༄༅། །མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་གཉིས་པས་མཐར་ཕྱིན་མཛད་སྒོ་སྤེལ་བ།

        སྤྱི་ལོ༢༠༢༢ལོའི་ཟླ༥བའི་ཚེས༢༧ཉིན་གྱི་ཉིན་གུང་གི་ངལ་གསོའི་དུས་སུ། སློབ་མ་རྣམས་ཀྱིས་ཤེས་ཡོན་ལ་རྩིས་མཐོང་དང་དཔེ་ཆ་ལ་གཅེས་སྤྲས། སློབ་མའི་དྲིན་བཟོ་དང་གཏོང་བ། གཞན་ཕན་སོགས་ཡ་རབས་ཀྱི་བསམ་པ་དང་སྤྱོད་ལམ་བསྐྱེད་སྲིང་བྱེད་པའི་ཆེད་དུ། སློབ་གྲྭའི་ཐོན་ཨུའི་རྩ་འཛུགས་འོག་མཐོ་གསུམ་གྱི་མཐར་ཕྱིན་སློབ་མས་སློབ་གྲྭའི་སྲོལ་རྒྱུན་བཟང་བོའི་རྒྱུན་བསྐྱངས་ནས་སློབ་ཁྲིད་ཐོག་ཁང་ཆེན་མོ་རིག་བྱེད་ཕུན་ཚོགས་གླིང་གི་མདུན་གྱི་ཐང་ཆེན་དུ། རང་གིས་སྤྱད་ཟིན་པའི་དཔེ་ཆ་ལོ་རིམ་འོག་མ་རྣམས་ལ་སྦྱིན་པའི་དོན་སྙིང་ལྡན་པའི་དཔེ་སྦྱིན་གྱི་བྱ་འགུལ་ལེགས་པར་སྤེལ་བ་དང་། མཐོ་གཅིག་མཐོ་གཉིས་ཀྱི་སློབ་མ་རྣམས་ཀྱང་བུང་བ་སྤྲིན་གྱི་ཚོགས་བཞིན་རུབ་སྟེ། འཚང་ཁ་ཤིག་ཤིག་གིས་རང་ལ་མཁོ་བའི་དཔེ་དེབ་སྣ་ཚོགས་འཚོལ་ཞིང་ལེན་པར་བྲེལ་བའི་ཚུལ་ནི་ཤིན་ཏུ་ཉམས་དགའ་ཞིང་ཡིད་ཀྱི་དང་བ་འདྲེན།

        ཟླ༥བའི་ཚེས༢༩ཉིན་གྱི་སྔ་དྲོའི་ཆུ་ཚོད་བརྒྱད་ཀྱི་སྟེང་མཐོ་གསུམ་གྱི་མཐར་ཕྱིན་མཛད་སྒོ་སློབ་གྲྭའི་ལུས་རྩལ་ར་བར་སྤེལ། སློབ་གྲྭའི་མགོ་ཁྲིད་དང་དགེ་རྒན་རྣམ་པ། མཐོ་གཅིག་མཐོ་གཉིས་ཀྱི་སློབ་མ་ཡོངས་ཀྱི་ལག་ཟུང་ཐལ་མོའི་རྡེབ་སྒྲ་དང་བཀྲ་ཤིས་པའི་གླུ་སྒྲའི་ཁྲོད་མི་རིགས་ཀྱི་རྒྱན་གོས་གྱོན་ཞིང་དྲན་རྟེན་གྱི་ལེགས་སྐྱེས་དང་ཁ་བཏགས་བཏེགས་པ། གདོང་ལ་ཡིད་ཆེས་དང་སྤོབས་པས་ཁེངས་པའི་མཐར་ཕྱིན་འཛིན་གྲྭ་རེ་རེ་ལུས་རྩལ་ར་བར་དགའ་སྤྲོའི་ངང་བསུས། ཚང་མས་གཟབ་ནན་གྱིས་རྒྱལ་གླུ་ལེན་བཞིན་རྒྱལ་དར་བསྒྲེངས་ཤིང་མཐར་ཕྱིན་སློབ་མ་ཡོངས་ཀྱིས་སྐད་གསེང་མཐོན་པོས་ནར་སོན་གྱི་མནའ་ཚིག་སྒྲོག་པའི་འབོད་སྒྲའི་ཁྲོད་མཛད་སྒོ་དངོས་སུ་དབུ་ཚུགས།

        སློབ་གཙོ་པདྨ་དབང་ཆེན་དང་སློབ་གཙོ་གཞོན་པ་སྟོབས་ལྡན། མཐར་ཕྱིན་གྱི་ཚབ་བྱེད་དགེ་རྒན་ཉི་མ་ཚེ་རིང་བཅས་ཀྱིས་རིམ་པ་བཞིན་སེམས་ཚོར་དྲག་པོ་དང་བཅས་སློབ་མ་རྣམས་ལ་མཐའ་མཇུག་གི་སེམས་ན་འཛིན་རྒྱུའི་ཚིག་དང་རུམ་ལ་བསྡུ་རྒྱུའི་བྲོ་རུ་གྱུར་བའི་གསུང་བཤད་གལ་ཆེན་གནང་། ལེགས་སྐྱེས་ཕུལ་བའི་མཛད་རིམ་རྣམས་ལེགས་པར་གྲུབ་རྗེས་ཏང་ཨུའི་ཧྲུའུ་ཅི་གཞོན་པ་ཁུང་ཀྲན་ཁུའེས་མཐར་ཕྱིན་སློབ་མའི་མིང་ཐོ་བསྒྲགས་ཏེ་མཐར་ཕྱིན་འཛིན་ཡིག་བསྩལ། དགེ་རྒན་རྣམས་དང་སློབ་གྲྭའི་རིག་རྩལ་ཚོགས་པས་རིག་རྩལ་འཁྲབ་སྟོན་གྱ་ནོམ་པ་ཀུན་གྱི་མིག་གི་དགའ་སྟོན་དུ་ཕུལ། མཐར་བཀྲ་ཤིས་པའི་ཁ་གཡང་དང་གྱེས་གདུང་གི་མཆི་མའི་ཀློང་ནས་མཐར་ཕྱིན་སློབ་མ་རྣམས་སློབ་གྲྭའི་སྒོ་ཁར་སྐྱེལ་མ་ཞུས་ཏེ་མཛད་སྒོ་ཡོངས་སུ་མཇུག་བསྡུས་སོ། །