ཆམ་པའི་ནད་རིགས་བཅོས་ཐབས།

            གསོ་བྱེད་སྙིང་པོ་ཡན་ལག་བརྒྱད་པ་གསང་བ་མན་ངག་ཡོན་ཏན་རྒྱུད་ཀྱི་སྐབས་གསུམ་པའི་ནང་གསེས་ཆམ་པའི་ནད་ལ་སྨན་བཅོས་བྱེད་སྟངས་སྐོར་ལ་ཅུང་ཟད་ཞིག་ཞུ་རྒྱུ་ཡིན།
            དེ་ལ་ཆམ་པའི་ནད་ཀྱི་རྒྱུ་དང་།  རྐྱེན་དང་།   དབྱེ་བ་དང་།   རྟགས་དང་།  བཅོས་ཐབས་དང་རྣམ་པ་ལྔ་ཡོད།
            （༡）ཆམ་པའི་རྒྱུ་ནི་ངོ་བོ་རིམས་ནད་སྤྱི་དང་ཆོ་འདྲ་ཞིག་ཡིན་ནོ།
            （༢）རྐྱེན་དེ་ཡང་སྣ་བུག་གཡས་གཡོན་ནས་རྩ་རོ་རྐྱང་གཉིས་མར་ལ་ཁ་བལྟས་ཟངས་དུང་ལྟ་བུར་ཁ་གདངས་ཡོད་པ་དེ་ལ་མི་གཙང་བའི་ཟས་དང་སྤྱོད་ལམ་འདྲེས་པ་དང་།   རྡུལ་འཚུབ་དང་།  གྲིབ་དང་།  དྲི་ཕོག་པ་སོགས་ཀྱིས་རྐྱེན་ལས་བྱུང་བས་རྩ་དེ་ཆམ་ལ་ཕབ་པས་ན་ཆམ་པ་ཞེས་གྲགས་ཤིང་།  ཁྱད་པར་གྱི་རྐྱེན་ནི་བ་མོ་དང་།   རླུང་དང་།  སྒྲ་དྲག་པོ་བསྒྲགས་པ་སོགས་ཀྱིས་འཇིགས་དངངས་དང་གཉིད་མེད་པས་གཡེར་བ་དང་།  གཉིད་ལོག་དྲགས་པ་དང་།  སྔས་མཐོ་དྲགས་པ་དང་།  ཆུ་མང་པོ་འཐུངས་པ་དང་།  ཉལ་པོ་སྤྱད་དྲགས་པ་དང་།  སྐྱུག་པ་དང་།  ཁའི་མཆིལ་མ་བཀག་པ་དང་།  དུད་པ་དང་།  རླུང་ཤས་ཆེ་བའི་སྤྱོད་ལམ་གྱིས་ནད་འཁྲུགས་པས་ཆམ་པ་སྐྱེད་པར་བྱེད་དོ།
            （༣）དབྱེ་བ་ཕྱེ་ན།  རླུང་མཁྲིས་བད་ཀན་འདུས་པ་བཞི་དང་།  གྲེ་ཆམ།  གློ་ཆམ།  རིམས་ཆམ།  སྣ་ཆམ་སྟེ་རྣམ་པ་བརྒྱད་ཡོད་པ་ཡིན་ནོ།
            （༤）སྤྱིའི་རྟགས་སུ་ཆམ་པ་ཀུན་ལ་གློ་དང་སྦྲིད་པ་འབྱུང་ཞིང་།  གྲེ་བ་དང་སྣ་བུག་གཉིས་ཀ་ཚ་ཞིང་འགགས།  སྣ་ཆུ་འཛག  བྱེ་བྲག་རླུང་ལས་གྱུར་པའི་ཆམ་པ་ཡིན་ན་སྣ་ཟ་འཕྲུག་བྱེད་ཅིང་སྦྲིད་པ་རྟག་ཏུ་འབྱུང་།  མུར་འགྲམ།  སོ།  ཀླད་པ་བཅས་ན།  སྨིན་མ་དང་སྣའི་བར་དུ་སྲིན་བུ་རྒྱུ་སྙམ་བྱེད།  སྐད་འགགས།  མཐར་སྨིན་རྟགས་སུ་མཆིལ་མ་དང་སྣབས་ལུད་མང་དུ་འཛག
            མཁྲིས་པ་ལས་གྱུར་བའི་ཆམ་པ་ཡིན་ན་མགོ་དང་།  ཚིགས་བཞི།  ཉྭ་བཅས་ན། སྟོད་མི་བདེ་ཞིང་བརླ་དང་རྐེད་པ་བརྡུངས་སྙམ་བྱེད།  ཁ་ཏིག་ཁ།  ཟས་ཀྱི་དང་ག་མེད།  ལུས་ལ་གྲང་ཤུམ་བྱེད།  སྲོད་ལ་ཤ་དྲོད་ཚ།  རྨི་ལམ་ཟ་ཟིར་མང་།  སྣ་རྩེ་ནག་ཅིང་སྣ་ནང་དུ་ཁྲུམ་པ་འཁྱེར།  མཆིལ་སྣབས་དམར་སེར་ཉིད་དུ་འཛག་པ་ཡིན་ནོ།
            བད་ཀན་ལས་གྱུར་བའི་ཆམ་པ་ཡིན་ན་ལུད་པ་མང་དུ་ཐོན།  དབུགས་རྔུབ་གཏོང་མི་བདེ།  ལུས་ལྕི།  ཡི་ག་འཆུས།  ཁ་མངལ་ཞིང་གཡལ་ལ་མཆིལ་སྣབས་སྣུམ་ཅན་དཀར་པོ་འཛག་གོ
            འདུས་པ་ལས་གྱུར་པ་ནི་རྟགས་དེ་གསུམ་དང་ལྡན་ཞིང་ཁྱད་པར་བྲང་ན།  ལུས་སེམས་ཀྱི་ཚོར་བ་ཞན།  མིག་དམར།  རྣ་བ་ཟ།  ལུད་པ་དང་དབུགས་ཀྱི་དྲི་མི་ཞིམ་པ་ཡིན་ནོ།
            གྲེ་ཆམ་ནི་དང་པོ་གྲེ་བ་དང་རྐན་མཚུལ་རྣམས་ཚ་ལ་བར་དུ་སྣ་ཆུ་འཛག  མཚུལ་པ་འགགས་པ་དང་ཐ་མ་སྦྲིད་པ་མང་པོ་ཡང་ཡང་བསྟུད་ཅིང་འོང་ངོ་།
            གློ་ཆམ་ཡང་གྲེ་ཆམ་དང་འདྲ་བར་དང་པོ་གྲེ་བ་ཚ་ཞིང་སྐད་འཛེར།  བར་དུ་གློ་མང་ཞིང་མགོ་དང་བྲང་རྒྱབ་སྦྲགས་ནས་ན།  ཐ་ན་ལུད་པ་རྣག་ཏུ་ལུ་ཞིང་གློ་གཅོང་གི་ནད་དུ་འགྱུར་བ་ཡོད་དོ།
            རིམས་ཆམ་ནི་མགོ་དང་ཚིགས་གཞི་དང་བྱིན་པ་དང་ཉྭ་སོགས་ན།  རོ་སྟོད་མི་བདེ་བ་དང་།  བརླ་དང་རྐེད་པ་བརྡུངས་སྙམ་བྱེད་པ་དང་།  ཁ་ཏིག་ཁ། དང་ག་མི་བདེ།  གྲང་ཤུམ་བྱེད།  སྲོད་ལ་ཤ་དྲོད་ཚ།  རྨི་ལམ་ཟ་ཟིར་མང་བ་བཅས་གོང་གི་མཁྲིས་གྱུར་དང་ཆོ་འདྲ།  དེ་ལ་སྤྱོད་ལམ་དྲག་ཤུལ་གྱི་རིགས་དང་།  བཅུད་ཅན་ཤོར་བས་རྒྱས་པར་གྱུར་ན་ཆམ་པར་སྐྱུག་ཤོར་བ་ཞེས་བྱ་སྟེ་ཤི་བ་མང་ངོ་།
            སྣ་ཆམ་ནི་སྣ་ཚ་ཞིང་ཟ་གཡའ་བྱེད་ལ་སྣ་ཆུ་མང་དུ་བྱུང་ངོ་།
            （༥）བཅོས་པའི་ཐབས་ལ་སྤྱི་དང་བྱེ་བྲག་གཉིས་ལས།  སྤྱི་ལ་སྨན་དང་།  ཟས་དང་།  སྤྱོད་ལམ་སྟེ་རྣམ་པ་གསུམ།  དེ་ལ་སྨན་པ་ཁ་ཅིག་གིས་ཐང་སོགས་སྨིན་བྱེད་ཀྱི་རིགས་མ་བཏང་བར་ནད་བྱུང་མ་ཐག་ཏུ་གཉེན་པོའི་སྨན་གཏོང་བ་ཡོད་ཀྱང་།  དེས་ནི་ལུས་བཟང་ཞིང་གྲེ་ཆམ་སོགས་ནད་ཚབས་ཆུང་ངུ་ལ་ཕན་པ་སྲིད་ཀྱང་།  རང་ལུགས་ལ་དེ་ལྟར་བྱས་ན་ནད་ཕལ་ཆེར་ལུས་ལ་བྱེར་ཞིང་རུས་ལ་ཞེན་པ་དང་།  ཆུ་སེར་དུ་རྙོགས་པ་དང་། འཁྲུགས་པ་དང་། གྲུམ་བུར་འགྱུར་ཞིང་ཐུ་ན་འཆི་བའང་ཡོད། དེ་ཙམ་མ་ཟད་གློ་ནད་བརྒྱད་ཀྱང་ཆམ་ནད་འདི་ལས་འབྱུང་བ་མང་།  རྒྱུ་མཚན་དེའི་ཕྱིར་ན་ནད་འདི་ཐུ་ཆུང་ངུར་ངོས་མི་འཛིན་པར་བཅོས་ཟབ་དགོས་པ་ནི་གལ་ཆེ་བ་ཡིན།  དེ་ལ་ཐོག་མར་ཟས་སྨྱུང་བར་བྱས་ཏེ་ཆུ་སྐོལ་ཚད་ལྡན་ལན་འགའ་བཏང་།  དེ་རྗེས་ལྷན་ཐབས་སུ་སླེ་ཏྲེས་བདུན་ཐང་གསུངས་པ་སྒེར་སྨན་ཤིན་ཏུ་ཟབ་ཀྱང་དེང་སང་སྤྱི་སྨན་ཙམ་ནོར་བུ་བདུན་ཐང་ཐུན་༣.༤ཡུལ་དུས་དང་དཔགས་ཏེ་བཏང་།  གོས་དྲོ་བས་བྱིབས་ལ་རྔུལ་དུ་བཅུག  དེས་ནི་ཚ་བ་སྨིན་པ་དང་གསོད་པ་དུས་གཅིག་ཏུ་བྱེད་པ་ཡིན་ནོ།   ཡང་ན་མ་ནུའི་འཕྲུལ་ཐང་གོང་བཞིན་གཏོང་བ་ཤིན་ཏུ་ཟབ།  དེས་མ་ལྡོག་ན་ཆམ་འཇོམས་དཔའ་བོ་༡༤སྦྱོར་བ་ཚད་ལྡན་བཏང་བས་གཉན་ཚད་དང་རིམས་ལས་གྱུར་པ་སྤྱི་དང་།  ཁྱད་པར་གྱི་གསང་སྨན་ལྡན་པས་ཆམ་པའི་རིགས་ཀུན་ལ་མཆོག་ཏུ་བསྔགས་ཤིང་།  ཁ་བསྒྱུར་ནི་གློ་འགོག་པར་དཀའ་ན་སྟར་བུ་དང་རུ་རྟ།   ༧གྲེ་བ་ཚ་ན་ཕྱི་རྒྱུད་ལི་ཤི་དྲུག་པ།  ༧གློ་མང་ཞིང་སོབ་ན་སྲོ་ལོ་དཀར་པོ་དང་ནག་ཚང་ཨ་ཀྲོང་།  ༧མགོ་བོ་ན་ན་ག་དུར་དང་སྤུ་ནག   ༧ཡ་མར་བབས་ན་ཐང་ཕྲོམ་དང་བྱི་ཏང་ག་རྣམས་རང་རང་གི་ཁ་བསྒྱུར་བསྣན་པ་མཆོག་ཏུ་བསྔགས་པ་ཡིན་ནོ།  །ཡང་ན་ཁྱུང་སྔོན་དགུ་པ་རིམས་འཁྲུགས་གཉན་ཚད་སྤྱི་དང་གློ་ཆམ་གྲེ་བ་བབས་པར་བསྔགས།  ༧གཞན་ཡང་ཁྲག་མཁྲིས་ཅན་གྱི་ཆམ་པའི་རིགས་ལ་ཁྱུང་སྔོན་དགུ་པ་དང་།  སྟོད་ལུགས་སྤང་རྩི་༡༢   ༧བད་རླུང་ཅན་གྱི་རིགས་དང་སྦྲགས་ན་ཨ་གར་སོ་ལྔ་དང་།  ༧སྣ་ཆུ་འཛག་ན་གུར་ཁྱུང་གང་རུང་མན་ངག་བསིལ་སྦྱོར་དང་ལྟག་པ་སྤྲད།  ཡང་སྨན་སེར་ཆེན་མོ་དང་སྤྲུ་ནག་ཉེར་ལྔ་སོགས་འདི་ལ་མཆོག་གྱུར་ཡིན་ཀྱང་།   ནད་སྟོབས་ཆུང་ལ་གཉེན་པོ་སྟོབས་ཆེས་ན་མི་རུང་བའང་ཤེས་དགོས།
            བྱེ་བྲག་གི་བཅོས་ཐབས་ལ་རླུང་མཁྲིས་བད་ཀན་འདུས་པ་བཞི་པོ་གང་ཤས་ཆེ་བར་མདེ་ཁ་རིམ་པས་བསྒྱུར་དགོས།    གྲེ་ཆམ་ལ་ལི་ཤི་དྲུག་པའི་སྟེང་ལྷན་ཐབས་སྐྱེར་ཤུན་སོགས་བཅུ་བསྡེབས་པའི་ལྡེ་གུ་རིལ་བུར་བསྒྲིལ་ལ་ཁ་མུར་བསྟེན་པའམ་ཁོང་དུ་བཏབ་པས་གྲེ་བའི་ཚད་པ་སེལ།   ཡང་ན་བོང་དཀར་དྲུག་པ་སོ་ཕག་གདུས་ཁུ་མཁུར་བཀང་བསྟེན་པས་གྲེ་བ་ཚ་སྐམ་སྐད་འགགས་ཁ་སྐམ་ནད་ལ་བསྔགས།   ནད་སྟོབས་ཆེ་ན་ཁྱུང་སྔོན་དགུ་པ་ཟབ།    ཚབས་ཆེན་ལྕེ་འོག་སྐྱོར་གོང་གི་རྩ་ལ་གཏར།   གྲེ་ཆམ་མཚུལ་པར་ཞེན་ལ་ལ་ཕུག་ཁུ་བས་བདུག་ཅིང་སྣ་སྨན་ཕྱི་རྒྱུད་བཞིན་བསྟེན།
            གློ་ཆམ་ལ་ལྷན་ཐབས་ཨ་རུ་༧པ་བསྟེན།   རྗེས་སུ་གློ་ཚད་ཀུན་སེལ་དང་ཡང་ན་འཁྲུགས་གློ་ཀུན་སེལ་ཡང་ཆམ་མཇུག་ལ་བསྔགས།   ཡང་ན་སྤང་རྒྱན་༡༥འདིས་ཆམ་ཚད་གྲེ་བར་བབས་པ་དང་།    དབུགས་མི་བདེ་བ།    བད་རླུང་སྟོད་དུ་འཁྱིམས་པའི་གཟེར་ཆེན་དང་།    ཁྱད་པར་བད་ཚད་ལ་མཆོག་ཏུ་བསྔགས།
            རིམས་ཆམ་ནི་རིམས་ནད་གང་ཡིན་དེའི་གཉེན་པོ་དང་ལྟག་སྤྲོད་ཀྱིས་བཅོས་དགོས་ཀྱང་།    ཕལ་ཆེར་ལ་གོང་གི་ཁྲག་མཁྲིས་ཅན་ལྟར་བཅོས་པས་འཐུས།
            ཡང་ཆམ་པ་བཅོས་རྡུགས་དང་བཅོས་མ་བྱུང་བ་ཡུན་ལོན་པ་ལ་ཐང་ཆེན་༢༥སྨིན་རྟགས་མ་བྱུང་བར་བསྡུ།    དེ་ནས་གཉེན་པོའི་སྨན་རིམ་པར་གཏོང་དགོས།
            ཡང་སྣ་ཆམ་ལ་སྤོད་ཀྱི་རླངས་པའི་བདུག་མང་དུ་བྱ་ཞིང་།    མཁྲིས་བཅོས་སྐབས་སུ་བཤད་པའི་ཆུའི་འཕྲུལ་འཁོར་གྱི་རིགས་ཀྱི་དཔྱད་དམ་སྤྱོད་ལམ་དང་།   གུ་གུལ་དཀར་ནག  རས་སྔོན།   ནཱ་གི   ཆུ་སྲིན་སྡེར་མོ།     ཤ་བའི་ཚིལ།   ཨ་རུ།    ཨར་ནག   ལང་ཐང་རྩེ།   ནས་སྣ་གཉིས་སྦྱར་སྣར་བདུག་པས་སྣ་ཆུ་ཆད་ཅེས་ཀྱང་གསུངས།    མཇུག་ཏུ་གུར་གུམ་བཅུ་གསུམ་དང་ཅུ་གང་བདེ་བྱེད་ཆེ་འབྲིང་ཆུང་།    ག་བུར་ཉེར་ལྔ།   མྱུ་གུ་ཟླ་ཤེལ་སོགས་རྗེས་བཅོས་དཔག་དགོས།    ཁ་ཟས་ནི་ཚ་བ་ཚ་སྟེ་ཇ་འཇམ་པ་དང་།    ཕྱེ་ཚོད་དང་།    བ་རའི་ཞོ་དར་བསྟེན་པ་དང་།    སྤྱོད་ལམ་དྲག་ཤུལ་གྱི་རིགས་དང་།   ཉིན་པར་གཉིད་ལོག་པ།    དྲོད་བཅུད་ཀྱི་རིགས་སྤང་བར་བྱ་ཞིང་།   དེ་ལྟ་བུའི་ཟས་དང་སྤྱོད་ལམ་ལོག་པས་འགྲམས་ནས་རིམས་སམ་ཡང་ན་འཁྲུགས་སུ་ཤོར་བ་ཡིན་ན་འགྲམས་འཁྲུགས་རང་རང་གི་གཞུང་བཞིན་བརྩོན་པས་བཅོས་འོས་ཀྱང་དགོས་སོ།    །དེ་ལྟར་གོང་ཞུས་རྣམས་རྒྱུད་ཀྱི་དགོངས་པ་དང་བསྟུན་པའི་རྩོམ་ཚུལ་མདོར་བསྡུས་ཙམ་ཞིག་འབྲི་དགོས་པའི་བཀའ་ཕེབས་བཞིན་རྒན་པོའི་ཉམས་མྱོང་རྣག་ཐོག་གཙགས་འཁེལ་ཐུབ་པ་སུར་འོས་སུས་བཤད་ལ་བཀག་འགོག་མེད་པའི་བདག་རྐྱེན་ཚད་མེད་ཀྱིས་སྲིད་ཇུས་མཛུབ་སྟོན་གནང་དོན་ལྟར། གུས་ནས་གསོ་ཡུལ་གྱི་ནད་རིགས་རྣམ་པའི་སྒོ་ནས་དཔག་ཏུ་མེད་པ་ནི་བློ་ཡུལ་ལས་འདས་ཀྱང་།    སྟོང་དང་ཉིས་བརྒྱ་བཅུ་གཉིས་ཀྱི་རྒྱུ་རྐྱེན་རྟགས་བཅོས་རྒྱ་མཚོ་ལྟ་བུའི་གཏིང་མཐའ་བྲལ་བ་ཞིག་ཞུ་འདོད་ལྷག་པར་ཆེ་ཡང་།   གུས་རང་རིག་གཞུང་ཐོག་རང་ས་ནས་མ་ལྡེངས་པས་དེ་ཡང་།    འདི་ལ་མ་སྦྱངས་རྨོངས་ཚོད་ཀྱིས།    །འཆད་རྩོད་རྩོམ་པའི་གྲྭར་འཇུག་པ།    །ཝ་སྐྱེས་སེང་ལྤགས་གྱོན་པ་བཞིན།    །ནམ་ཞིག་རྗེས་ངན་གསལ་བར་འགྱུར།   །གསུངས་པ་ལྟར།   ཨོ་ཚོད་ཀྱི་ཞུ་བ་ནི་ཤིན་ཏུ་ནས་དཀའ།    རང་བློ་རང་ལ་འཁེལ་ཞིང་གདེང་དང་ལྡན་པ་ནི་རྒྱ་མཚོའི་ཆུ་ཐིགས་ཙམ་ལས་ཞུ་རྒྱུ་མེད་རུང་སླད་ཕྱིན་རྒྱལ་ཡོངས་སྤྱི་དང་།    བྱེ་བྲག་བོད།    ལྷག་ཏུ་སྨན་རྩིས་ཁང་གི་སློབ་གསར་གཞོན་ནུ་རྣམས་ཡར་རྒྱས་གོང་འཕེལ་དུ་འགྲོ་བའི་གོམས་གཤིས་བཟང་པོ་ཞིག་ཆགས་པའི་ཆེད་དུ་ཤིང་ནྱ་གྲོ་ཏའི་ས་བོན་གྱི་རྣམ་པའི་ཚུལ་དུ་ཆམ་པའི་ནད་བཅོས་ཐབས་ཨེམ་རྗེ་རྒད་པོ་གཞུང་དང་བྲལ་ཞེས་པའི་དཔེ་ལྟར་སྟབས་བདེ་ཞིག་ཞུ་རྒྱུ།
            དང་པོ་ནད་འདིའི་འབྱུང་ཁུངས་ནི།   གཙོ་བོ་ལུས་སྟོབས་ཞན་པས་འདུ་ལོངས་ཆེ་སར་ཕྱིན་ནས་དུ་བ་རླངས་པས་རིམས་དྲི་སྣ་ལ་འཇུག་ཞེས་པ་ལྟར།   ཆམ་པ་ཕོག་པའི་མི་ལ་སྐད་ཆ་བཤད་པ་དང་།    ཁ་སྣའི་དྲི་མ་འདྲེས་པ།   ཐལ་རྡུལ་མང་པོ་ལངས་པ་དང་།   གློ་བུར་དུ་ཚ་གྲང་འཐབ་པ་སོགས་གཙོ་གྱུར་གྱིས་ནད་གཏའ་ཕོག་འཕྲལ་རྩ་རྒྱུད་ལྟར་མཁྲིས་རྟགས།    ཁ་ཁ་མགོ་ན་ཤ་དྲོད་ཚ་བ་དང་།    །ཞེས་པ་དང་།    བད་རྟགས་དང་ག་མི་བདེ།   ཁ་མངལ་བ།    རླུང་རྟགས།   དཔྱི་དང་རྐེད་པ་རུས་ཚིགས་མ་ལུས་ན།    །ཞེས་སོགས་ཀྱི་སྐབས་ཚ་བ་ཞག་གསུམ་བད་རླུང་འདྲེས་པའི་དུས་སུ་ཤ་དྲོད་ཚ་རྐྱེན་གྱིས་ཆུ་ལ་ཞུགས་པ།    སྐོམ་དད་ཀྱིས་རྐྱེན་པས་ཆང་དང་།    ཞོ་བཅུད།   གྲང་ཤུམ་གྱིས་རྐྱེན་པས་མེ་ཉིར་བསྲོས་པ་སོགས་མིན་ན་རྩ་དང་ཆུ་སོགས་ནད་པའི་ཡིད་དང་བསྟུན་ནས་བལྟས་ཏེ།    གཙོ་ཆེ་བ་མེ་ཉིར་མ་ཞུགས་པས་ལག་པ་དཔྲལ་བ་གཉིས་ཀྱི་ཤ་དྲོད་ཆེ་ཆུང་ལ་དཔགས་པའི་ནོར་བུ་བདུན་ཐང་ངམ་འཕྲུལ་ཐང་རིལ་བུ་རྐྱང་པ་བཤེས་གཉེན་དམ་པའི་ཕྱག་རྒྱུན་ཞལ་གདམས་གཏོང་ཚུལ་ཕན་ནུས་བཅས་པ་པར་འཁོད་ཟུར་གསལ་ལྟར་སྨིན་རྟགས་མ་བྱུང་བར་བཏང་བས་སྨིན་རྟགས་སུ་རུས་ཟུག་དང་གྲང་ཤུམ་འཇགས་རྗེས་ཆམ་འཇོམས་དཔའ་བོ་༡༤སོགས་གཉེན་པོའི་སྨན་དང་།    ༧  ཡ་མར་བབས་ན་གུར་ཁྱུང་།   རྡོ་རྗེ་རབ་འཇོམས།   ༧གློ་ལ་གཙོ་བོ་༢༥  མཁྲིས་ཤས་ལ་གི་དགུ་ཁྱུང་ནག    ༧བྲང་ཚ་བ་ལ་སྤང་རྒྱན་༡༥   ལུག་མུར་བདུན་པ།    ༧གྲེ་བ་བབས་ཏེ་སྐད་འགགས་པར་ལི་ཤི་དྲུག་པ་དང་།   བོང་དམར་བདུན་པ།    ༧ལྕེ་ཆུང་རྒྱས་པར་ཕན་པ་ཀུན་ལྡན།    ༧གྲེ་བ་ཚ་བར་ཁྱུང་སྔོན་དགུ་པ།    ༧སོ་ནད་སྐྱོན་ཅན་ལ་སྤང་རྩི་༡༢  ཕན་ཀུན།    ༧མགོ་གཟེར་ལ་གསེར་མདོག་བཅུ་གཅིག    ༧སྣ་ཆུ་མང་ན་ནོར་བུ་བདུན་ཐང་གི་དུ་བ་བདུག    ཁ་ལ་རྡོ་རྗེ་རབ་འཇོམས་བཅས་སྐབས་བསྟུན་བཏང་ཞིང་ཟས་སྤྱོད་གོང་བཞིན་ཚུལ་ལྡན་བྱུང་ན་ཆམ་པ་སེང་དྲག་ཏུ་འགྲོ་གི་ཡོད།   འོན་ཏེ་ཆམ་པའི་ནད་ཐུ་ཆུང་བའི་རིགས་དང་གློ་བཅས་གོང་གསལ་ཐང་གཉིས་ཀྱིས་ལམ་ནད་བཟློག་པར་བྱེད་ངེས་ཡང་གོང་གསལ་ཟས་དང་སྤྱོད་ལམ་ལོག་པས་བླ་གཉན་གྱི་ནད་ཅེས་ནད་གཞི་གཅིག་ཐོག་ཉིས་བརྩེགས་གང་བྱུང་ན་རྒྱུད་ཀྱི་གསོ་ཚུལ་དགུ་ཡི་ནང་གསེས་གཙོ་བོ་དམེ་ཤོར་འཁྲུགས་འདུམ་ལྟ་བུར་ཁ་བཤད་ལག་ལེན་ཡ་བྲལ་དུ་མ་སོང་བའི་ཐོག་ནས་བཅོས་དགོས་ཀྱི་ཡོད་པ་འདྲ།