ངོས་དང་པོ > མི་སྣ། > སློབ་གསོ་སྨྲ་བ། > ༄༅།།དགེ་རྒན་ཆེན་མོ་ཚེ་དབང་ལྷ་མོའི་ངོ་སྤྲོད་མདོར་བསྡུས།

༄༅།།དགེ་རྒན་ཆེན་མོ་ཚེ་དབང་ལྷ་མོའི་ངོ་སྤྲོད་མདོར་བསྡུས།

རྩོམ་པ་པོ།：མི་གསལ། ཡོང་ཁུངས།：གངས་ལྗོངས་ཉི་གཞོན། དུས་ཚོད།：2020-06-19 09:14:57 ཀློག་གྲངས།：

ཚེ་དབང་ལྷ་མོ་ནི་བོད་ལྗོངས་ཉིང་ཁྲི་ས་ཁུལ་གྱི་རྫ་ཡུལ་རྫོང་གི་མི་ཡིན་ཞིང་། ཀྲུང་དབྱང་མི་རིགས་སློབ་ཆེན་གྱི་བོད་ཀྱི་བརྡ་སྤྲོད་རིག་པའི་ཆེད་སྦྱོང་གི་འབུམ་རམས་པའི་མཛུབ་སྟོན་དགེ་རྒན་དང་ཁོང་ནི་བོད་རིགས་བུད་མེད་ཁྲོད་ཀྱི་འབུམ་རམས་པའི་མཛུབ་སྟོན་དགེ་རྒན་ཐོག་མ་ཡིན། སྐད་བརྡ་རིག་པའི་རྣམ་བཤད་སོགས་བརྩམས་དེབ་དྲུག་བརྩམས་པ་དང་། བོད་ཡིག་དུས་དེབ་ཁག་ཏུ་སྔ་ཕྱིར་དཔྱད་རྩོམ20ལྷག་སྤེལ། རྒྱལ་ཁབ་སློབ་གསོ་པུའུ་བོད་ཀྱི་སྐད་ཡིག་རྒྱུ་ཆའི་བང་མཛོད་འཛུགས་རྒྱུའི་ལས་གཞི་ལས་ཡན་ལག་ལས་གཞིའི་གཙོ་འགན་ཁུར་བ་དང་། རྒྱལ་ཁབ་མི་རིགས་དོན་གཅོད་ཁང་གི་སློབ་འཁྲིད་བཅོས་བསྒྱུར་ལས་གཞི་ཁག་བཞི་ལྷག་གི་གཙོ་འགན་ཁུར།

1982ལོར་བོད་ཀྱི་མཁས་དབང་དུང་དཀར་བློ་བཟང་འཕྲིན་ལས་དང་། ཉན་ཤུལ་མཁྱེན་རབ་འོད་གསལ། སྐལ་བཟང་འགྱུར་མེད་སོགས་དང་ལྷན་སྒྲོན་འདྲ་པར།

1972ལོར་ལོ་ན་བཅུ་གསུམ་ལས་མེད་པའི་བུ་མོ་ཆུང་ཆུང་ཞིག་རང་གི་ཕ་ས་ཕ་ཡུལ་དང་ཁ་བྲལ་ནས་ནང་ལོགས་ཀྱི་ཞཱན་དབྱང་གྲོང་ཁྱེར་དུ་ཆགས་པའི་བོད་ལྗོངས་མི་རིགས་སློབ་གླིང་གི་སྟ་གོན་འཛིན་གྲྭ་དྲུག་པའི་ནང་ལ་ཞུགས་ནས་སློབ་གཉེར་གྱི་སྐལ་བ་བཟང་པོ་ཞིག་བྱུང་ལ། འབད་བརྩོན་ལྷོད་མེད་ཀྱིས་གྲུབ་འབྲས་གཡུར་དུ་ཟ་བ་ཞིག་བླངས་ཏེ1976ལོར་ཀྲུང་དབྱང་མི་རིགས་སློབ་ཆེན་དུ་རྒྱུགས་འཕྲོད།
1980ལོར་ཚེ་དབང་ལྷ་མོ་ཀྲུང་དབྱང་མི་རིགས་སློབ་ཆེན་ནས་སློབ་མཐར་ཕྱིན་མ་ཐག་སློབ་གྲྭ་དེའི་དགེ་རྒན་དུ་བསྐོ་བཞག་བྱས།

1994ལོར་པེ་ཅིང་མི་རིགས་རིག་གནས་ཕོ་བྲང་དུ་ང་ཕོད་ངག་དབང་འཇིགས་མེད་དང་མཉམ་དུ་བསྐྱོན་པའི་འདྲ་པར།

དགེ་རྒན་ཚེ་དབང་ལྷ་མོས་བོད་རིགས་གཞོན་སྐྱེས་སློབ་མ་རྣམས་ལ་སུམ་རྟགས་དང་། དེང་རབས་སྐད་བརྡ་རིག་པ། ཡུལ་སྐད་རིག་པ་སོགས་སློབ་གཉེར་གནང་ཞིང་། དུས་མཚུངས་སུ་རིག་གཞུང་ཞིབ་འཇུག་གི་ལས་ལ་ཞུགས་ནས《ལོ་ཐོའི་རྣམ་བཤད》དང། 《བརྡ་སྤྲོད་རིག་པའི་རྣམ་བཤད་འཕྲུལ་གྱི་མེ་ལོང》《བརྡ་སྤྲོད་རིག་པའི་སྤྱི་བཤད》《སློབ་གྲྭ་ཆེན་མོའི་སུམ་རྟགས་སློབ་དེབ》《བོད་ཀྱི་བརྡ་སྤྲོད་རིག་པའི་མཐའ་དཔྱད་སེང་གེའི་ང་རོ》ཞེས་པ་སོགས་རིག་གཞུང་ཆེད་རྩོམ་དྲུག་ཙམ་དང་། གཞན་ཡང《བོད་ཀྱི་ཡིག་གཟུགས་བྱུང་འཕེལ་སྐོར་ལ་དཔྱད་པ》དང། 《རྟགས་ཀྱི་འཇུག་པའི་དཀའ་གནད་ལ་དཔྱད་པ》《སློབ་གྲྭ་ཆེན་མོའི་སུམ་རྟགས་སློབ་ཁྲིད་བྱེད་ཐབས་སྐོར་ལ་དཔྱད་པ》སོགས་རིག་གཞུང་དཔྱད་རྩོམ་ཉི་ཤུ་ལྷག་དུས་དེབ་གྲགས་ཅན་ཁག་ལ་འགྲེམ་སྤེལ་བྱས་ནས་གྲུབ་འབྲས་གཡུར་དུ་ཟ་བ་བླངས་པས། 2009ལོར་དགེ་རྒན་ཆེན་མོ་ཞེས་པའི་ལས་གནས་དང་མཚན་སྙན་ཐོབ།

ཨ་རིའི་ཇོ་ཅི་མེ་སིན་སློབ་ཆེན་དུ་སློབ་སྦྱོང་བྱེད་སྐབས་དགེ་སློབ་འགའ་ཡི་མཉམ་པར།

2013ལོ་ལ་དགེ་རྒན་ཆེན་མོ་ཚེ་དབང་ལྷ་མོ་ལ་བོད་རིགས་བུད་མེད་ཁྲོད་ནས་འབུམ་རམས་པའི་མཛུབ་སྟོན་དགེ་རྒན་ཐོག་མ་ཞེས་པའི་མཚན་སྙན་འདི་ཐོབ་པས། གངས་ཅན་སློབ་གསོའི་ལས་དོན་གྱི་ལམ་བུའི་ཐོག་ནས་བུད་མེད་ཀྱི་འབུམ་རམས་པའི་མཛུབ་སྟོན་དགེ་རྒན་མེད་པའི་ལོ་རྒྱུས་ཡོངས་སུ་མཇུག་སྒྲིལ།
གང་ལྟར། དགེ་རྒན་ཆེན་མོ་ཚེ་ལྷ་དབང་ལྷ་མོ་ནི་འདི་ལྟར་ལམ་ལ་ཆས་ཤིང་། ཁོང་གིས་ཡུམ་ཆེན་ཞིག་ལ་མངའ་འོས་པའི་བླ་མེད་ཀྱི་བྱམས་བརྩེ་དང་ཁྱད་འཕགས་ཀྱི་འཇོན་ཐང་ལ་བརྟེན་ནས་སྔར་བཞིན་གངས་རིའི་བུ་ཕྲུག་སྐྱོང་བའི་ལས་ལ་འབད་བརྩོན་གནང་བར་མ་ཟད། ཁྱད་པར་དུ་རྒྱལ་ཁབ་ཕྱི་ནང་གི་རིག་གཞུང་ཚོགས་འདུ་ལ་ཞུགས་ནས་གངས་ཅན་གཙུག་ལག་རིག་གནས་ཀྱི་ངོ་མཚར་ཕྱི་ལ་ངོམ་ཞིང་། མི་ལོ་སྟོང་ཕྲག་དུ་མའི་རིང་ལ་གུས་གུས་ཞུམ་ཞུམ་གྱི་ཚུལ་དུ་ལུས་པའི་བོད་རིགས་བུད་མེད་རྣམས་ལ་མི་ཚེའི་རིན་ཐང་མངོན་འགྱུར་བྱེད་པའི་ཁ་ཕྱོགས་ཤིག་དང་ཡིད་ཆེས་ཤིག་བསྩལ་བ་ཡིན་པས། ང་ཚོས་ཀྱང་འདི་ནས་ཁོང་གི་མཛད་འཕྲིན་ཐམས་ཅད་གོང་ནས་གོང་དུ་འཕེལ་བ་དང་། ཁྱད་པར་དུ་མི་རིགས་ཀྱི་ཡུམ་ཆེན་དེ་ལས་མང་པོ་ཞིག་གསོ་སྐྱོང་ཐུབ་པའི་སྨོན་འདུན་སྙིང་ནས་ཞུ།

འབྲེལ་ཡོད་འོས་སྦྱོར།