ངོས་དང་པོ > ཆེད་དོན། > མཚོ་སྔོན་པོའི་ཞོགས་ཟེར། > འཁོར་སྐྱོད། བསོད་ནམས་ཚེ་རིང་།

འཁོར་སྐྱོད། བསོད་ནམས་ཚེ་རིང་།

རྩོམ་པ་པོ།：བསོད་ནམས་ཚེ་རིང་། ཡོང་ཁུངས།：མཚོ་སྔོན་པོ་དྲ་བ། དུས་ཚོད།：2012-07-01 16:59:00 ཀློག་གྲངས།：

རུས་མིང་། བསོད་ནམས་ཚེ་རིང་།
འཛིན་གྲྭ། 2010ལོའི་བོད་ཡིག་འཛིན་གྲྭ
ཕ་ཡུལ། བྲག་དཀར།

འཁོར་སྐྱོད།

སྔོན་ཆད་སྔོན་ཆད་ཅིག་ལ
ངས་ཁྱོད་ཀྱི་ལྟག་རྒྱབ་ཏུ
ཁ་རོག་གེར
ཁྱོད་ཀྱི་སྒལ་གཞུང་ལ་ཅེར་ནས
རང་ཉིད་ཀྱི་མ་འོངས་བ་བཙལ

ཏག་ཏག་འདས་ཟིན་པར།
ང་ཁྱོད་དང་ཁ་གཏད་དུ་ཙོག་པུར་བསྡད་ནས
ཁྱོད་ཀྱི་འཛུམ་མདངས་ལ་བལྟ་བཞིན
རང་ཉིད་ཀྱི་བདེ་སྐྱིད་བཙལ

ཁ་སང་དེ་རིང
ང་ཁྱོད་ཀྱི་གསེག་ངོས་ནས་དྲང་བོར་འགྲེང་ཏེ
སྔར་སོང་ལ་དྲན་གསོ་རེ་བྱ་བཞིན
ལག་པ་འགྲམ་པར་བཞག་ནས
ཅི་ཞིག་འཚོལ་དགོས་བར་བསམ་བློ་བཏང་།

འཇིགས་སྐྲག་ཆེ་བའི་འཛུམ།

ཁྱོད་ཀྱི་འཛུམ་མདངས་དེ་བསྟན་པ་ནས།
ང་ཧ་ཅང་དགའ་དྲགས་ཏེ།
རྨོངས་བར་གྱུར།
རྨོངས་བ་དེས།
ངས་ངའི་ཕ་མ་དང་ཕ་ཡུལ།
ད་དུང་།
ཡུལ་མི་སྥུན་ཟླ་ཚོ།
རེ་རེ་ནས་རེ་རེ་བཞིན།
བརྗེད་སོང

ཁྱོད་ནི་མཛེས་སྡུག་ལྡན་པའི་དུག་ལྡན་གྱི་མེ་ཏོག་ཞིག་དང་འདྲ།
ངས་ཁྱོད་ལ་ཉེན་ཁ་ཆེ་བ་ཤེས
ཁྱོད་ལ་སྡུག་རྩུབ་ཆེ་བའང་ཤེས།
ཡིན་ཡང་།
ང་སྲིན་འབུ་མེ་ལྕེབས་མེ་ལ་ལྕེབས་པ་བཞིན།
ཐེ་ཚོམ་མེད་པར།
ཁྱོད་ཕྱོགས་ལ་གོམ་ཁ་བསྒྱུར།
ཡོད་ཚད་རང་དབང་ན་མི་འདུག
ཁྱོད་དང་འགྲོགས་པ་ནས་བཟུང་།
ངས་རྩམ་དྲི་དང་མར་དྲི།
ཨ་མའི་ནུ་ཞོ་དང་ཨ་ཕའི་གླུ་སྐད།
ད་དུང་།
དྭངས་གཙང་གི་ཕ་སྐད།
རེ་རེ་ནས་རེ་རེ་བཞིན།
གར་སོང་ཆ་མེད་དུ་གྱུར།
ཕལ་ཆེར་སྔོན་ཆད་བྱུང་མ་མྱོང་བའི་ཚོར་བ་ཞིག

ཡང་ན།
ང་ངོ་མ་ཁྲེལ་མེད་ཅིག་རེད།
དེ་རིང་ནས་བཟུང་ཕ་དམ་པ་ཞིག་གི་རང་ཚུགས་བོར་ནས།
མ་མཛངས་མ་ཞིག་གི་བློ་ཁོག་བརྗེད་ནས།
ཁྱི་ལྡོམ་བཞིན།
རི་སྤྱང་བཞིན།
ང་ལ་ཅི་ཡང་མེད་་་