སྟོན་པའི་རྣམ་ཐར་ཚིགས་བཅད་བཅོ་བརྒྱད་མ།

     དང་བོར་བྱང་ཆུབ་མཆོག་ཏུ་སེམས་བསྐྱེད་ཅིང༌།།བར་དུ་གྲངས་མེད་གསུམ་ལ་ཚོགས་གཉིས་བསགས། །མཐའ་མར་རྡོ་རྗེ་གདན་དུ་སངས་རྒྱས་པའི། །སྟོན་པ་ཐུགས་རྗེ་ཅན་ལ་གསོལ་བ་འདེབས།།ཐེག་ཆེན་ལུགས་ལ་འོག་མིན་སྟུག་པོ་རུ།།ངེས་པ་ལྔ་ལྡན་ངོ་བོར་སངས་རྒྱས་ཏེ། །ཆུ་ཟླ་བཞིན་དུ་ཞིང་ཁམས་རབ་འབྱམས་སུ། །མཛད་པ་བཅུ་གཉིས་སྟོན་ལ་གསོལ་བ་འདེབས།།དགའ་ལྡན་གནས་སུ་དམ་པ་ཏོག་དཀར་གྱི།།རྣམ་པར་བྱོན་ཏེ་ཆོས་ཀྱིས་ཚིམ་པར་མཛད། །མི་ཕམ་རྒྱལ་ཚབ་བསྐོས་ཏེ་གཟིགས་པ་ལྔས། །འཛམ་བུ་གླིང་དུ་བྱོན་ལ་གསོལ་བ་འདེབས།།ཟླ་བ་བཞི་བའི་ཡར་ཚེས་བཅོ་ལྔའི་མཚན།།རྒྱལ་ཡུམ་སྒྱུ་འཕྲུལ་ལྷ་མོ་གསོ་སྦྱོང་དུས།།གླང་ཆེན་ཐལ་ཀར་མཆེ་བ་དྲུག་ལྡན་གྱི།།རྣམ་པས་ལྷུམས་སུ་ཞུགས་ལ་གསོལ་བ་འདེབས།།གཉིས་པའི་ཚེས་བཅུར་གློ་གཡས་ནས་བལྟམས་ཚེ།།ས་ཆེན་འདི་ལ་གོམ་པ་བདུན་སྤོས་ནས།།ང་ནི་འཇིག་རྟེན་ཀུན་གྱི་མཆོག་ཡིན་གསུངས། །སྐྱེ་རྒུའི་མགོན་པོ་ཁྱོད་ལ་གསོལ་བ་འདེབས།།གཞོན་ནུ་དུས་སུ་ཡི་གེ་རྩིས་ལ་སོགས།།སྒྱུ་རྩལ་དྲུག་ཅུ་རྩ་བཞིའི་ཕ་རོལ་སོན།།སྟོབས་ཆེན་དྲེགས་ལྡན་ཁེངས་པ་འཕྲོག་མཛད་པའི།།དོན་ཀུན་གྲུབ་པའི་ཞབས་ལ་གསོལ་བ་འདེབས།།རྒྱལ་བོ་ཟས་གཙང་མཆོག་གི་དགོངས་པ་དང༌།།བསྟུན་ནས་འཇིག་རྟེན་མཐུན་པ་སྟོན་པའི་ཕྱིར།།བཙུན་མོ་མཆོག་གྱུར་གྲགས་འཛིན་མ་སོགས། །བཞེས་ནས་ཁབ་དུ་བཞུགས་ལ་གསོལ་བ་འདེབས།།དགུང་ལོ་ཉེར་དགུར་རྒ་ན་འཆི་བ་དང༌།།དགེ་སློང་གཟིགས་ཏེ་བཞི་བའི་ཚེས་བརྒྱད་ལ། །ལྐོག་ཏུ་བྲོས་ནས་མཆོད་རྟེན་རྣམ་དག་དྲུང༌།།རབ་ཏུ་བྱུང་བར་མཛད་ལ་གསོལ་བ་འདེབས།།ཆུ་བོ་ནེ་རན་ཛ་ནའི་འགྲམ་ངོགས་སུ།།སྙོམས་འཇུག་རོལ་ཏེ་ལོ་དྲུག་དཀའ་བ་སྤྱད།།ལེགས་སྐྱེས་མ་ཡིས་འོ་ཐུག་སྦྲང་རྩི་ཅན།།གསོལ་ཏེ་སྐུའི་མདངས་གསོས་ལ་གསོལ་བ་འདེབས།།སོ་ལྔར་རྡོ་རྗེའི་གདན་དུ་བཀྲ་ཤིས་ལས།།བསླངས་པའི་རྩྭ་ཡི་སྟན་དུ་བྱང་ཆུབ་མཆོག །མ་ཐོབ་བར་དུ་གཡོ་བར་མི་བྱེད་ཅེས། །བྱང་ཆུབ་ཤིང་དྲུང་བཞུགས་ལ་གསོལ་བ་འདེབས།།བདུད་སྡེའི་མཚོན་དང་མཛེས་མའི་བསླུ་བྲིད་ཀྱིས།།བྱང་ཆུབ་སྒྲུབ་པའི་བར་ཆད་བྱས་ནའང༌།།གཡོ་མེད་ས་ཡི་ལྷ་མོས་དབང་མཛད་ཚེ། །འདོད་ལྷའི་སྤོབས་པ་བཅོམ་ལ་གསོལ་བ་འདེབས།།དགུང་ལོ་སོ་ལྔའི་ཟླ་བ་བཞི་བ་ཡི།།བཅོ་ལྔའི་ཐུན་དྲུག་ཐ་མར་སངས་རྒྱས་ཏེ། །བདུན་ཕྲག་བདུན་ལ་ཐུགས་ལས་ཆུང་ངུ་ཡིས། །ཀུན་ཏུ་ལྗོངས་རྒྱུ་མཛད་ལ་གསོལ་བ་འདེབས།།འཇིག་རྟེན་ལྷ་ཆེན་ཚངས་པ་ལ་སོགས་པས།།གསེར་གྱི་ཆོས་འཁོར་ཕུལ་ཏེ་བསྐུལ་བ་ལས། །ཝ་ར་ན་སིར་དྲུག་པའི་ཚེས་བཞི་ལ། །བདེན་བཞིའི་ཆོས་འཁོར་བསྐོར་ལ་གསོལ་བ་འདེབས།།མ་ཡི་སྐྱེ་བར་སྨིན་ཕྱིར་སུམ་རྩེན་དུ།།དབྱར་གནས་མཛད་དེ་སྐལ་ལྡན་སྨིན་པར་མཛད། །དགུ་བའི་ཉེར་གཉིས་སུམ་ཅུ་རྩ་གསུམ་ནས། །འཇིག་རྟེན་འདི་རུ་བབས་པར་གསོལ་བ་འདེབས།།མུ་སྟེགས་སྟོན་པ་དྲུག་གི་ཕྲག་དོག་གིས།།ཆོ་འཕྲུལ་འགྲན་པར་གསོལ་བ་བཏབ་པ་བཞིན། །ཧོར་ཟླ་གཉིས་པའི་དཀར་ཕྱོགས་དུས་ནི་ཆར། །ངོ་མཚར་ཆོ་འཕྲུལ་བསྟན་ལ་གསོལ་བ་འདེབས།།བྱ་རྒོད་ཕུང་བོར་ཤེར་ཕྱིན་མདོ་སྡེ་དང༌།།ཕྱི་ལོར་ལྷོ་ཕྱོགས་འབྲས་སྤུངས་གསང་སྔགས་གསུངས། །ཡངས་པ་ཅན་སོགས་ལེགས་ཕྱེའི་ཆོས་འཁོར་གྱིས།།གདུལ་བྱ་སྨིན་པར་མཛད་ལ་གསོལ་བ་འདེབས། །བརྒྱད་ཅུའི་དཔྱིད་ཐའི་བཅོ་ལྔར་ཀུན་ཏུ་རྒྱུ།།རབ་བཟང་འདུལ་ནས་གདུལ་བྱ་མི་རྟག་པར། །བསྐུལ་ཕྱིར་དགའ་རབ་དབང་ཕྱུག་འདུན་པ་བཞིན། །མྱ་ངན་འདའ་ཚུལ་བསྟན་ལ་གསོལ་བ་འདེབས།།དེ་ནས་ཉན་ཐོས་ཆེན་པོ་འོད་སྲུངས་དང༌།།ཀུན་དགའ་བོ་སོགས་བསྟན་པའི་གཏད་རབས་བདུན། །རིམ་པར་བྱོན་ནས་བཤད་སྒྲུབ་བསྟན་པ་མཆོག། རིམ་བཞིན་སྐྱོང་བར་མཛད་པར་གསོལ་བ་འདེབས།།དེ་བཞིན་གཤེགས་པ་ཁྱེད་སྐུ་ཇི་འདྲ་དང།།འཁོར་དང་སྐུ་ཚེ་ཚད་དང་ཞིང་ཁམས་དང༌། ཁྱེད་ཀྱི་མཚན་མཆོག་བཟང་བོ་ཇི་འདྲ་བར། །དེ་འདྲ་ཁོ་ནར་བདག་སོགས་འགྱུར་བར་ཤོག།