ཕྱིར་རྟོགས་ཁྲོད་ཀྱི་ཕ་ཡུལ། སེ་ཀུན་ཐུབ་རྡོ་རྗེ།

ཕྱིར་རྟོགས་ཁྲོད་ཀྱི་ཕ་ཡུལ།

                                                                           མཐོ་གཉིས་བཞི་བ། སེ་ཀུན་ཐུབ་རྡོ་རྗེ།

                                   ཕ་ཡུལ་ལགས། 
                                   ཁྱེད་ཀྱི་པང་དུ་བུ་རྒོད་པོའི་གཡུལ་འཁྲུག་བྱས་ས་ཡོད་ལ།
                                   མ་བུ་མོར་མཛངས་མིང་ཐོགས་སའང་ཡོད།
                                   ཁྱེད་ཀྱི་ཕྱི་ནང་གི་བཀོད་པ་ལྷ་ཡུལ་ལ་འགྲན་པ་བདེན་ནམ།
                                   ད་ཆ།   ཁྱེད་ཀྱི་ལུས་ཟུངས་འདི་ཅི་འདྲའི་ཉམས་ཐག་ཅིག
                                   ཅི་འདྲའི་ཐབས་ཆགས་ཤིག
                                   འོན་ཀྱང༌།
                                   ངའི་ནམ་ཡང་ཁྱེད་ལ་ལེ་བདའ་དང་སྨྲེ་ངག་འདོན་མི་སྲིད་ལ།
                                   སྐྱོ་བ་དང་ཤུགས་རིང་འབྱིན་ག་ལ་སྲིད།
                                   ངའི་ཁྱེད་ལ་བཅངས་པའི་བརྩེ་དུངས་འདི།
                                   ཆར་ཤུལ་འཇའ་གུར་གྱི་སྣང་བརྙན་ཞིག་ག་ལ་ཡིན།
                                   དེ་ནི་སྦྲ་ནག་གི་གོང་ཁ།     
                                   རི་སུལ་གྱི་འཚོ་བ།
                                   བྱིས་དུས་ཀྱི་རྩེད་ཁང༌། 
                                   ཨ་མའི་མར་ལོ་བཅས་ཀྱི་བྲོ་བ་དང་བག་ཆགས་སྟུག་པོས་ང་ལ་དྲན་ཤིང་བཞག་ཡོད་ཡ། 
                                   དེ་མིན།  ཨ་ཕའི་སྒྲུང་དང་ཕུ་ནུ་མིང་སྲིང་གི་དགོད་སྒྲ
                                   ཨ་ཅེ་སྒྲོལ་མའི་གླུ་སྐད།
                                   ད་དུང་ཡོད་ཚད་ཀྱིས་ང་ལ་བརྗེད་བྱང་བཀོད་ཡོད།
                                   བདག་གི་རྨི་ལམ་དུ་གཡུ་སྦྲང་བཞིན་འཁོར་ཡོང་བ་ནི།
                                   ཕ་ཡུལ་ལགས།
                                   ཁྱེད་ཀྱི་ཟུངས་ཁྲག་ལས་བརྡོལ་བའི་ཆུ་ཕྲན།  
                                   བྱ་བྱེའུའི་འགྱུར་ཁུག
                                   རྫི་བོའི་གླུ་སྐད་བཅས་ཡིན་ལ།
                                   ངའི་བསམ་གཞིགས་ཀྱི་བྱང་ཁོག་སྙེག་དུས།
                                   སྐྱ་རེངས་སྒེག་མོའི་འཆོར་འགྲོས།
                                   ཆུ་ཁུར་བུ་མོའི་ཧབ་ཆ།
                                   དེ་མིན།   གོམ་ལག་རླུང་ལ་འགྲན་པའི་སྐྱེ་ཕོ་རབས་ཤིག་གི་སྐྱ་རྩལ་བཅས་བཞེངས་བསྐྲུན་བྱས།
                                   བར་སྐབས་འདིར། 
                                   བརྗོད་མི་ཚར་བའི་ང་དང་ཁྱེད་ཀྱི་གཏམ་རྒྱུད་འདི།
                                   ཁོད་ཡངས་པའི་ཁྱེད་ཀྱི་པང་ཁུགས་སུ་གཏོར་ཏེ།
                                   རྣམ་ཤེས་བཞིན་འཁྱམས་སུ་འཇུག་འདོད།
                                   ཁྱེད་ཀྱི་མཚུངས་མེད་ཀྱི་སེམས་པ་རེ་རེས། 
                                   ངའི་ལང་ཚོ་ལ་གསོན་ཤུགས་སྦྱིན་ཞིང༌།
                                   སྤོབས་པ་ལ་རམ་འདེགས་མཛད། 
                                   མདུན་སྐྱོད་ལ་ངར་ཤུགས་བསྣན།
                                   དེར་བརྟེན། 
                                   ཁྱེད་ཀྱི་དྲན་ཤིང་གིས་ང་ཡི་འཕར་རྩར་བདེ་དྲོད་ཀྱི་ཟུངས་ཁྲག་བསྣན་པས།  
                                   ངས་ནམ་ཡང་བརྗེད་པ་མི་སྲིད༌།
                                   ཕ་ཡུལ་ལགས།