བོད་ཀྱི་གྱོན་ཆས་འཆར་འགོད་པ་བསྟན་འཛིན་རིན་དཔལ།

       དམག་ཞབས་ཐིམས་པའི་དམག་མི་ཞིག་ནས་གྱོན་ཆས་འཆར་འགོད་པ་ཞིག་གི་བར། ས་སྐྱེས་རྡོ་སྐྱེས་ཀྱི་ལྷ་སའི་གཞོན་སྐྱེས་མ་བསྟན་འཛིན་རིན་དཔལ་གྱིས་དགའ་ཞེན་དང་སྙིང་རུས་ལ་བརྟེན་ནས་བོད་མི་རིགས་ཀྱི་གྱོན་ཆས་རིག་གནས་རྒྱུན་འཛིན་དང་དར་སྤེལ་གཏོང་བར་འབད་བཞིན་ཡོད། ཁྱིམ་ཚང་གི་ཤུགས་རྐྱེན་དང་ཕ་མ་བཟང་པོའི་བཀའ་སློབ་བརྒྱུད་ཆུང་བྱིས་པའི་དུས་ནས་བོད་ཆས་གྱོན་པར་དགའ་བས། སློབ་གྲྭ་ཆེན་མོ་འགྲིམ་སྐབས་ཁོམ་པ་བྱུང་རིམ་བཞིན་འཆར་འགོད་ཀྱི་ལག་རྩལ་ཁག་ལ་སློབ་སྦྱོང་བྱེད་པ། སློབ་གྲྭ་ཐོན་རྗེས་སྔ་རྗེས་སུ་རྒྱལ་ནང་གི་མིང་གྲགས་ཡོད་པའི་སློབ་གླིང་ཁག་ཏུ་ཟབ་སྦྱོང་བྱེད་པར་བསྐྱོད། བསྟན་འཛིན་རིན་དཔལ་གྱིས་དེང་རབས་ཀྱི་འཆར་འགོད་འདུ་ཤེས་དང་སྲོལ་རྒྱུན་གྱོན་གོས་ཀྱི་མཛེས་ཉམས་མཉམ་འདྲེས་བྱས་ཏེ། བོད་ཆས་ལ་དུས་རབས་ཀྱི་གཞི་རྒྱུ་གསར་པ་སྣོན་བཞིན་ཡོད། ད་ལྟ་བོད་ལྗོངས་ལྷ་མོ་ཚོགས་པར་ཕྱག་ལས་གནང་བཞིན་པའི་ཁོང་གིས་གཟེངས་རྟགས་རེ་རེ་དང་འཆར་འགོད་བྱས་པའི་གྱོན་ཆས་རེ་རེས་བོད་ཀྱི་རིག་གནས་འཛམ་བུ་གླིང་དུ་ཁྱབ་སྤེལ་གཏོང་བའི་ཕུགས་འདུན་གསལ་པོ་མཚོན་ཐུབ།      དེ་ལྟར། ཁོང་གིས་སློབ་ཆེན་རིང་སྦྱངས་པའི་གཞུང་ལུགས་དང་འཆར་འགོད་ལག་རྩལ་གཅིག་པུར་བློ་ཡིད་ཚིམས་ནས་མ་བསྡད་པར། རང་ཉིད་ཀྱི་གྱོན་ཆས་འཆར་འགོད་བྱེད་པའི་ལག་རྩལ་གོང་མཐོར་གཏོང་ཆེད་དང་བོད་ཆས་ཀྱི་མཛེས་ཉམས་དེང་རབས་ཀྱི་ན་གཞོན་ཚོའི་མཛེས་དཔྱད་ལྟ་བ་དང་དེ་བས་མཐུན་པ་ཡོང་ཆེད། སློབ་གྲྭ་ཆེན་མོ་ཐོན་རྗེས། སྔ་རྗེས་སུ་ཀྲུང་གོ་ཟློས་གར་སློབ་གླིང་དང་པེ་ཅིང་བྲོ་གར་སློབ་གླིང་དུ་ཟབ་སྦྱོང་བྱེད་པར་བསྐྱོད། རྩེར་སོན་གྱི་སྒྱུ་རྩལ་སློབ་གླིང་དུ་ཁོང་གིས་རང་ཉིད་ལ་རེ་བ་ནན་པོ་བཏོན་ཏེ་གྱོན་ཆས་འཆར་འགོད་ཙམ་མ་ཟད། གར་སྟེགས་ཀྱི་མི་སྣ་དང་གྱོན་གོས་འཆར་འགོད་ཐད་ཀྱི་རིག་གཞུང་ཉིང་བསྡུས་ལ་སློབ་སྦྱོང་ཧུར་ཐག་གནང་བ་རེད། ཟློས་གར་མི་སྣའི་ལོ་རྒྱུས་དང་། རྒྱབ་ལྗོངས་དང་མཐུན་པའི་གྱོན་གོས་འཆར་འགོད། བྲོ་གར་དང་མཛེས་འཆོས་ཀྱི་ལག་རྩལ་ལ་སོགས་པའི་ནང་ཚན་མཐའ་དག་ལ་སྐོམ་པ་ཆུ་འདོད་བཞིན་དུ་སྦྱོང་གི་ཡོད།
       ཟབ་སྦྱོང་ལ་སྐྱོད་པའི་རྩ་ཆེའི་ཉམས་མྱོང་ནི་བསྟན་འཛིན་རིན་དཔལ་གྱི་སྒྱུ་རྩལ་ལམ་བུ་ཇེ་ཡངས་སུ་འགྲོ་བའི་རྒྱུ་རྐྱེན་གཙོ་བོ་རེད། ན་གཞོན་ཚོའི་ཡིད་དབང་ཇི་ལྟར་འགུག་པ་དང་། གར་སྟེགས་ཀྱི་མི་སྣ་ཇི་ལྟར་འཆར་འགོད་བྱེད་པ། འཛད་སྤྱོད་པར་གྱོན་ཆས་རིག་གནས་ཇི་ལྟར་མཉམ་སྤྱོད་བྱེད་པ་ལ་སོགས་ཁོང་གི་འཆར་འགོད་ཀྱི་ལག་རྩལ་དང་བསམ་བློའི་འདུ་ཤེས་ལ་ཆུ་ལེན་བུམ་སྟོང་དུ་མ་གྱུར་པའི་ལག་ལེན་དངོས་ཀྱི་གྲུབ་འབྲས་ལེགས་པོ་ཐོབ། “དང་ཐོག་མ་འཆར་འགོད་བྱེད་དུས་མང་ཆེ་བ་རང་ཉིད་ཀྱི་ཚོར་སྣང་ལ་བརྟེན་གྱི་ཡོད། ད་ལྟ་ཆེད་ལས་ཀྱི་ལག་རྩལ་དང་རིག་གནས་ཀྱི་རྒྱབ་ལྗོངས་གཞིར་བཟུང་ནས་འཆར་འགོད་བྱས་པའི་གྱོན་ཆས་འདིས་རིག་གནས་གང་འདྲ་ཞིག་བརྒྱུད་སྤྲོད་བྱེད་པ་དང་། གྱོན་ཆས་འདི་དང་མི་སྣ། ཁོར་ཡུག གར་སྟེགས་སོགས་དབར་ལ་འབྲེལ་བ་གང་འདྲ་ཡོད་པ། ཕན་ཚུན་འབྲེལ་མཐུད་གང་འདྲ་བྱེད་པ་སོགས་ལ་བསམ་བློ་མང་པོ་གཏོང་དགོས་ཀྱི་ཡོད། དེར་བརྟེན། ཟབ་སྦྱོང་ལ་བསྐྱོད་རྒྱུ་བྱུང་བ་ནི་དངོས་གནས་གོ་སྐབས་རྩ་ཆེན་ཞིག་ཡིན་བསམ་གྱི་འདུག ཟབ་སྦྱོང་བྱེད་རིང་ང་རང་གིས་ཀྱང་དུས་ཚོད་འཕྲོ་བརླག་མི་གཏོང་བར་ལག་རྩལ་དང་ཆེད་ལས་སོགས་ལ་སློབ་སྦྱོང་ནན་ཏན་བྱས་པ་ཡིན། དེས་ངའི་སླད་ཕྱིན་གྱི་སྒྱུ་རྩལ་ལམ་བུར་ཕན་ཐོགས་ཆེན་པོ་བྱུང”ཞེས་ཁོང་གི་མིག་ཟུང་ལས་དྲིན་ཚོར་གྱི་འོད་སྣང་འཕྲོ་བཞིན་འདི་ལྟར་བརྗོད།
       དེ་ལྟར། དགའ་ཕྱོགས་ནས་ཆེད་ལས་བར། བསྟན་འཛིན་རིན་དཔལ་གྱི་འཆར་འགོད་ཀྱི་ལམ་བུ་ལ་འགྱུར་ལྡོག་ཆེན་པོ་ཞིག་བྱུང་ཡོད།        བསྟན་འཛིན་རིན་དཔལ་གྱིས་ཞིབ་ཚགས་ཤིང་ངང་རྒྱུད་རིང་བའི་གཤིས་ཀར་བརྟེན་ནས་མི་རིགས་ཀྱི་ཕུལ་བྱུང་སྲོལ་རྒྱུན་རྒྱན་གོས་རིག་གནས་ལ་འཚོལ་ཞིབ་གཏིང་ཟབ་དང་། དམག་མིའི་བློ་བརྟན་འགྱུར་མེད་ཀྱི་རང་གཤིས་ལ་བརྟེན་ནས་ཀྲུང་ཧྭའི་རིག་གནས་ཀྱི་ཁྲག་རྒྱུན་སྐྱོང་བཞིན་ཡོད། ཁོང་གི་བློ་ངོར་བོད་ཆས་རེ་རེ་ནི་རྒྱུན་སྤྱོད་ཀྱི་གྱོན་གོས་ཤིག་དང་། རྟེན་མཛོད་ཁང་ནང་གི་རིག་དངོས་ཙམ་ཞིག་མ་ཡིན་པར། མི་རིགས་ཀྱི་དྲན་ཤེས་གཏམས་ཤིང་བོད་ཀྱི་གཏམ་རྒྱུད་གླེང་བའི་སྒྱུ་རྩལ་གྱི་ཐོན་རྫས་ཤིག་ལ་བརྩི་ཡི་ཡོད།