བོད་ཀྱི་རི་མོ།

ཨ་མདོ་བྱམས་པས་བྲིས་པའི་པཎ་ཆེན་སྐུ་ཕྲེང་བཅུ་པ།

   བསིལ་ལྡན་གངས་རིའི་ལྗོངས་སུ་ལྷ་སྐུ་བཞེངས་སྲོལ་སྟོན་པ་གཤེན་རབ་དུས་ནས་ཡོད་པར་སྙམ་ཡང་དཔྱད་པར་འཚལ། ཕོ་བྲང་ཡུམ་བུ་བླ་སྒང་གི་ཉེ་འདབས་སུ་རྡོ་ཕ་བོང་དང་བྲག་གི་ངོས་ལ་རི་མོ་མང་པོ་ཡོད་པ་དེར་ཞིབ་ཕྲས་བལྟས་ཚེ་ཕྲུ་གུ་མང་པོའི་རྩེད་མོ་རྩེ་བའི་རྣམ་པ་དང༌། ཡང་ཕྲུ་གུ་མང་པོ་རུབ་ནས་ཕྲུ་གུ་གཅིག་སྒལ་བར་འཁུར་ནས་འགྲོ་བ་སོགས་རི་མོ་གསལ་ལ་མི་གསལ་བ་ཞིག་ཡོད་པ་སྔར་གཉའ་ཁྲི་བཙན་པོ་མི་རྣམས་ཀྱིས་གཉའ་ཡི་སྟེང་དུ་འཁུར་ཟེར་བའི་གཏམ་དེ་དངོས་གནས་ཡིན་རྒྱུ་རེད་བསམ་བྱུང་ཞེས་དགེ་ཆོས་རིན་པོ་ཆེས་གསུངས། ཆོས་རྒྱལ་སྲོང་བཙན་སྒམ་པོའི་སྐུ་རིང་ལ་བྲིས་པའི་རི་མོ་ནི་གཙུག་ལག་ཁང་དུ་སྔར་མང་པོ་ཡོད་ལ། ཞོལ་ཁང་གི་བྱང་ངོས་ཀྱི་རྩིག་སྟེང་དུ་རྒྱལ་བ་རིགས་ལྔ་དང༌། དག་པ་ལྕང་ལོ་ཅན་གྱི་ལྷ་ཁང་གི་ལྷོ་ངོས་ཀྱི་རྩིག་སྟེང་དུ་གཙུག་ལག་ཁང་གསར་བཞེངས་སྐབས་ཀྱི་ས་ཁྲའི་རི་མོ་གསལ་ལ་མི་གསལ་བ་ཆ་ཚང་བ་ཞིག་ཡོད་པ་དང༌། བལ་བོད་ཟུང་འབྲེལ་གྱིས་བཞེངས་པའི་བར་ཐོག་གི་ལྷ་ཁང་གཡས་གཡོན་དུ་ལྡེབས་རིས་མང་པོ་ཡོད་པ་ཚང་མ་ཡིད་རབ་ཏུ་སྐྱོ་བ་ཞིག་ལ་ཉམས་གསོ་སྐབས་རྩ་ཆེ་བའི་རི་མོ་ཐམས་ཅད་མིག་གི་ལམ་ལས་འདས་པར་གྱུར། གཞན་སྲོང་བཙན་དུས་སུ་བཞེངས་པའི་རི་མོ་དང་འབུར་སྐུ་མང་པོ་སྔར་ཕ་བོང་ཁ་དང༌། བྲག་ར་ཀླུ་སྤུག ཁྲ་འབྲུག་མངའ་རིས་སོགས་སུ་འདུ་ཁང་དང་རྡོའི་སྟེང་དུ་མང་པོ་མཇལ་རྒྱུ་ཡོད་ལ། དུས་དབང་གིས་དེང་སྐབས་རེ་ཟུང་ལས་མི་འདུག ཐིག་རྩ་ལ་བསྟུན་པ་དང་མ་བསྟུན་པའི་ལྷ་ཡི་བཞེངས་སྲོལ་འདྲ་མིན་ཡོད་ན་ཡང་གཙོ་བོ་བོད་མིའི་གོམས་སྲོལ་དང་མཐུན་པ་ཞིག་བཞེངས་ཡོད། སྤྱིར་སྟོན་པའི་ན་བཟའི་ཁ་དོག་སོགས་ངེས་ཡོད་པ་ལས་མདོག་སྣ་མང་མནབས་པའི་ལུགས་སྲོལ་མེད་ཀྱང་ང་ཚོ་བོད་ལ་སྟོན་པའི་ན་བཟའ་ལ་གསེར་གྱི་བྱ་འབྲུག་ཁ་སྤྲོད་ཅན་གྱི་གོས་ཆེན་དང༌། འོད་མདངས་ཆེ་བའི་རི་མོ་མང་པོ་ཡོད་པའི་གོས་ཆེན། ན་འཟའ་ནང་ཤ་སྔོན་པོ་དང་ལྗང་ཁུ། སྐེ་རགས་དར་ལྗང་ཁུ་བཅས་རང་མི་རིགས་ཀྱི་གོམས་གཤིས་ཆེ་བའི་གོས་ཆེན་སོགས་ཕུལ་བའི་སྲོལ་ཡོད། གཞན་ཡང་གནས་ཆུང་རྒྱལ་པོ་དང་དམ་ཅན་མགར་ནག་སོགས་ཀྱི་དབུ་ཞྭ་དང་ན་བཟའ་བེར་ཞེས་པ་སྔོན་བོད་ཀྱི་བཙན་པོ་དང་མི་སྣ་གྲགས་ཅན་གྱི་དབུ་ཞྭ་དང་གྱོན་ཆས་དེ་ཕུལ་བ་དང༌། བྱང་གི་གཉན་ཆེན་ཐང་ལྷ། སྨད་ཀྱི་རྨ་རྒྱལ་སྦོམ་ར་སོགས་ལྷ་མཐུ་བོ་ཆེ་ཀུན་གྱི་ན་བཟའ་ཡང་ལྷ་དེ་དང་དེའི་གནས་རི་ཉེ་འདབས་ཀྱི་ཡུལ་མི་ཚོའི་གྱོན་ཆས་ཕུལ་སྲོལ་ཡོད་པ་དཔེར་ན། རྨ་རྒྱལ་སྦོམ་རའི་དབུ་ཞྭ་དང་ན་བཟའ་དེ་ཡང་ཡུལ་མིའི་དབྱར་ཞྭ་ཞེས་པའི་ལ་ཐོད་ཐད་རྩེ་མོ་རྣོ་བའི་སྟེང་ལ་ཇ་ལ་དམར་པོ་ཤལ་ཤལ་ཡོད་པ། ལྭ་བ་དཀར་པོ་ཕུ་ཐུང་ཆེན་པོ་ལྷབ་ལྷབ་རེ་གྱོན་པའི་སྲོལ་དེ་ཕུལ་ཡོད། བོད་ཀྱི་ས་ཁུལ་གང་སར་བཙན་ཁང་མང་པོའི་ནང་དུ་བཙན་ཞེས་ལྷ་དྲག་པོར་བཞེངས་སྲོལ་ཡོད་པ་དེ་ཚོར་ཡང་བཙན་གྱི་ཐ་སྙད་ཆགས་པ་དེ་ཡང་སྔོན་གྱི་བཙན་པོ་རྣམས་ཀྱི་མཚན་རང་གི་སྐྱེས་ལྷར་ཆེད་བསྟོད་བཅོས་ཏེ་ཕུལ་བ་དང༌། དབུ་ཞྭ་ལ་ཡང་བཙན་ཞྭ་ཞེས་པའི་མིག་གསུམ་རྒྱབ་ཡོད་པའི་ལ་ཐོད་ཀྱི་དབྱིབས་ཅན་དེ་སྔོན་བཙན་པོའི་དབུ་ཞྭ་ཕུལ་བའི་སྲོལ་དང༌། མིག་གསུམ་བྲིས་པ་དེ་ནི་རང་གི་སྐྱེས་ལྷ་ཡེ་ཤེས་པ་ཡིན་པར་ཆེད་དུ་བསྟོད་པ་བྱས་པ་ཞིག་ཡིན། ལུགས་སྲོལ་འདིས་མི་ཆས་ལྷ་ལ་ཕུལ་བའི་སྲོལ་ཡོད་པའང་ཤེས་ཐུབ། མདོར་ན་ལུང་བ་གང་དང་གང་ཡིན་རུང་ཞི་ཁྲོའི་ལྷ་གང་བཞེངས་ཀྱང་རང་མི་རིགས་ཀྱི་རྣམ་པ་དང་ན་བཟའ་སོགས་སོ་སོའི་མི་རིགས་ཀྱི་ཁྱད་ཆོས་ལྡན་པའི་གོམས་སྲོལ་ཕུལ་བཞིན་ཡོད་པ་སྙམ་ཡང་དཔྱད་པར་འཚལ།