བོད་འདིར་སྔ་བའི་སྣར་ཐང་བཀའ་འགྱུར་དང་།།སི་ཏུ་དགེ་བློའི་ཚལ་པ་བཀའ་འགྱུར་དང་།།རྒྱལ་རྩེ་ཐེམས་སྤང་གྲགས་པའི་བཀའ་འགྱུར་རྒྱུན།།རྒྱ་ནག་ཏཱ་མིང་རྒྱལ་པོའི་བཀའ་འགྱུར་རྒྱུན།།འཇང་ཡུལ་རྒྱལ་པོས་བཞེངས་པའི་བཀའ་འགྱུར་པར།།དེང་སང་ལི་ཐང་བཞུགས་པ་འདི་ཉིད་དང་།།ཨ་གཉེན་པཀྵིའི་ཐུགས་དམ་བཀའ་འགྱུར་དང་།།རྒྱལ་དབང་ལྔ་པའི་དགོངས་བཀོད་ལྷོ་རྫོང་གི།།བཀའ་འགྱུར་བཅས་དང་འདུལ་མདོ་ཤེར་ཕྱིན་དང་།།གསང་སྔགས་རྒྱུད་འབུམ་བཅས་པ་སོ་སོ་ཡི།།དཔེ་ཁུངས་བཙུན་པ་རྣམས་དང་གོ་བསྡུར་ཞིང་།།ཁྱད་པར་སྙིགས་དུས་བསྟན་པའི་སྒྲོན་མེ་མཆོག།མཁས་པ་ཆེན་པོ་བུ་སྟོན་རིན་ཆེན་གྲུབ།།གང་གིས་དཀར་ཆག་བཏབ་པ་ཚད་མར་འཛིན།།གཞན་ཡང་བྲིས་པ་ལས་འཛིན་ལེ་ལོ་ཡིས།།ནོར་འཁྲུལ་སོར་ཆུད་ལོག་དཔྱོད་བསྒྱུར་ཉེས་རྣམས།།འཕགས་ཡུལ་རྒྱ་དཔེའི་སྟེང་ནས་བསྒྱུར་ཞིང་ཞུས།།གཏན་ལ་ཕབ་ཅིང་ཐེ་ཚོམ་བྱུང་བ་རྣམས།།རྒྱ་འགྲེལ་དང་བསྟུན་ཚད་མ་ཉིད་དུ་བཅོས།།སྔགས་བཏུ་ཡོད་པ་དེ་ཉིད་དག་དང་བསྟུན།།ལེགས་པར་ལེགས་སྦྱར་སཾ་སྐྲྀ་ཏ་ཡི་སྐད།།འགྲོ་ལྡིང་སྐད་དང་པི་ཤཱ་ཙི་ཡི་སྐད།།ཟུར་ཆག་ཨ་བ་བྷྲཾ་ཤའི་སྐད་དང་ནི།།གསང་བ་བརྡ་ཡི་སྐད་སོགས་སྒྲ་སྐད་རྣམས།།ཀུན་ལ་ཐོགས...

མ་དག་པར་ཤེས་པ་རྣམས་ཤད་འཐེན།རྐང་ཆད་པར་ཐིག་ལེ།ཐེ་ཚོམ་ཟོས་པར་གསུམ་འཁྱོགས།གོང་འོག་འཁྲུགས་པར་རྒྱ་གྲམ་གམ་ཀ་ཐོས་བརྒྱན་པ།མ་དག་པ་ཆེན་པོ་འདུག་པ་ཞ་ལུ་ལོ་ཙཱ་བའི་སྔགས་འབུམ་དང་བསྟུན་ནས་ཤོག་མཚན་རྣམས་རང་གི་བློ་སྟོབས་ཀྱིས་གང་ནུས་ཞུས།མཁས་པའི་དབང་པོ་ཡིན་ངེས་སྦྱངས་པ་ཅན་བློ་གཟུ་བོར་གནས་པ།ཤ་བ་ཆེ་ལ་རིལ་མ་ཆུང་བ་མ་ཡིན་པ་རྣམས་ཀྱི་བདག་གི་འདི་བས་ལྷག་པ་མཛད་དུ་ལོ་ན་བརྩེ་བས་གཟིགས་ནས་བསྟན་པའི་ག་བརྡར་དང་སྟོན་པ་དང་མཁས་པའི་དྲིན་གཟོ་མཛོད་ཅེས་གསོལ་བ་གདབ་སྤྲོ་ལགས།མཆན་ཡིག་འབེབས་ཚུལ།ཞུས་དག་བྱེད་ཚུལ།མཆན་ཡིག་འབྲི་ཚུལ་རྣམས་སྤང་ལོའི་གསུང་བཞིན་བཀོད།ཤུ་བྷཾ།།།།...

ཡོན་གནས་བླ་མེད་མང་ཐོས་ཟིལ་མངར་འབུམ།།ནན་ཏན་གུས་རྟག་བརྩོན་པའི་ལྟོར་སྐྱིལ་ཞིང་།།རྒྱ་ཆེན་ལུང་རིགས་བུང་བ་རྩེན་པའི་གཞི།།མཚོ་བྱུང་སྨྲ་བའི་འདབ་ལྡན་གང་དེའི་དྲུང་།།ཤེས་འཆལ་གཡའ་རྡོ་དགུང་དུ་བརྩེགས་པའི་རྩེར།།རབ་རིབ་རྨོངས་པའི་ན་བུན་འཁོར་བ་ལས།།རྒྱ་སྐྱེགས་མཆུ་སྒྲོས་སེམས་ཀྱི་ཁྱེ་འུ་ཆུང་།།མཚོ་བས་ཟབ་པའི་གཡང་སར་ཕྱོགས་དེས་ཞུ།།ཡོན་ཏན་ཆུ་བོ་ནང་དོན་ནོར་འཛིན་མར།།རྒྱ་མཚོ་མཁའ་ལ་ལུད་པའི་དཔེར་འཕྱུར་བས།།ཡོན་ཏན་ཆུ་ཡིས་སྐོམ་པའི་གདུང་སེལ་ལ།།རྒྱ་མཚོ་སྟོང་གི་བརྟུལ་ཞུགས་འཛིན་པ་ནས།།...

རིགས་ལམ་ཕྲ་མོ་ཕྱེད་པའི་རྣམ་དཔྱོད་དང་།།གཞུང་ལུགས་གདམས་པར་ཤར་བའི་ཉམས་ལེན་དང་།།ཚིག་སྦྱོར་ཚུལ་ལ་མཁས་པའི་ངག་གི་དཔལ།།ས་སྟེང་འདི་ན་རིན་ཆེན་རྣམ་གསུམ་སྣང་།།འདི་ནི་ཤིན་ཏུ་དཀོན་ཞིང་འདོད་པ་འཇོ།།རྨད་དུ་བྱུང་བའི་དགའ་བ་རྒྱས་བྱེད་པས།།རིན་པོ་ཆེ་ཞེས་མཁས་པ་རྣམས་ལ་གྲགས།།མཁས་པའི་ཡིད་འཕྲོག་རིན་ཆེན་གཞན་ཡོད་མིན།།སྨྲ་བའི་ཁྱུ་མཆོག་འཕགས་པ་ཡབ་སྲས་དང་།།ལོག་སྨྲ་ཚར་གཅོད་ཕྱོགས་གླང་གྲགས་པ་ལས།།ལེགས་པར་འོངས་པའི་རིགས་ལམ་བདུད་རྩིའི་ཆུས།།བློ་མིག་དྲི་མ་ཡང་ཡང་མ་བཀྲུས་ན།།ཤིན་ཏུ་ཟབ་གནས་མཐོང་བ་སྨོས་ཅི་དགོས།།...

དམ་པའི་སྐྱེས་བུ་འགའ་ཞིག་མདོ་སྔགས་ཀྱི།།ལམ་བཟང་སྒྲུབ་ཚུལ་བསླབ་བྱ་བྱེད་པ་པོ།།རང་ཉིད་བསམ་ཞིང་རང་ལ་ཡི་མུག་སྐྱེས།།འདི་ཕྱིའི་སྐྱབས་སུ་བླ་མ་བསྟེན་ན་ཡང་།།བདེན་ཁ་རང་གིས་བཟུང་བ་ཡིད་རེ་མུག།...

བྱང་ཕྱོགས་གངས་རིའི་ཁྲོད་འདིར་དམ་ཆོས་དང་།།ཟང་ཟིང་རྙེད་བཀུར་ཕུན་ཚོགས་མཐའ་ཡས་ཀྱི།།འཁོར་ལོ་བསྒྱུར་བའི་འཕགས་མཆོག་ས་སྐྱ་པ།།བློ་གྲོས་རྒྱལ་མཚན་ཞབས་དེར་གུས་ཕྱག་འཚལ།།འཛམ་གླིང་འདི་ན་མཁས་དང་གྲུབ་པ་ཡི།།སྙན་གྲགས་འདོད་རྒུར་སྤེལ་བའི་འབྱུང་ཁུངས་ཆེ།།ཆོས་སྲིད་སྦྱིན་པའི་བདག་པོ་ས་སྐྱ་པ།།ཁུ་དབོན་བརྒྱུད་པར་བཅས་དེར་ཕྱག་འཚལ་ལོ།།འདི་ལྟའི་བསྟོད་མཆོད་དགེ་བའི་རྒྱུ་ཉིད་ཀྱིས།།སྡོམ་གསུམ་རབ་དབྱེ་ཞེས་གྲགས་བསྟོད་དེའང་།།དཔལ་ལྡན་དྭགས་པོས་བཞེད་པའི་ཕྱག་རྒྱ་ཆེའི།།ཕྲིན་ལས་ཕྱོགས་བཅུར་རྒྱས་ཆེད་བསྔོ་བར་བགྱི།།...

གཤམ་དུ་བཀོད་པའི་གསུང་རྩོམ་དེ་ནི་གྲུབ་ཆེན་ཐང་སྟོང་རྒྱལ་པོས་གསུངས་པའི་བསླབ་བྱ་ཞིག་གོ།གང་དེའི་རྩོམ་ལུགས་དང་ཚིག་འགྲོས་ཐུན་མོང་མ་ཡིན་པ་དེས།ཕྱིས་ཀྱི་གུང་ཐང་སློབ་གཉེར་བསླབ་བྱ་སོགས་བོད་ཀྱི་བསླབ་བྱའི་རྩོམ་རིག་གི་རྩོམ་ལུགས་རྩོམ་སྟངས་ཐད་ལ་ཤུགས་རྐྱེན་ཐེབས་ཡོད་ལས་ཆེ།རྩོམ་རིག་སྤྱི་དང་སྒོས་སུ་བསླབ་བྱའི་རྩོམ་རིག་སྐོར་ལ་ཞིབ་འཇུག་གནང་མཁན་ཚོར་དཔྱད་གཞི་ཙམ་དུ་ཕུལ་བ་དགེའོ།།...

རྗེ་བཙུན་འཇམ་པའི་དབྱངས་ཀྱི་རྣམ་འཕྲུལ་ཆོས་ཀྱི་རྗེ་ས་སྐྱ་པཎྜི་ཏ་ཆེན་པོ་ཀུན་དགའ་རྒྱལ་མཚན་ལ་བསྟོད་པ་ཤླཽ་ཀ་བཅོ་ལྔ་པ་འདི།ཤཱཀྱའི་དགེ་སློང་ཆོས་ཀྱི་གྲགས་པས་ལྕགས་ཕོ་འབྲུག་ལོ་ཟླ་བ་དགུ་པའི་ཉེར་ལྔ་ལ་བྲིས་པའོ།།།།...

ཀྱེ་མ་ཀྱི་ཧུད་རྩ་གསུམ་རྒྱལ་བ་ཡི་ལྷ་ཚོགས།།སྙིགས་མའི་འགྲོ་ལ་ཡེ་ཤེས་ཐུགས་རྗེ་ཡིས་གཟིགས་དང༌།།རང་དང་གཞན་གྱི་སྤྱོད་ཚུལ་སྣ་ཚོགས་ལ་བསམ་ན།།གདུང་བའི་སྨྲེ་སྔགས་མི་འདོན་རང་དབང་ནི་མི་འདུག།ཐོབ་དཀའི་དལ་རྟེན་དོན་མེད་ཆུད་ཟོས་ལ་གཏོང་ཞིང༌།།ངེས་མེད་འཆི་བའི་བག་ཟོན་གྱི་ན་རུ་བོར་ནས།།རྒྱུ་འབྲས་ཞིབ་པར་མི་བསམ་ལས་ངན་གྱི་བཙུན་གཟུགས།།ང་དང་ང་འདྲ་ཡོད་ན་ཐུགས་རྗེ་ཡིས་གཟིགས་ཤིག།...

འདི་ནི་བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པ་ལགས།དེའང་འབྲུག་པ་ཀུན་ལེགས་ཀྱི་མགུར་མ་ཕལ་ཆེར་ཟློག་སྒོམ་གྱི་ཚུལ་དུ་བཟང་ངན་གཉིས་རེ་སྦྲགས་ཏེ་ཉམས་དོད་པོ་ཞིག་འདུག་པའི་ལད་མོ་བྱས་པ་ཡིན།ལད་མོ་ཞེས་པའང་བཤད་ལུགས་དབྱིབས་མཚུངས་བྱས་པ་ཡིན་གྱི།འགའ་ཞིག་ལྟར་ཚིག་བརྐུས་པ་དང་དོན་གཡར་བ་ནི་མིན་ནོ།།...