མཆོད་རྟེན་ཆེན་པོ་བྱ་རུང་ཁ་ཤོར་གྱི་ལོ་རྒྱུས་ཐོས་པས་གྲོལ་བ།

མཆོད་རྟེན་ཆེན་པོ་བྱ་རུང་ཁ་ཤོར། 

        ཕྱོགས་བཅུ་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཐམས་བཅད་ཀྱི་ཐུགས་གཉིས་སུ་མེད་པ་ཆོས་ཀྱི་སྐུའི་རྟེན་མཆོད་རྟེན་ཆེན་པོ་བྱ་རུང་ཁ་ཤོར་ཞེས་བྱ་བ་འདི་ཉིད་ཀྱི་ལོ་རྒྱུས་ནི།  མེ་ཕོ་སྤྲེལ（སྤྱི་ལོ816）ཟླའི་ཚེས་བཅུའི་ཉིན།  དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཆེན་པོའི་བར་ཁང་དུ།  ཆོས་རྒྱལ་ཁྲི་སྲོང་ལྡེ་བཙན་རྗེ་འབངས་ཉི་ཤུ་རྩ་ལྔ་ལ་བླ་མ་ཡང་གསང་ཐུགས་ཀྱི་སྒྲུབ་པའི་དབང་བསྐུར་ཆེན་པོ་མཛད་པའི་དུས།  ཟ་འོག་གི་འབོལ་དགུ་རྩེག་གི་སྟེང་དུ། ཨུ་རྒྱན་རིན་པོ་ཆེ་བཞུགས་སུ་གསོལ།  གསེར་སྐྱོགས་རྒུན་ཆང་གིས་བཀང་ནས་ཕྱག་ཏུ་ཕུལ། འཇིག་རྟེན་གྱི་ཞལ་ཟས་སྣ་ཚོགས་ཕུལ།  རྗེའི་མགུལ་གཡུ་གསལ་བ་འོད་སྒྲོན་གྱིས་ཐོག་དྲངས་པའི་གཡུ་ཉི་ཤུ་རྩ་གཅིག   གསེར་ཕྱེ་བྲེ་ལྔ།  གསེར་གྱི་པ་ཏྲ་བདུན།  དར་ཟབ་ཡུག་བརྒྱ།  གཞན་ཡང་ལོངས་སྤྱོད་དཔག་ཏུ་མེད་པ་ཕུལ།  རྒྱལ་པོ་ཁྲི་སྲོང་ལྡེ་བཙན་གྱིས་ཀྱང་ཕྱག་ལན་སྟོང་དུ་བཙལ་ཏེ་ཞུས་པ།   ཀྱེེ་སློབ་དཔོན་ཆེན་པོ་ལགས།  བདག་ནི་མཐའ་འཁོབ་གདོང་དམར་བོད་ཀྱི་ཡུལ་དུ་སྐྱེས་ཀྱང་།  ཟ་ཧོར་ཡུལ་གྱི་མཁན་པོ་བོ་ངྷི་ས་ཏྭ་ཞི་བ་མཚོ་དང་།  ཨུ་རྒྱན་ཡུལ་གྱི་མཁན་པོ་པདྨ་འབྱུང་གནས་ཉིད་འདྲ་བའི་སྤྲུལ་སྐུ་རྣམ་གཉིས་གདན་དྲངས།  བདག་གིས་གཡར་དམ་འགྲོ་བ་མི་རྣམས་བསོད་ནམས་གསོག་པའི་རྟེན། དཀོན་མཆོག་རིན་པོ་ཆེ་རྣམ་པ་གསུམ་གྱི་བཞུགས་གནས།  དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཆེན་པོ།  ལྷོ་ཕྱོགས་འཛམ་བུའི་གླིང་ན་འགྲན་ཟླ་བྲལ་བ།  འདི་ལྟ་བུ་ནི་མཐར་ཕྱིན་པར་གྲུབ།  མཐའ་འཁོབ་བོད་ཀྱི་ཡུལ་མུན་པའི་གླིང་འདྲ་བ་འདིར།  དཀོན་མཆོག་གི་བསྟན་པ་ནི་གངས་ལ་ཉི་མ་ཤར་བ་ལྟར་དུ་དར་ཏེ་དབུས་འགྱུར་མ་ག་ངྷ་དང་མཉམ།  འགྲོ་བ་སེམས་ཅན་ཐམས་བཅད་ཉན་བཤད་དམ་པའི་ཆོས་ལ་བྱེད་པའི་དུས་བཟང་བོ་འདི་ལྟ་བུ་འབྱུང་བ་ནི།  སྔོན་དེ་བཞིན་གཤེགས་པ་འོད་སྲུངས་ཀྱི་བསྟན་པ་ལ།  བལ་ཡུལ་མ་གུ་ཏའི་ཡུལ་གྲུ་རུ།  རང་རེ་མཆོད་ཡོན་མ་དབུལ་མོ་བྱ་རྫི་མའི་བུ་བཞི་རུ་སྐྱེས་པའི་དུས་སུ་མཆོད་རྟེན་ཆེན་པོ་བྱ་རུང་ཁ་ཤོར་བཞེངས་ཏེ།  དེའི་དུས་སུ་སྨོན་ལམ་བཏབ་པའི་འབྲས་བུ་ཡིན་པར་གསུངས་ཏེ།  མཆོད་རྟེན་ཆེན་པོ་འདི་ཇི་ལྟར་བརྩིགས་པ་དང་།  སྨོན་ལམ་བཏབ་ཚུལ་རྣམས་ཡིད་ཆེས་ཤིང་དང་བ་དད་མོས་པར་བསྐྱེད་ཕྱིར།  བདག་ཅག་རྣམས་ལ་ཞིབ་པར་གསུང་དུ་གསོལ།  ཞེས་ཞུས་པས།  མ་ཧཱ་གུ་རུས་བཀའ་སྩལ་པ།  ཀྱེེ་རྒྱལ་པོ་ཆེན་པོ་ལེགས་པར་ཉོན་ལ་ཡིད་ལ་ཟུངས་ཤིག    མཆོད་རྟེན་ཆེན་པོ་བྱ་རུང་ཁ་ཤོར་ཞེས་བྱ་བ་འདི་ཉིད་ཇི་ལྟར་བྱུང་བའི་ལོ་རྒྱུས་ནི།  སྔོན་བསྐལ་པ་དཔག་ཏུ་མེད་ཅིང་བགྲང་ལས་འདས་པའི་སྔོན་རོལ་ན།  དེ་བཞིན་བཤེགས་པ་འོད་དཔག་ཏུ་མེད་པའི་དྲུང་དུ། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་སེམས་ཅན་ཐམས་བཅད་འཁོར་བའི་འདམ་ལས་འདོན་པར་སྨོན་ལམ་བཏབ་ནས།  འགྲོ་བ་དཔག་ཏུ་མེད་པ་འཁོར་བ་རྒྱ་མཚོ་ལས་བསྒྲལ་ཏེ།  ཕོ་བྲང་རི་བོ་པོ་ཏ་ལའི་རྩེར་བྱོན་ནས།  ད་ནི་སེམས་ཅན་གཅིག་ཀྱང་མེད་དོ་སྙམ་ནས་གཟིགས་པས་རིགས་དྲུག་གི་གནས་ན་སེམས་ཅན་ཆང་གར་མའི་སྦང་མ་ལྟ་བུ་ཉུང་དུ་མ་སོང་བར་འདུག་པས།  ད་ནི་སེམས་ཅན་འཁོར་བའི་རྒྱ་མཚོ་ལས་སྒྲོལ་བར་མི་ནུས་སོ་སྙམ་ནས་སྤྱན་ཆབ་ཤོར་བ།  ཕྱག་གི་སྲིན་ལག་གཉིས་ཀྱིས་གཏོར་ནས།  མ་འོངས་པའི་དུས་སུ་སྤྱན་ཆབ་གཉིས་ཀྱིས་ཀྱང་འགྲོ་བའི་དོན་བྱེད་པར་ཤོག་ཅིག་ཅེས་སྨོན་ལམ་བཏབ་པས།  སུམ་ཅུ་རྩ་སུམ་ལྷའི་ཡུལ་དུ།  ལྷའི་དབང་པོ་བརྒྱ་བྱིན་གྱི་སྲས་མོ་གཉིས་འཁྲུངས་ཏེ།  ལྷའི་བུ་མོ་གང་མ་དང་གང་ཆུང་མ་ཞེས་བྱ་བ་གཉིས་སུ་གྱུར་པས།   གང་ཆུང་མས་ལྷའི་མེ་ཏོག་བརྐུས་པས།  ལྷའི་ཁྲིམས་རྣམ་པར་དག་པ་མནན་ནས་མིའི་གནས་སུ་ལྷུང་བས།  བལ་ཡུལ་མ་གུ་ཏའི་ཡུལ་གྲུ་རུ།  ཕ་བྱ་རྫི་གསལ་བ་དང་།  མ་བྱ་རྫི་མ་བུ་རྣ་ཞེས་བྱ་བའི་བུ་མོ།  བྱ་རྫི་མ་བདེ་མཆོག་མ་ཞེས་བྱ་བར་སྐྱེས་ཏེ་བྱ་འཚོ་བའི་ལས་བྱེད་དོ།  དེའི་ཚེ་རིགས་ངན་བཞི་དང་བཤོས་པ་བུ་བཞི་སྐྱེས་ཏེ། དང་པོ་རྟ་རྫི་བཤོས་པའི་བུ་གཅིག  དེའི་འོག་ཕག་རྫིས་བཤོས་པའི་བུ་གཅིག  དེ་འོག་ཁྱི་རྫིས་བཤོས་པའི་བུ་གཅིག   དེ་འོག་བྱ་རྫིས་བཤོས་པའི་བུ་གཅིག་སྟེ་བཞི་སྐྱེས་སོ།  དེ་ནས་མས་བྱ་གསོས་པའི་གླ་བསགས་པས།  བུ་བཞི་ཡང་ཁྱིམ་པ་རབ་ཐང་དུ་ཕོག  སླར་ཡང་གླའི་ལྷག་མ་བསགས་པས་ནོར་མང་མོ་བསགས་ཏེ།  བྱ་རྫི་མས་བསམ་བློ་གཅིག་བཏང་བས། ཡང་ངས་བྱ་བཙོས་པའི་གླ་བསགས་པས་བུ་བཞི་ཡང་ཁྱིམ་པ་རབ་ཐང་དུ་ཕོག   ད་གླའི་ལྷག་མ་བསགས་པ་ལ་ཡང་།  ནོར་མང་པོ་རྙེད་པ་འདི་ཀུན་ལ་སྙིང་པོ་ལེན་པའི་ཕྱིར་དུ། སངས་རྒྱས་ཐམས་བཅད་ཀྱི་ཐུགས་ཀྱི་རྟེན་ང་རང་གི་ཡི་དམ།  འགྲོ་བ་དཔག་ཏུ་མེད་པའི་བསོད་ནམས་གསོག་པའི་ཞིང་།  དེ་བཞིན་བཤེགས་པའི་རིང་བསྲེལ་གྱི་སྙིང་པོ་ཅན་གྱི་མཆོད་རྟེན་ཆེན་པོ་ཞིག་བཞེངས་པར་བྱེད་པ་ལ།  ཐོག་མར་ཡུལ་གྱི་རྒྱལ་པོ་ཆེན་པོ་ལས་བླང་བའི་ཞུ་བ་འབུལ་བར་བྱའོ་སྙམ་ནས།  རྒྱལ་པོ་ཆེན་པོའི་དྲུང་དུ་ཕྱིན་ནས།  ཕྱག་འཚལ་བསྐོར་བ་བྱས།  པུས་བཙུགས།  ཐལ་མོ་སྦྱར་ཏེ་གསོལ་བ།   ཀྱེེ་རྒྱལ་པོ་ཆེན་པོ་ལགས། བདག་དབུལ་མོ་བྱ་རྫི་མ་མི་གཅིག་གིས་བྱ་བཙོས་པའི་གླ་བསགས་པས།  ཕ་མི་གཅིག་པའི་བུ་བཞི་ཡོད་པ་ཡང་ཁྱིམ་པ་རབ་ཐང་དུ་ཕོག   གླའི་ལྷག་མ་བསགས་པས་ཀྱང་ནོར་མང་པོ་རྙེད་པ་རྣམས་བདག་རང་གི་ཡི་དམ།  འགྲོ་བ་དཔག་ཏུ་མེད་པའི་བསོད་ནམས་གསོག་པའི་ཞིང་།  སངས་རྒྱས་ཐམས་བཅད་ཀྱི་ཐུགས་ཀྱི་རྟེན།  དེ་བཞིན་གཤེགས་པའི་རིང་བསེལ་གྱི་སྙིང་པོ་ཅན་གྱི་མཆོད་རྟེན་ཆེན་པོ་ཞིག་བཞེངས་སུ་གསོལ་བས།   གནང་པར་ཞུ་འཚལ།  དེ་སྐད་ཅེས་གསོལ་བ་དང་།  རྒྱལ་པོ་ཆེན་པོ་རྣམས་མ་བརྟགས་པར་བཀའ་མི་སྩོལ་བས།  རེ་ཞིག་ཐུགས་མཉམ་པར་བཞག་ནས་གཟིགས་པས།   མོ་དབུལ་མོ་བྱ་རྫི་མ་མི་གཅིག་གིས་བྱ་བཙོས་པའི་གླ་བསགས་པས་ཕ་མི་གཅིག་པའི་བུ་བཞི་ཡང་ཁྱིམ་པ་རབ་ཐང་དུ་ཕོག  གླའི་ལྷག་མ་བསགས་པས་ཀྱང་མཆོད་རྟེན་ཆེན་པོ་བཞེངས་པ་ངོ་མཚར་ཆེ་དགོངས་པ་ཐུགས་ལ་ཤར་ཏེ།   དེ་ལྟར་བྱ་རུ་རུང་ཞེས་བཀའ་སྩལ་གནང་བས།  བྱ་རྫི་མ་དགའ་ཞིང་ཡིད་རབ་ཏུ་རངས་པར་གྱུར་ནས།  སླར་ཡང་རྒྱལ་པོ་ཆེན་པོ་ཉིད་ལ་ཕྱག་འཚལ་ཞིང་བསྐོར་བ་ལན་མང་དུ་བྱས་ནས།  རང་གི་ཁྱིམ་དུ་ལོག་ཏེ།   མོ་རང་མ་བུ་ལྔ་དང་བྲན་གཅིག་རྣམས་ཀྱིས་གླང་བོ་ཆེ་གཅིག་དང་བོང་བུ་གཅིག་ཡོད་པ་ལ་ས་སྦག་བཀལ་ཞིང་སྐྱས་ཏེ།  དེ་ནས་མཆོད་རྟེན་ཆེན་པོའི་རྨང་གཏིང་སྟེ་བརྩིགས་པས། ཁྲི་འབངས་གསུམ་དུ་སླེབས་པའི་ཚེ།  བལ་ཡུལ་གྱི་མི་ཐམས་བཅད་ཁ་འཆམས་ཏེ།  མོ་དབུལ་མོ་བྱ་རྫི་མ་མི་གཅིག་གིས་འདི་ཙམ་གྱི་མཆོད་རྟེན་བཞེངས་ན།  རྒྱལ་པོ་དང་།  བློན་པོ།  ཕྱུག་པོ་ཆེན་པོ།  མི་དྲག་པ་ཀུན་གྱིས་ཇི་ལྟ་བུའི་མཆོད་རྟེན་བཞེངས།   འདི་ཀུན་ལ་བརྙེས་པ་ཡིན་ཡང་གནོད་པར་འགྱུར་བས།   མི་ཐམས་ཅད་གྲོས་བྱས་ཏེ་རྒྱལ་པོ་ཆེན་པོ་ལ་ཞུས་ཏེ་རྩིག་ཏུ་མ་བཅུག་པར་འཐད་དོ་ཟེར།   བལ་ཡུལ་གྱི་མི་ཐམས་ཅད་ཚོགས་ཏེ་རྒྱལ་པོ་ཆེན་པོ་ཞུས་པ།  ཀྱེེ་རྒྱལ་པོ་ཆེན་པོ་ལགས།  ཁྱེད་ལ་ཐུགས་ནོར་བ་ཆེན་པོ་གཅིག་གདའ།  མོ་དབུལ་མོ་བྱ་རྫི་མ་མི་གཅིག་གིས་མཆོད་རྟེན་འདི་ལྟ་བུ་བཞེངས་ན།  ཁྱེད་རྒྱལ་པོ་དང་།   བློན་པོ།  ཕྱུག་པོ་ལ་སོགས་པ་དྲག་པ་ཀུན་གྱིས་དགེ་རྩ་ལ་ཇི་ལྟ་བུའི་མཆོད་རྟེན་བཞེངས།   འདི་རྩིག་ཏུ་བཅུག་ན་རང་རེ་ཀུན་ལ་གནོད་པས།  ས་རྡོ་རྣམས་རང་གནས་སུ་བསྐྱལ་ཏེ་རྩིག་ཏུ་མ་བཅུག་པ་འཐད་དོ་ཞུས་པས།  རྒྱལ་པོ་ཆེན་པོས་བཀའ་སྩལ་བ།   ཁྱེད་རྣམས་ཐམས་བཅད་ལེགས་པར་ཉོན་ཅིག   མོ་དབུལ་མོ་བྱ་རྫི་མ་མི་གཅིག་གིས་བྱ་འཚོ་བའི་གླ་བསགས་པས་ཀྱང་ཕ་མི་གཅིག་པའི་བུ་བཞི་ནི་ཁྱིམ་པ་རབ་ཐང་དུ་ཕོག   སླར་ཡང་གླའི་ལྷག་མ་བསགས་པ་ལའང་མཆོད་རྟེན་ཆེན་པོ་འདི་ལྟ་བུ་བཞེངས་པ་ངོ་མཚར་རེ་ཆེ་བསམ་ནས།   ངས་ནི་བྱ་རུ་རུང་ཟེར་བ་ཁ་ནས་ཤོར་རོ།   ང་རྒྱལ་པོས་སྨྲས་པ་ལན་གཅིག་ཡིན་ནོ་གསུངས་པས། གཞན་མི་རྣམས་ཀྱིས་བཀག་ཀྱང་མི་ཁོགས་པར་བརྩིགས་པས།   ལོ་བཞི་ལ་བུམ་པ་མན་བརྩིགས་གྲུབ་པས།   དེའི་དུས་སུ་བྱ་རྫི་མ་བདེ་མཆོག་མ་དེ་ཉིད་ཚེའི་དུས་བྱེད་པར་ཤེས་ཏེ།  བུ་བཞི་གཡོག་དང་ལྔ་ལ་སྨྲས་པ།   ཁྱེད་རྣམས་ཀྱིས་ངའི་ཡི་དམ།  འགྲོ་བ་མཐའ་ཡས་པའི་སེམས་ཅན་ཐམས་ཅད་ཀྱི་བསོད་ནམས་གསོག་པའི་ཞིང་མཆོག་ཏུ་གྱུར་པའི་མཆོད་རྟེན་ཆེན་པོའི་ཞབས་སུ་ཆུག་ལ།  འདིའི་ནང་དུ་དེ་བཞིན་གཤེགས་པའི་རིང་བསྲེལ་བཞུགས་སུ་གསོལ་ཏེ།  རབ་ཏུ་གནས་པ་རྒྱ་ཆེན་པོ་གྱིས་ཤིག   དེས་ནི་ངའི་བསམ་པ་རྫོགས་ཤིང་།  དུས་གསུམ་གྱི་སངས་རྒྱས་ཐམས་ཅད་ཀྱི་དགོངས་པ་ཡང་ཡོངས་སུ་རྫོགས་པ་དང་། ཁྱེད་རྣམས་ཀྱི་ཡང་འདི་ཕྱིའི་དོན་རྒྱ་ཆེན་པོ་གྲུབ་པར་འགྱུར་རོ།  ཞེས་སྨྲས་ཏེ་ཚེའི་དུས་བྱས་སོ།   དེའི་ཚེ་སྒྲ་དང་རོལ་མོ་དང་ལྷའི་མེ་ཏོག་གི་ཆར་ཆེན་པོ་འབབ་པ་དང་།  འཇའ་འོད་ཀྱི་ཚོགས་དང་བཅས་ཏེ་མཆོད་རྟེན་ཆེན་པོ་འདི་ཉིད་བཞེངས་པའི་ཕན་ཡོན་གྱིས།   མ་བྱ་རྫི་མ་བདེ་མཆོག་མ་འདི་ཉིད་དམ་ཚིག་ལྷ་མོ་པྲ་མོ་ཞེས་བྱ་བར་སངས་རྒྱས་སོ།།
           དེ་ནས་བུ་རྣམས་གྲོས་བྱས་ཏེ་རང་རེའི་མ་རྒན་མོ་འདི་ཉིད་དབུལ་མོ་བྱ་རྫི་མར་སྐྱེས་ཀྱང་། ངེད་རང་ཕ་མི་གཅིག་པའི་བུ་བཞི་ནི་ཁྱིམ་པ་རབ་ཐང་དུ་ཕོག   ནོར་གྱི་ལྷག་མས་ཀྱང་འཛམ་བུའི་གླིང་དུ་དཀོན་པའི་མཆོད་རྟེན་ཆེན་མོ་ངོ་མཚར་མཆོག་ཏུ་གྱུར་པ་འདི་ལྟ་བུ་བཞེངས་ན།    ད་ངེད་རང་བུ་རྣམས་ཀྱིས་མའི་དགེ་རྩ་དྲིན་ལན་གསོ་བའི་ཕྱིར་དུ།  མའི་མཆོད་རྟེན་ལ་བུམ་པ་གདགས་དགོས་ཟེར་ཏེ།   གྲོས་མཚམས་ནས་བུ་རྣམས་ཀྱིས་སྔར་ལྟར་གླང་པོ་ཆེ་དང་བོང་བུ་ལ་ས་སྦག་བཀལ།  བྲན་གཅིག་པོ་ལ་གྲོགས་བཅོལ་ཏེ་ལོ་གསུམ་བརྩིགས་པས།  ཀུན་དྲིལ་ལོ་བདུན་ལ་ཞབས་སུ་ཆུག་སྟེ།  དེ་བཞིན་བཤེགས་པ་འོད་སྲུང་ཀྱི་རིང་བསྲེལ་གྱི་ག་ངྷའི་བྲེ་གང་སྲོག་ཤིང་གི་ནང་དུ་བཞུགས་སུ་གསོལ་ཏེ།  དེ་ནས་མཆོད་པའི་ཚོགས་དཔག་ཏུ་མེད་པ་བཤམས་ནས་རབ་ཏུ་གནས་པའི་མེ་ཏོག་འཐོར་བའི་ཚེ།  མདུན་གྱི་ནམ་མཁའི་ཁམས་ཐམས་ཅད་དུ།  དེ་བཞིན་བཤེགས་པ་འོད་སྲུང་འཁོར་དང་བཅས་པ་དང་།  གཞན་ཡང་ཕྱོགས་ཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དགྲ་བཅོམ་པའི་འཁོར་དཔག་ཏུ་མེད་པས་བསྐོར་བ་དང་།  གཞན་ཡང་བདེ་བཞིན་བཤེགས་པ་རིགས་ལྔ།   རིགས་གསུམ་མགོན་པོ་ཞི་ཁྲོའི་ལྷ་ཚོགས་དཔག་ཏུ་མེད་པ་ཏིལ་གྱི་གང་བུ་ཁ་ཕྱེ་བ་ལྟ་བུ་བསམ་གྱིས་མི་ཁྱབ་པ་རྣམས་བྱོན་ནས།  མེ་ཏོག་འཐོར་ཞིང་བཀྲ་ཤིས་པ་རྒྱ་ཆེན་པོ་བརྗོད་པར་མཛད།   ལྷའི་རོལ་མོ་སྣ་ཚོགས་པའི་སྒྲ་སྒྲོགས་པ་དང་།  ལྷའི་མེ་ཏོག་གི་ཆར་ཆེན་པོ་འབབ་པ།  ལྷའི་སྤོས་དྲི་ཞིམ་པོས་ས་ཕྱོགས་ཐམས་ཅད་དུ་ཁྱབ་པ།  ས་ཆེན་པོ་འདི་ཡང་ལན་གསུམ་གྱི་བར་དུ་གཡོས་པ།  དེ་བཞིན་བཤེགས་པའི་ཚོགས་ཀྱི་སྐུ་ལ་ཡེ་ཤེས་ཀྱི་འོད་ཟེར་དཔག་ཏུ་མེད་པ་འཕྲོས་པས།  ཉིན་ནུབ་ཀྱི་སྣང་བ་མེད་པ་ཞག་ལྔའི་བར་དུ་བསྟན་ནོ།།(མཆོད་རྟེན་ཆེན་པོ་བྱ་རུང་ཁ་ཤོར་གྱི་ལོ་རྒྱུས་ལས།  ཇི་ལྟར་བཞེངས་པ་དང་རབ་གནས་མཛད་པའི་ལེའུ་སྟེ་དང་པོ།)
          ཡང་རྒྱལ་པོ་ཁྲི་སྲོང་ལྡེ་བཙན་གྱིས་གསོལ་བ།   ཀྱེེ་སློབ་དཔོན་ཆེན་པོ་ལགས།  དེ་ལྟ་བུའི་མཆོད་རྟེན་ཆེན་པོ་བྱ་རུང་ཁ་ཤོར་ཞེས་བྱ་བ་ངོ་མཚན་དཔག་ཏུ་མེད་པ་འདི་ཉིད་ཀྱི་དྲུང་དུ།  སྨོན་ལམ་ཇི་ལྟར་བཏབ་པ་དང་དེ་ཉིད་འདི་ལྟར་གྲུབ་པའི་ལོ་རྒྱུས་རྣམས་ཞིབ་པར་གསུངས་དུ་གསོལ་ཞེས་གསོལ་བས།   མ་ཧཱ་གུ་རུས་བཀའ་སྩལ་པ།  ཉོན་ཅིག་རྒྱལ་པོ་ཆེན་པོ།   མཆོད་རྟེན་ཆེན་པོ་འདི་ལ་རབ་ཏུ་གནས་པའི་མེ་ཏོག་གཏོར་བའི་དུས་སུ།  ངོ་མཚར་བའི་ལྟས་ཡ་མཚན་ཆེ་བ་དེ་ལྟར་བསྟན་པའི་དུས་དེར།  སངས་རྒྱས་དང་བྱང་ཆུབ་སེམས་དཔའ།  ལྷའི་ཚོགས་དཔག་ཏུ་མེད་པ་དེ་དག་ཐམས་ཅད་ཀྱི་ཞལ་ནས།  མགྲིན་གཅིག་ཏུ། དབྱངས་གཅིག་ཏུ།  ཀྱེེ་སྐལ་བ་མཆོག་དང་ལྡན་པའི་རིགས་ཀྱི་བུ་རྣམས་ཉོན་ཅིག    ཁྱེད་རྣམས་ཀྱིས་ལྷག་པའི་བསམ་པ་རྣམ་པར་དག་པས་དུས་གསུམ་གྱི་རྒྱལ་བ་ཐམས་ཅད་ཀྱི་ཐུགས་གཉིས་སུ་མེད་པ་ཆོས་ཀྱི་སྐུའི་རྟེན་མཆོག་ཏུ་གྱུར་པའི་མཆོད་རྟེན་ཆེན་པོ་འདི་ལྟ་བུ་བཞེངས་པའི་ཕན་ཡོན་གྱིས།  རང་རང་གི་སྨོན་ལམ་ཅི་བཏབ་པ་ཐམས་ཅད་འགྲུབ་པར་འགྱུར་བས་ཐོབ་ཅིག་ཅེས་བཀའ་སྩལ་བྱུང་བས།  དེར་བུ་རྣམས་ཀྱིས་གྲོས་བྱས་པས།  ཡང་རང་རེའི་མ་རྒན་མོ་དེ་ཉིད་ཀྱིས་སེམས་བསྐྱེད་རྒྱ་ཆེན་པོ་བྱས་ཏེ།  མཆོད་རྟེེན་འདི་ལྟ་བུའི་རྨང་བཏིང་ཞིང་བརྩིགས།  དེ་ནས་ཚེའི་དུས་བྱས་པས།  ངེད་རང་བུ་རྣམས་མའི་དགེ་རྩ་ལ་མཆོད་རྟེན་ལ་བུམ་པ་བཏགས་ཅིང་རབ་ཏུ་གནས་པ་བྱས་པའི་ཕན་ཡོན་གྱིས།  ཕྱོགས་ཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་ཞལ་མངོན་སུམ་དུ་བསྟན་ནས།  སྨོན་ལམ་ཅི་བཏབ་པ་འགྲུབ་པས་ཐོབ་ཅིག་ཅེས་གནང་བ་ཐོབ་པའི་དུས་འདིར།  ངེད་རང་རྣམས་སྨོན་ལམ་རྒྱ་མ་ཆུང་བ་རེ་འདེབས་དགོས་སོ་ཟེར་ཏེ།  བུ་ཆེ་ཤོས་རྟ་རྫིའི་བུའི་བསམ་པ་ལ།  སྨོན་ལམ་གཅིག་འདེབས་པར་བྱེད་པ་ལ་རྒྱ་གང་ཆེ་བསམ་པས།  ད་ལྟར་བྱང་གི་ཕྱོགས་ཀྱི་རྒྱལ་ཁམས་འདི་ན།  འཁྱག་པ་འཁྱག་ཡུལ་གྱི་མཐའ་འཁོབ་ཞེས་བྱ་བ།  རི་ཐམས་ཅད་གངས་སུ་ཡོད་པ།  མཐིལ་ཐམས་ཅད་ཆུ་རུ་ཡོད་པ།  དབྱར་ཆུ་བྱ་མང་པོ་གནས་པ།  དགུན་འཁྱག་པའི་ཐང་ཅིག་དུ་གནས་པ་ཞིག་ཡོད་པ་དེ།  མ་འོངས་པ་ན་ཆུ་ཐམས་ཅད་བསྐམས་ཏེ།   དེ་བཞིན་བཤེགས་པ་ཤཱཀྱ་ཐུབ་པའི་བསྟན་པ་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་འདུལ་བའི་ཞིང་དུ་གྱུར་ནས།  དེར་སངས་རྒྱས་ཀྱི་བསྟན་པ་རྒྱ་ཆེན་པོ་འབྱང་བར་འགྱུར་རོ་ཞེས་བྱ་བའི་ལུང་བསྟན་འདུག་པས།  ཞིང་དེར་སངས་རྒྱས་ཀྱི་བསྟན་པ་འབྱུང་བ་འདི་ཉིད་ངས་འཛུགས་པར་སྨོན་ལམ་གདབ་དགོས་བསམ་ནས།  སྨོན་ལམ་བཏབ་པ་ནི།  བདག་གི་ལྷག་བསམ་རྣམ་པར་དག་པས་མའི་མཆོད་རྟེན་ལ་བུམ་པ་བཏགས་པའི་ཕན་ཡོན་གྱིས།  བདག་གིས་མ་འོངས་སྙིགས་མ་བར་བདོའི་དུས།  དེ་བཞིན་བཤེགས་པ་ཤཱཀྱ་ཐུབ་པའི་བསྟན་པ་ལ་འཁྱག་པ་འཁྱག་ཡུལ་གྱི་མཐའ་འཁོབ་ཏུ་ཆོས་སྐྱོང་བའི་རྒྱལ་པོ་ཆེན་པོ་ཞིག་ཏུ་སྐྱེས་ནས་སངས་རྒྱས་ཀྱི་བསྟན་པ་རིན་པོ་ཆེ་འཛུགས་པར་ཤོག་ཅིག་ཅེས་བརྗོད་དོ། །  དེ་འོག་ཕག་རྫིའི་བུའི་སྨོན་ལམ་ནི།  མའི་མཆོད་རྟེན་ལ་བུམ་པ་བཏགས་པའི་ཕན་ཡོན་གྱིས།   ཕུ་བོ་ཁྱེད་ཆོས་སྐྱོང་བའི་རྒྱལ་པོར་སྐྱེས་ནས།  སངས་རྒྱས་ཀྱི་བསྟན་པ་རིན་པོ་ཆེ་འཛུགས་པའི་དུས་སུ།  འཁྱག་པ་འཁྱག་ཡུལ་གྱི་མཐའ་འཁོབ་དེ་རུ། བསྟན་པའི་གཞི་མ་དགེ་འདུན་གྱི་སྡེ་འཛུགས་དགོས་པས།  བདག་ནི་དགེ་སློང་རྣམ་པར་དག་པ་གཅིག་ཏུ་སྐྱེས་ནས།  དགེ་འདུན་ཐམས་ཅད་རབ་ཏུ་བྱུང་བར་བྱེད་པའི་མཁན་པོ་ཆེན་པོ་གཅིག་ཏུ་སྐྱེ་བར་ཤོག་ཅིག་ཅེས་བརྗོད་དོ།།  དེ་འོག་ཁྱི་རྫིའི་བུའི་སྨོན་ལམ་ནི།  མའི་མཆོད་རྟེན་ལ་བུམ་པ་བཏགས་པའི་ཕན་ཡོན་གྱིས།  ཕུ་བོ་ཁྱེད་གཉིས་འཁྱག་པ་འཁྱག་ཡུལ་གྱི་མཐའ་འཁོབ་ཏུ།  གཅིག་གིས་ནི་སངས་རྒྱས་ཀྱི་བསྟན་པ་འཛུགས།  གཅིག་གིས་སངས་རྒྱས་ཀྱི་བསྟན་པ་འཛིན་པའི་དུས་སུ།  བདག་མངལ་ལས་མ་སྐྱེས་པ།  མེ་ཏོག་པདྨའི་སྡོང་པོ་ལ་རྫུས་ཏེ་སྐྱེས་པ།  སྐྱེ་ཤི་རྒྱུན་བཅད་དེ་ཚེ་ཉི་ཟླ་དང་མཉམ་པ།  ནུས་པས་ལྷ་འདྲེ་མི་གསུམ་འདུལ་བ་གཅིག་ཏུ་སྐྱེས་ནས་མཐའ་འཁོབ་འདི་ཉིད་ཀྱི་འདྲེ་སྲིན་གདུག་པ་ཅན་ཐམས་ཅད་འདུལ་བ་དང་།  ཁྱེད་གཉིས་ཀྱི་བསམ་པ་འགྲུབ་ཅིང་སངས་རྒྱས་ཀྱི་བསྟན་པ་མཐའ་དག་སྲུང་བའི་སྔགས་འཆང་ནུས་པ་ཅན་ཞིག་ཏུ་སྐྱེ་བར་ཤོག་ཅིག་ཅེས་སྨོན་ལམ་བཏབ་བོ། །  དེ་འོག་བྱ་རྫིའི་བུའི་སྨོན་ལམ་ནི།  མའི་མཆོད་རྟེན་ལ་བུམ་པ་བཏགས་པའི་ཕན་ཡོན་གྱིས།  ཕུ་བོ་ཁྱེད་གསུམ་འཁྱག་པ་འཁྱག་ཡུལ་གྱི་མཐའ་འཁོབ་ཏུ།  གཅིག་གིས་སངས་རྒྱས་ཀྱི་བསྟན་པ་འཛུགས།  གཅིག་གིས་འཛིན།   གཅིག་གིས་སྲུང་བའི་དུས་སུ།ཁྱེད་རྣམས་འཁྲུངས་ཡུལ་གཅིག་ཏུ་འོང་བའི་ངེས་པ་མེད་པས།  བདག་ནི་ཁྱེད་རྣམས་མཇལ་འཕྲད་བྱེད་པའི་འཕྲིན་བློན་གཅིག་ཏུ་སྐྱེ་བར་ཤོག་ཅིག་ཅེས་སྨོན་ལམ་བཏབ་བོ།།
         དེའི་ཚེ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མགྲིན་གཅིག་དང་དབྱངས་གཅིག་ཏུ།   ཀྱེེ་རིགས་ཀྱི་བུ་སྐལ་བ་མཆོག་དང་ལྡན་པ་ཁྱེད་རྣམས་ཀྱིས་སྨོན་ལམ་རྒྱ་ཆེན་པོ་བཏབ་པ་ནི་ལེགས་སོ་ལེགས་སོ།།   སངས་རྒྱས་ཐམས་ཅད་ཀྱིས་ཀྱང་རྗེས་སུ་ཡི་རང་ངོ་།།   འདི་ལྟ་བུའི་བསོད་ནམས་ཀྱི་ཕུང་པོའི་ཚད་ནི།  དུས་གསུམ་གྱི་སངས་རྒྱས་ཐམས་ཅད་ཀྱིས་ཀྱང་བགྲང་བར་མི་ནུས་སོ་ཞེས་བཀའ་སྩལ་ཏེ།   ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་འོད་དང་འོད་ཟེར་གྱི་གོང་བུ་གཅིག་ཏུ་གྱུར་པ། མཆོད་རྟེན་ཆེན་པོ་འདི་ཉིད་ལ་ཐིམ་པས།   མཆོད་རྟེན་གྱི་མཚན་ཡང་སངས་རྒྱས་ཐམས་ཅད་འདུས་པའི་པའི་མཆོད་རྟེན་དུ་གྲགས་སོ།།  དེའི་ཚེ་རྟ་རྫིའི་བུའི་རྩེ་ཆུང་(འཇིང་པའི་དོན)ལ་སྦྲང་བུ་ཏྲེ་མ་གཅིག་གིས་འཇིབས་པས་མ་བཟོད་དེ།  ལག་པས་ཤད་ཤད་བྱས་པས་སྦྲང་བུ་ཤི་བའི་རོ་གཅིག་བྱུང་བས།  སྙིང་རྗེ་དཔག་ཏུ་མེད་པ་སྐྱེས་ནས་སྨོན་ལམ་བཏབ་པ་ནི། བདག་འཁྱག་པ་འཁྱག་ཡུལ་གྱི་མཐའ་འཁོབ་ཏུ་ཆོས་སྐྱོང་བའི་རྒྱལ་པོར་སྐྱེས་པའི་དུས་སུ། སྦྲང་བུ་འདི་ཉིད་སྲས་སུ་སྐྱེས་ཏེ་ཆོས་ལ་སྤྱོད་པར་ཤོག་ཅིག་ཅེས་སྨོན་ལམ་བཏབ་བོ།།  བོང་བུ་དེའི་བསམ་པ་ལ་ང་ལ་ཡང་སྨོན་ལམ་གཅིག་འདེབས་ཏེ་འོང་བསམ་པ་ལ།  སྨོན་ལམ་ཅི་ཡང་འདེབས་པ་མ་བྱུང་བས།   ཁོ་ཁྲོས་ནས་འཁྱག་པ་འཁྱག་ཡུལ་གྱི་མཐའ་འཁོབ་ཏུ།  ཁོ་ཆོས་སྐྱོང་བའི་རྒྱལ་པོར་སྐྱེས་ནས་སངས་རྒྱས་ཀྱི་བསྟན་པ་འཛུགས་པའི་དུས་སུ།  དེའི་ཚེ་ཆོས་ལ་མི་དགའ་བའི་བཀའི་བློན་པོ་གཅིག་ཏུ་སྐྱེས་ནས་རྒྱལ་པོ་ཁོ་ལ་ཅི་ཡང་བྱ་དབང་མེད་པ་གཅིག་ཏུ་སྐྱེ་བར་ཤོག་ཅིག་ཅེས་བྱས་སོ།།   དེ་སྐད་བརྗོད་པ་གཡོག་པོས་ཐོས་པས་ཁོ་དེ་ལྟ་བུའི་བདུད་བློན་ལ་སྐྱེས་ནས་ཆོས་ལ་བར་ཆད་བྱེད་པའི་དུས་སུ།  དེ་ཉིད་ཀྱི་གཡོ་ཐབས་དང་ནུས་པ་ཐམས་ཅད་ཟློག་ཅིང་འཇོམས་པར་བྱེད་པའི་ཆོས་བློན་ཐབས་ལ་མཁས་པ་གཅིག་ཏུ་བདག་སྐྱེ་བར་ཤོག་ཅིག་ཅེས་སྨོན་ལམ་བཏབ་བོ།།    ཡང་གླང་པོ་ཆེ་དེའི་བསམ་པ་ལའང་།  ང་ལ་ཡང་སྨོན་ལམ་གཅིག་འདེབས་ཏེ་འོང་བསམ་པ་ལ།   སྨོན་ལམ་ཅི་ཡང་འདེབས་པ་མ་བྱུང་བས།   ཁོ་ཁྲོས་ནས་ངས་ས་རྡོ་འདི་ཙམ་སྐྱེལ་པས་སྨོན་ལམ་ཅི་ཡང་མི་འདེབས་ན།  ཁོང་རྣམས་ཀྱིས་བཙུགས་པའི་བསྟན་པ་དེ་རྒྱལ་པོ་དེའི་བུའམ་ཚ་བོར་སྐྱེས་ཏེ་ངས་བསྣུབ་པར་ཤོག་ཅིག་ཅེས་བྱས་སོ།།  དེ་སྐད་བརྗོད་པ་བྱ་རོག་གཅིག་གིས་ཚོར་བས་ལྷག་པའི་བསམ་པ་སྐྱེས་ཏེ།  ཁོ་དེ་ལྟ་བུའི་རྒྱལ་པོར་སྐྱེས་ནས་སངས་རྒྱས་ཀྱི་བསྟན་པ་བསྣུབས་པའི་དུས་སུ། བདག་བྱང་ཆུབ་སེམས་དཔའ་ཆེན་པོ་ཞིག་ཏུ་སྐྱེས་ནས་བདུད་ཀྱི་རྒྱལ་པོ་འདི་ཉིད་གསོད་པར་ཤོག་ཅིག་ཅེས་སྨོན་ལམ་བཏབ་པའོ།།  དེའི་ཚེ་བྲམ་ཟེའི་ཁྱིའུ་ཚངས་སྤྱོད་ཅན་ཤ་སེར་སོང་བ་གཉིས་ཀྱིས་ཡང་སྨོན་ལམ་བཏབ་པ་ནི།  ཁྱེད་རྣམས་འཁྱག་པ་འཁྱག་ཡུལ་གྱི་མཐའ་འཁོབ་ཏུ།  སངས་རྒྱས་ཀྱི་བསྟན་པ་རིན་པོ་ཆེ་འཛུགས་པའི་དུས་སུ།  བདག་གཉིས་ནི་དམ་པའི་ཆོས་རྣམས་མ་ལུས་པ་སྒྱུར་བར་བྱེད་པའི་ལོ་ཙཱ་བ་རེ་རེར་སྐྱེ་བར་ཤོག་ཅིག་ཅེས་སྨོན་ལམ་བཏབ་བོ།།  ཡང་དེའི་ཚེ་རྒྱལ་རིགས་ཀྱི་བུ་མོ་ཤེས་རབ་ཅན་གཉིས་ཀྱིས་ཀྱང་སྨོན་ལམ་བཏབ་སྟེ།  འཁྱག་པ་འཁྱག་ཡུལ་གྱི་མཐའ་འཁོབ་ཏུ།  ཁྱེད་རྣམས་སངས་རྒྱས་ཀྱི་བསྟན་པ་རིན་པོ་ཆེ་འཛུགས་པའི་དུས་སུ།   དམ་པའི་ཆོས་རྣམས་ཡི་གེར་འབྲི་བའི་ཡིག་རིགས་ཐམས་བཅད་ལ་མཁས་པའི་མཆོག་ཏུ་གྱུར་བ་རེ་རེར་སྐྱེས་ནས།  བཀའ་དང་བསྟན་བཅོས་མ་ལུས་པ་ཡི་གེར་འབྲི་བར་ཤོག་ཅེས་སྨོན་ལམ་བཏབ་བོ།།  གཞན་ཡང་དེའི་ཚེ་བསྟན་པ་དང་སེམས་ཅན་ལ་ཕན་པའི་སྨོན་ལམ་བཏབ་པ་ནི་དཔག་ཏུ་མེད་ཅིང་གྲངས་ལས་འདས་སོ། །
         དེ་ལྟར་བཏབ་པའི་སྨོན་ལམ་རྣམས་མ་ལུས་པར་འགྲུབ་པ་ནི།  དེའི་ཚེ་དེའི་དུས་ཀྱི་བུ་ཆེ་བ་རྟ་རྫིའི་བུས་རྒྱལ་པོར་སྐྱེ་བར་སྨོན་ལམ་བཏབ་པ་ནི། ད་ལྟའི་ཆོས་སྐྱོང་རྒྱལ་པོ་ཁྲི་སྲོང་ལྡེ་བཙན་ལགས་སོ།།  དེའི་ཚེ་དེའི་དུས་ཀྱི་ཕག་རྫིའི་བུས་མཁན་པོར་སྐྱེ་བའི་སྨོན་ལམ་བཏབ་པ་ནི།   ད་ལྟའི་མཁན་པོ་བོ་ངྷི་ས་ཏྭ་འདི་ཡིན་ནོ།།   དེའི་ཚེ་དེའི་དུས་ཀྱི་ཁྱི་རྫིའི་བུས་སྔགས་འཆང་དུ་སྐྱེ་བའི་སྨོན་ལམ་བཏབ་པ་ནི། ད་ལྟའི་ཨུ་རྒྱན་གྱི་མཁན་པོ་པདྨ་འབྱུང་གནས་ང་ལགས་སོ།།  དེའི་ཚེ་དེའི་དུས་ཀྱི་བྱ་རྫིའི་བུས་འཕྲིན་བློན་དུ་སྐྱེ་བའི་སྨོན་ལམ་བཏབ་པ་ནི།  ད་ལྟའི་ཡར་ཀླུང་སྦ་ཁྲི་གཞེར་འདི་ཡིན་ནོ།།   དེའི་ཚེ་དེའི་དུས་ཀྱི་སྦྲང་བུ་ཏྲེ་མས་སྲས་སུ་སྐྱེ་བའི་སྨོན་ལམ་བཏབ་པ་ནི།  ད་ལྟའི་རྒྱལ་པོའི་སྲས་མོ་ལྷ་ལྕམ་པདྨ་གསལ་ཚེའི་དུས་བྱས་པ་འདི་ཡིན་ནོ།།  དེའི་ཚེ་དེའི་དུས་ཀྱི་བོང་བུས་སྨོན་ལམ་ལོག་སྟེ་བདུད་བློན་དུ་སྐྱེ་བར་སྨོན་ལམ་བཏབ་པ་ནི།   ད་ལྟའི་བདུད་བློན་མ་ཞང་ཁྲོམ་པ་སྐྱེས་ཞེས་བྱ་བ་འདི་ཡིན་ནོ།།   གཡོག་གིས་བདུད་བློན་འཇོམ་པའི་ཆོས་བློན་དུ་སྐྱེ་བར་སྨོན་ལམ་བཏབ་པ་ནི།   ད་ལྟའི་ཆོས་བློན་འགོས་པདྨ་གུང་བཙན་འདི་ཡིན་ནོ།།  དེའི་ཚེ་དེའི་དུས་ཀྱི་གླང་པོ་ཆེས་སྨོན་ལམ་ལོག་སྟེ་བདུད་ཀྱི་རྒྱལ་པོར་སྐྱེ་ནས་བསྟན་པ་བསྣུབ་པར་སྨོན་ལམ་བཏབ་པ་ནི།  རྒྱལ་པོ་ཁྲོད་ནས་གདུང་རབས་གསུམ་གྱི་དུས་སུ།  བདུད་ཀྱི་རྒྱལ་པོ་གླང་གི་མིང་ཅན་གཅིག་འབྱུང་སྟེ།  དེས་ནི་སངས་རྒྱས་ཀྱི་བསྟན་པ་བསྣུབ་པར་བྱེད་དོ།།  དེའི་ཚེ་དེའི་དུས་ཀྱི་བྱ་རོག་གིས་སེམས་བསྐྱེད་ནས་བདུད་ཀྱི་རྒྱལ་པོ་དེ་ཉིད་གསོད་པར་སྨོན་ལམ་བཏབ་པ་ནི།  ད་ལྟའི་ལྷ་སྲས་མུ་རུག་བཙན་པོ་འདི་ཡིན་ནོ།། མ་འོངས་པའི་དུས་སུ་བདུད་རྒྱལ་གླང་གི་མིང་ཅན་བྱུང་ནས་སངས་རྒྱས་ཀྱི་བསྟན་པ་བསྣུབ་པའི་ཚེ།  བྱང་ཆུབ་སེམས་དཔའ་ལྷ་ལུང་དཔལ་གྱི་རྡོ་རྗེ་ཞེས་བྱ་བར་སྐྱེས་ནས།   བདུད་ཀྱི་རྒྱལ་པོ་འདི་ཉིད་གསོད་པར་འགྱུར་རོ།།  དེའི་ཚེ་དེའི་དུས་ཀྱི་བྲམ་ཟེའི་ཁྱེའུ་གཉིས་ཀྱི་ལོ་ཙཱ་བར་སྐྱེ་བའི་སྨོན་ལམ་བཏབ་པ་ནི།  ད་ལྟའི་སྐ་བ་དཔལ་བརྩེགས་དང་ཅོག་རོ་ཀླུའི་རྒྱལ་མཚན་འདི་ཡིན་ནོ།།  དེའི་ཚེ་དེའི་དུས་ཀྱི་རྒྱལ་རིགས་བུ་མོ་གཉིས་ཀྱིས་དམ་ཆོས་འབྲི་བའི་ཡི་གེ་པར་སྨོན་ལམ་བཏབ་པ་ནི།  ད་ལྟའི་ལྡན་མ་རྩེ་མངས་དང་ལེགས་བྱེད་ཉི་མ་འདི་ཡིན་ནོ།།  ཞེས་བཀའ་སྩལ་པས།  ཆོས་རྒྱལ་ཁྲི་སྲོང་ལྡེ་བཙན་དང་དེར་འདུས་པ་ཐམས་ཅད་ངོ་མཚར་ཞིང་ཡིད་ཆེས་ཏེ།   ཕྱག་དབུ་ལ་ཕོད་བུད་བུད་དུ་བཙལ།  མཆི་མ་ལྷུག་པར་བཏོན་ནས་སླར་ཡང་དེར་འདུས་པ་ཐམས་ཅད་ཀྱིས་བསྟན་པ་དང་སེམས་ཅན་ལ་ཕན་པའི་སྨོན་ལམ་སྟོབས་པོ་ཆེ་མང་པོ་བཏབ་བོ།།  (མཆོད་རྟེན་ཆེན་པོ་བྱ་རུང་ཁ་ཤོར་གྱི་ལོ་རྒྱུས་ལས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་ལུང་བསྟན་ནས་སྨོན་ལམ་བཏབ་ཅིང་གྲུབ་པའི་ལེའུ་གཉིས་པ།)

མཚོ་སྔོན་པོའི་ཟིན་བྲིས་པ་གསེར་ཁུང་བ་རྡོ་རྗེ་རིག་འཛིན་གྱིས་འོས་སྦྱོར་བྱས།