭ་ཤག་དེའི་ནང་ཚོན་མདོག་མི་གཅིག་པའི་ལྷ་སྐུ་མང་པོ་ཞིག་འདུག་ཅིང་། ལྷ་སྐུ་དེ་དག་གི་ཞལ་རས་འགའ་རེ་དམར་བོ་མེ་ལ་འགྲན་ཅིང་། འགའ་རེ་གཡུ་ལྟར་སྔོ་བ། འགའ་རེ་ནི་དཀར་བོ་དཀར་རྐྱང་དང་། འགའ་རེ་ནི་ནག་པོ་ནག་རྐྱང་ཡིན་པ། ལྷ་སྐུ་འགའ་རེས་ཁྲོ་ཉམས་ཤིག་བསྟན་ཞོར་ཕྱག་ཏུ་བསྣམས་པའི་རལ་གྲི་མཁའ་ལ་འཕྱར་འདུག་པ་དང་། ལྷ་སྐུ་འགའ་རེས་ཞལ་ནང་གི་ལྗགས་དམར་ཕྱི་རུ་ བཏོན་ནས་ཁོ་ལ་རྫིག་རྫིག་བྱེད་པ། ལྷ་སྐུ་འགའ་རེར་དབུ་ལྔ་དྲུག་ཙམ་ཞིག་འཁྲུངས་པ་དང་། འགའ་རེར་ཕྱག་ལྔ་དྲུག་ཙམ་ཞིག་འཁྲུངས་ཡོད་པ་། འགའ་རེའི་སྐུ་ཚད་ཧ་ཅང་མཐོ་བ་དང་། འགའ་རེའི་སྨིན་མ་དཀྱུས་རིང་ལ་མཁའ་ལ་གཟེངས་འདུག་པས། ཁོས་ལྷ་སྐུ་དེ་དག་རིག་ཐེངས་རེར་སེམས་ལ་བྲེད་ཤ་ཞིག་ངང་གིས་ལངས་བྱུང་བས། སྙིང་ལ་སྤུ་གྲི་ཟུག་པ་ཇི་བཞིན་ལུས་ཡོངས་རྫོགས་འདར་སིག་སིག་བྱས་བྱུང་།
     སྐྱི་གཡའ་བའི་མཚན་མོ་དེར་ཁོའི་མིག་མདུན་དུ་བྱམས་བརྩེ་ལྡན་པའི་ཕ་མའི་ཞལ་རས་དང་། ཁོ་རང་གི་སྙིང་ནས་དགའ་བའི་བུ་མོ་ཕན་ཐོགས་ཀྱི་འཛུམ་མདངས་རེ་རེ་ཡང་ནས་ཡང་དུ་དྲན་ནས་རང་དབང་མེད་པར་ངུ་ཤུམ་དབང་མེད་དུ་ཤོར་བྱུང་། ཁོ་རང་གི་ངུ་སྒྲ་དེ་གྲྭ་རྒན་དེས་ཐོས་བྱུང་བས། ཁོས་གོམ་པ་རྟབ་རྟབ་པོར་སྤོས་ཏེ་ཁོ་རང་གི་ཁྲིས་སུ་ཡོང་ནས“ཅི་རེད། ཁྱེད་ཀྱི་སྐུ་ལུས་མི་བདེའམ”ཞེས་དྲིས་བྱུང་བས། བསམ་ལྡིང་སྤྲུལ་སྐུས་གདོང་ནས་སྐྱོ་བའི་མིག་ཆུ་བཞུར་གྱིན“སྐུ་མཁྱེན། ང་ཕ་ཡུལ་དུ་ཕྱིར་ལོག་ཁྱོལ་དང”ཞེས་གསུངས། གྲྭ་རྒན་དེས་ཁོ་རང་གི་དབུ་ལ་བྱིལ་བྱིལ་ལན་འགའ་བྱེད་བཞིན“ད་ནས་བཟུང་། དགོན་པ་དེ་ནི་ཉིད་ཀྱི་ཕ་ཡུལ་ཡིན”ཅེས་སྨྲ་བ་འཇམ་པོས་བསམ་ལྡིང་སྤྲུལ་སྐུ་ལ་ཞུས་པས།“དེ་ངའི་ཡུལ་མ་རེད། ངའི་ཕ་ཡུལ་ཡངས་པའི་རྩྭ་ཐང་ཐོག་ཡོད། ད་ལྟ་ང་ཕ་མ་ཧ་ཅང་དྲན། ངས་སྤྲུལ་སྐུ་བྱ་མ་འདོད”ཅེས་གསུང་སྟེ་ཤུམ་འགོ་ཚུགས་སོང་།“ཁྱེད་ལ་ཆ་མཚོན་ན་འགྲོ་བ་རིགས་དྲུག་ཚང་མ་རང་གི་ཕ་མ་མ་ཡིན་ནམ། ད་མ་ཤུམས་ཤིག”གྲྭ་རྒན་དེས་ཁོའི་ཕྲག་པར་ལག་པས་རྡེབ་རྡེབ་བྱེད་ཀྱིན་ཧ་ཅང་གཅེས་པའི་ཉམས་ཀྱིས་ཁོང་ལ་དེ་ལྟར་སེམས་གསོ་བྱས།
     ཞོགས་པའི་ཉི་འོད་ཐོག་མ་བསམ་ལྡིང་དགོན་པའི་རྒྱ་ཕིབས་ཀྱི་ངོས་སུ་ཆེམ་ཆེམ་དུ་འཕྲོས་བྱུང་། ཉི་འོད་དྲོན་མོ་ཁོའི་ལུས་ཐོག་ལ་འཕྲོས་ཐེངས་རེར། ཁོའི་སེམས་ལ་རང་དབང་མེད་པར་ཕ་ཡུལ་དང་ཕ་ཡུལ་གྱི་ཡངས་ཤིང་རྒྱ་ཆེ་བའི་རྩྭ་ཐང་དྲན་བྱུང་། ནོར་ལུག་གི་རྗེས་སུ་སྙེགས་བཞིན་རྫི་གླུ་ཐན་ཐུན་རེ་ངག་ལ་ལེན་གྱིན་པའི་ཕ་ཡུལ་གྱི་འཚོ་བ་དག་དྲན་བྱུང་། ད་དུང་ཕན་ཐོགས་དང་ལྷན་དུ་ཡངས་པའི་རྩྭ་ཐང་གི་ངོས་སུ་གན་རྐྱལ་དུ་ཉལ་ནས་སྙིང་གཏམ་ལྒིང་ཞོར་མཐོ་ནམ་མཁའི་དབྱིངས་སུ་རང་དགར་རྒྱུ་བའི་སྤྲིན་དཀར་དང་། སྙན་པའི་གྲེ་འགྱུར་སྒྲོག་བཞིན་རང་དབང་ངང་འཕུར་ལྡིང་བྱེད་བཞིན་པའི་བྱ་བྱེའུ་ཡི་ཁྱུ་ཚོགས་ལ་ལྟད་མོར་རོལ་བཞིན་པའི་རྩྭ་ཐང་གི་རང་བྱུང་བབ་ཆགས་ཀྱི་འཚོ་བ་དག་དྲན་བྱུང་། ཁོ་རང་དེ་ལྟ་བུའི་འཚོ་བ་ལ་ཧ་ཅང་དགའ། ཧ་ཅང་དགའ།
     མགོ་ཐོག་ཏུ་རང་དབང་ངང་བཞུད་བཞིན་པའི་འདབ་ཆགས་ཀྱི་ཚོགས་རྣམས་མིག་ཟུང་གིས་རིག་ན། ཁོ་རང་གི་བསམ་པར་རང་ཉིད་ཀྱང་གང་སར་འཕུར་ལྡིང་བྱེད་བཞིན་པའི་བྱེའུ་ཆུང་ཅིག་ཡིན་ན་ཅི་མ་རུང་ཨང་སྙམ། འོན་ཀྱང་། ད་ལྟ་ཁོ་རང་ལ་ཆ་མཚོན་ན་རང་ཉིད་ནི་དགུང་ནམ་མཁའ་སྔོན་མོའི་ཐོག་ཏུ་རང་དབང་ངང་འཕུར་ལྡིང་བྱེད་བཞིན་པའི་བྱེའུ་ཆུང་ཞིག་མ་ཡིན་པར། གཟེབ་ཏུ་ཚུད་པའི་བྱེའུ་ཆུང་ཆུང་ཞིག་དང་ཁྱད་ཅི། ཕ་མ་གཉིས་ཀྱི་འདུག་རོགས་མེད་པར་ཉིན་ལྟར་གཞན་གྱི་བཀའ་བཀོད་འོག་ཤིན་ཏུ་ནས་མི་ གོམས་པའི་ངུར་སྨྲིག་གི་ཆས་གོས་རིང་བོ་ཞིག་ལུས་ལ་གྱོན་ཏེ་གྲང་ཅང་ཅང་གི་གྲྭ་ཤག་དེའི་ནང་མ་འདོད་བཞིན་དུ་གསལ་བྱེད་སུམ་ཅུ་ནས་གཙོས་པའི་རང་རིགས་ཀྱི་སྐད་དང་འབྲེལ་ཡོད་ཀྱི་ཆོས་གཞུང་ལ་འབད་བརྩོན་བྱ་དགོས་པ་མ་ཡིན་ནམ། ད་ལྟ་ཁོ་རང་གི་ལུས་པོ་གྲྭ་ཤག་དེའི་ནང་ཡོད་ཀྱང་སེམས་པ་སྐར་ཆ་ཙམ་ཡང་གནས་དེར་མི་གནས་པར་རྒྱང་རིང་གི་རྩྭ་ཐང་དུ་ཆས་ཟིན། རྩྭ་ཐང་གི་འབྲི་མོ་ཐོད་དཀར་མའི་གདོང་པ་དང་། རང་ཉིད་མཐོང་ན་མགོ་བོ་གཡུག་གཡུག་དང་མཇུག་མ་ཀེར་ཀེར་བྱེད་ཀྱིན་པའི་སྒོ་ཁྱི་ནག་པོ། འབྲི་མོའི་འོ་མ་འཇོ་ཞོར་དང་འོ་ཇ་སྐོལ་ཞོར“ངའི་གཅེས་ཕྲུག”ཟེར་བཞིན་བྱམས་དུང་གི་འོ་ཡང་ཡང་སྦྱོར་བའི་ཨ་མ། རང་ཉིད་ཀྱི་ལག་ཆུང་ནས་བཟུང་སྟེ་ཡངས་པའི་རྩྭ་ཐང་གི་ཐོག་ཏུ་ནོར་ལུག་འཚོ་སྐྱོང་བྱ་རོགས་ཀྱི་ཨ་ཕ་། ཆུང་ཆུང་ལུག་གི་འཚོ་རོགས་དང་ཡང་ཆུང་མེ་ཏོག་འཐུ་རོགས་བྱེད་མྱོང་བའི་ཕན་ཐོགས་སོགས་མདོར་ན་རྩྭ་ཐང་གི་ཡོད་ཚད་དུས་ད་ལྟའང་ཁོའི་སེམས་ན་ཁྲིག་ཁྲིག་ཡིན། རྩྭ་ཐང་དང་ཁ་བྲལ་བའི་ཉིན་དེ་དག་ནི་ཁོ་ལ་མཚོན་ན་འོད་ཟེར་མཐོང་དཀོན་པའི་སྨག་རུམ་མུན་པའི་ཀློང་གི་ཉི་མ་འགའ་ཡིན། ད་ཆ་ཁོས་རང་གི་ཕ་མ་གཉིས་ཧ་ཅང་དྲན། ཁོ་རང་དེ་ལྟར་སློབ་སྦྱོང་གི་ཐོག་ཏུ་སེམས་པ་མ་གནས་པར་དྲན་གསོ་དང་འདང་རྒྱག་གི་ཀློང་དུ་ཚུད་བཞིན་པ་གྲྭ་རྒན་དེས་མཐོང་བྱུང་བས། གྲྭ་རྒན་དེས་དེ་མ་ཐག་ལག་ཏུ་དབྱུག་པ་ཐོགས་ཏེ་ཁོ་རང་གི་མགོ་ཐོག་ཏུ་ལན་གསུམ་འཕངས་བྱུང་བས། ཁོའི་སེམས་པ་དེ་བས་སྐྱོ་གདུང་གི་ཀློང་དུ་ཚུད་ནས་མིག་ཆུ་ཁྲུམ་ཁྲུམ་དུ་བཞུར་བྱུང་།
     མཚན་མོ་དེར། ཁོ་རང་ལ་རྨི་ལམ་དྲོན་མོ་ཞིག་བཏང་བྱུང་། རྨི་ལམ་ནང་ཁོ་རང་གི་ཕ་མ་གཉིས་པོས་མགུལ་ལ་དཀར་གཙང་གི་མཇལ་དར་དང་། ལག་ཏུ་ཆང་ཕོར་བསྣམས་ནས་ཕན་ཐོགས་དང་རང་ཉིད་ཀྱི་གཉེན་སྟོན་ལ་རྟེན་འབྲེལ་ཞུ་བཞིན་འདུག ཕན་ཐོགས་ཀྱིས་ཧ་ཅང་དགའ་བའི་འཛུམ་མདངས་ཤིག་སྟོན་ཞོར་ཁོ་རང་གི་མགྲིན་པར་དམ་དུ་འཁྱུད་བྱུང་བ་དང་། མོའི་པད་མའི་ལོ་མ་ལས་སྲབ་པའི་མཆུ་འདབ་ཁོ་རང་གི་ཐོས་འཛིན་རྣ་བའི་ངོས་སུ་སྦྱར་ནས“དེ་རིང་ནས་བཟུང་། ངས་ཁྱོད་དང་ཁ་མི་བྲལ། ནམ་ཡང་ཁ་མི་བྲལ་ཁོ་ཐག་ཡིན”ཅེས་ལབ་བྱུང་། གློ་བུར་དུ་མི་ཞིག་གིས་ཁོ་རང་གི་གྲྭ་ཤག་དེའི་སྒོ་མོ་ཤེད་ཀྱིས་རྡུང་གིན་འདུག ཁོ་རང་གཉིད་ལས་སད་དུས་ཁོས་ད་གཟོད་དེ་དག་ཡོད་དོ་ཅོག་རྨི་ལམ་འབའ་ཞིག་ཡིན་པ་རྟོགས་བྱུང་བས། སེམས་ལ་ཕངས་སེམས་དྲག་པོ་སྐྱེས་ནས་གྲྭ་རྒན་དེ་ལ་ཁ་ཡའང་བྱ་འདོད་མེད་པར་གྱུར།
     གྲྭ་རྒན་དེས་སྔར་རྒྱུན་བཞིན་བསམ་ལྡིང་སྤྲུལ་སྐུའི་ཁྲིས་སུ་ཙོག་ཅིང་། ལག་ཏུ་ཆོས་དཔེ་སྣ་རིང་མ་ཞིག་བཟུང་སྟེ། ཁ་ནས། “འདུས་བྱས་ཐམས་ཅད་མི་རྟག་པ། ཟག་བཅས་ཐམས་ཅད་སྡུག་བསྔལ་བ། ཆོས་ཐམས་ཅད་སྟོང་ཞིང་བདག་མེད་པ། མྱ་ངན་ལས་འདས་པ་ཞི་བ”ཞེས་རེ་རེ་བཞིན་ངག་ནས་བཏོན་ཏེ་ཁོ་ལ་ལྷན་དུ་འདོན་དུ་བཅུག་མོད། བསམ་ལྡིང་སྤྲུལ་སྐུ་ནི་སྤྱན་ཟུང་གནས་ངེས་མེད་ཅིག་ཏུ་ཅེ་རེར་གཟིགས་ནས་ཧད་འདུག་པ་ལས། གྲྭ་རྒན་གྱིས་གསུངས་པའི་ཆོས་ཀྱི་ནང་དོན་ལ་ཁ་ཡ་གཏན་ནས་བྱེད་ཀྱིན་མིན་འདུག ཁོའི་མིག་མདུན་དུ་ནམ་ཡང་ཡལ་རྒྱུ་མེད་པ་ནི་ཕན་ཐོགས་ཀྱི་ཡིད་འོང་བཞིན་རས་དང་མིག་གི་ཟུར་མདའ་དེ་ཡིན་ལ། ཡིད་ཀྱི་ཡོལ་རས་ངོས་སུ་གློག་བརྙན་ཇི་བཞིན་གསལ་ལེར་ཤར་བ་ནི་རྩྭ་ཐང་དང་རྩྭ་ཐང་གི་བདེ་སྐྱིད་ཀྱི་འཚོ་བ་དག་ཡིན། གྲྭ་རྒན་གྱིས་བསམ་ལྡིང་སྤྲུལ་སྐུ་བླ་བོར་བ་ལྟར་ཀྲོང་ངེར་ཧད་འདུག་པ་མཐོང་འཕྲལ། སྒྲོག་རྩེའི་ངོས་སུ་བཞག་པའི་དབྱུག་པ་ཆུང་ཆུང་དེ་ལག་ཏུ་ཐོགས་ཏེ་ཁོང་གི་དབུ་ལ་ལན་གསུམ་བརྒྱབ་པས། ཁོ་རང་ད་གཟོད་མཛེས་སྡུག་ལྡན་པའི་ཕྱིར་དྲན་གྱི་ཀློང་ནས་གདུག་རྩུབ་ཆེ་བའི་དངོས་ཡོད་ཀྱི་འཚོ་བ་དེར་ཕྱིར་དྲངས་བྱུང་།
     གྲྭ་རྒན་དེས་ཁོའི་འཁྲིས་སུ་ཡོང་ནས་ཧ་ཅང་དུང་བའི་མིག་ཟུང་ཁོའི་ཕྱོགས་སུ་ལྟ་བཞིན“ཁྱེད་རང་ཁམས་མི་བདེའམ། ཁྱེད་ལ་དོན་དག་ཅི་ཞིག་ཡོད་རུང་གསང་བ་མེད་པར་བདག་ལ་གསུངས་དང་། བདག་གིས་གང་ཐུབ་ཅི་ཐུབ་ཞུས་ཆོག”ཅེས་བཤད་བྱུང་བས། ཁོའི་གདོང་ལ་སྔར་ན་མེད་པའི་འཛུམ་མདངས་ཤིག་རྒྱས་ནས“ཁྱོད་ཀྱིས་ང་ཕ་ཡུལ་དུ་ཕྱིར་ལོག་ཁྱོལ་དང་། ང་དགོན་པ་དེ་རུ་གཏན་ནས་འདུག་ན་མི་འདོད། ཁྱོད་ཚོས་སྤྲུལ་སྐུ་གཞན་པ་བཙལ་ན་ཆོག ང་ད་དུང་ཁྱིམ་ལ་ལོག་ནས་གཉེན་སྒྲིག་བྱ་དགོས། ཕན་ཐོགས་ཀྱིས་ང་སྒུག་ནས་བསྡད་ཡོད”ཅེས་གསུངས་བྱུང་བས། གྲྭ་རྒན་དེའི་གདོང་པ་དེ་མ་ཐག་བྱུ་རུའི་མདོག་བཞིན་དམར་བོ་དམར་རྐྱང་དུ་གྱུར་སོང་། ཁོས་སྨྲ་བ་ལྡབ་ལྡིབ་ཀྱི་སྒོ་ནས“རིན་པོ་ཆེ། ཐུགས་རྗེས་གཟིགས། དེ་འདྲ་གཏན་ནས་མ་གསུང་བར་འཚལ། དེ་འདྲ་དཔེ་མི་སྲིད”ཅེས་བཤད་ཞོར་གྲྭ་གཟན་དམར་བོ་དེའི་སྣེ་མོ་དཔུང་ལ་བསྐོན་ནས་རྟབ་རྟབ་པོར་སྒོ་ཁར་བུད་སོང་། ཉིན་དེར་ཁོའི་སེམས་པ་སྐྱོ་གདུང་གིས་་ཡོངས་སུ་མནར་སོང་། སེམས་པ་སྐྱོ་གདུང་གིས་མནར་དུས། ཁོ་རང་མགོ་བོ་དུད་ཅིང་སྨྲ་བ་བསྡམས་ནས་འདུག་དགོས་རྒྱུ་ལས་ཐབས་མེད་པར་གྱུར། མདང་ནུབ་རྨིས་པའི་རྨི་ལམ་དྲོན་མོ་དེ་དྲན་ན། ཁོའི་སེམས་པ་རྣལ་ལ་ཕབ་ནས་གནས་དེར་འདུག་ཐབས་གཏན་ནས་མ་བྱུང་།  དེ་ནི་རྒྱལ་བ་ཚངས་དབྱངས་རྒྱ་མཚོའི་མགུར་གླུར་གསུངས་པ་ཇི་བཞིན “སྒོམ་པའི་བླ་མའི་ཞལ་རས།། ཡིད་ལ་འཁོར་རྒྱུ་མིན་འདུག། མ་བསྒོམ་ཆུང་འདྲིས་ཞལ་རས།། ཡིད་ལ་འཁོར་འཁོར་བྱས་བྱུང་།།”ཞེས་པ་ཇི་བཞིན་ནོ། །
     ཉིན་དེ་དག་གི་རིང་ཁོ་རང་གི་ཕ་མས་ཁོ་རང་ལ་ཐེངས་གཅིག་ཀྱང་ལྟ་བར་ཕེབས་མ་བྱུང་ལ། ཕན་ཐོགས་ཀྱི་གྲིབ་མ་ཙམ་ཡང་ཁོ་རང་གི་མཐོང་ཡུལ་དུ་མིན་འདུག ཁོ་རང་ནི་འཇིག་རྟེན་འདིས་རྒྱང་དུ་སྤྱུགས་པའི་དྭ་ཕྲུག་ཞིག་དང་ཁྱད་ཅི། གང་ལྟར་སྤྲུལ་སྐུར་མངའ་གསོལ་བྱས་པའི་ཉིན་དེ་ནས་བཟུང་། ཁོ་རང་གི་བཞིན་རས་ཀྱི་ཁྱོན་ལ་འཛུམ་མདངས་གཏན་ནས་མཐོང་རྒྱུ་མིན་འདུག བྱིས་དུས་ཀྱི་རང་དབང་བབ་ཆགས་ཀྱི་བདེ་སྐྱིད་ལྡན་པའི་འཚོ་བ་དག་དྲན་ན། ཁོ་རང་གི་སེམས་པ་གཤོག་ཟུང་ཐོགས་པའི་ཅང་ཤེས་རྟ་ཕོ་ཞིག་དང་འདྲ་བར་གནས་དེར་འདུག་ཐབས་མེད་པར་ཕ་ཡུལ་དང་ཕ་ཡུལ་གྱི་ཡངས་ཤིང་རྒྱ་ཆེ་བའི་རྩྭ་ཐང་གི་ཕྱོགས་སུ་དལ་གྱིས་བཞུད་འགྲོ། ཉི་མ་རེ་རེ་བཞིན་ཕར་ལ་འདས་པ་དང་བསྟུན་ནས་ཁོ་རང་གིས་ཕ་ཡུལ་དྲན་པའི་གདུང་བའང་དབྱར་གྱི་ཆུ་མོ་ཇི་བཞིན་ངང་གིས་རྒྱས་འོང་།

དྲུག

     ཞོགས་པའི་ཉི་མ་སླར་ཡང་འཆར་བྱུང་། མཐོ་སྒང་གི་ཉི་མ་ནི་ནམ་ཡང་དེ་ལྟར་གཏོང་ཕོད་ཆེ་བ་ཞིག་རེད་ཨང་། ཞོགས་པ་དེར་གྲྭ་རྒན་གྱིས་ནམ་རྒྱུན་ལྟར་བསམ་ལྡིང་སྤྲུལ་སྐུའི་གྲྭ་ཤག་གི་སྒོ་མོ་རྡུང་འགོ་བརྩམས། འོན་ཀྱང་། རྒྱུན་གཏན་ལྟར་མི་འདྲ་བ་ཞིག་ལ་གྲྭ་རྒན་གྱིས་སྒོ་མོ་ཇི་ཙམ་རྡུང་ཡང་བསམ་ལྡིང་སྤྲུལ་སྐུ་ཞུགས་སའི་གྲྭ་ཤག་དེའི་ནང་གྲགས་འགུལ་ཅི་ཡང་མ་བྱུང་། གྲྭ་རྒན་གྱིས་སེམས་པ་ཅུང་འཚབ་པ་ འདྲ། ཁོས་ལུས་ཀྱི་ཤེད་ཤུགས་ཡོད་རྒུ་བཏོན་ནས་སྒོ་མོ་ཕར་ལ་ཕྱེ་བར་བརྩམས་པ་ན“ཨཱ་ཨཱ། དཀོན་མཆོག་གིས་མཁྱེན”གྲྭ་རྒན་གྱི་ངོ་མདོག་དེ་མ་ཉིད་དུ་སྐྱ་བོར་གྱུར་ནས་ངག་ལྡབ་ལྡིབ་ཀྱིས་སྐད་ངན་འཆོར་སོང་། ཡིན་རྒྱུ་ནི་མདང་ནུབ་བསམ་ལྡིང་སྤྲུལ་སྐུས་རང་སྲོག་ལྕེབས་ནས་དགོངས་པ་ཆོས་དབྱིངས་སུ་ཐིམས་འདུག
     བསམ་ལྡིང་སྤྲུལ་སྐུ་དེ་ལྟར་དགོངས་པ་རྫོགས་སོང་། ཁོང་བུད་རྗེས་ཁོང་གིས་ཤུར་དུ་བསྐྱུར་བ་ནི་ཚོན་ལྡན་གྱི་རི་མོ་གཉིས་ཏེ། རི་མོ་གཅིག་ནི་སྦྲ་གུར་གྱི་འདབས་རོལ་ན་བཞོ་ཟེའུ་ལག་ཏུ་བཟུང་ནས་འབྲི་མོའི་འོ་མ་འཇོ་བཞིན་པའི་བུད་མེད་གཅིག་གི་རྒྱབ་གཟུགས་དང་། རི་མོ་གཞན་དེའི་ཐོག་རྩྭ་ཐང་གི་ཕང་བ་རུ་ནོར་ལུག་འཚོ་སྐྱོང་བྱེད་བཞིན་པའི་ལུག་རྫི་བྱིས་པ་ཕོ་མོ་གཉིས་ཀྱིས་ནོར་ལུག་འཚོ་བཞིན་པའི་ངང་ཚུལ་དེ་རེད།
     བསམ་ལྡིང་སྤྲུལ་སྐུ་དེ་ལྟར་ང་ཚོ་དང་རྒྱང་དུ་གྱེས་ཟིན། བསམ་ལྡིང་སྤྲུལ་སྐུ་བུད་པའི་མཚན་མོ་དེར། ཕྱི་རོལ་དུ་ཁ་བ་སྐྱ་ཆིལ་ཆིལ་དུ་བབས་ཤིང་། འཇའ་འོད་ཆེན་པོ་ཞིག་མཁའ་མཐའ་ན་ཡུན་གྱིས་འཁྲིགས་འདུག དེ་ནི་ཁོ་རང་ཐོག་དང་པོར་ཨ་མའི་མངལ་ནས་འཇིག་རྟེན་འདིར་ཕེབས་པའི་ཉིན་མོ་དེ་དང་ཧ་ཅང་འདྲ། ཧ་ཅང་འདྲ། །

2017ལོའི་ཟླ1པོའི་ཚེས4ཉིན། ཕ་ཡུལ་ཤངས་རྣམ་པར་རྒྱལ་བའི་གླིང་དུ་བྲིས།