ས་ཆེན་པོའི་ན་ཟུག་གཞན་ཞིག་འབྱིན་ཚུལ།

དངོས་མིང་།  ཟླ་འབུམ།
འཛིན་གྲྭ  2010ལོའི་བོད་སྐད་ཡིག་རྩོམ་རིག་དགེ་སྦྱོང་འཛིན་གྲྭ
ཕ་ཡུལ།  མཚོ་ལྷོ་ཁྲི་ཀ

ས་ཆེན་པོའི་ན་ཟུག་གཞན་ཞིག་འབྱིན་ཚུལ།
                                                  -----ལྗང་བུས་ཕབ་སྐྲུན་བྱས་པའི་བརྙན་ཐུང་མཚོ་སྔོན་པོ་ལས་འཕྲོས་པ།

          གང་ནི་ཡབ་ཆེན་སུ་ཞིག་གི་སྙིང་སྟོབས་ཀྱིས་བཞེངས་པའི་རྣམ་རྒྱལ་ཁང་བཟང་ཡིན།
          གང་ནི་ཡུམ་ཆེན་སུ་ཞིག་གི་བྱམས་སེམས་ཀྱིས་བཀོད་པའི་འཆི་མེད་སྐྱེད་ཚལ་ཡིན།
          ཡང་ན།  ཕུ་ནུ་སུ་ཞིག་གི་དཀའ་སྤྱད་ཀྱིས་བསྐྲུན་པའི་རྟ་ཕོའི་རྨིག་སྒྲ་ཡིན།
          མིང་སྲིང་སུ་ཞིག་གི་འབོད་དབྱངས་ཀྱིས་རྙེད་པའི་འཚོ་བཅུད་མངར་མོ་ཡིན།

          དྲི་བྲལ་སྔོ་བསངས་ཀྱི་མཁའ་དབྱིངས།  རྙོག་བྲལ་དྭངས་གཙང་གི་མཚོ་མོ།
          བདེན་སྤུངས་དཔའ་ཚུགས་ཀྱི་སྟག་ཤར།  གཞུང་དྲང་བརྩེ་ཡོད་ཀྱི་སྨན་ཤར།
          ད་དུང་།  ས་ཆེན་པོའི་ཁྲེལ་ཡོད་ཀྱི་གནམ་འདེགས་ཀ་བས།
          མི་ཚོགས་དེར་ཅེར་ནས་ཁ་རོག་གེར་ཅི་ཞིག་གླེང་གིན་འདུག་ཨང་།
          ང་ཡི་མཚོ་སྔོན་པོ་དང་མཚོ་སྔོན་པོའི་མཚོ་མཐའ།

          གནམ་ས་འདྲེས་པའི་བར་མཚམས་ནས་འབུས་པའི།
          སོར་གདུབ་ཀྱི་དུངས་ཞེན་དང་།  བརྩེ་བའི་མེ་ཏོག  
          རྒྱལ་སྲས་ཀྱི་སྙིང་གཏམ་གྱི་ཚོགས།
          ལྷད་མེད་ཀྱི་བདུད་རྩི་དང་།  གདོད་མའི་གླུ་གཞས།
          རྟག་བརྟན་གྱི་དམ་ཚིག་སོགས་ཀྱི་གསེང་ན་འདུར་ཞིང་གནས།

          ས་ཆེན་པོའི་མགུལ་བར་འཁྱུད་པའི།
          དོམ་ཁྱི།  རྫི་གླུ།  སྐར་ཚོམ……
          ནམ་མཁའི་སྔོ་མདོག་གི་ངོ་གདོང་ལེབ་མོ་དེར།
          ཉི་ཟླ་ཟུང་གི་ཁ་གཏད་དུ་འགྲེངས་སྟེ།
          རང་དབང་དང་འཚོ་གནས་ཞེས་པའི་ཡིག་འབྲུ་བྲིས་ནས་ལོ་མང་འགོར་ཡོད།

          ཁ་བ་མོད་པའི་དགུན་ཟླ་རིང་མོ་ཞིག་ཕར་བསྐྱལ་རྗེས།
          ལྗིད་ཚད་བརྒལ་བའི་རལ་བ་རྒྱབ་ཏུ་དཔྱངས་པའི་ཨ་མྱེས་དག་གི
          གཟི་བརྗིད་དང་མིག་ཆུ་འཁུར་བའི་གནའ་གཏམ་དེ་དག་ལ།
          མིག་ཟུང་བཙུམ་མི་ཤེས་པའི་ཚ་བོ་འདི་ཚོས་གཏན་ནས་ཉན་མ་འདོད།
          དུས་ཚིགས་ཀྱི་འགྱུར་ལྡོག་ནི་རང་བྱུང་གི་ཆོས་ཉིད་ཡིན་པ་བདེན་དུ་ཆུགས།
          ལོ་རྒྱུས་ཀྱི་ཆུ་རྒྱུན་ལོ་ཟླའི་སྲུབས་ཀ་ནས་ཐོལ་གྱིས་བཞུད་པའང་བདེན་དུ་ཆུགས།
          འོན་ཏེ།  ས་ཆེན་དེས།
          གདོང་དམར་ཚང་གི་གྲངས་ཀ་མི་ལོན་པའི་མཆོད་རྐོང་འདི་བསྐྲུན་ལ།
          མེ་ལྕེ་དེས་མཆོད་སྡོང་འདིའི་ལང་ཚོ་འོད་དུ་སྤུར།
          མཆོད་སྡོང་དེས་ཚེ་འབར་གྱི་མར་ཁུ་འདི་ལམ་ལམ་འཁྱིལ་དུ་བཅུག

          རེད་ཡ།  འདི་དག་ཅི་ཞིག་ཡིན།
          འདི་དག་གི་ཕག་ན་འཇིགས་སུ་རུང་བའི་སྡེར་མོ་ཅན་སུ་ཞིག་སྦས་ཡོད།
          དྲང་མོར་ཤོད།  མྱུར་དུ་དྲང་མོར་ཤོད།

          འདི་ལྟར།  ལོ་ཟླའི་གཙང་བོའི་ཀློང་ན།
         མཚོ་སྔོན་པོ་དང་མཚོ་སྔོན་པོའི་མཚོ་མཐའ་སྟེ།
          ས་ཆེན་གྱིས་མངགས་པའི་རླུང་འཚུབ་དང་བུ་ཡུག་གི་ཕོ་ཉ་དེ་དག་ནི།
          ཁོས་གྱེས་བྲལ་གྱི་ཡིག་འབྲུ་ལ་ཤུབ་བུར་ལབ་པའི་ན་ཟུག་གཞན་ཞིག་ཡིན་སྲིད།

2012ལོའི་ཟླ3པའི་ཚེས23ཉིན།