སྨྱུ་གུའི་རྒྱུ་དང་སྨྱུག་བཟོའི་ཤེས་བྱ།

  དེ་ལ་བྲི་སྨྱུག་འོས་པའི་སྨྱུག་མ་ངེས་འཛིན་དང་སྨྱུ་གུ་ལེགས་བཅོས་བྱ་ཐབས་ནི།  སྨྱུག་མ་ལ་རིགས་མང་པོ་ཡོད་པས་སྨྱུ་གུའི་རྒྱུར་འོས་པའི་སྨྱུག་མ་ནི།  ནང་གི་སྦུ་གུ་ཕྲ་ཞིང་བཏེགས་ན་ལྕི་བ།  སྡོང་བོ་ཆེར་སྐྱེས་པའི་སྨྱུག་མ་ཤ་མཐུག་ཅིང་མ་འཆུས་པ།  མདོག་སེར་ཞིང་ཕྱི་རྩེ་འཇམ་ལ་འོད་དང་ལྡན་པ།  རྒྱུ་སྲ་བས་སོས་མནན་ན་འདྲེད་པར་འགྱུར་བ་དེ།  ཡིག་རིགས་དང་གསེར་དངུལ་མཚལ་སྣག་ཐམས་ཅད་ལ་མཆོག་ཏུ་བཤད་དོ།།

སྨྱུག་རྒྱུ་སྲ་བར་བཅོས་ཐབས་སུ།  ཡུན་རིང་དུད་ཁར་བཞག  བ་རྐང་རྙིང་པ་རབ།  མ་རྙེད་ན་རྐང་མར་རྙིང་པས་བྱུགས་ནས་བརྔོས་མ་ཐག་གི་ཡོས་ཚན་ནང་དུ་བཅུག་ནས་ལེགས་པར་འཕྱིས་ན་སྲ་མཁྲེགས་རུས་པ་ལྟ་བུར་འགྱུར་རོ།།

  གཞན་ཡང་འཇང་སྨྱུག་ཅེས་པའི་མདོག་ནག་པོ་སྦུ་གུ་ཅན་ནི་སུབ་ཅེས་ཏེ་དཀྱུས་ཡིག་འབྲི་བ་ལ་བདེ་བ་དང་།  ལྕགས་སྨྱུག་ནི་གསུང་རབ་གཏོས་ཆེ་རྣམས་ལ་བཟང་བ་དང་།  ལྷོ་སྨྱུག་རོང་སྨྱུག་སྤུས་ལེགས་དག་གིས་ཀྱང་སྨྱུག་གུར་འོས་པ་སོགས་བཤད་ཀྱང་།  སྔོན་བྱོན་མཁས་པས་མཛད་པའི་གསུང་བཟོའི་བསྟན་བཅོས་སུ་གསལ་བ་ཙམ་ལས་དེང་དུས་སུ་སྨྱུག་མའི་རིགས་འདི་དག་ངེས་ཟིན་མཁསན་དང་།  དེ་མཚུངས་ཀྱི་ལས་ཀ་ཞིབ་ཚགས་ཐུབ་མཁན་བཟོ་བ་ཉུང་མོད།  མདོར་ན་སྨྱུ་གུའི་རྒྱུ་ནི་སྨྱུག་ཤ་མཐུག་ཅིང་སྲ་མཁྲེགས་ཅན་ཞིག་ངེས་པར་དགོས་སོ།།  སྨྱུག་གུ་བཟོ་ཐབས་ལ།  མཐོ་གང་བས་མི་རིང་ཞིང་མཐེབ་མཛུབ་བས་མི་ཐུང་བ།  རན་པ་འཛིན་བདེར་གཞོག་རྩེ་སོར་ཕྱེད་གཉིས་གཞལ་བའི་སར་ཁམས་གཉིས་གཞོག  སུམ་གཉིས་རྫིང་ཞགས་དང་སུམ་གཅིག་མཆུ་བྱས་ཤིང་།  མགྱོགས་བྲིས་འབྲི་བར་གས་ཆེན་དང་ལེགས་པར་འབྲི་བར་གས་ཆུང་བྱས་ཏེ་རྫིང་འདྲ་ཡུར་བ་འདྲ་བ་ཞེས་སྨྱུག་རྒྱབ་ནས་བལྟས་ན་གཡས་གཡོན་ཆ་སྙོམས་པ།  རྫིང་མཆུ་ཧ་ཅང་མི་སྲབ་ཅིང་བཅད་ཁ་སྟེ་མཆུ་ཅུང་ཟད་གསེག་པར་བཅད།  ཚེག་བྲིས་འབྲི་ན་མཉམ་པར་བཅད།།  ཟླུམ་བྲིས་འབྲི་ན་ཉིས་ཆོད་བྱ།།  སྨྱུག་ཁ་ཆིག་ཆོད་བྱས་གྱུར་ན།།  ཡི་གེ་ལེགས་པའི་གནད་གཅིག་ཡོད།།  སྨྱུག་ཁ་ཉིས་ཆོད་བྱས་གྱུར་ན།།  སྨྱུག་ཁ་སྲ་བའི་གནད་ཅིག་ཡོད།།  གསུམ་ལྡན་ལྔ་འཛོམས་ཞེས་པའི་དོན།།  སྨྱུག་གུ་མཆུ་ལ་མཁས་གྱུར་ན།།  ཡི་གེའི་འབྲི་ལ་མཁས་པར་བཤད།།  ཅེས་པ་སོགས་ནི་སྨྱུག་མའི་སྨྱུ་གུ་བཟོ་ཐབས་ཁོ་ན་ཙམ་ཡིན་གྱི་དེང་དུས་ཀྱི་ལྕགས་སྨྱུག་སྣ་ཚོགས་དང་།  རང་འབབ་ཆུའི་སྨྱུག་གུ་དང་།  བོད་ཀྱི་ཡི་གེ་འབྲི་བ་ལའང་འབྱོར་བའི་མི་རིགས་ཀྱི་སྨྱུ་གུ་ལ་སོགས་སྨྱུག་གསར་རྣམ་གྲངས་མང་པོ་དག་ལ་མ་ཡིན་ཡང་།  བོད་ཀྱི་ཡིག་གཟུགས་ཚད་དང་ལྡན་པ་ཞིག་འབྲི་བར་འདོད་ན་སྨྱུག་མའི་སྨྱུ་གུ་ལས་ལྷག་པ་མེད་དོ།།                  《བཟོ་གནས་སྐྲ་རྩེའི་ཆུ་ཐུགས》ལས།