མག་པའི་རྣ་འབྱོག་འཐོག་པ།

       བག་སྐར་ཉིན་དེར་ཐོན་ལ་ཉེ་དུས་བག་མའི་ཁ་སྒག་ཅེས་པའི་ཟ་མ་ཉུང་ངུ་ཞིག་ལས་མི་འཇུག་པ་རེད། ཟས་ཟ་ཚད་ཆེས་དྲགས་པས་ཁོག་པ་མ་བདེ་ན་ཤིན་ཏུ་ངོ་ཚ་ཆེ་ལ་ཟས་ཚོད་འཛིན་པའི་སྲོལ་རྒྱུན་གྱི་བྱེད་ཐབས་ཞིག་ཡིན།  བག་མ་གནས་ལ་འགྲོ་བའི་ཉིན་མོར་ངོ་མདངས་ཇེ་དཀར་ལ་འགྲོ་བ་དང་།  བག་མའི་ཁ་ངོ་སོས་པའི་ཆེད་ངལ་གསོས་གནང་སྟེ་ནང་ལ་འཛུལ་ནས་ངལ་རྩོལ་བྱེད་དུ་མི་འཇུག་པ་དང་ཡུལ་གྱི་ལས་ཀ་ཙག་ཙིག་ཀྱང་བྱེད་དུ་མི་འཇུག་པ་རེད།  དེ་བུ་མོར་མི་ཚེ་བགྲོད་ལམ་རིང་མོ་ནང་འཐོབ་པའི་དམིགས་བསལ་གྱི་ཆ་རྐྱེན་ཡིན་ཞེས་བརྗོད་ན་མི་ཆོག་རྒྱུ་མེད།
       གཏན་འཁེལ་བའི་ཉིན་དེར་ཐོན་པ་ན་བར་བ་དང་མག་པ་གཉིས་ཀྱིས་བག་རྟ་དཀར་བོ་སྒོང་བ་འདྲ་ཞིག་ལ་སྒ་ཆས་དང་བཅས་འཁྲིད་པ་དང་གྱོན་ཆས་ཆ་ཚང་ཁྱེར་ཡོང་ཏེ་ཨ་ཕ་དང་ཨ་ཁུ་འདུས་པའི་མདུན་དུ་གདན་དཀར་ཞིག་བཏིངས་ནས་བར་བས་དང་ཐོག་ཡར་མགོ་ལ་ཝ་མོ་འཇོག་ལ།  རིམ་བཞིན་ཚར་ལྭ།  ཕྲུགས་ལྭ། ཐོག་ལྭ། སྐ་རགས། སྟོད་ཐུང་། དོར་མ། སྐྱ་ལོང་། སྐེ་རྒྱན་སོགས་གཅིག་ཐོག་གཅིག་བརྩེགས་ཏེ་རྐང་འབོལ་དང་ཀོ་ལྷམ་མཇུག་ལ་བཞག་སྟེ་རེ་རེ་སྔར་གྲོས་ཤ་གྲོས་ཆང་ཐོག་གཏན་ལ་ཕབ་པ་རྣམས་རྩིས་སྤྲོད་དང་ཞིབ་བཤེར་བྱས་རྗེས། དགུང་མོ་ཉི་མ་ནུབ་ཁད་ལྷས་རྭའི་རྡང་ཐོག་ལ་འཕངས་ཏེ་སྡེ་བའི་སྐྱེ་དམན་ཚང་མ་འདུ་ལོང་ཆེན་པོའི་ངང་ནས་མ་བོས་མགྲོན་དུ་བཀུག་པ་བཞིན་ཐོན་གྱིན་ཡོད། དེ་གའི་གྱོན་ཆས་བཟང་ངན་དང་མང་ཉུང་སོགས་ལབ་ལྒིང་སྣ་ཚོགས་བྱེད་པ་ནི་སྡེ་བ་དེར་གསར་འགྱུར་གསར་བ་ཞིག་སྐྱེལ་ཡོང་བ་དང་གཉིས་སུ་མ་མཆིས་པས་ཉིན་དུ་མའི་རིང་གི་བརྗོད་གཞི་གསར་བར་གྱུར་འདུག
       ཉི་མ་ནུབ་ཁར་གྱོན་ཆས་དང་རྒྱན་ཆ་རྣམས་བལྟས་ཚར་རྗེས་རང་རང་གི་མལ་ཚང་དུ་འཕྱི་བ་ཁུང་དུ་འཛུལ་བ་བཞིན་སོང་ཚར་བ་ཡིན།  དགོང་ཚ་འཐུང་རྗེས། སྐྱེ་དམན་རྒན་གཞོན་ཚང་མ་སྟོན་ཁའི་ཤ་འོད་རྒྱུགས་པ་བཞིན་ཁྱིམ་ཚང་དེ་གའི་སྒོ་ཁར་ཐོན་གྱིན་འདུག  བར་བ་དང་མག་པ་གཉིས་སྙིང་ཆུང་ཆུང་ལུ་གུ་རྩེད་རྩེད་བཞིན་འདུག་པའི་གནས་མེད་པར་རྣ་འབྱོག་ཉོ་བྱེད་ཀྱི་ཁ་བཏགས་དང་།  གོས།  ཐེར་མ།  ཕྲུག་སོགས་གྲ་སྒྲིག་བྱེད་ཁར་ཨ་ཞང་ཚང་གི་ཉེ་འབྲེལ་དང་མག་པའི་ཤ་ཉེ་འདྲ་སྡེ་དེ་རུ་ཡོད་ན་མག་པའི་སྔུན་ནས་ལངས་ཏེ་རོགས་རམ་བྱེད་ཀྱིན་ཡོད། མག་པ་དང་བར་བ་གཉིས་འགྲོ་སའི་ཁུང་མ་རྙེད་པར་ཞི་ལ་ལག་ནས་སོ་མ་འཆོར་བའི་བྱི་བ་དང་མཚུངས་བར་ཐབ་ཚང་གི་གྲུ་ཁ་ཞིག་ལ་ཡིབ་ནས་འདུག
       མ་སྲུ་རྣམས་ཀྱིས་འཚང་ཁ་ཤིག་ཤིག་ཏུ་བརྒྱབ་ནས་བར་བ་འདྲུད་པ་དང་བར་མཚམས་འབྱེད་མཁན་རྣམས་འདྲུད་པར་བྱེད། སྡེ་བའི་གསར་བུ་རྣམས་ཀྱིས་མ་སྲུ་རྣམས་ལ་དཔུང་རོགས་བྱས་པ་བཞིན་སྔུན་ལ་ཕུད་རྒྱག་དང་ཤུགས་ཀྱིས་རྗེས་ནས་འདེད་པ་ཡིན།
མ་སྲུ་རྣམས་ཀྱིས་འུར་རྒྱག་པ་དང་མཉམ་ཏུ་བར་བའི་ལག་ནས་སྒོར་མོ་དང་གོས་ལིང་ལེན་པའི་རྩེད་མཚར་གྱི་རྣམ་པ་ཞིག་དང་མེད་དུ་མི་རུང་བའི་ཁོ་མོ་ཚོའི་འཐོབ་སྐལ་ཞིག་ཡིན་པས་ཚང་མ་སྤྲོ་སྣང་ཆེན་པོ་ལྡན་པ་ཞིག་ཡིན།
       སྐབས་དེར་མ་སྲུ་ཁ་བདེ་ལྕེ་བདེ་ཞིག་གིས་སྐད་གསེང་མཐོན་པོས།
ངེད་ཚང་གི་མ་སྲུ་ཆེ་རྒན་རྣམས། །
ཁ་རྒན་ལ་ཟ་ལོབས་ཡོད། །
ལག་རྒན་ལ་ལེན་ལོབས་ཡོད། །
ཁྱོད་ཀ་སྟོད་ན་སྟག་མོ་མཆོང་སའི་རྗེས་ཡོད། །
སྨད་ན་ཤིང་རྟ་དྲུད་སའི་བཤུལ་ཡོད་ཀི །
ཕྱུགས་རྫ་ལམ་ལ་ཁྱབ་ཡོད་ཀི །
ནོར་སྲིབ་ལམ་ལ་ཁེབས་ཡོད་ཀི །
ཚོང་ཉིན་ལམ་ལ་བཀང་ཡོད་ཀི །
མིང་ལོ་ལམ་ལ་གྲགས་ཡོད་ཀི །
དཔོན་གོ་ས་གཉིས་ཀྱིས་བཟུང་ཡོད་ཀི །
རྒྱུ་འབྱོར་བ་གཉིས་ཀྱིས་བཀང་ཡོད་ཀི །
ངེད་ག་མ་སྲུ་ཚོར།
གོས་ལེབ་ཆེན་རི་མགོ་ཁེབས་ནི་དགོས་ནས། །
ལེབ་ཆུང་རྒྱ་མཚོ་ཁེབས་ནི་དགོས་ནས། །
གསེར་སེར་བོ་སྲང་ལ་ཚད་ནི་དགོས་ནས། །
དངུལ་དཀར་བོ་བྲེ་ལ་འཇལ་ནི་དགོས་ནས། །
གཡུ་བྱུ་རུ་རྒྱ་གྲངས་ལོན་ནི་དགོས་ནས། །
དེ་རིང་རི་རབ་འདྲ་ཞིག་བརྩིག་དགོས། །
བྱ་རྒོད་པོ་མིན་ན་འཕུར་མི་ཐུབ་ནི། །
རྒྱ་མཚོ་འདྲ་ཞིག་བསྐྱིལ་དགོས། །
ཉ་གསེར་མིག་མིན་ན་རྐྱལ་མི་ཐུབ་ནི། །
དེ་མེད་ན་དེ་རིང་མག་པའི་རྣ་འབྱོག་འགོག་རྒྱུ་ཡིན།
       བར་བ་རྒན་པོས་རྟབ་རྟབ་པོར་རུམ་ནས་ཁ་བཏགས་བླངས་ཏེ།
ཡ  ངེད་ལག་གི་ཁ་བཏགས་དཀར་བོ་ལྷ་དགུ་འདི། །
ལྷ་མོ་བརྒྱ་ཡིས་བཀལ་ནི་ཡིན། །
ཀླུ་མོ་བརྒྱ་ཡིས་འཐག་ནི་ཡིན། །
སྤུན་སོ་གཅིག་གིས་འཆུགས་མེད་ནོ། །
སྐུད་པ་གཅིག་གིས་ཤོར་མེད་ནོ། །
སྟོད་དབུས་གཙང་ཡུལ་ལ་ཁྱེར་ན། །
དབུས་གཙང་བླ་མའི་མཇལ་དར་ཉན་ན། །
སྨད་རྒྱ་ནག་ཡུལ་ལ་ཁྱེར་ན། །
རྒྱ་ནག་རྒྱལ་བོའི་ཁྲིམས་དར་ཉན་ན། །
བོད་ཁ་བ་ཅན་ལ་ཡོང་ན། །
སྲིད་པ་བོད་ཀྱི་གཉེན་དར་ཉན་ན། །
ཁ་བཏགས་དཀར་བོ་གོས་ཀྱི་བསམ་དགོས།
ཁ་ཚིག་ཁ་བརྡ་རྟ་ཡི་བསམ་དགོས།
ཁ་རླངས་སྨུག་པོ་རྒྱུ་ཡི་བསམ་དགོས། །
མ་སྲུ་ཆེ་རྒན་ཚོ་བཤད་པ་ལོས་བདེན། །
ཁྱེད་ཅག་མ་སྲུ་ཚོ་ཁ་རྒན་ལ་ཟ་ལོབས་དང་།།
ལག་རྒན་ལ་ལེན་ལོབས་ཡོད་ཀྱང་།།
ངེད་ཚང་ལ་མཚོན་ན་ཕྱི་རྫ་རི་སྨུག་པོ།།
ནང་རྫ་ཁོག་སྐམ་པོ་ཡིན། །
ལག་རིང་འདོད་ཀྱི་ཕུ་རུང་ཐུང་གི །
ལུག་བསྐྱིལ་སའི་ཤུལ་ན་རྩྭ་མེད་ཀི །
མཁར་བརྡུང་སའི་ཤུལ་ན་ས་མེད་ནོ་རྒྱུ་མཚན་གྱིས་ཁ་བཏགས་དཀར་བོ་འདིས་མ་སྲུ་བརྒྱ་ཐམ་པ་དགའ་དགོས།ཞེས་བཤད་མ་ཐག--འུར་དིར་རུ--སོང་ལ།
       ངེད་མ་སྲུ་རྣམས་ལ་འདི་ཙམ་གྱིས་ག་ལ་ཆོག །
ངེད་ཅག་ལ་ལེན་པའི་སྲོལ་ཡོད། །
བགོས་པའི་སྐལ་ཡོད། །
ཁ་བཏགས་ཟད་པོ་གཡང་ར་འདི། །
ཕྱི་ནས་བལྟས་ན་ནང་རིག་ཀི །
ནང་ནས་བལྟས་ན་ཕྱི་རིག་ཀི །
ཐར་བཅད་ན་སྟེང་ནས་རླུང་མི་ཁོག་ཀི །
ལྟེབ་བཤིག་ན་ཁུག་ནས་ཆུ་མི་ཁོག་ཀི །
ཁ་བཏགས་ཆད་རུང་ལྷན་པ་མི་ཉན་ཀི །
སྟོད་དབུས་གཙང་ཡུལ་གྱི་ཕྲུག་དགོས། །
ཕྲུག་གཅིག་རུང་ཐིག་ལེ་མི་གཅིག་ནི་དགོས། །
སྨད་རྒྱ་ནག་ཡུལ་གྱི་གོས་དགོས། །
གོས་གཅིག་རུང་རི་མོ་མི་གཅིག་ནི་དགོས། །
བོད་ཁ་བ་ཅན་གྱི་རས་དགོས། །
རས་གཅིག་རུང་ཁ་ཚར་མི་གཅིག་ནི་དགོས། །
རི་ཆེན་ཞིག་གི་མགོ་ནས་བཤམས་ན། །
རི་སྐེད་ལ་དཀྲིས་གསུམ་རྒྱག་ནི་ཟིག །
དེ་ཟམ་ཆེན་ཞིག་གི་ཁ་ན་ཕྱར་ན། །
ཆུ་ཆེན་པོ་ཁ་ཞེང་གཡོགས་ནི་ཞིག །
འདོམ་ལ་འཇལ་ན་འདོམ་གྱིས་ལོན་ནི། །
ཞེང་གིས་འཇལ་ན་ཞེང་གིས་ལོན་ནི་ཟིག །
མི་ཆེན་ཞིག་གིས་ཕྲག་ལ་བླངས་ན་ས་རུ་འཁྱིལ་ལེ་འདུག་ནི་ཟིག་མེད་ན་མི་ཆོག
རས་ལོ་ད་ཤོག་མི་དགོས།
ད་ཁ་དུ་ཁ་མི་དགོས།
སྐུ་རས་ཁ་འཆལ་མི་དགོས།ཡིན་ནམ་མ་སྲི་ཚོ།ཞེས་ཧབ་ཆ་བརྒྱབ་ནས་འཚང་ཁ་ཤིག་ཤིག་གིས་བར་བ་ཚ་ཐབ་ཐོག་ནས་མར་འདྲུད་པ་ཡིན།