རླུང་ནད་བཅོས་ཐབས།

   རླུང་ནད་བཅོས་པའི་ཐབས་ལ་སྤྱི་དང་བྱེ་བྲག་གཉིས་ཡོད་པ་ལས། དང་པོ་སྤྱིར་བཅོས་པའི་ཐབས་ལ་ཟས་དང་སྤྱོད་ལམ་སྨན་དང་དཔྱད་དང་ལོག་གནོན་དང་ལྔ། དང་པོ་ཟས་ཀྱི་སྒོ་གནས་བཅོས་པ་ནི། རླུང་ཟས་བཅུ་བཞི་སོགས་མདོར་ན་དྲོད་ཞིང་སྣུམ་ལ་བཅུད་དང་ལྡན་པའི་ཟས་ཀྱིས་བཅོས་པར་བྱའོ། །

སྤྱོད་ལམ་ཡིད་དང་མཐུན་པའི་དྲོ་བའི་གནས་སུ། གཉིད་ལོག་པ་དང་། སྙན་པའི་ཚིག་སྨྲ་ཞིང་ཡིད་དུ་འོང་བའི་གྲོགས་བསྟེན་པ་སོགས་ཀྱི་སྒོ་ནས་བཅོས་པར་བྱའོ། །

   སྨན་ལ་སོག་ཡུ་གཞུག་ཆུང་སྲེ་ལོང་སྟེ་རུས་བཅུད་གསུམ་དང་། ཤ་མར་བུར་རྙིང་ཆང་སྟེ་བཅུད་བཞིའི་ཐང་ལ་ཛཱ་ཏི་དང་ཁ་རུ་ཚྭ་དང་ཤིང་ཀུན་བཏབ་པ་གཏོང་། སྨན་སྒ་དང་གོ་སྙོད་དང་ཛཱ་ཏི་གསུམ་འདུས་པའི་ཐང་གིས་རླུང་ནད་མ་ལུས་སེལ་བར་བྱེད་དོ། །དཀར་འདོན་དང་། དམར་འདོན་དང་། སྐྱུར་འདོན་དང་། སྒོག་འདོན་ཏེ་འདོན་བཞིའི་སྦྱོར་བའང་རླུང་ནད་ལ་མཆོག་ཏུ་ཕན་ནོ། །ཕྱེ་མ་ལ་ཛཱ་ཏི་བཅུ་བཞི། ཤིང་ཀུན་ཉེར་ལྔ་སོགས་དང་། སེ་འབྲུ་ལྔ་བའི་སྨན་མར་སོགས་གཏོང་།

   དཔྱད་ལ་མར་རྙིང་གི་ཞུན་མའི་བསྐུ་མཉེ་དང་འཇམ་རྩི་བཏང་། ཨ་རུའི་རྩ་བ་དང་སྒོག་ཐལ་དང་རྒྱ་ཚོས་གསུམ་འབྲི་མར་སྦྱར་བའི་རེང་བུའང་བཏང་། སྤྱི་གཙུག་དང་ཨན་སྟོང་ཚིགས་པ་དང་པོ་དང་ཚིགས་པ་དྲུག་བདུན་བཅུ་དྲུག་དཀར་ནག་མཚམས་རྣམས་སུ་མེ་བཙའ་གདབ་པར་བྱའོ། །

   བྱེ་བྲག་ཏུ་བཅོས་པའི་ཐབས་ནི། མགོ་རླུང་ལ་ཤིང་ཀུན་ལྔ་བ། བད་རླུང་མགོ་འཁོར་ལ་ཤིང་ཀུན་དགུ་སྦྱོར་རིལ་བུ་དང་། སྙིང་རླུང་ལ་ཨ་གར་བཅོ་ལྔ་དང་། བཙན་དྲུག་སྨན་མར་སོགས་དང་། གློ་རླུང་ལ་སྟར་བུ་བདུན་པ་དང་། མཆིན་རླུང་ལ་ལྷན་ཐབས་སེ་འབྲུ་བརྒྱད་པ་དང་། ཕོ་བའི་རླུང་ལ་རྒྱ་ཚྭའི་ཆིག་ཐང་དང་ཡང་ན་སེ་འབྲུ་བཞིའི་སྟེང་ཤིང་ཀུན་བསྣན། ལོང་གི་རླུང་ལ་ལྷན་ཐབས་སེ་འབྲུ་བཅུ་གཉིས་དང་། མན་རྒྱུད་སྨུག་པོའི་སྐབས་ཀྱི་སེ་འབྲུ་བཅུ་གསུམ་བསྟེན། མཁལ་མའི་རླུང་ལ་རྩ་བ་ལྔའི་སྨན་མར་དང་། སུག་སྨེལ་བཅུ་བའི་སྟེང་དུ་ཛཱ་ཏི་དང་སྲམ་ཤ་བསྣན་པ་གཏོང་། རུས་པའི་རླུང་ལ་སྣུམ་ལྡན་གྱི་དུགས་བྱ། མཁྲིས་པ་དང་འདྲེས་པའི་རླུང་ལ་ཟས་སྨན་ཡང་ལ་དྲོ་བས་བཅོས། སྲོག་རླུང་ལ་སྲོག་འཛིན་བཅུ་གཅིག་དང་སྲོག་རླུང་འཇོམས་པའི་གྱད་གསུམ་བཏང་། རླུང་ནད་ཅེ་སྤྱང་ལ་ཁོང་སྨན་སྤོས་ཁྱུང་བཅོ་ལྔའི་སྟེང་དུ་ཤིང་ཀུན་ཛཱ་ཏི་གི་ཝང་གུར་གུམ་དཀར་པོ་ཆིག་ཐུབ་བསྣན་པ་དང་། དངུལ་ཆུ་བཅོ་བརྒྱད་གཉིས་ལྟག་པ་སྤྲད་ལ་གཏོང་། ཁྲག་རླུང་སྟོད་འཚངས་ལ་ནོར་བུ་བདུན་ཐང་གི་སྟེང་ལ་མིང་ཅན་སེར་བོ་དང་ཀོ་བྱི་ལ་བསྣན་པ་དང་། ཨ་གར་བཅོ་ལྔ་དང་ཨ་གར་བཅུ་དགུ་ཨ་གར་སོ་ལྔ་སོགས་གཏོང་། དཀར་ནག་མཚམས་དང་ཚིགས་པ་དྲུག་བདུན་སོགས་སུ་མེ་བཙའ་དང་མེ་བུམ་བྱ། མདོར་ན་རྐྱང་བའི་ནད་རྣམས་ལ་སྤྱི་བཅོས་ཀྱི་ཁོག་ཕུག་པར་བྱ་ལ། གཞན་ལ་ནད་རང་རང་གི་གསོ་ཐབས་ཀྱི་མདེ་ཁར་གདགས་ནས་བཅོས་པར་བྱའོ། །