སྤྲུལ་སྐུ།

རྣམ་གླིང་རིན་ཆེན། གཞིས་ཀ་རྩེ།

     སྐུ་ཞབས་དོན་གྲུབ་རྒྱལ་ནས་གཙོས་པའི་རང་རེའི་སྒྲུང་གཏམ་གསར་རྩོམ་པ་མང་པོས《  སྤྲུལ་སྐུ》  བརྗོད་བྱར་བྱས་པའི་བརྩམས་སྒྲུང་མང་དག་ཅིག་གསར་རྩོམ་གནང་འདུག་མོད། ཁོ་ཚོ་ཕལ་ཆེ་བས་ཡང་ན་སྤྲུལ་སྐུ་རྫུན་མར་དགག་རྒྱག་སུན་འབྱིན་ བྱེད་པ་དང་། ཡང་ན་སྤྲུལ་སྐུའི་ཡོན་ཏན་ལ་བསྔགས་བརྗོད་བྱས་པ་གཙོ་བོར་བཟུང་འདུག གུས་པས་ཚོད་ལྟའི་ཚུལ་དུ་བརྩམས་ཁུལ་བྱས་པའི《  སྤྲུལ་སྐུ》  ཞེས་པའི་སྒྲུང་གཏམ་དེའི་ནང་སྤྲུལ་སྐུ་ཆུང་ངུ་དེ་བྱིས་པ་ཅིག་ཡིན་པའི་ངོས་ནས། བྱིས་པ་ཅིག་གི་རང་གཤིས་སམ་བྱིས་པའི་ཁྱད་ཆོས་གསལ་སྟོན་བྱ་རྒྱུ་གཙོ་བོར་ཞིབ་འབྲི་བྱས་ནས། བྱིས་པ་ཞིག་སྤྲུལ་སྐུར་ངོས་འཛིན་བྱས་རྗེས་ཀྱི་ཁོའི་ནང་སེམས་ཀྱི་འཇིག་རྟེན་ཚུར་སྣང་བྱ་རྒྱུར་འབད་ཡོད།

གསལ་བཤད་ཀྱི་གཏམ།

གཅིག

     ཨ་ཕའི་ངག་སྒྲོས་ལ་ཉན་ན། ཁོ་རང་ཨ་མའི་མངལ་ནས་འཇིག་རྟེན་འདིར་ཐོག་དང་པོ་སླེབས་པའི་དུས་ཚོད་ནི་ཧ་ཅང་རྒྱུན་གཏན་མིན་པའི་དབྱར་ཁའི་ནམ་ཟླ་ཞིག་ཡིན་ཅིང་། ཉིན་དེར་ཕྱི་རོལ་དུ་ཁ་བ་སྐྱ་ཆིལ་ཆིལ་དུ་བབས་པ་དང་། ཡུལ་དེའི་རི་ཆུ་གཉིས་ཀྱི་སྣེ་ཟུར་དུ་ཁ་དོག་རྣམ་པར་བཀྲ་བའི་འཇའ་གུར་ཕུབ་ཡོད་ཚུལ་བརྗོད་བྱུང་། ད་དུང་ཡ་མཚན་སྐྱེ་དགོས་པ་ཞིག་ལ། ཁོ་རང་ཨ་མའི་མངལ་ནས་བཙས་ཏེ་ཟླ་བ་གཉིས་ཙམ་ལས་སོང་མེད་ནའང་ཁོས་ཁ་གྲགས་ཏེ“ཨོམ་མ་ཎི་པད་མེ་ཧུང ཨོམ་མ་ཎི་པད་མེ་ཧུང”ཞེས་མ་ཎི་ཡིག་དྲུག་བར་མེད་འདོན་པར་བྱེད་ཅིང་། ཁོ་རང་ལ་ཁོམ་པ་འདྲ་བྱུང་ན་ནམ་རྒྱུན་ཨ་ཕས་ལག་ཏུ་བཟུང་ནས་བར་མེད་བསྐོར་གྱིན་པའི་མ་ཎིའི་ཆོས་འཁོར་དེ་དང་། བ་སོའི་ཕྲེང་བ་དེ་ཁོ་ནར་ལག་པ་འཆང་སྟེ་གཏན་ནས་ཁ་བྲལ་མི་བྱེད་པའི་སྐོར་བཤད་བྱུང་བས། དུས་དེ་ནས་བཟུང་། ཁོའི་ཕ་མ་གཉིས་དང་དེ་མིན་ སྡེ་བའི་ཡུལ་མི་མང་པོས་ཁོ་རང་ཉིད་ནི་བླ་མའམ་སྐྱེས་མཆོག་དམ་པ་གང་རུང་ཞིག་གི་རྒྱུད་པ་ལས་མཆེད་པའི་བྱང་ཆུབ་སེམས་དཔའ་ཞིག་ཡིན་པར་སྨྲས་ཏེ། དུས་རྒྱུན་ཁོ་རང་ལ་སྡེ་བའི་བྱིས་པ་གཞན་ལས་ལྷག་པའི་སྒོ་ནས་བརྩི་བཀུར་དང་བྱམས་སྐྱོང་བྱེད་ཚུལ་གླེང་བྱུང་། སྐབས་དེ་དུས་ཁོ་རང་ལོ་ངོ་བདུན་ལ་སོན་ཙམ་ཡིན། དེ་དུས་ཁོས་བླ་མ་ཟེར་བ་ཅི་ཞིག་ཡིན་མིན་མི་ཤེས་ལ། སྤྲུལ་སྐུ་ཟེར་བ་གང་ཞིག་ཡིན་མིན་གཏན་ནས་ཤེས་མ་བྱུང་།
     རྒྱང་རིང་ནས་བལྟས་ན། རྨ་ལུང་སྡེ་བ་ནི་མུ་མཐའ་མི་མངོན་པའི་རྩྭ་ཐང་གི་ཐོག་ཚོམ་བུ་ཚོམ་བུར་བཞད་པའི་གུར་ཀུམ་མེ་ཏོག་ཇི་བཞིན་ཡངས་པའི་རྩྭ་ཐང་གི་ཐོག་ཏུ་མཛེས་སྡུག་གིས་ཆགས་འདུག
     རྨ་ལུང་སྡེ་བ་ནི་འབྲོག་ཁུལ་དུ་ཆགས་པའི་སྡེ་བ་ཞིག་ཡིན་པས། ཁོ་ཚོའི་མི་རབས་དུ་མ་སྦྲ་གུར་ནང་གནས་མལ་བཅས་ཏེ་མི་ཚེ་ཕར་ལ་ཕུད་མཁན་འབའ་ཞིག་ཡིན་པས། ནམ་རྒྱུན་རྩྭ་ཆུ་བཟང་སའི་ཕྱོགས་སུ་སྦྲ་གུར་གནས་སྤོས་བྱ་དགོས་ཀྱིན་ཡོད་སྟབས། རྩྭ་ཐང་གི་ཁུགས་སོ་མང་དག་ཅིག་གི་ཐོག་ཏུ་ཁོ་ཚོ་གནས་སྡོད་བྱས་པའི་རྗེས་ཤུལ་རེ་ཡོད་ལ། སྦྲ་གུར་བཅས་མྱོང་བའི་རྗེས་ཤུལ་རེ་རེའི་ངོས་སུ་ཁོ་ཚོའི་དགོད་སྒྲ་རེ་རེ་ཐིམས་ཤིང་། ངོ་མཚར་གྱིས་ཕྱུག་པའི་གཏམ་རྒྱུད་དྲོན་མོ་མི་ཉུང་བ་ཞིག་ཀྱང་རྩྭ་ཐང་དེའི་ཕང་བར་འཁྱིལ་ཡོད་པ་རེད་ཨང་།
     ཁོ་ཚོས་དྲོད་ཁོལ་གྱིས་ཕྱུག་པའི་ལོ་ཟླ་མང་དག་ཅིག་རྩྭ་ཐང་དེའི་གྲུ་ཁ་གང་སར་ཕར་ལ་བསྐྱལ་ཏེ། ནོར་གནག་གི་ངུར་སྒྲ་དང་། གཡང་དཀར་ལུག་ཁྱུའི་འབའ་སྒྲའི་ཀློང་དུ་ལྷིང་འཇགས་ཀྱི་འཚོ་བ་རྩྭ་ཐང་གི་མེ་ཏོག་དང་འགྲོགས་ནས། དུས་བཞིའི་ནམ་ཟླ་རེ་རེ་འཛུམ་མདངས་ཀྱིས་ཚུར་ལ་བསུ་བཞིན་ཡོད། དེ་ནི་ཁོ་ཚོའི་འཚོ་བ་ཡིན། ནོར་ལུག་དང་ལྷན་དུ་འགྲོགས་པའི་རྩྭ་ཐང་གི་འཚོ་བ་ཡིན། ཁོ་ཚོ་ནི་རྩྭ་ཐང་དེའི་བུ་ཕྲུག་ལྷད་མེད་ཅིག་ཡིན།
     ཞོགས་པའི་སྐྱ་རེངས་ཀྱི་འཛུམ་མདངས་ཀློང་དུ། ཨ་ཡེ་མཚོ་མོས་བཞོ་ཟེའུ་ལག་ཏུ་བཟུང་ནས་འབྲི་མོ་ཐོད་དཀར་མའི་ཕྱོགས་སུ་འོ་མ་འཇོ་བར་འགྲོ་བཞིན་འདུག མོ་ནི་སྦྲ་གུར་དེའི་བདག་མོ་འཁྲུལ་མེད་ཅིག་ཡིན་པས། མོ་སྐྱེས་ནས་ད་བར་དུ་མི་ལོ་སུམ་ཅུ་ལྷག་འགོར་སོང་། ལོ་ངོ་སུམ་ཅུ་ལྷག་གི་མི་ཚེའི་འགྲུལ་བཞུད་ཁྲོད། མོས་རྩྭ་ཐང་དེ་རང་གི་ཚེ་གཅིག་ལུས་གཅིག་གི་ཁྱིམ་གཞིས་སུ་བརྟེན་ནས་མོས་སྦྲ་ནག་གྲུ་བཞི་དེའི་ནང་ཁྱོ་ག་དང་བྱིས་པ་ལ་བཟའ་མ་གཡོ་སྦྱོར་བྱས་པ་བགྲང་གིས་མི་ལང་ལ། འབྲི་མོའི་འོ་མ་འཇོ་བ་དང་། ཞོ་དཀྲོག་པ་སོགས་བསྐྱར་ཟློས་ཀྱི་ལས་ཀ་མང་དག་ཅིག་གཅིག་གཅིག་གཉིས་གཉིས་ཀྱིས་ལས་བཞིན་ཡོད་པ་རེད་ཨང་།
     མོའི་ཁྱོ་གའི་མིང་ལ་ཚེ་རིང་ཟེར་ཞིང་། ཁོ་ནི་མི་ཚེ་གཅིག་ནོར་ལུག་གི་རྨིག་རྗེས་དེད་མཁན་གྱི་རྫི་བོ་ཞིག་ཡིན། ཁོ་གཉིས་བཟའ་ཚོར་བྱིས་པ་གཅིག་རང་ཡོད་པ་དེའི་མིང་ལ་དོན་གྲུབ་ཟེར་ཞིང་། ཁོ་ནི་ད་ལོ་ལོ་ངོ་བདུན་ལ་སོན་མ་ཐག་ཡིན། ནམ་རྒྱུན་ཁོས་ཨ་ཕའི་རྗེས་སུ་བསྙེགས་ནས་ནོར་ལུག་འཚོ་སྐྱོང་ལ་འབད་བཞིན་ཡོད་པས། ཁོའི་ཨ་ཕའི་ངོས་ནས་བརྗོད་ན། ཁོ་ནི་ཨ་ཕའི་ལས་རོགས་བཟང་པོ་ཞིག་ཡིན་པ་མ་ཟད་འདུག་རོགས་བཟང་པོ་ཞིག་ཏུའང་གྱུར་ཡོད། ཁོ་དང་ཨ་ཕས་མུ་མཐའ་མི་མངོན་པའི་རྩྭ་ཐང་གི་གྲུ་ག་མང་དག་ཅིག་ཕ་མཐར་བཅད་མྱོང་ལ། རི་རྩེའི་སྨུག་སྤྲིན་གྱི་ཀློང་དུ་ཕར་འགྲོ་ཚུར་འོང་བྱས་པའི་རྐང་རྗེས་ཀྱང་གྲངས་མེད་ཡིན་པས། དོན་གྲུབ་ཀྱང་ད་ཆ་ཁོ་རང་གི་ཨ་ཕ་དང་ཆ་འདྲ་བར་གནས་དེའི་རྩྭ་ཐང་གི་གྲུ་ག་རེ་རེ་ལ་རྒྱུས་མངའ་ཆེན་པོ་ལྡན་ཅིང་། ཨ་ཕ་དང་ཆ་མཚུངས་པའི་རྫི་བོ་བཟང་བོ་ཞིག་ཏུ་གྱུར་ཡོད་པས། ནམ་རྒྱུན་ཁོའི་ཨ་ཕས་ཁོ་རང་གི་སྐྲ་ལོར་དུང་བའི་བྱིལ་བྱིལ་ལན་འགའ་བྱེད་བཞིན་གདོང་ལ་འཛུམ་མདངས་ཤིག་རྒྱས་ཞོར།“ད་ལྟ་བུ་ཁྱོད་ཀྱང་ཨ་ཕ་དང་ཆ་འདྲ་བའི་རྫི་བོ་བཟང་བོ་ཞིག་ཏུ་གྱུར་ཡོད་པས། འུ་ཅག་གི་ཁྱིམ་གཞིས་དེ་མ་སྟོང་ཙམ་ཞིག་ཡོང་ས་རེད”ཟེར་བཞིན་འོད་མདངས་འཕྱུར་བའི་རེ་བའི་མིག་ཟུང་ཁོའི་གདོང་ལ་ཅེར་ནས་འདུག ཨ་ཕའི་གཏམ་ལ་ཉན་རྗེས། ཁོའི་ལུས་སེམས་ཧྲིལ་བོར་སྤྲོ་སྣང་ཞིག་དལ་གྱིས་འཕེལ་བྱུང་།

གཉིས།

     བྱིས་པའི་དུས་སུ་ཁོ་རང་ཡང་སྡེ་བའི་ན་མཉམ་བྱིས་པ་དེ་དག་དང་ཆ་འདྲ་བར་ཆུ་མིག་དགུ་སྒྲིལ་གྱི་འུར་རྡོ་སྐེད་པར་གཟེད་ནས་ནོར་ལུག་གི་རྨིག་སྒྲའི་རྗེས་སུ་བསྙེགས་ཏེ་ནོར་རྫི་དང་ལུག་རྫི་བྱ་ཞོར་ཡངས་པའི་རྩྭ་ཐང་གི་ཐོག་ཏུ་གན་རྐྱལ་དུ་ཉལ་ནས་སྤང་ཐང་གི་ཐོག་ཏུ་འགྲེ་ལོག་ཡང་ཡང་རྒྱག་བཞིན་མགོ་ཐོག་གི་སྔོ་ཞིང་དྭངས་པའི་ནམ་མཁའ་དང་། ཚོམ་བུ་ཚོམ་བུར་བྱས་ནས་རང་དབང་ངང་ཕར་བཞུད་ཚུར་འོང་བྱེད་བཞིན་པའི་སྤྲིན་དཀར་ལ་ལྟད་མོར་རོལ་བ་དང་། གཤོག་ཟུང་རྡེབ་ཞོར་སྙན་པའི་གྲེ་འགྱུར་སྒྲོག་བཞིན་པའི་བྱེའུ་ཆུང་གི་ཁྱུ་ཚོགས་དང་། སྦྲ་འདབས་ཀྱི་ཕ་རོལ་དུ་ཞིམ་མངར་གྱི་རྩྭ་ཆུ་ལོངས་སུ་སྤྱོད་བཞིན་པའི་འབྲི་མོའི་ངུར་སྒྲ་དང་། གཡང་དཀར་ལུག་གི་འབའ་སྐད། རྟ་ཕོའི་འཚེར་སྐད། སྒོ་ཁྱིའི་ཟུག་སྒྲ་སོགས་ལ་རྣ་བ་བླགས་ཏེ་ཕ་མ་གཉིས་ཀྱི་བྱམས་བརྩེའི་གཉོར་སྐྱོང་འོག་མི་ཚེ་ཕར་ལ་ཕུད་བཞིན་པའི་བྱིས་པ་རྣམ་དག་ཅིག་ཡིན། སྐབས་དེ་དུས་ཀྱི་དྲོད་ཁོལ་ལྡན་པའི་མཛེས་སྡུག་གི་འཚོ་བ་དེ་དག་དུས་ད་ལྟའང་ཁོའི་མིག་ལམ་ན་མེ་ཏོག་ལྟར་འཛུམ་ཞིང་འཇའ་བཞིན་བཀྲ་འོང་། འོན་ཀྱང་། ཁོ་རང་ལོ་ངོ་བརྒྱད་ལ་སོན་པའི་དབྱར་ཁ་ཞིག་ལ། ཁོ་ཚང་དུ་ངུར་སྨྲིག་གི་ན་བཟའ་བཞེས་པའི་བླ་རྒན་འགའ་ཕེབས་བྱུང་། དུས་དེ་ནས་བཟུང་། མཛེས་སྡུག་ལྡན་པའི་ཁོའི་བྱིས་དུས་ཀྱི་འཚོ་བ་ལ་གནམ་ས་བླ་འོག་བརྗེས་པ་ལྟ་བུའི་འགྱུར་བ་ཆེན་པོ་ཞིག་ཐེབས་འགོ་ཚུགས་ལ། ཁོའི་མི་ཚེའི་ལས་དབང་ལའང་འགྱུར་ལྡོག་ཤུགས་ཆེན་ཅིག་ཐེབས་སོང་།
     ཉིན་དེའི་ཞོགས་པ་ནམ་གཤིས་ཧ་ཅང་དྲོ། ཁོ་རང་རྒྱུན་གཏན་ལྟར་ལྷས་རའི་ཁྲིས་སུ་ཕྱིན་ཏེ་ནོར་ལུག་རྣམས་ཕྱིར་བཏོན་ནས་རི་འདབས་སུ་དེད། ནོར་ལུག་རྣམས་རི་འདབས་སུ་དེད་ནས་ཁོ་ཚོ་རྩྭ་ཆུ་བཟང་སར་འཚོ་སྐྱོང་བྱ་རྒྱུ་ནི་ཁོའི་ཉིན་གང་གི་ལས་ཀ་ཡིན་ལ་ཉིན་གཅིག་གི་འཚོ་བའང་ཡིན། མ་གཞི་ཁོ་རང་འཚོ་ གནས་བྱ་ཡུལ་གྱི་འབྲོག་ཁུལ་དེ་རུ་ཁོ་རང་དང་ཆ་འདྲ་བའི་བྱིས་པ་མང་དག་ཅིག་ཡོད། ཁོ་ཚོས་སློབ་གྲྭ་ཟེར་བ་རྣ་བར་གོ་མ་མྱོང་ལ། ཡི་གེ་ཀ་ཞེས་པ་གཅིག་ཀྱང་ངོ་ཤེས་ཀྱི་མེད། འོན་ཀྱང་། ཁོ་ཚོའི་སྣང་ངོར་རང་ཉིད་ལས་སྣང་བ་སྐྱིད་པ་ཅིག་དང་། རང་ཉིད་ལས་བདེ་སྐྱིད་ལྡན་པ་ཅིག་གཏན་ནས་མེད་པར་སེམས་བཞིན་ཡོད། རྒྱུ་མཚན་ནི་རྩྭ་ཐང་དེའི་གྲུ་ག་གང་སར་ཁོ་ཚོའི་རྐང་རྗེས་རེ་རེ་ཡོད་ལ། རྩྭ་ཐང་གི་ཕང་བར་ཐིམས་ནས་ནོར་ལུག་འཚོ་ཞོར་རྩེད་འཇོར་རོལ་རྒྱུ་ནི་ཁོ་ཚོར་མཚོན་ན་རྦད་དེ་གོམས་གཤིས་སུ་སོང་བས་ཡིན། ཁོ་ཚོ་ནི་དེ་ལྟ་བུའི་རང་བྱུང་བབ་ཆགས་ཀྱི་འཚོ་བར་ཧ་ཅང་དགའ། ཧ་ཅང་དགའ།
     ཉི་མ་ནུབ་རིར་བྱོན་ལ་ཉེ། ཁོས་རྒྱུན་གཏན་ལྟར་རང་ཁྱིམ་གྱི་ནོར་ལུག་རྣམས་དེད་ནས་ཕྱིར་ཁྱིམ་དུ་ལོག་བྱུང་། སྦྲ་གུར་གྱི་སྒོ་ཁར་བཏགས་ཡོད་པའི་སྒོ་ཁྱི་སྤུ་སོག་དེས་ཁོ་རང་མཐོང་ཐེངས་རེར་དེ་མ་ཉིད་དུ་མཇུག་མ་གནམ་དུ་ཀེར་ཀེར་ལན་འགའ་བྱས་ནས་ཁོ་རང་གི་ཕྱོགས་སུ་མིག་ཟུང་ཅེ་རེར་ལྟ་བཞིན་འདུག ཨ་མས་རྒྱུན་གཏན་ལྟར་བཞོ་ཟེའུ་ལག་ཏུ་ཐོགས་ནས་འབྲི་མོའི་འོ་མ་འཇོ་བཞིན་འདུག ཁོའི་ཨ་མས་ཁོ་རང་ཁྱིམ་དུ་ལོག་པ་ཤེས་འཕྲལ་ཧ་ཅང་དུང་བའི་མིག་ཟུང་གིས་ཁོ་ལ་ལྟ་བཞིན“གཅེས་ཕྲུག དེ་རིང་དཀའ་ལས་ཁག་མ་བྱུང་ངམ། ཁྱོད་མྱུར་མོ་ཁྱིམ་ལ་སོང་དང་། ཁྱིམ་ན་མགྲོན་པོ་ཐོན་ཐལ”ཅེས་བཤད་བྱུང་། ཨ་མའི་སྐད་ཆར་ཉན་རྗེས་ཁོའི་སེམས་ལ་གློ་བུར་དུ་དྲོད་ཁོལ་ཅིག་རྒྱས་བྱུང་། ཁོའི་བསམ་པར་ཁྱིམ་ལ་ཕེབས་པའི་མགྲོན་པོ་ནི་བུ་མོ་ཕན་ཐོགས་ཀྱི་ཨ་ཕ་ཡིན་ཁོ་ཐག་རེད་བསམས།
     བུ་མོ་ཕན་ཐོགས་ནི་ཁོ་རང་ཆུང་བྱིས་པའི་དུས་ཀྱི་རྩེད་གྲོགས་དང་། གཡང་དཀར་ལུག་གི་འཚོ་རོགས་ཡིན་པ་མ་ཟད། ཁོ་རང་ཆེས་དགའ་སའི་བུ་མོའང་ཡིན། ཁོ་གཉིས་ཉིན་ལྟར་སྤང་ཐང་ཐོག་གན་རྐྱལ་དུ་ཉལ་ཞོར་བརྩེ་བ་མཚོན་པའི་སྙིང་གཏམ་ཕར་ཚུར་བཤད་བྱེད་བཞིན་ཡོད་དེ།“ཕན་ཐོགས། རྗེས་སུ་ང་ཆེན་པོ་ཆགས་རྗེས་ངས་ཁྱོད་ཆུང་མར་ལེན་ངེས་ཡིན། ཁྱོད་ངའི་ཆུང་མ་བྱ་རྒྱུར་འཐད་པ་ཨེ་ཡོད”ཁོས་དེ་ལྟར་སྨྲ་བཞིན་ཕན་ཐོགས་ཀྱི་ལག་པ་ནས་དམ་དུ་འཇུས་བྱུང་། ཁོའི་སྐད་ཆ་དེས་ཕན་ཐོགས་ཅི་བྱ་གཏོལ་བྲལ་དུ་གྱུར་སོང་། མོའི་ངོ་གདོང་གི་ཁྱོན་ལ་ཚ་བེར་བེར་བྱེད་ཅིང་། གདོང་པ་ཧྲིལ་པོ་མཚམས་སྤྲིན་གྱི་མདོག་ལྟར་དམར་ལམ་ལམ་བྱེད། མོ་ངོ་ཚ་ཞིག་གིས་ཡོངས་སུ་མྱོས་ཏེ་མགོ་བོ་དུད་ནས་སྐད་ཆ་ཚིག་གཅིག་ཀྱང་ངག་ལས་མ་བཤད།
     མོའི་སྨྲ་བ་མེད་པའི་རྣམ་འགྱུར་གྲང་ཤུར་ཤུར་དེ་ཁོས་མཐོང་བས་ཁོའི་སེམས་ལ་བྲེད་ཤ་ཅིག་ངང་གིས་ལངས་བྱུང་བས། ཁོས་སྐད་གདངས་དམའ་བོས“ད་བྱས་ན་ཁྱོད་ལ་འཐད་པ་མེད་པ་ཨེ་རེད”ཅེས་དྲིས་བྱུང་བས། བུ་མོ་ཕན་ཐོགས་ནི་སྔར་བས་ངོ་ཚའི་སྒྲོག་གིས་བཅིངས་ནས་མགོ་བོ་པུས་མོའི་བར་དུ་དུད་བྱུང་། ཁོས་ཕན་ཐོགས་ཀྱིས་རང་ཉིད་ལ་ཁ་ཡ་མི་བྱེད་པ་མཐོང་དུས་ཁོའི་སེམས་ལ་གྲང་ལྷང་ལྷང་དང་འཁྱག་སིབ་སིབ་ཀྱི་ཚོར་བ་ཞིག་ངང་གིས་སྐྱེས་བྱུང་། ཁོས་དེ་འཕྲལ་ཕན་ཐོགས་ཀྱི་ལག་པ་གློད་ནས་སྤང་ཐང་གི་ཐོག་ཏུ་གན་རྐྱལ་དུ་ཉལ་ནས་སྐད་ཆ་ཚིག་གཅིག་ཀྱང་མ་བཤད། ཕན་ཐོགས་ཀྱིས་ཁོའི་སྨྲ་བ་མེད་པའི་རྣམ་འགྱུར་སྐྱོ་ཤས་ཅན་དེ་མཐོང་བས་དེ་འཕྲལ་ཁོའི་འགྲམ་པའི་ངོས་སུ་འོ་ཞིག་སྦྱར་ཏེ་ཁོའི་འོད་ཀྲིག་ཀྲིག་གི་མིག་ཟུང་ལ་ལྟ་བཞིན་མགོ་བོ་ལྕོག་ལྕོག་ལན་འགའ་བྱས་བྱུང་། ཁོ་རང་ནི་རེ་ཞིག་སྨྱོས་པ་ལྟར་རྩྭ་ཐང་དེའི་ཐོག་ཏུ་ས་ལྡིང་གནམ་ལྡིང་བྱེད་བཞིན་ངོ་གདོང་གི་ཁྱོན་ལ་སྔར་ན་མེད་པའི་འཛུམ་མདངས་ཤིག་གིས་ཡོངས་སུ་ཕྱུག་འདུག དུས་དེ་ནས་བཟུང་ལུག་རྫི་བྱིས་པ་གཞན་དག་གིས་ཀྱང་ཁོ་གཉིས་ལ་“བཟའ་ཚོ་ཆུང་ཆུང་ཆ་གཅིག སྤང་གི་མེ་ཏོག་ཆ་གཅིག གཡང་དཀར་ལུ་གུ་ཆ་གཅིག སེར་སྦྲང་བུང་བ་ཆ་གཅིག”ཅེས་སྨྲ་བཞིན་ཁོ་གཉིས་ལ་ཀུ་རེ་ཡང་ཡང་བྱེད་ཀྱིན་ཡོད།
     ཁོ་རང་རང་ཁྱིམ་གྱི་སྦྲ་གུར་ནང་འཛུལ་བས། སྦྲ་གུར་ནང་བུ་མོ་ཕན་ཐོགས་ཀྱི་ཨ་ཕ་མཐོང་རྒྱུ་མེད་པར་དེ་ལས་ལྡོག་སྟེ་རྒྱུན་པར་རྩྭ་ཐང་དེའི་ཐོག་མཐོང་དཀོན་པའི་ན་བཟའ་དམར་བོ་བཞེས་པའི་གྲྭ་རྒན་གཉིས་བསྡད་ཡོད་པ་མཐོང་། ཨ་ཕས་ཇ་དང་རྩམ་པ་ཁོ་གཉིས་ཀྱི་མདུན་དུ་བཤམས་ནས་ཁོང་གཉིས་པོར་སྣེ་ལེན་གཟབ་རྒྱས་བྱས་འདུག ཨ་མས་བཤད་པའི་ཁྱིམ་ཚང་ནང་གི་མགྲོན་པོ་དེ་ཕན་ཐོགས་ཀྱི་ཨ་ཕ་མིན་པ་ཤེས་དུས་ཁོས་གྲྭ་རྒན་དེ་གཉིས་ལའང་ཁ་བརྡ་བྱ་འདོད་མེད་པར་སེམས་ལ་ཕངས་སེམས་དྲག་པོ་ཞིག་སྐྱེས་བྱུང་།
     ཁོས་རང་ཁྱིམ་གྱི་ཐབ་ཀའི་མདུན་དུ་སྨྲ་བ་མེད་པར་ཁུ་སིམ་མེར་ཙོག་པུར་བསྡད། གྲྭ་པ་ལོ་ན་ཅུང་རྒན་པ་ཞིག་ཡོད་པ་དེས་ཁོའི་ཁྲིས་སུ་ཡོང་ནས་ཁོའི་མགོ་ལ་བྱིལ་བྱིལ་ལན་འགའ་བྱེད་ཞོར“བུ་དོན་གྲུབ། ཁྱོད་བདེ་མོ”ཞེས་འཚམས་འདྲི་བྱས་པ་དང་སྦྲགས། གྲྭ་རྒན་དེས་རང་གི་ལྟོ་ཕད་ཀྱི་ནང་ནས་རིགས་མི་གཅིག་ལ་ཁ་དོག་ཀྱང་མི་འདྲ་བའི་ཕྲེང་བ་མང་དག་ཅིག་ཕྱིར་བཏོན་ནས“བུ། ཁྱོད་ཀྱི་ཨ་ཕའི་སྐད་ཆར་ཉན་ན། ཆུང་དུས་ཁྱོད་ཕྲེང་བ་ལག་ཏུ་བཟུང་རྒྱུར་ཧ་ཅང་དགའ་ཟེར། ང་ལ་ཁྱོད་ལ་སྦྱིན་བྱེད་ཀྱི་ལག་རྟགས་གཞན་མེད་པས། ཕྲེང་བ་དེ་དག་ལས་ཁྱོད་ཀྱིས་གཅིག་གདམ་ནས་བདག་པོ་བྱོས”གྲྭ་རྒན་དེས་དེ་ལྟར་ལབ་བཞིན་ཕྲེང་བ་དེ་དག་རེ་རེ་བྱས་ནས་བུ་དོན་གྲུབ་ཀྱི་གམ་དུ་བཀྲམ། ཁོས་ཕྲེང་བ་མང་པོ་དེ་འདྲ་མཐོང་དུས་སེམས་ལ་དགའ་སྣང་ཞིག་ངང་གིས་སྐྱེས་ནས་ད་སོ་མའི་རྣམ་འགྱུར་གྲང་ཤུར་ཤུར་དེ་གར་སོང་ཆ་མེད་དུ་ཡལ། རྒྱུ་མཚན་གང་ཡིན་མིན་ཁོ་རང་གིས་ཀྱང་ཤེས་ཀྱིན་མིན་འདུག གང་ལྟར་ཆུང་དུས་ནས་ད་བར་དུ་ཁོ་རང་ཕྲེང་བ་ལག་ཏུ་ཐོགས་རྒྱུར་ཧ་ཅང་དགའ།
     ཁོས་ཕྲེང་བ་དེ་དག་ལ་ཞིབ་མོས་ལྟ་བཞིན་དེ་དག་ལས་ཅུང་ཟད་རྙིང་ཞིང་དྲེག་པ་ཅན་ཅིག་ཡོད་པ་དེ་ལག་ཏུ་བཟུང་ནས་ཧ་ཅང་ཡ་མཚན་པའི་མིག་ཟུང་ཞིག་གྲྭ་རྒན་དེར་བལྟས་ཏེ“ཕྲེང་བ་དེ་ངའི་ཡིན་པས། ཁྱོད་ཀྱི་ལག་ཏུ་ཇི་ལྟར་སླེབས་པ་རེད”ཅེས་དྲིས་པས། གྲྭ་རྒན་དེ་གཉིས་ཀྱི་ངོ་མདོག་དེ་མ་ཉིད་དུ་འགྱུར་ནས་མྱུར་དུ་ལག་ཟུང་གི་སྙིམ་པ་བྲང་ཁར་སྦྱར་བཞིན“ཨ་ཙི། དཀོན་མཆོག་མཁྱེན། ད་ཡིན་ན་འགྲིག་སོང་། ང་ཚོས་ལོ་ངོ་བརྒྱད་ཏག་ཏག་གི་རིང་ཕྲེང་བ་འདིའི་བདག་པོ་འཚོལ་བར་ཕྱིན་པ་ཡིན་ཡང་ད་བར་དུ་བདག་པོ་བཙལ་རྙེད་ཐུབ་མ་སོང་། ད་ཡིན་ན་འགྲིག་སོང་། དཀོན་མཆོག་མཁྱེན”ཅེས་སྨྲ་བཞིན་ཁོའི་དཔྲལ་བའི་ངོས་སུ་འགྲམ་པ་སྦྱར་ཞིང་ཕྲེང་བ་དེ་ཁོ་རང་གི་སྐེ་ལ་བསྐོན་ནས་ཁོ་ལ་ཕྱག་གསུམ་འཚལ་རྗེས་རང་རང་གི་རྟ་ལ་བཞོན་ནས་བྲེལ་བྲེལ་འཚུབ་འཚུབ་ངང་ཁོའི་ཁྱིམ་ལས་ཕྱིར་བུད་སོང་།

གསུམ།

     ད་ནི་དགུན་ཁ་སླེབས་བྱུང་། ད་ལོའི་དགུན་ཁ་ནམ་རྒྱུན་ལས་ཧ་ཅང་འཁྱག དོན་གྲུབ་དང་ཁོའི་ཕ་མ་གཉིས་པོས་སྦྲ་གུར་ནང་གི་ཐབ་ཀའི་འགྲམ་དུ་ཙོག་ནས་འོ་ཇ་སྐོལ་བཞིན་འདུག བུ་དོན་གྲུབ་ནི་སྨྲ་བ་མེད་པར་ཕྲེང་བ་དེ་ཁོ་ནར་མིག་ཟུང་ཅེར་ནས་ཅི་ཞིག་ལ་འདང་རྒྱག་བཞིན་ཡོད་པ་འདྲ།
     ཁོ་ཚང་གི་སྦྲ་གུར་དང་རྒྱང་ཐག་མི་རིང་བའི་ས་ན་མི་མང་པོ་ཞིག་རྟ་ལ་བཞོན་ནས་ཁོའི་ཁྱིམ་ཚང་གི་ ཕྱོགས་སུ་ཡོང་གིན་འདུག ཞིབ་ཏུ་བལྟས་ན་ཁོ་ཚོའི་ལུས་ལ་རས་གོས་དམར་པོའི་ཆོས་གོས་རེ་མནབས་འདུག་པས་ཁོ་ཚོ་ནི་དགོན་སྡེ་ཁག་ནས་གནས་དེར་ལྕི་བ་སློང་བར་ཡོང་མཁན་གྱི་དགོན་སྡེའི་རབ་བྱུང་བ་ཡིན་ཤས་ཆེ་ལ། ཡང་ན་གནས་རི་གནས་བཟུང་འགྲིམས་པའི་གནས་འཇལ་བ་ཡིན་ཡང་སྲིད། དེ་ནས་དུས་ཡུན་ཅུང་ཟད་འགོར་རྗེས་རྟ་བཞོན་པའི་རབ་བྱུང་བ་དེ་དག་ཁོའི་སྦྲ་གུར་གྱི་འཁྲིས་སུ་འབྱོར་བྱུང་། ཁོ་ཚོས་རྟ་ལས་མར་བབས་ཏེ་དཀར་གཙང་གི་ཁ་བཏགས་དཀར་བོ་རེ་ཕྱིར་བཏོན་ནས་བུ་དོན་གྲུབ་ཀྱི་ཕ་མ་གཉིས་ལ་བསྒྲོན་སོང་། ཁོ་ཚོའི་ཁྲོད་ན་ཁ་སྔོན་ཁོའི་ཁྱིམ་ཚང་དུ་ཡོང་བའི་གྲྭ་རྒན་དེ་གཉིས་ཀྱང་འདུག གྲྭ་རྒན་ལོ་ན་ཅུང་རྒན་པ་ཞིག་ཡོད་པ་དེས་བུ་དོན་གྲུབ་ཀྱི་ཁྲིས་སུ་བཅར་ཏེ་ཁོའི་ཐོད་པར་དབུ་ཐུག་ལན་གསུམ་བྱས་རྗེས། སླར་ཡང་འཛུམ་དམུལ་དམུལ་གྱིས་ཁོའི་ཕ་མ་གཉིས་ཀྱི་གན་ལ་ཐོན་ཏེ།“ཕ་མ་བསོད་ནམས་ཅན་པོ་ལ་བུ་ཡང་བསོད་ནམས་ཅན་དེ་འདྲ་ཞིག་འཁྲུངས་འདུག ཁྱེད་ཚོའི་བུ་ནི་ངེད་བསམ་ལྡིང་དགོན་པའི་བླ་མ་གོང་མའི་སྤྲུལ་སྐུ་རྨ་མེད་པ་ཞིག་རེད་འདུག དེ་རིང་ང་ཚོ་དེར་ཡོང་ནས་བུ་དེ་དགོན་པར་ཁྲིད་ནས་མུ་མཐུད་དེ་འགྲོ་བའི་དོན་མཛད་དུ་བཅུག་དགོས”ཞེས་གསུངས་བྱུང་། ཁོའི་ཕ་མ་གཉིས་ནི་རེ་ཞིག་འབག་སྐུ་བཞིན་རྣམ་ཤེས་བོར་བ་ལྟར་སྐད་ཆ་ཚིག་གཅིག་ཀྱང་ངག་ལས་མ་འཁྲོལ། ཁོའི་ཕ་མ་གཉིས་ཀྱི་ངོས་ནས་བརྗོད་ན། བྱིས་པ་སྤྲུལ་སྐུ་ཡིན་པ་ཤེས་དུས་གཅིག་ནས་ལུས་སེམས་དགའ་བས་རབ་ཏུ་མྱོས་བྱུང་ལ། གཉིས་ནས་བཤད་ན་ཁོང་བཟའ་མི་གཉིས་ལ་བུ་ཕྲུག་དེ་ཁོ་ན་ཉིད་ལས་མེད་པས། གལ་ཏེ་བྱིས་པ་དགོན་སྡེར་སྤྲུལ་སྐུ་བྱེད་པར་བསྐྱལ་ན། ཁོ་ཚོའི་མི་རྒྱུད་དེ་ཇི་ལྟར་རྒྱུན་བསྲིངས་དགོས་སམ། གང་ལྟར་ཁོའི་ཕ་མ་གཉིས་པོ་ཡུད་ཙམ་ཞིག་རིང་དགའ་སྣང་ཞིག་དང་སེམས་ཚེགས་ཤིག་ལྷན་དུ་སྐྱེས་ནས་ཅི་བྱ་གཏོལ་བྲལ་དུ་གྱུར་སོང་།
     “བུ། རང་དགོན་པར་སྤྲུལ་སྐུ་བྱེད་པར་འགྲོ་འདོད་དམ”ཁོའི་ཨ་ཕས་ཁོ་རང་གི་གདོང་ལ་ཅེར་ནས་དེ་ལྟར་དྲིས།
     “སྤྲུལ་སྐུ་ཟེར་ན་ཅི་ཞིག་རེད”
     “སྤྲུལ་སྐུ་ཟེར་ན་ཁོ་ཚོ་དང་འདྲ་བར་དགོན་པར་འཚོ་བ་བསྐྱལ་ནས་འདུག་མཁན་དེ་དག་ལ་ཟེར”ཁོའི་ཨ་ཕས་རང་གི་མཛུབ་མོ་རབ་བྱུང་བ་དེ་དག་གི་ཕྱོགས་སུ་བསྟན་ཏེ་དེ་ལྟར་བཤད།
     “སྤྲུལ་སྐུ་བྱས་ན་ཆུང་མ་བླངས་ན་ཨེ་ཆོག”ཁོས་དེ་སྐད་དྲིས་བྱུང་བས། ཁོའི་ཨ་ཕས་མྱུར་དུ་ཁོའི་ཁ་ལ་སྦར་མོས་བཀབ་སྟེ། “ཅི་ཟེར། བྱིས་པ་པྲ་ཚགས་ཁྱོད་ཡིན་ན། སྤྲུལ་སྐུས་ཆུང་མ་ལེན་པའི་སྲོལ་ཅིག་གང་ན་ཡོད”
     “ཆུང་མ་ལེན་མི་ཆོག་ན་ང་སྤྲུལ་སྐུ་བྱེད་པར་འགྲོ་མི་འདོད། ངས་ད་དུང་ཕན་ཐོགས་ཆུང་མར་ལེན་རྒྱུའི་དམ་བཅའ་བཞག་ཡོད། ང་རང་མུ་མཐུད་དེ་ལུག་རྫི་བྱ་འདོད”ཁོས་དེ་སྐད་སྨྲ་བཞིན་འདུར་མ་རྒྱུགས་ཀྱིས་ཐད་ཀར་ཕན་ཐོགས་འཚོལ་བར་བུད།
     ཁོའི་ཕ་མས་གྲྭ་རྒན་དེ་ཚོ་ལ་རང་གི་བྱིས་པ་སྤྲུལ་སྐུ་བྱ་བར་འགྲོ་འདོད་མེད་པའི་གནས་ཚུལ་བཤད་པས། གྲྭ་རྒན་དེས་མིག་ཟུང་ཇེ་ཆེར་བགྲད་ནས“དེ་འདྲ་དཔེ་མི་སྲིད། ཁྱེད་རྣམ་པའི་བྱིས་པ་གཞན་དང་མི་འདྲ་བར་ད་ཆ་སྤྲུལ་སྐྲུའི་གོ་འཕང་ཐོབ་དུས། སྤྲུལ་སྐུ་བྱེད་པར་མི་གཏོང་བའི་དཔེ་ཞིག་གང་ན་ཡོད། ཡང་གཅིག་བཤད་ན། སྤྲུལ་སྐུ་བཞུགས་ཡུལ་དགོན་པ་ཡིན་པས། ལས་ལ་སྤྲུལ་སྐུ་བསྐོས་དུས། མི་འགྲོ་ཟེར་བའི་དཔེ་ཞིག་གང་ན་ཡོད”ཅེས་བརྗོད་བྱུང་བས། ཁོའི་ཕ་མ་གཉིས་ཀྱིས་ཀྱང་བུའི་འདོད་པ་ཡོད་མེད་ལ་གཏན་ནས་མི་བལྟ་བར་བུ་བཙན་ཤེད་ཀྱིས་དགོན་སྡེར་སྤྲུལ་སྐུར་མངའ་གསོལ་བྱ་རྒྱུར་ཐག་བཅད།
     མཚན་མོ་དེར། ཁོ་རང་འདུག་སའི་སྦྲ་གུར་དེའི་ནང་དུ་ཆོས་ཀྱི་སྒྲ་དབྱངས་ལྷང་ལྷང་དུ་གྲགས་ཤིང་། རྒྱུས་ཡོད་རྒྱུས་མེད་ཀྱི་མང་ཚོགས་དད་ལྡན་པ་མང་དག་ཅིག་ཐོན་འདུག་པས། དུས་རྒྱུན་ཁ་ཁུ་སིམ་པའི་སྦྲ་གུར་དེའི་ནང་ད་ལྟ་འདུ་འཛིའི་ཡོ་ལང་ཞིག་གིས་ཡོངས་སུ་འཁྲིགས་འདུག ནངས་ཁ་སྔ་མོ་ནས་ཆ་རྒྱུས་མེད་པའི་གྲྭ་རྒན་དེ་དག་དང་ལྷན་དུ་དགོན་སྡེར་འགྲོ་དགོས་པའི་གནས་ཚུལ་རྣམས་དྲན་ན་ཁོ་ལ་གཉིད་ཁུག་འདོད་ཀྱི་དང་ཁ་ཡེ་ནས་མིན་འདུག
     ཁོ་རང་སྐྱེས་པ་ནས་ད་བར་དུ་ཁོ་རང་འཚོ་གནས་བྱ་ཡུལ་གྱི་སྦྲ་གུར་དེ་དང་བྱམས་བརྩེ་ཅན་གྱི་ཕ་མ་གཉིས་དང་ཁ་བྲལ་ཏེ་ཡུལ་གཞན་དུ་གཏན་ནས་འགྲོ་མ་མྱོང་། ད་ཆ་རྒྱུས་མེད་ཀྱི་ཡུལ་གྲུ་ཞིག་ཏུ་ལུག་རྫིའི་ལས་སྤངས་ནས་སྤྲུལ་སྐུ་བྱེད་པར་འགྲོ་དགོས་རྒྱུ་ནི་ཁོ་ལ་མཚོན་ན་མནར་གཅོད་ཅིག་ཅི་ལ་མིན། ནམ་རྒྱུན་དགོད་རྒྱུར་དགའ་བའི་ཁོ་རང་དོ་ནུབ་ངུ་ཤུམ་དབང་མེད་དུ་ཤོར་བྱུང་། ཁོའི་ངུ་སྒྲ་དེས་རྩྭ་ཐང་གི་མཚན་མོ་དེའི་ལྷིང་འཇགས་དཀྲུགས་སོང་། དེ་ནི་ཁོ་རང་གི་གཅེན་མོ་ཕ་མའི་བཙན་ཤེད་ལ་བརྟེན་ནས་མ་འདོད་བཞིན་དུ་གནས་ལ་བསྐྱལ་བ་ཇི་བཞིན་ཁོ་རང་གི་མིག་ཟུང་མིག་ཆུས་ཡོངས་སུ་བསྒྲིབས་ནས་མིག་མདུན་གྱི་ཡོད་ཚད་མག་མོག་ཏུ་གྱུར་སོང་། མག་མོག་ཏུ་གྱུར་སོང་།