ཁྲིམས་ལྟར་རྒྱལ་ཁབ་སྐྱོང་བར་ཕྱོགས་ཡོངས་ནས་སྐུལ་འདེད་གཏོང་བའི་ཆེད་དོན་ཞིབ་གྲོས་འཛིན་གྲྭར་གནང་བའི་གསུང་བཤད།

       ཀྲུང་གོའི་གུང་ཁྲན་ཏང་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་བྱ་གཞག་གི་འགོ་ཁྲིད་སྲོག་ཤིང་ཡིན་ཞིང་། ཁྱོན་ཡོངས་སྤྱི་འདོམས་དང་ཕྱོགས་གང་ཅི་མཐུན་སྦྱོར་བྱེད་པའི་གོ་གནས་བཟུང་ཡོད། དེང་སྐབས་ཀྱི་ཀྲུང་གོར་ཀྲུང་གོའི་གུང་ཁྲན་ཏང་གི་ཆབ་སྲིད་སྟོབས་ཤུགས་ལས་ཆེ་བའི་སྟོབས་ཤུགས་སམ་སྟོབས་ཤུགས་གཞན་པ་གང་ཡང་མེད། ཏང་སྲིད་དམག་དམངས་སློབ་དང་། ཤར་ལྷོ་ནུབ་བྱང་དབུས་ཏེ། ཏང་ནི་ཐམས་ཅད་ལ་འགོ་ཁྲིད་བྱེད་མཁན་དང་ཆབ་སྲིད་ཀྱི་འགོ་ཁྲིད་བྱེད་ཤུགས་མཐོ་ཤོས་དེ་ཡིན། ཀྲུང་གོའི་གུང་ཁྲན་ཏང་ནི་སྲིད་སྐྱོང་ཏང་ཡིན་ཞིང་། ཏང་གི་འགོ་ཁྲིད་ནི་ཏང་དང་རྒྱལ་ཁབ་ཀྱི་ལས་དོན་ཁག་ལེགས་པོར་སྒྲུབ་པའི་རྩ་བའི་འགན་ལེན་ཡིན་ལ། རང་རྒྱལ་གྱི་ཆབ་སྲིད་བརྟན་པོ་དང་། དཔལ་འབྱོར་འཕེལ་རྒྱས། མི་རིགས་མཐུན་སྒྲིལ། སྤྱི་ཚོགས་བརྟན་བརླིང་བཅས་ཡོང་བའི་གཞི་རྩ་ཡིན་པས་གཡོ་འགུལ་སྤུ་ཙམ་ཡང་གཏོང་མི་རུང་།