༄༅། དགེ་བ་བཅུའི་ལས་ཀྱི་ལམ་གྱི་བསྟན་པ་ཞེས་བྱ་བ།

   འཕགས་པ་སྦྱིན་པའི་ཕ་རོལ་དུ་ཕྱིན་པ་ཞེས་བྱ་བ་ཐེག་པ་ཆེན་པོའི་མདོ་ལས།

   འཕགས་པ་ཕ་རོལ་དུ་ཕྱིན་པ་ཞེས་བྱ་བའི་ཐེག་པ་ཆེན་པོའི་མདོ་ལས།　བྱང་ཆུབ་སེམས་དཔའ་སེམས་དཔའ་ཆེན་པོ་མི་ཡི་དབང་བོ་གཙུག་གི་ནོར་བུས་གསོལ་བ།　བཅོམ་ལྡན་འདས་རིགས་ཀྱི་བུའམ་རིགས་ཀྱི་བུ་མོ་དང་པོ་སེམས་བསྐྱེད་པས་གང་ལ་མངོན་པར་བརྩོན་པར་བགྱི་ལགས།　བཀའ་བསྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེནཔ་དང་པོ་སེམས་བསྐྱེད་པས་དགེ་བ་བཅུའི་ལས་ཀྱི་ལམ་དག་ལ་བརྩོན་པར་བྱའོ།　།དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་བཅུའི་ལས་ཀྱི་ལམ་དག་ལ་ཇི་ལྟར་བརྩོན་ཞེ་ན།　བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྲོག་གཅོད་པ་སྤོང་བ་ནས་ལོག་པར་ལྟ་བའི་ཡང་དག་སྤངས་བ་ཡིན་ནོ། 　།

དེ་ལ་སྲོག་གཅོད་པ་སྤངས་བ་ནི་འདི་སྙམ་དུ་སེམས་ཏེ།

   སྲོག་ཅེས་བྱ་བ་ནི་ཐ་ན་སྲོག་ཆགས་གྲོག་སྦུར་ཡན་ཆད་ལ་ཡང་སྡུག་ཅིང་ཕངས་ལ་དགའ་ཞིང་ཡིད་དུ་འོང་བ་ཡིན་ཏེ།　བདག་ལ་ཡང་སྲོག་འདི་སྡུག་ཅིང་ཕངས་ལ་དགའ་ཞིང་ཡིད་དུ་འོང་བ་ཡིན་གྱི་སུ་ཡང་བདག་གསོད་པའམ། གསོད་དུ་འཇུག་པའམ།　བསད་པ་ལ་རྗེས་སུ་ཡི་རངས་བར་མ་གྱུར་ཅིགབདག་གིས་ཀྱང་སུ་ལ་ཡང་གསད་པར་མི་བྱ།　།གསོད་དུ་གཞུག་པར་མི་བྱ།　།གསོད་པ་ལ་རྗེས་སུ་ཡི་རངས་བར་མི་བྱའོ་སྙམ་མོ།　།དེ་ལྟ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྲོག་གཅོད་སྤངས་བ་ཡིན་ནོ།　།མངལ་ན་གནས་པ་ཡན་ཆད་ཀྱང༌།　།ཀུན་ལ་སྲོག་ནི་སྡུག་པའི་ཕྱིར།　།བདག་གི་སྲོག་ཕངས་གང་ཡིན་པ།　།དེ་ནི་སྲོག་ཆགས་གསོད་མི་བྱེད།　།

དེ་བཞིན་དུ་མ་བྱིན་ལེན་པ་སྤངས་བ་ནི།

   ནོར་ཞེས་བྱ་བ་ནི་ཐ་ན་རིགས་ངན་དང་གཡུང་བོ་ཡན་ཆད་ལའང་སྡུག་ཅིང་ཕངས་པ་ཡིན་པས།　སུ་ཡང་བདག་ལ་འཕྲོག་པ་དང༌།　འཕྲོག་ཏུ་འཇུག་པ་དང༌།　འཕྲོག་པ་ལ་རྗེས་སུ་ཡི་རང་བར་མི་བྱའོ་སྙམ་པའོ།　།ཤིང་དང་བོང་བ་ཡན་ཆད་ལ།　། གཞན་གྱིས་བོར་བར་གྱུར་བ་ཡང༌།　།གང་ལ་ཕ་ཡི་ནོར་སྡུག་པ།　།དེ་ནི་ནོར་ལ་འཕྲོག་མི་བྱེད།　།

འདོད་པས་ལོག་པར་གཡེམ་པ་སྤངས་བ་ནི།

   ཆུང་མ་ཞེས་བྱ་བ་ནི།　ཐ་ན་དུད་འགྲོའི་སྐྱེ་གནས་སུ་གྱུར་བ་རྣམས་ལ་ཡང་སྡུག་ཅིང་ཕངས་བ་ཡིན་ཏེ།སུ་ཡང་བདག་ལ་འཕྲོག་པའམ་འཕྲོག་ཏུ་འཇུག་པའམ།　འཕྲོག་པ་ལ་རྗེས་སུ་ཡི་རང་བའམ།　ནན་གྱིས་མནན་ཏེ་དགའ་མགུར་ཡོངས་སུ་ལོངས་སྤྱོད་པར་མི་བྱའོ་སྙམ་པའོ།　།བྲན་མོར་གྱུར་བ་ཡན་ཆད་ཀྱང༌།　།གཞན་གྱིས་བཞག་པར་གྱུར་བ་ལ།　།གང་ལ་རང་གི་ཆུང་མ་སྡུག　།དེ་ནི་ཆུང་མར་འཕྲོག་མི་བྱེད།　།

རྫུན་དུ་སྨྲ་བ་སྤངས་བ་ནི།

   བདེན་པ་ཞེས་བྱ་བ་དེ་ནི་ཐ་ན་གནོད་སྦྱིན་དང་འབྱུང་བོ་ཤ་ཟ་རྣམས་ལའང་སྡུག་ཅིང་ཕངས་ལ་དགའ་ཞིང་ཡིད་དུ་འོང་བ་ཡིན་ཏེ།　བདག་ལའང་སྡུག་ཅིང་ཕངས་བས་བདག་ལ་རྫུན་སྨྲ་བས་སུན་འབྱིན་པའམ།　སུན་འབྱིན་དུ་འཇུག་པའམ།　སུན་ཕྱུང་བ་ལརྗེས་སུ་ཡི་རང་མར་མ་གྱུར་ཅིག　།བདག་གིས་ཀྱང་སུ་ལའང་རྫུན་དུ་སྨྲ་བས་སུན་འབྱུང་བར་མི་བྱ་བ་ནས།　རྗེས་སུ་ཡི་རང་བར་མི་བྱ་བའོ་སྙམ་པའོ།　།གནོད་སྦྱིན་འབྱུང་བོ་ཡན་ཆད་ཀྱང༌།　།གང་ལ་བདེན་པར་སྨྲ་བ་སྡུག　།ཤེས་རབ་ཅན་དེ་རྫུན་ཚིག་གིས།　།ལུས་ཅན་ཀུན་ལ་སུན་མི་འབྱིན།　།

ཕྲ་མའི་ཚིག་སྤངས་བ་ནི།

   ཕྲ་མ་ནི་ཐ་ན་གང་ཟག་ཕྲ་མ་ཅན་རྣམས་ལའང་ཡིད་མི་སྡུག་ཅིང་མི་འདོད་ལ་མི་དགའ་ཞིང་ཡིད་དུ་མི་འོང་བ་ཡིན་ཏེ།བདག་ལའང་ཡིད་དུ་མི་འོང་བ་ཡིན་གྱི།སུ་ལ་ཡང་བདག་ལ་ཕྲ་མ་ཟེར་བས་གླེང་བའམ།གླེང་དུ་འཇུག་པའམ།གླེང་བ་ལ་རྗེས་སུ་ཡི་རང་བར་མ་གྱུར་ཅིགབདག་གིས་ཀྱང་སུ་ལའང་ཕྲ་མ་ཟེར་བས་གླེང་བར་མི་བྱ་བ་ནས།ཡི་རང་བར་མི་བྱའོ་སྙམ་པའོ།

ངག་རྩུབ་པོ་སྨྲ་བ་སྤངས་པ་ནི།

   ངག་རྩུབ་པོ་ཞེས་བྱ་བ་འདི་ནི་ཐ་ན་གང་ཟག་ངག་རྩུབ་པོ་དང་ལྡན་པ་རྣམས་ལ་ཡང་མི་སྡུག་ཅིང་ཡིད་དུ་མི་འོང་བ་ཡིན་ཏེ།　བདག་ལའང་ཡིད་དུ་མི་འོང་བ་ཡིན་གྱི།སུ་ཡང་བདག་ལ་ངག་རྩུབ་པོ་སྨྲ་བ་དང༌།　གཏུམ་པོའི་ཚིག་དང༌།　བརླང་བོའི་ཚིག་དང༌།　མི་བདེན་པའི་ཚིག་གིས་ཐོ་འཚམ་པའམ།　ཐོ་འཚམ་དུ་འཇུག་པའམ།　ཐོ་འཚམ་པ་ལ་རྗེས་སུ་ཡི་རང་བར་མ་གྱུར་ཅིག　།བདག་གིས་ཀྱང་སུ་ལ་ཡང་ངག་རྩུབ་པོ་སྨྲ་བ་ནས་ཡི་རང་བར་མི་བྱའོ་སྙམ་པའོ།　།གང་དག་སུ་ཡང་རུང་བ་ལ།ཕྲ་མ་ངག་རྩུབ་མི་སྡུག་པ།　།དེ་ནི་ཕྲ་མ་མི་ཟེར་ཏེ།　།རྩུབ་པའི་ཚིག་ཀྱང་སྲུང་བར་བྱེད།　།

ཚིག་ཀྱལ་བ་སྤངས་པ་ནི།

   ཚིག་ཀྱལ་བ་ཞེས་བྱ་བ་ནི་ཐ་ན་གང་ཟག་ཚིག་ཀྱལ་བ་ཅན་དག་ལ་མི་སྡུག་ཅིང་ཡིད་དུ་མི་འོང་བ་ཡིན་ཏེ།　བདག་ལའང་ཡིད་དུ་མ