མེ་ཏོག་འཚོ།

མེ་ཏོག་འཚོ།

                                      དམའ་འབྲིང་གསུམ་པའི་འཛིན་གྲྭ་ལྔ་བ།  ཚེ་དཔག་སྐྱབས།

                             སྒྱུ་མའི་གྲོང་ཁྱེར།
                             མཛེས་པའི་དོ་ར།
                             ཡོད་ཚད་མཚར་སྡུག་གིས་ཕྱུག་པའི་ཞིང་ཁམས་ན།
                             ཤེས་རིག་གི་གཟབ་འཆོར་སྤྲས་པའི་མེ་ཏོག་འཚོ།
                             འཛུམ་དམུལ་དམུལ།  བྱམས་དུངས་དུངས།
                             ངའི་བརྩེ་འཛུམ་གྱི་མཁའ་དབྱིངས་སུ།
                             དལ་གྱིས་བརྒྱུད་པའི་རབ་དཀར་གྱི་ཆུ་འཛིན།
                             ཁྱེད་ཀྱི་རང་གཤིས་མ་ཡིན་ནམ།
                             དེ་མིན།  གཡའ་དག་པའི་བར་སྣང་དུ།
                             གཤོག་འགྱུར་གྱི་སྟངས་སྟབས་བསྒྱུར་པའི་རྒོད་པོའི་འཕུར་རྩེན།
                             ཁྱེད་ཀྱི་བྲོ་གར་གྱི་ལྡེམ་མྱུར་ཨེ་ཡིན།
                             དཔའ་ངར་གྱི་སྐྱེ་སྟོབས་ལྡན་པའི་ཐག་འཁྱུད་མེ་ཏོག
                             ཁྱེད་ཀྱིས་སློབ་སྦྱོང་ལ་གཞོལ་པའི་སྙིང་རུས་མིན་ནམ།
                             མེ་ཏོག་གི་འཇིག་རྟེན་ན་གཏམས་པའི་མེ་ཏོག་འཚོ།
                             ཀ་མ་ལའི་བཞིན་རས།  ཀཱ་པ་ལའི་རང་མདངས།
                             འདི་ནི་ཁྱེད་ཀྱི་མཛེས་སྡུག་གི་ལང་ཚོ་ཡིན།
                             མེ་ཏོག་འཚོ།
                             གངས་དཀར་པོར་བློ་སེམས་གཏད་ནས།
                             སྤང་སྔོན་མོར་ཕུགས་འདུན་བཅོལ་དུས།
                             འཁྲེང་ཞེན་ཁྲི་ཕྲག་གི་རྒྱབ་ལྗོངས་ནས།
                             ངས་ཁྱེད་ཀྱི་དགེ་མཚན་ཡོད་ཚད།
                             སྨྱུག་རྩེ་ནས་མགུར་མ་རུ་བཞེངས་ཡོད།