འབྲོང་ཕྲུག་གི་ལྷུག་རྩོམ་ཁག་གཉིས།

       ངེད་ཚང་གི་དབྱར་ས་ནི་བཅུད་པར་མཐོན་པོ་བཅུ་གསུམ་གྱིས་ལག་པའི་ནང་ལ་ལག་པ་བཞག་འདྲའི་དཔུང་བའི་ནང་དུ་དཔུང་བ་སྦྲེལ་འདྲའི་རི་ཕྲེང་ཕྲེད་དུ་བསྟར་བའི་ནང་ལུང་དུ་ཡོད། དེ་ལ་ལོ་རྒྱུས་དང་ས་ཁམས་གང་གི་ཆ་ནས་ཀྱང་ངག་རྒྱུན་དང་དཔང་རྟགས་གང་མང་ཞིག་གིས་ལ་བཤད་ལུང་བཤད་བྱེད་རྒྱུ་མང་དུ་འདུག་མོད། གལ་ཆེ་བོ་ནི་རི་མཐོ་ས་དང་འཕྲང་དོག་ས། འགག་བཙན་ས་ཡིན་པའི་བཅུད་པར་གྱི་རི་དང་ལུང་བ། ནགས་ཚལ་དང་གཙང་བོ་དག་གིས་ང་རང་ནར་སོན་གྱི་ལོ་ཟླའི་ཁྲོད་དུ་མིག་གིས་ལྟ་ས་དང་རྣ་བས་ཉན་ས། སེམས་ཀྱིས་དྲན་ས་ཡིན་པའི་འདམ་བག་ཤར་བར་མ་ཞེས་པའི་ལུང་བ་དེ་ད་ལྟ་ད་དུང་ཡང་དྲན་པར་ཝ་ལེར་འཁོར་བར་བྱེད། ཞེ་ལ་ཐོགས་པའི་ཕ་ཡུལ་དང་དྲན་པར་འཁོར་བའི་ཕ་ས་ནི་མི་ཞིག་ནར་སོན་གྱི་གོ་རིམ་ཁྲོད་དུ་དེ་འདྲའི་བརྗེད་དཀའ་ཞིང་དྲན་སླ་བ་ལ་ཨང་།
       ངེད་ཚང་གི་དབྱར་ས་ནི་འདམ་བག་ཤར་བར་མ་ཞེས་པ་དེ་ཡིན། དབྱར་ས་གླེང་དགོས་ཚེ་མི་གླེང་ཐུ་མེད་དུ་ཡོད་པ་གཞན་ཞིག་ནི་འབྲོག་པའི་རུ་འགེལ་སྐྱས་འདེད་ཀྱི་ལས་ཀ་དེ་རེད། བདག་གི་དྲན་པར་ཟིན་དུས་ནས་བཟུང་། ངེད་ཚང་ལ་རྟ་རག་ཕྲུག་ཅེས་སྤུ་མདོག་སེར་སྐྱ་གཟུགས་ཐུང་ཞིག་ཡོད། བདག་དང་ནུ་བོ་ཆེ་བ་གཉིས་ཀྱིས་རྟ་རག་ཕྲུག་ལ་འཕོངས་བརྒྱབ་ནས་ལུག་འདེད་པ་དང་། ནུ་བོ་ཆུང་བ་དང་སྲིང་མོ་གཉིས་ནི་ཁལ་མ་གཡུང་མོ་ཞིག་གི་རྒྱབ་ལ་གཡས་གཡོན་དུ་བཀལ་བའི་སླེ་བོ་རུ་བཞག་སྟེ་སྐྱས་རྗེས་སུ་འབྲངས་ཡོད། ཨ་ཕ་དང་ཨ་མ་ནི་རྐང་ཐང་དུ་སྐྱས་དང་འདྲེས་པའི་ནོར་ཁྱུ་འདེད་མཁན་ཡིན། ཉིན་ལམ་ཡིན་པའི་སྐྱས་ལམ་རིང་མོ་དེས་ཉི་ཤར་གྱི་སྔ་གཞུག་རྩད་དེ་འབའ་ལུ་གུ་ཐང་ཞེས་པའི་ཁོད་ཡངས་པའི་ཐང་ཆེན་དེ་ནས་ལམ་ལ་ཆས་ན། ངག་རྒྱུན་དུ་ང་ཚོའི་སྡེ་མིང་ལ་རྟ་མང་ཞེས་སུ་ཐོགས་རྐྱེན་དུ་བཤད་པའི་རྟ་ཁྱུ་ཆུ་ལ་བཤར་སའི་རྐང་ལམ་རིང་མོ་དེར་ཞུགས་དགོས། ཁུ་ལུང་གཡག་སྙིང་ཞེས་པའི་གནས་རི་འགངས་ཆེན་ཞིག་གི་ཁིས་ན་ཡོད་པའི་ཉག་ལམ་ཕྲ་མོ་ཞིག་བརྒལ་དགོས། བཅུད་པར་གསེར་སྨུག་རྫོང་དུ་སྦྲེལ་བའི་འབྲི་གོང་བར་མའི་བྲག་འཕྲང་བཙན་པོ་ཞིག་བརྒྱུད་དགོས། ལམ་བར་དུ་ཁལ་མ་རྒོད་པོ་རེས་རྒྱབ་ཀྱི་ཁུར་བོ་ལྕི་མོ་ལ་མི་འདོད་པའི་རྣམ་འགྱུར་དང་བཅས་ས་ལྡིང་གནམ་ལྡིང་གིས་ཁལ་དུ་བཀལ་བའི་ཅ་ལག་དག་བཅོམ་ཆག་སྐྱ་ཉིལ་དུ་གཏོང་ཐེངས་ཀྱང་ཡོད་དེ། ཐེངས་ཤིག་ལ། ལུག་ཁྱུ་ལམ་འགྲམ་གྱི་རྩི་སྤུངས་ནས་སད་པའི་རི་བོང་ཞིག་ལ་འདྲོགས་པ་དང་རྟ་རག་ཕྲུག་ལུག་ཁྱུར་འདྲོགས་ནས་ངེད་ཕུ་ནུ་གཉིས་རྟ་གོང་ནས་ཐང་ལ་གཡུགས་སོང་། གླིང་སྒྲུང་དུ་གན་རྐྱལ་ལ་ནམ་ལངས་འདྲ་གཅིག་བརྡབས་པ་དང་ཁ་སྦུབ་ཏུ་ས་རུབ་འདྲ་ཞིག་བརྡབས་སུ་བཤད་པའི་ཤི་གསོན་གྱི་བར་གླགས་དེར། བདག་ནི་ལུས་ཀྱི་ན་ཟུག་དང་སེམས་ཀྱི་ཕམ་གདུང་གིས་མིག་ཆུ་དབང་མེད་དུ་ཤོར་ནའང་། ནུ་བོ་ནི་དེ་མུར་ཐང་ནས་ཡར་ལངས་ཤིང་གྱོལ་མ་ལྡིང་གིས་བརྒྱུགས་སོང་ནས་ཐག་རིང་ན་སྣ་འདྲོག་བྱེད་ཀྱིན་རྟ་རག་ཕྲུག་གི་མཐུར་མདའ་ནས་བཟུང་སོང་། རྗེས་ཀྱི་ལོ་ཟླའི་ཁྲོད་དུ་ནུ་བོ་ནི་ཕྱུགས་རྫི་དཔེ་མེད་ཅིག་ཏུ་གྱུར་པའི་རྟགས་དང་རྟེན་འབྲེལ་ཡང་དེ་ལྟར་འགྲིག་པ་ཡིན་མིན་ཅི་ཆ། ལམ་ཚེགས་དང་ལུས་ཚེགས་ཀྱིས་མནར་བའི་འགྲུལ་བཞུད་རིང་མོ་དེ་ཕྱི་དྲོའི་ཉི་མ་ནུབ་ཁ་ཙམ་ལ་མཇུག་རྫོགས་ཤིང་། མཚེར་ས་གསར་པར་སྦྲ་ཕུབ་དང་ཐབ་ཀ་ལས་ནས་འོ་ཇ་གསར་སྐོལ་འགྲུབ་དུས་སུ། ཉི་མ་ནི་ནུབ་ཕྱོགས་ཀྱི་བཅུད་པར་མཐོན་པོ་བཅུ་གསུམ་གྱི་རི་རྩེ་གང་རུང་ཞིག་ནས་ནུབ་འགྲོ་ལ། དབྱར་གཞུང་གི་གཡའ་དག་པའི་ནམ་མཁའ་རུ་སྐར་མའི་ཚོགས་ཀྱི་ཞལ་འཛུམ་ནི་མིག་ལ་མཛེས་ཤིང་ཡིད་ལ་སིམ་པ་ཞིག་ཡོད།
       བདག་གིས་ངེས་པར་གླེང་དགོས་པ་ཞིག་ནི། འབྲོག་པའི་རུ་འགེལ་བ་ནི་དུས་ཚོད་ངེས་ཅན་དང་ས་གནས་ངེས་ཅན་དུ་བྱེད་པ་ལས་རང་འདོད་ཅི་འདོད་ལྟར་ཡོང་བ་ཞིག་མིན་པར། དེ་ནི་དུས་ཚིགས་བཞིའི་རྩྭ་ཆུའི་དགོས་མཁོ་ལྟར་ཐག་གིས་གཅོད་པ་ཞིག་ཡིན་པས། དཔྱིད་ཀྱི་ཆར་བ་དང་དབྱར་གྱི་ཚད་པ། སྟོན་གྱི་རླུང་བུ་དང་དགུན་གྱི་ཁ་བ་གང་དང་ཅི་ལ་འཛེམ་ཆོག་པ་ཞིག་ཀྱང་མིན་ཚོད་འདུག བདག་གི་དྲན་པའི་ཁྲོད་དུ་ཆུ་དང་ཆར་བ།ཙག་དང་ཁ་བའི་ཁྲོད་དུ་རུ་འགེལ་བ་དང་སྐྱས་དེད་པའི་ལོ་རྒྱུས་མང་དུ་ཡོད། བདག་གི་དྲན་པའི་ཁྲོད་དུ་རུ་འགེལ་བའི་བར་གླགས་ནས་ལུས་པོ་ཆར་གྱིས་བངས་པ་དང་རྐང་ལག་ཙག་གིས་ཕྱིད་པའི་ལོ་རྒྱུས་མང་དུ་ཡོད་མོད། དེ་ནི་བདག་གཅིག་པུ་མ་ཡིན་པའི་འབྲོག་གི་བུ་དང་བུ་མོ་ཡིན་ཡིན་པོ་ཚང་མ་བརྒྱུད་དགོས་པའི་ཉམས་སད་ཐེངས་ཤིག་ཡིན་པས། འབྲོག་པའི་བུ་ལ་ལྕགས་ཀྱི་སྲོག་ཐོགས་དོན་ཡང་དེ་ལ་འབྲེལ་བ་ཨེན་ཙམ་ལོས་ཡོད་བསམ་ཡོང་། སྐབས་ལན་རེར། རུ་བཀལ་ནས་མཚེར་སར་ཐོན་དུས་སུ་དུས་ཚོད་འཕྱི་པོ་ཆགས་ནས་ས་རུབ་ལ་ཉེ་ནའང་། ཁྱིམ་མཚེས་གཡས་གཡོན་གྱི་ཁྱིམ་བདག་མ་དག་གིས་འོ་ཇ་གསལ་སྐོར་ཁྱེར་ཡོང་ནས་སྐོམ་པ་གསོད་ཅིང་། སྦྲ་དང་ཐབ་ཀ་ཕུབ་རོགས་སོགས་ཀྱིས་ཚེགས་ཆེ་ཞིང་ཡུན་རིང་བའི་ལས་ཀ་དེ་དུས་ཡུན་ཐུང་ངུ་ཞིག་གི་ནང་དུ་ཚེགས་མེད་ཀྱིས་འགྲུབ་པས་ན། འབྲོག་པའི་ལས་ཀ་ནི་ཕན་ཚུན་རོགས་རམ་གྱི་ཁྲོད་ནས་མགོ་རྩོམ་ཞིང་ཕན་ཚུན་མཉམ་ལས་ཀྱི་ཁྲོད་ནས་ཡོངས་སུ་འགྲུབ་པ་ཞིག་ཀྱང་ཡིན་འདུག        བདག་གི་དྲན་པའི་ཁྲོད་དུ་ཞག་ལྟར་ཆགས་ཤིང་མར་བཞིན་སིམ་འདུག་པ་ཞིག་ལ། ལོ་རེ་རེའི་ཟླ་ལྔ་པའི་ཟླ་མཇུག་གམ་ཟླ་དྲུག་པའི་ཟླ་མགོ་གང་རུང་དུ་འབྲོག་པའི་བལ་སྟོན་བྱེད་པ་དེ་ཡིན། འབྲོག་པའི་བལ་སྟོན་ནི་ཁྱིམ་ཚང་སུ་ཞིག་གིས་ལུག་བལ་འབྲེག་དུས་སུ། རུ་ཁ་ཁྱིམ་མཚེས་ཀྱི་ལོ་གཞོན་ཕོ་མོ་དག་མ་སྐུལ་དང་བླངས་ཀྱིས་མཉམ་དུ་འཛོམས་ཤིང་། རྒན་པ་བསམ་ཤེས་དག་གི་བཀའ་བཀོད་བཞིན་ཐོག་མར་བྱིས་པ་དག་གིས་ལུག་ར་བར་སྐྱིལ་བ་དང་གསར་བུ་དག་ལུག་ཁྱུར་བརྒྱུགས་ནས་བལ་གང་ཡོད་གང་འཛོམས་ཀྱི་ལུག་འཛིན་པར་བྱེད། ལུག་བཟུང་ཡོང་ནས་འབྲེང་བས་ཕྲེང་ལ་བསྟར་ནས་བཀྱིག་རྗེས་བལ་འབྲེག་མགོ་རྩོམ་པ་ཡིན། བལ་འབྲེག་མཁན་ནི་ལོ་ན་གཞོན་པའི་གསར་བུ་དང་བལ་འབྲེག་ལ་བྱང་བའི་དར་མ་དག་ཡིན་པ་དང་། ཁོ་ཚོས་སྟར་ལ་བཀྱིག་པའི་ལུག་བཅུ་ཁ་བོ་དེ་སུས་སྔོན་ལ་བྲེག་ཚར་མིན་གྱི་སྔ་གཞུག་ལ་འགྲན་བསྡུར་བྱེད་པ་ཡིན་ལ། བུད་མེད་དང་བྱིས་པ་དག་གིས་བྲེགས་ཟིན་པའི་ལུག་བལ་ཕྱོགས་གཅིག་ཏུ་སྤུངས་ནས་བལ་དོས་རྒྱག་པར་གྲ་སྒྲིག་བྱེད། སྤྱིར་བཏང་དུ་ལུག་བལ་ནི་དྲོས་ཇའི་བར་དུ་བྲེགས་ཚར་བར་བྱེད་པ་དང་། ཁྱིམ་བདག་གིས་ཀྱང་ལུག་བཤས་ཏེ་ནང་ལྡུག་པ་དང་ཤ་བཙོ་བའི་ལས་ཀ་བྱས་ནས་དྲོས་ཇར་གྲ་སྒྲིག་བྱེད། ཨ་ཕ་ནི་ལུག་བཤའ་བ་དང་ནང་ལྡུག་པ་ལ་དེ་འདྲ་འཇོན་པོ་ཞིག་མིན་ནའང་། ཨ་མ་ལག་རོགས་སུ་ཡོད་ན་འབྲོག་པའི་ཁ་དཔེ་བཞིན་ཇ་དཀར་ཡོལ་གང་འཐུང་ཡུན་དུ་ཡོད་ཚད་ཚགས་སུ་ཆུད་ཐུབ་པ་ཞིག་ཡོང་། སྤྱིར་འབྲོག་ཁུལ་དུ་ལུག་བཤའ་བའི་ལས་ཀ་དེ་ནི་སྐྱེས་པ་དག་གིས་མ་ཎི་འདོན་པ་དང་ཁོག་འབྱེད་རྒྱུ་དང་། བུད་མེད་དག་གིས་ནང་ལྡུག་རྒྱུ་དང་ཤ་བཙོ་བར་བྱེད་པ་ཡིན། དྲོས་ཇ་འཐུང་རྗེས་བལ་དོས་རྒྱག་པ་ཡིན་ཏེ། དེ་ལ་བུད་མེད་རྣམས་ཀྱིས་ཡུས་ཐག་འཁེལ་བ་དང་བྱིས་པ་དག་གིས་འབྲུག་བཅོ་ཞིང་གསར་བུ་ཚོས་བལ་དོས་རྒྱག་པར་བྱེད།
       དུས་རབས་སྔོན་མའི་ལོ་རབས་བརྒྱད་ཅུ་དང་དགུ་བཅུ་པའི་དུས་སྐབས་དེར། བལ་སྟོན་ཞེས་ཆེ་ཆེ་གྲགས་གྲགས་ཤིག་བཤམས་རྒྱུ་མེད་ནའང་། བལ་འབྲེག་དུས་དང་བལ་དོས་རྒྱག་དུས། དྲོས་ཇ་འཐུང་དུས་གང་ཡིན་ཡང་མི་རྣམས་ཀྱི་གཏམ་དང་ཀུ་རེ་རྒྱུན་ཆད་མེད་པར་ལས་ཀ་ནི་རྩེད་མོ་ཞིག་གི་རྣམ་པར་བསྒྱུར་བ་དེས་ནི་བས་མཐའི་རི་ལུང་རྫ་ཀླུང་དུ་ནོར་ལུག་གི་རྨིག་རྗེས་དང་ལྕི་འདམ་གྱི་ངད་ཁའི་ཁྲོད་མི་ཚེ་སྐྱེལ་བའི་འབྲོག་པའི་འཚོ་བ་ལ་སྔར་མེད་ཀྱི་སྤྲོ་སྣང་ཞིག་ཁྱེར་ཡོང་གིན་ཡོད། ལྷག་པར་དུ་ལུག་བལ་བྲེགས་ཚར་རྗེས། ཁྱིམ་མཚེས་དུ་མས་ཚེགས་བརྒྱབ་སྟེ་མཉམ་དུ་ལུག་བལ་ཁལ་མར་བཀལ་ནས་འཚོང་དུ་སོང་བ་ན། ང་ཚོ་བེའུ་རྫི་བྱིས་པ་རྣམས་དང་ནོར་རྫི་བུ་མོ་ཚོས་རེ་སྒུག་གི་ཉི་མ་མཛུབ་བར་ནས་གསོག་མགོ་རྩོམ། ང་ཚོ་བེའུ་རྫི་རྣམས་ཀྱིས་ཨ་ཕས་ཟས་ཞིམ་པོ་དང་གོས་སོ་མ་ཉོས་ཡོང་བར་རེ་བ་བྱེད་པ་ཡིན་ཏེ། ལོ་གཅིག་གི་ནང་དུ་ལོ་སར་གྱི་འཕྲོ་ནས་ཟས་ཞིམ་པོ་བཟའ་བ་དང་གོས་སོ་མ་གྱོན་པའི་བསོད་ནམས་ནི་དུས་ཚོད་འདི་ཁོ་ན་ཉིད་དོ། །ཡིན་ནའང་། ནོར་རྫི་བུ་མོ་ཚོས་ཅི་ཞིག་ལ་རེ་སྒུག་བྱེད་པ་ནི་ལོ་ནར་མ་སོན་ཞིང་བསམ་མི་ཤེས་པའི་ང་ཚོ་བེའུ་རྫི་དག་ལ་འབྲེལ་བ་ཆེར་མེད་པས། དེ་ལ་བསམ་བློ་བཞི་གསུམ་བཅུ་གཉིས་དང་བློ་རྩེ་ཉི་ཤུ་རྩ་ལྔ་དགོས་པའི་དགོས་པ་མི་འདུག་སྙམ་མོད། ཕྱི་ཉིན་མགོ་དཀྲིས་མདོག་ཆེན་དང་མཛུབ་དཀྲིས་གོང་ཆེན་གོན་པའི་ནོར་རྫི་བུ་མོ་ཚོའི་དགའ་སྣང་དེས་གསང་བ་ཅི་ཞིག་བརྟོལ་འདོད་ཀྱི་འདུན་པ་མེ་རུ་འབར་ནས་འདུག་བཟོད་མེད་པ་ཞིག་སྐྱེས་ཡོང་།
       སྤྱིར་བཏང་དུ་འབྲོག་པའི་རྩྭ་ས་ནི་དུས་ཚིགས་དང་ནམ་ཟླའི་འགྱུར་བ་དང་བསྟུན་ནས་དབྱར་ལ་མཐོ་ཞིང་བསིལ་ཆེ་བའི་རྫ་ལུང་རི་ལུང་དུ་བྱེད་པ་དང་དགུན་ལ་དམའ་ཞིང་དྲོད་ཆེ་བའི་ཐང་གཤོང་དུ་བྱེད་པ་ཡིན། དཔྱིད་དང་སྟོན་ནི་དབྱར་ས་དང་དགུན་སའི་བར་གྱི་ལུང་མདོ་རུ་བྱེད་པ་ཡིན་ལ། སྡོད་ཡུན་ཆེས་རིང་བོ་ཡང་དཔྱིད་ས་དང་སྟོན་ས་ཡིན་པས་གནས་དེ་རུ་འབྲོག་པའི་གཏན་སྡོད་ཁང་བ་ལས་ནས་ལོ་ལོན་དང་བྱིས་པ་དག་རྒྱུན་ཆགས་སུ་ཡོད། བདག་ཀྱང་སློབ་ཆུང་ལོ་རིམ་དང་པོར་ཞུགས་པ་ནས་བཟུང་དབྱར་སར་སོང་བའི་ལོ་རྒྱུས་མང་པོ་མི་འདུག་སྟེ། ངའི་དྲན་ཡིད་ཀྱི་དབྱར་ས་ཡང་ལོ་བརྒྱད་ལ་བུད་པ་ནས་བཟུང་གློག་ཆད་པ་ནང་བཞིན་དྲན་པར་མུན་པ་འཁོར་ཡོང་། ཡིན་ནའང་། བདག་ནི་ཁ་མལ་གཅིག་ནས་སྡོད་ཐུབ་པའི་རིགས་སུ་མི་གཏོགས་པས་ཨ་ཕ་དང་མཉམ་དུ་ལུག་རྫིར་འགྲོ་དགའ་ཆེ་ཞིང་ཨ་མ་དང་ལྷན་ཅིག་ཆུ་ལེན་དུ་འགྲོ་བར་ཡང་དགའ་བོ་ཡོད། དེ་མིན་ཁ་ཡ་ན་ཟླ་ཚོར་འགྲོགས་ནས་རྩེད་འཇོར་རོལ་རྒྱུར་ཡང་མི་དགའ་བ་ག་ལ་སྲིད། ང་ཚོས་བེའུ་ཁྱུ་དབྱར་སའི་ན་ཁུགས་དང་ཆུ་འགྲམ་དུ་བཀྲམ་རྗེས། རྐང་རྗེན་དུ་སྔོ་རྩྭའི་གསེང་དུ་རྒྱུག་ཅིང་ཆུ་ཕྲན་དཀྱིལ་དུ་བརྒལ་བ་བགྲང་གིས་མི་ལང་། དེ་བཞིན་དུ་ན་མཉམ་གྱི་བེའུ་རྫི་གཞན་དང་ལྷན་ཅིག་གད་འོག་ཏུ་ཆར་ལྭས་མགོ་སྦྲ་ཕུབ་ཅིང་སྤོ་ཐོས་ཐབ་ཀ་ལས་པ་དང་། རྡོ་གཡའ་མས་དོ་ཆ་བརྩིགས་ཤིང་རྡེའུ་དཀར་ནག་གིས་ནོར་ལུག་འཚོས་པའི་ལོ་ཟླ་དེ་དག་ནི་ཁ་སང་གི་དོན་དག་ཅིག་དང་འདྲ་ལ། རྗེས་མར་ནོར་རྫི་ནས་ཨ་ཅེ་དང་ཕུ་བོ་དག་གི་ཚབ་ཏུ་ནོར་ཁ་ལེན་དུ་འགྲོ་བ་དང་ཡི་གེ་སྐྱེལ་རོགས་བྱས་པའི་དུས་ཚོད་ཀྱི་གཙང་བོ་དེ་ནི་ད་དུང་ཡང་བདག་གི་ནང་སེམས་སུ་དྭངས་གཙང་གིས་བཞུར་བཞིན་ཡོད། མཛེས་སྡུག་དང་བདེ་སྐྱིད་ནི་དེ་འདྲ་རྙེད་སླ་ཞིང་རྒྱུན་སྲིང་དཀའ་བ་ཞིག་ཀྱང་ཡིན་པ་སུ་ཡིས་ཤེས། །